Mejān Ettōn̄dikdik im Būruōn Kam̧m̧oolol ko
Em̧m̧an eo an Armej ro Rekwojarjar ilo Africa em̧ool ej erom kein kam̧ool ilo aer jelm̧ae apan̄ ko an mour im aikuj ko an juon Kabun̄ ej eddōkļo̧k.
Juon iiō emootļo̧k, kar kōtļo̧k eō jān kūr eo aō ilo Būreejtōnji eo an Jiljilimjuonn̄oul eo, juon oktak me kar kōjjeļļā kake ijin ilo kweilo̧k eo eļap. Kōnke kar kūr eta turinļo̧k Ritōl ro Routiej me ren kar erom emeritus, elōn̄ raar ļōmņak ekar barāinwōt dedeļo̧k iien jerbal eo aō. Ālkin kweilo̧k eo, ikar bōk elōn̄ naan in kam̧m̧oolol im kōjeraam̧m̧an ko kōn bun̄tōn eo tok juon ilo mour eo aō. Jon̄an jet raar kōņaan wiaik m̧weo m̧ō ilo North Salt Lake. Ekar em̧m̧an n̄an jeļā ke renaaj kar on̄ kake eō im bar jeļā ke eban kar pen aō wia kake m̧weo mōm n̄e en kar dedeļo̧k aō jerbal. Bōtaab ijjan̄in de tōpar ijōņ.
Ijjitōn̄ kāāl eo aō ekar bōkļo̧k Monica im n̄a n̄an Africa, ijo Kabun̄ in ekūtōk maro. Ekar juon kōjeraam̧m̧an n̄an jerbal ibwiljin Armej ro Rekwojarjar ilo Africa South Eria eo im kam̧ool iakwe eo an Irooj n̄an er. Ekakōm̧kōm̧ n̄an lo baam̧le ko elōn̄ epepenier kōn jekjek ko aer rooktak jān doon, ekoba elōn̄ membōr ro an Kabun̄ in rejeraam̧m̧an im jeļālo̧kjeņ, rej ajeļo̧k iien ko aer im tōļan ko n̄an jerbal n̄an ro jet.
Ilo ejja iien in wōt, kōn jon̄an dettan kilepen ijin, elōn̄ armej ejjab ļap jeraam̧m̧an ippāer rej kobatok ilo Kabun̄ in im ukōt mour ko aer kōn kōjeraam̧m̧an ko kōn kōļļā ilo tiljek juon m̧ōttan jon̄oul im jekjek ko kōn jeļāļo̧kjeņ liļo̧k jān Kabun̄ in. Būrokraam̧ ko āinwōt Succeed in School, EnglishConnect, BYU–Pathway, im Perpetual Education Fund eo rej kōjeraam̧m̧an elōn̄ armej, eļaptata ro ilo diktak in epepen eo.
Juon iien Būreejtōn James E. Faust ekar ba, “Em̧ōj kar ba ke kabun̄ in ejjab kan̄ōltok armej ro rekajoor ak ekkā an kōm̧m̧an bwe armej ren kajoor.”
Bōtata eo an Rikwojarjar ro ad ilo Africa ej erom em̧ool kein kam̧ool ilo aer jelm̧ae apan̄ ko an mour im aikuj ko an juon Kabun̄ ej eddōkļo̧k. Aolep iien rej ņa mejļan apan̄ ko im aikuj ko kōn juon m̧wil emm̧an. Rej kalikkar katak eo ebun̄bun̄ an Būreejtōn Russell M. Nelson:
“Lan̄lōn̄ eo jej en̄jake edik jetņakin ilo wāween mour ko ad im aolep men otemjej jej kōm̧m̧ani ilo ad mije mour ko ad.
“N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad.”
Rej lo lan̄lōn̄ jekdo̧o̧nta apan̄ ko aer. Em̧ōj aer katak ke jemjerā eo ad ippān Rilo̧mo̧o̧r eo ej kōm̧m̧an bwe jen jelm̧ae men ko reppen kōn mejān ettōn̄dikdik im būruōn kam̧m̧oolol ko.
In kwalo̧k jet iaan en̄jake ko aō ippān Rikwojarjar rein retiljek me rej kwaļo̧k pedped in katak in, jino ilo Mozambique.
Mozambique
Jejjo allōn̄ remootļo̧k, iaar tōl juon kweilo̧k an stake n̄an juon stake eo juon iiō dettan me ewōr ie 10 unit ko. Elōn̄ļo̧k jān 2,000 armej raar kobrak m̧ōn jar jidikdik eo im jilu em̧ nuknuk kar kajutaki nabōj. Stake būreejtōn eo ej 31 iiō dettan, lio pāleen 26 an iiō, im ewōr ruo nejierro ajri jiddik. Ej tōl stake in ej eddekļo̧k im epen kōn ejjeļo̧k ellotaan, mejān ettōn̄dikdik wōt im būruōn kam̧m̧oolol.
Ilo juon intōrpiu ippān petriak eo, iaar jeļā ke lio pāleen ekar lukkuun nan̄inmej, im ļein ekar kakkōt n̄an kakke an liin aikuj. Ālkin am ekōnono kōn jekjek eo ippān stake būreejtōn eo, kōm kar leļo̧k n̄an liin juon priesthood kōjeraam̧m̧an. Iaar kajjitōk ippān petriak eo ewi lōn̄ in petriak kōjeraam̧m̧an ko ej ekkā an kōm̧m̧ani.
“Ruwalitōk n̄an jon̄oul,” ekar ba.
Iaar kajjitōk, “Ilo juon allōn̄?”
Ekar uwaak, “Ilo juon wiik!” Iaar kapilōke bwe kōm̧m̧ane jon̄an lōn̄ eo ilo juon wiik ejjab jejjōt.
“Elder Godoy,” eaar ba, “ejjab bōjrak aer itok aolep wiik, ekoba membōr kāāl ro im elōn̄ jodikdik ro.” Bar juon alen, ejjeļo̧k ellotaan, mejān ettōn̄dikdik im būruōn kam̧m̧oolol.
Ālkin m̧wen̄an eo an joteen Jādede in kweilo̧k eo an stake, ilo iaļ eo aō n̄an hotel eo, ikar kile armej ebon̄e aer wia m̧ōn̄ā itōrerein iaļ eo ļo̧k. Ikar kajjitōk ippān rittōr eo aō etke raar kōm̧m̧ane ke ekar kanooj marok ijello̧kin kōm̧m̧ane in raan. Ekar uwaak bwe raar kōm̧m̧ane ilo raan bwe en lōn̄ jāān n̄an wia m̧ōn̄ā kiinļo̧k.
“O, raar jerbal rainin n̄an m̧ōn̄ā ilju,” ikar ba.
Ak ļein ekar kajim̧we eō: “Jaab, raar jerbal ilo raan n̄an m̧ōn̄ā bun̄nin.” Ekar wōr aō kōjatdikdik membōr ro ad remaron̄ pād ilo juon jekjek em̧m̧anļo̧k, bōtaab ekar ba bwe elōn̄ raar jelm̧ae ejja apan̄ ko wōt ilo m̧ōttan jab eo an laļ eņ. Jibbon̄ōn eo tok juon, ilo m̧wen̄an eo am ilo Jabōt im kōn jeļā eo ekāāl kōn jekjek ko aer, em̧ool ekar ļapļo̧k aō m̧weiur kōn mejān ettōn̄dikdik ko aer im būruōn kam̧m̧oolol ko.
Zambia
Ilo iaļ eo ļo̧k n̄an kweilo̧k eo an Jabōt, stake būreejtōn eo im n̄a kar lo juon ripālele rej etetalļo̧k ilo iaļ eo ippān juon nin̄nin̄ im ruo ajri reddik. Kōm kar bōjrak im kauwe er. Raar ilbōk im kar m̧ōņōņō. Ke ikar kajjitōk ewi ettoļo̧k in aer aikuj in etetal ļo̧k n̄an m̧ōn jar eo, baba eo ekar uwaak bwe emaron̄ bōk 45 minit n̄an juon awa, pedped ioon m̧ōkaj in an ajri ro etetal. Raar jelm̧ae etal itok in, aolep Jabōt, kōn ejjeļo̧k ellotaan ko—mejān ettōn̄dikdik wōt im būruōn kam̧m̧oolol ko.
Malawi
Juon Jabōt m̧okta jān juon kweilo̧k an stake, ikar loļo̧k ruo branch ko rej kōjerbal m̧ōn jikuuļ ko an kien āinwōt im̧ōn jar ko. Ikar ilbōk kōn ettā eo im ļam waan eo an jekjek ko an im̧ōko, eo ilo m̧ool ekar ejjeļo̧k jikin ko remenin aikuj. Ke ikar iioon jejjo membōr ro ijo, ikar pojak in joļo̧k bōd kōn jekjek ko rejjab bwe an im̧ōn kweilo̧k eo aer, bōtaab raar m̧ōņōņō kōn juon jikin epaak n̄an koba, joļo̧k etetal aitok eo ekkā aer kōm̧m̧ane. Bar juon alen, ekar ejjeļo̧k ellotaan—mejān ettōn̄dikdik wōt im būruōn kam̧m̧oolol.
Zimbabwe
Ālkin juon kamminene an ritōl ilo Jādede eo, stake būreejtōn eo ekar bōk n̄a n̄an kweilo̧k ko ilo Jabōt kar kōm̧m̧ani ilo juon em̧ kar rent e. Ekar wōr 240 armej raar pād. Innām bisop eo ekar kwaļo̧k kadkad in 10 membōr kāāl ro raar peptaij ilo wiik jab eo. Jarlepju eo ekar ajeeded ilo ruo ruum̧ jiddik ko, ippān jet membōr ro rej barāinwōt jijet nam̧ōj in m̧weo, alooje kweilo̧k eo ilo wintō ko im kōjām ko. Bar juon alen, ekar ejjeļo̧k ellotaan—mejān ettōn̄dikdik wōt im būruōn kam̧m̧oolol.
Lesotho
Ikar loļo̧k laļ jidikdik in eaiboojoj, kar bar jeļā kake āinwōt “the mountain kingdom,” n̄an lale juon district an Kabun̄ in erom juon stake. Ālkin kweilo̧k ko an Jādede eo, ikar pād ilo iien jar ko ilo Jabōt ilo juon iaan branch ko aer ilo juon em̧ raar rent e. Ruum̧ in kwojkwoj eo ekar lutōkļo̧k, kōn armej ro rej jutak nam̧ōj in kōjām eo n̄an bōk koņaer. Ikar jiron̄ branch būreejtōn eo bwe e ej aikuji juon em̧ ekilepļo̧k. Ikar ilbōk, ke ekar karon̄ eō bwe kar jimettan in ro uwaan rijar ro an. Jimettan eo juon renaaj pād ilo kweilo̧k in kwojkwoj eo kein karuo ālkin awa eo kein karuo. Bar juon alen, ekar ejjeļo̧k ellotaan—mejān ettōn̄dikdik wōt im būruōn kam̧m̧oolol ko.
Ikar bar jepļaak n̄an Lesotho tokālik kōn kar juon itaak in wa eo ekar jelet jodikdik ro ad, eo Elder D. Todd Christofferson ekar kwaļo̧kem̧oktaļo̧k. Ke ikar loļo̧k baam̧le ko im ritōl ro, ikar kōtmāne juon mejatoto elianij. Ijello̧kin, Ikar iioon Rikwojarjar ro rekajoor im kije me raar jelm̧ae jekjek eo ilo juon wāween ekōketak im kakōm̧kōm̧.
Mpho Aniciah Nku, 14, juon eo ekar mour jān jorrāān eo ilo pija in, ekar em̧m̧an an kōmeļeļeik ilo naan ko an: “Lōke Jisōs im reilo̧k n̄an E aolep iien, kōnke kōn E kwonaaj lo aenōm̧m̧an, im E enaaj jipan̄ eok ilo am̧ kammomo.”
Men kein rej jejjo iaan waanjon̄ak ko ijo jej lo m̧wil em̧m̧an eo aer kōnke rej likūt mour ko aer ilo gospel eo an Jisōs Kraist. Rejeļā ia eo n̄an pukot jipan̄ im kōjatdikdik.
Kajoor in Kōmour eo an Rilo̧mo̧o̧r
Etke Rilo̧mo̧o̧r emaron̄ jipan̄ er im kōj ilo jabdewōt kain jekjek ilo mour ko ad? Uwaak eo maron̄ loe ilo jeje ko rekwojarjar:
“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k. …
“… Im Enaaj bōk Ioon m̧ōjņo̧ ko aer, bwe būruōn ren maron̄ obrak kōn tūriam̧o, … bwe En maron̄ jeļā … ekōjkan jipan̄ armej ro An ekkar n̄an m̧ōjņo̧ ko aer.”
Āinwōt an Elder David A. Bednar kar katakin, ejjeļo̧k metak ilo kanniōk, en̄taan, ak m̧ōjņō jemaron̄ en̄jake me Rilo̧mo̧o̧r ejjab jeļā kake. “Kwe im n̄a ilo tōre in m̧ōjņo maron̄ lam̧ōj, ‘Ejjeļo̧k juon emeļeļe [ta eo n̄aij jelm̧ae]. …’ bōlen ejjeļo̧k armej ejeļā. Bōtaab Nejin Anij eweppān an jeļā im meļeļe. Bōtaab etke Kōnke “E ekar en̄jake im ineek eddo ko ad m̧okta jān ad kar ineeki.”
N̄aij kōjem̧ļo̧k kōn naan in kam̧ool eo aō kōn naan ko an Kraist ilo Matu 11:
‟Koṃwin itok n̄an Ippa, kom̧ otemjej rej jerbal im ban, im Inaaj kakkijeik kom̧.
“Koṃwin bōk Aō ine im likūte i aerami, im katak Ippa; bwe Ij ineeṃṃan im ettā būruō, im koṃ naaj lo an ami kakkije.
“Bwe Aō ine ej em̧m̧an, im men eo Ij ineke e mera.”
Āinwōt Armej ro Rekwojarjar ilo Africa, ijeļā ke kallim̧ur in ej m̧ool. Em̧ool ilo jeņ, im em̧ool ilo aolep jikin. Menin ij kam̧ool kake ilo etan Jisōs Kraist, amen.