Jeļā Lukkun Wōn Kwe
Jekdo̧o̧n ta ia eo jej pād ie ilo iaļ in rikaļoor eo ad, mour ko ad renaaj lukkuun in oktak eļan̄n̄e em̧m̧anļo̧k ad meļeļe wōn lukkuun kōj.
Jejjo iiō remootļo̧k leddik eo nejim ekar wōr juon an en̄jake em̧wilaļ kōn mijen eo an. Kōn an mālim, ij kwaļo̧k jidik jān ta eo ekar je tok n̄an kōm wiik jab eo:
“Inne juon membōr ej bar ro̧o̧ltok n̄an Kabun̄ in ekar kajjitōk ippām n̄an m̧ōkajļo̧k n̄an ippān. Ke kōm kar itakļo̧k, kōm kar loe ioon būļoor eo, kanooj m̧ōtato. Kōn kōmejaaļaļ ko, kōm kar jeļā bwe liin ekar jako an jerbal, naaj kar kadiwōjļo̧k jān m̧weo m̧ōn, im bar juon alen, ejjeļo̧k jikin.”
Leddik eo nejim ekar etal wōt: “Ikar kair in etale jeje ko rekwojarjar aō, kajjion̄ pukot juon men—jabdewōt—n̄an jipan̄ liin. Ke ikar pukot juon eoon ejetjet, ikar ļōmņak, ‘Ta in ij kōm̧m̧ane? Menin ejjab ta eo Kraist enaaj kar kōm̧m̧ane. Menin ejjab juon jorrāān eo me imaron̄ ņa mejļan, bōtaab men in ej lukkuun nejin leddik Anij me ej aikuj aō jipan̄.’ Kōn menin ikar kiil jeje ko rekwojarjar aō, kar bukwelōlō turin liin, im jiburi liin ke kōm̧ kar jar ippān doon, m̧ae iien ekar pojak in jelm̧ae jekjek in.”
Ālkin an aenōm̧m̧an kōrā in, leddik eo nejim ekar kōjerbal jeje ko rekwojarjar n̄an kajjion̄ jipan̄ liin meļeļe m̧ool eo an aorōk kwojarjar eo an im katakin e juon iaan m̧ool ko raorōk tata in mour in ad—bwe jej ļaddik im leddik ro jitōnbōro nejin Anij, juon Anij eo me eweppān an en̄jake meanwōd kōn kōj n̄e jej en̄taan im ej pojak n̄an jipan̄ kōj anjo̧ ioon apan̄ ko.
Ej ļōmņak eo me m̧oktata ej kwaļo̧k katak eo me mijenede ro ad rej katakin bwe Anij ej Jemādwōj Ilan̄ em̧man. Aolep m̧ool ko ālkin rej ekkal ioon pedped in meļeļe eo kōn wōn lukkuun kōj.
Susan H. Porter, Būreejtōn eo Eutiej an Būraimere, ear katakin: “N̄e kojeļā im meļeļe jon̄an likieo in iakwe eo n̄an eok āinwōt juon ajri nejin Anij, ej ukōt aolep men. Ej ukōt wāween am̧ en̄jake kōn kwe make n̄e kwoj kōm̧m̧an bōd. Ej ukōt wāween am̧ en̄jake n̄e men ko reppen rej waļo̧k. Ej ukōt wāween am̧ kalimjōk kien ko an Anij. Ej ukōt wāween am kalimjōk ro jet im jon̄an eo ippām n̄an kōm̧m̧an oktak.”
Oktak in ej alikkar ilo ad riit kōn en̄jake eo an Mose ke ekar kōnono ippān Anij jelm̧ae doon. Ilo iien bwebwenato eo, Anij ekar āliji an katakin Moses kōn jolet kwojarjar eo an, ba “Moses, … kwe kwōj nejū m̧aan.” Anij ekar kōmeļeļeik bwe Moses ekar ilo jekjekin Nejin Eaar Make Keotake. Moses ekar alikkar an meļeļe wōn kar e, bwe ekar wōr an jerbal n̄an kōm̧m̧ane, im bwe ewōr juon Jemān Ilan̄ em̧man.
Ālkin en̄jake in, rijum̧ae eo ekar itok n̄an kapo e im kar m̧ōkaj an ān̄inn̄in e kōn ba, “Moses, nejin armej.” Menin ej juon kein jerbal emakijkij im kauwōtata rikapo eo ej kōjerbal n̄an kapo. Ilo an Jemādwōj Ilan̄ jab jokod im ej kakeememej kōj bwe jej ajri ro Nejin, rikapo eo enaaj aolep iien kajjion̄ in kile kōj kōn m̧ōjņo̧ ko ad. Bōtaab Moses ekar katak kadede bwe e ekar ļapļo̧k jān juon “nejin armej.” Ekar ba n̄an Setan: “Wōn kwe? Bwe lo, N̄aij juon m̧aan nejin Anij.” Āinļo̧k wōt, n̄e jej jelm̧ae apan̄ ko an mour wabanban ak n̄e jej en̄jake āinwōt jabdewōt ej kajjion̄ in kile kōj kōn m̧ōjņo̧ ko ad, jej aikuj jutak pen ilo jeļā eo kōn lukkuun wōn kōj. Jej aikuj pukot kile eo jān Anij, ejjab jān jabdewōt. Im ilo ad pukote, jemaron̄ barāinwōt kean̄ ilo peran, “N̄a nejin Anij.”
Ilo juon noko n̄an rūm̧m̧an ded ro aolepān aļ in, Būreejtōn eo ad ejitōnbōro Russell M. Nelson ekar katakin: “Kōn menin wōn kom̧? M̧oktata im eļaptata, kwoj juon nejin Anij, juon ajri in bujen, im juon rikaļooraņ Jisōs Kraist. Innām eaar kallim̧uri kōj, “Ilo am̧ kaorōki m̧ool kein, Jemedwōj Ilan̄ enaaj jipan̄ eok tōpar kōttōpar eo am̧ ejjeļo̧k jem̧ļo̧kin kōn mour indeeo ilo Im̧aan mejen.”
Ejjab jide bwe eoon eo emelij tata kōnono kake, Anij ej kakeememej kōj kōn kadkad eo ad Ippān. Iaan aolep āt ko ko E emaron̄ kar kile kak ilo jar in kwojkwoj eo, E ekar kajjitōk n̄an ņa etan “Anij, Jemān Indeeo”
Ilo ad n̄an lukkuun jeļā wōn kōj, enaaj kajoorļo̧k ad tōmak bwe Jemādwōj Ilan̄ eo em̧m̧an ekar kōpooj juon karōk n̄an kōj n̄an bar ro̧o̧l n̄an mour Ippān. Elder Patrick Kearon ekar katakin: “Karōk eo an Jemed eaiboojoj, aaet karōk eo ‘ejejjōt’ An, eaar kōm̧anm̧ane n̄an kōjepļaak eok n̄an kapijuknen, ejjab depij eo itulik. … Anij ej kajjieon̄ aolep iien n̄an kōtōbrak eok.” Ļōmņak kake ilo jidik iien—Jemād eo ekajoor bōtata, iakwe ej “kajjieon̄ aolep iien n̄an kōtōbrak eok.”
Jekdo̧o̧n ta ia eo jej pād ie ilo iaļ in rikaļoor eo ad, mour ko ad renaaj lukkuun in oktak eļan̄n̄e em̧m̧anļo̧k ad meļeļe wōn lukkuun kōj. Imaron̄ ke elmakote ruo wāween ko me jemaron̄ kam̧wilaļļok meļeļe in.
M̧okta, Jar
Ke Rilo̧mo̧o̧r eo ekar jino jerbal in karejar eo An laļ in, kar tōlļo̧k e n̄an āne jem̧aden n̄an “pād ippān Anij.” Bōlen jej aikuj ukōt wāween ad ļōmņak jān baj ba jar ko ad n̄an bōk ebwe iien n̄an lukkuun kōnono ippān im “pād ippān Anij” kajjojo raan.
Ikar lo bwe em̧m̧an eo an jar ko ad ej em̧m̧anļo̧k ilo ad bōk jejjo minit ko n̄an m̧aanjabpopo n̄an kōnono ippān Jemād. Jeje ko rej kwaļo̧k n̄an kōj bwe menin ej juon jon̄ak me ej jerbal. Men̄e Josep Smith; Nipai, ļeo nejin Hilamōn; ak Inōs, aolepāer ewōr jet jekjek in ļōmņak im kōļmenļo̧kjeņ m̧okta jān je kōnono ko aer ippān Anij. Inōs ekar ba bwe an ekar kwōle ke naan ko an jemān kar deļo̧n̄ ilo m̧wilaļ in buruōn. Kajjojo waanjon̄ak kein rej katakin kōj aikuj eo n̄an pojak ilo jetōb n̄an iien eo ad kajjojo raan n̄an “pād ippān Anij.”
N̄an Rinipai ro, Rilo̧mo̧o̧r eo ekar kōmeļeļei, “N̄e kom̧ij jar, kom̧in deļo̧n̄ļo̧k ilo uukiļo̧k ko ami, im n̄e em̧ōj am̧ kili kōjām eo am̧, kom̧in jar n̄an Jemām.”
Men̄e ej ilo juon kōļo̧jet ak juon ruum̧ in kiki, pedped in katak eo ej n̄an pukot juon jikin ijo kwomaron̄ makeļo̧k n̄an jar, n̄an kōtļo̧k bwe am̧ en ikōn̄, im an en̄jake im̧we ko an “ainikien edik im emera.” Jemaron̄ kōppopo kōn ļōmņak kōn men ko me jej kam̧m̧oolol kaki im kajjitōk ko ak n̄ūrbōktak ko me jekōņaan kwaļo̧ki ippān Jemād. Jej aikuj kajjion̄ jab ba naan ko ekka ad ba ilo jab ļōmņak kaki bōtaab n̄an kōnono ippān Jemād, kōļap ad jar n̄e emaron̄.
Ij kile bwe ilo pok ko an mour ko ad, n̄e jej poub ippān nin̄nin̄ ko, ak pālļo̧k pāltok kōtaan kweilo̧k ko, emaron̄ ejjeļo̧k jikin ko relur im ejjeļo̧k iien kōppopo—ak jar ko reikōn̄, m̧ōkaj, im rōkaiirir maron̄ ļapļo̧k aer meļeļe n̄e jej aikuj in kōm̧m̧ane juon kijejeto n̄an “pād ippān Anij” ilo jibbon̄ tata in raan eo.
Ewōr bōlen jet ro me rejjan̄in kar jar ilo juon iien aitok ak ro jet me rejjan̄n kar en̄jake bwe jar ko aer kar ron̄. Ij kallim̧uri kom̧ bwe Jemāmi Ilan̄ ejeļā kwe, ej iakwe eok, im ej kōņaan ron̄ jān kwe. E ekōņaan kōnono ippāmi. E ekōņaan bwe kwōn keememej wōn kwe
Elder Jeffrey R. Holland ejjab to ekar katakin, “Jekdo̧o̧n ewi lōn̄ in am̧ jar, en ļapļo̧k am̧ jar. Jekdo̧o̧n ewi jon̄an am̧ jar, kwon jar ļo̧k wōt.”
Ilo kakkobaba n̄an kōļapļo̧k emakijkij in im kwaļo̧k itok limo in jar ko ad, ekkatak Bok in Mormon raan otemjej im kabun̄-jar ilo tampeļ naaj jipan̄ kōpooj ļōmņak ko ad n̄an revelesōn. Ilo ad kajjion̄ kōkm̧anm̧anļo̧k ekōnono eo ad ippān Jemādwōj Ilan̄, E enaaj kōjeraam̧m̧an kōj n̄an kanooj en̄jake bwe jej ro Nejin.
Ruo, Itok n̄an Jeļā Bwe Jisōs Ej Kraist Eo
Waļo̧ktok eo eļap tata kōn iakwe eo an Jemād Ilan̄ n̄an kōj āinwōt ro Nejin ej m̧ool eo bwe E ekar jilkintok Nejin, Rilo̧mo̧o̧r eo ad make, n̄an jipan̄ kōj ro̧o̧lļo̧k. Kōn menin, jej aikuj in jeļā E.
Iiō ko ļo̧k, ke kar jerbal āinwōt juon stake būreejtōņ, ikar jilkinļo̧k juon elmakot n̄an juon būratōr n̄an jerbal āinwōt juon rijerbal in kain̄i ilo tampeļ. Ālkin kōmeļeļeik ewi jon̄an an naaj juon rijierbal in kain̄i em̧m̧an enaaj, ikar jidilo̧k im jiped “Do not endorse”(Jab rie) eo ekar jilkinļo̧k elmakot eo. Ālkin an jab tōprak aō kōrooltok ennaan eo, ikar kūrļo̧k tampeļ būreejtōn eo im ba, “Ikar kōm̧m̧ane juon bōd nana.” Ilo ejjeļo̧k pere, tampeļ būreejtōn in em̧m̧an ekar ba, “Būreejtōn Eyre, ejjeļo̧k men en kwōn kar kōm̧m̧ane me jab maron̄ meļo̧kļo̧ke im āliktata kar kajim̧we.” Juon m̧ool eļap. Ilo m̧ool, Jisōs Kraist “ekajoor n̄an lo̧mo̧o̧ren.”
Ilo 2019 eo ekar wōr juon oktak eļap ilo kajjitōk ko an peba in mālim an tampeļ M̧oktaļo̧k, juon kajjitōk kar kajjitōk eļan̄n̄e ekar ewōr juon am̧ naan in kam̧ool kōn jerbal eo an Jisōs Kraist āinwōt ad Rilo̧mo̧o̧r im Ripinmuur. Ej kiiō kajjitōk eļan̄n̄e ewōr juon am̧ naan in in kam̧ool kōn jerbal eo An āinwōt am̧ Rilo̧mo̧o̧r im Ripinmuur. Pinmuur eo an Jisōs Kraist ejjab jerbal wōt n̄an ro jet; ej jerbal n̄an kwe im n̄a. E ej aō Rilo̧mo̧o̧r. E ej am̧ Rilo̧mo̧o̧r. Juon make. Kōn wōt E kwe im n̄an maron̄ bar ro̧o̧lļo̧k n̄an pād ippān Jemād.
Kōn menin, ro jeiū im jatū, jen pukot E. Jen ekkatak kōn kadkad kwojarjar eo An ippān Jemān im ippād kajjojo. Jen en̄jake al in iakwe in pinmuur eo me ej itok n̄an kajjojo n̄an katakin juon iaad kōn ad Ripinmuur ilo ad ukweļo̧k. Ilo ad itok n̄an jeļā “eo ekajoor n̄an lo̧mo̧o̧ren” jenaaj meļeļe bwe kōj, āinwōt ro nejin Anij, rej An lan̄lōn̄—An kalimjōk eo aorōk tata—im rej aaet aorōk n̄an lo̧mo̧o̧ren.
Ij kam̧ool bwe ewōr juon Jemād Ilan̄ eo em̧m̧an. Ilo ad itok n̄an jeļā m̧ool in indeeo kōn jar ekajoor, revelesōn an juon make, im itok n̄an Jisōs Kraist, jemaron̄ kiiō im aolep iien peran ilo kean̄ “N̄a nejin Anij.” Ilo etan Jisōs Kraist, amen.