Kwojarjar im Erreo ilo Kraist

Jiln̄uuļ jilu iiō ko rej m̧ootļo̧k, ikar bōk kūr eo aō n̄an jerbal āinwōt juon mijenede ilo Utah Ogden Mission. Aaet, kōnke Ikar itok jān Europe, jet iaan iiōk in m̧ōn̄ā kein an baj in Utah in āinwōt “green Jell-O with carrots” im “funeral potatoes” rekar jidik lukkuun kaijōljōl n̄an n̄a!

Ijoke, ikar lukkuun ļokjenaō kōn wūjlepļo̧k im wāween an elōn̄ Armej ro Rekwojarjar ļoor im mour kōn gospel eo, ebooļ armej ro rej pād ilo kweilo̧k ko an Kabun̄ in, im kobrak būrookraam̧ ko an Kabun̄ in. Ke mijen eo aō ekar itok n̄an an jem̧ļo̧k, ikar kōņaan bwe lan̄lōn̄ eo ikar en̄jake im kajoor in jetōb eo im mejatoto in m̧ōņōņō eo ikar loe enaaj barāinwōt pād n̄an baam̧le eo aō ilju im jekļaj. Ikar jōke ippa bwe enej m̧ōkaj aō ro̧o̧l im mour mour eo aō ilo “tōrerein ettoḷọktata in toḷ ko rej pād indeeo.”

Ijoke, Irooj ekar wōr an karōk ko roktak. Jabōt eo aō jinointata ilo m̧weo, bisop eo aō emāletlet ekar kūr eō n̄an jerbal āinwōt būreejtōn eo an Doulul eo an Likao ro ilo ward eo am. Jerbal ippān kūrub in likao rein rem̧m̧an, ekar m̧ōkaj aō jeļā bwe lan̄lōn̄ eo ej itok jān erom̧ juon rikaļoor an Kraist ejjab lukkuun itok jān dettan kweilo̧k ko an Kabun̄ in ak dettan būrookraam̧ ko.

Ke ikar m̧areiki kōrā aiboojoj eo pāleeō Margret, kōm̧ kar lan̄lōn̄ pepe in pād wōt ilo Europe im karūttoļo̧k baam̧le eo am̧ ilo m̧weo im̧ōm̧ ilo Germany. Ippān doon kōm̧ kar kam̧oole ta eo Būreejtōn Russell M. Nelson ekar katakin, “m̧ōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad.” N̄e jej mijōk wōt mour ko ad ilo Kraist im enaan ko an gospel eo An, jemaron̄ in en̄jake likio in kōjeraam̧m̧an ko an rikaļoor jabdewōt jikin jej mour ie.

Ijoke, ilo juon laļ in me ej ļapļo̧k kōņaan ko an laļ in ie, men ko pen meļeļe, poktak ko, ippān ennaan ko roktak im emmakijkij aer kōm̧m̧an jorrāān im an̄ļap ko, ewi wāween ad kattoļo̧k mejān jān ad maron̄ pilo im būruwōd kijen̄en̄e im mijōk wōt “men ko realikkar im aorōk” an gospel eo an Jisōs Kraist? Ilo juon iien tarpok, Rijilōk Paul ekar leļo̧k naan in kōkakpilōklōk in em̧m̧an n̄an Rikwojarjar ilo ilo Korint n̄an kakeememej er n̄an mijōk wōt “kwōjarjar im erreo eo ilo Kraist.”

Katak ko an Kraist im kakien ko an gospel eo rej lukkuun lam̧ waan jon̄an aaet ajri ro reddik remaron̄ meļeļe. Jemaron̄ bōk kajoor in pinmuur eo an Jisōs Kraist im bōk aolep kōjeraam̧m̧an ko an jetōb Jemedwōj Ilan̄ ekar kōpooji n̄an kōj jān kōjerbal tōmak ilo Jisōs Kraist, ukweļo̧k, peptaij, bōk kwojarjar jān mennin letok eo an Jetōb Kwojarjar, im niknik n̄an jem̧ļo̧kin. Būreejtōn Nelson ekar kōmeļeļeiki iaļ in elukkuun aiboojoj āinwōt “iaļen bujen” im jerbal eo n̄an erom̧ juon “erom̧ juon rikaļoor eo ewūjlepļo̧k an Jisōs Kraist.”

Eļan̄n̄e ennaan in elukkuun lam̧ waan, etke emakijkij an lukkuun apan̄ n̄an mour kōn kakien ko an Kraist im ļoore waanjon̄ak ko An? Bōlen emaron̄ bōlen bwe ejjab jejjet ad ukōt kwojarjar eo āinwōt juon men eo me epidodo bōke ilo an ejjeļo̧k kijejeto ak niknik. Ļoore Kraist ej aikuji kijejeto eo aolep iien im wōnm̧aanļo̧k wōt im oktak. Jej aikuj in “[utik] ļo̧k armej ilo lukkuun biktokin im …[erom āinwōt juon ajri, ettā,] ettā.” Menin ekitbuuj likūt ad “lōke ilo Irooj” im kōtļo̧k bwe men ko pen meļeļe ren etal, āinwōt ajri ro reddik rej kōm̧m̧ane. Kōjerbale katak ko an Kraist ilo pidodo im wāween eo ej mijōk im naaj jipan̄ kōj loe lan̄lōn̄ ilo mour ko ad iien otemjej, leļo̧k tōl ilo kūr ko ad, uwaake kajjitōk reppen an mour in, im leļo̧k kajoor n̄an jelm̧ae apan̄ ko ad reppen tata.

Ak ewi wāween jemaron̄ in kōjerbale wāween in eļam̧ waan ilo ito itak in ad eaitok āinwōt rikaļoor ro an Kraist? Būreejtōn Nelson ekar kakeememej kōj n̄an mijōk wōt “m̧ool eo erreo, katak eo erreo an Kraist, im revelesōn eo erreo” ilo ad kappukot n̄an ļoore Rilo̧mo̧o̧r eo. Kajjitōk aolep iien, “Ta eo Irooj Jisōs Kraist enaaj kar kōm̧m̧ane?” kwaļo̧k tōl in em̧m̧an. Loore waanjon̄ak ko An ej letok juon iaļ eo ekōjparok ilo jikin ko jejjab jeļā kaki im juon pein tōl eļap iakwe ippān, kabwijere jān raan n̄an raan. E ej Irooj in Aenōm̧m̧an im Seperd eo Em̧m̧an. E ej ad Rikaenōm̧m̧an im Ribōkļo̧k. E ej ad Dōkā im Rikōjparok. E ej juon Mōttā—m̧ōttam̧ im m̧ōtta! E ej karuwaineneik kōj aolep n̄an iakwe Anij, kōjparok kein ko An, im iakwe armej ro riturir.

Ilo ad kāālet n̄an ļoore waanjon̄ak eo An im bun̄m̧aanļo̧k kōn tōmak ilo Kraist, kautiej kajoor in Pinmuur eo An im keememej bujen ko ad , iakwe ej kobrak būruwōd, kōjatdikdik im ājmour ej ļōn̄aj jetōb ko ad, im nana im būrom̧ōj rej bōk jikin kōn kam̧m̧oolol im kijenmej n̄an kōttari kōjeraam̧m̧an ko kar kallim̧ur kaki. Ilo elōn̄ ko, jemaron̄ aikuj kattoļo̧k kōj make jān juon jekjek eo ejjab em̧m̧an ak kappukot jipan̄ ko retijem̧ļo̧k. Ak ilo aolep jekjek, kōjerbale pedped in katak ko an gospel enaaj jipan̄ kōj kōjebwebweik jān apan̄ kein an mour ilo wāween eo an Irooj.

Kōj jet iien kajejtokjāne kajoor eo jej bōke jān m̧akūtkūt ko repidodo kōm̧m̧ani āinwōt jar, jitlo̧k, ekkatak jeje ko rekwojarjar, ukweļo̧k aolep raan, bōk m̧ōttan kwojkwoj eo aolep wiik, im aolep iien kabun̄jar ilo m̧weo im̧ōn Irooj. Ak n̄e jej kile bwe jejjab aikuj in “kōṃṃan jabdewōt men eo eḷap” im jej likūt kōj make ilo ioļapļap mour kōn katak ko rerreo im reļam̧ waan, jej jino in loe ewi wāween an gospel eo “Eaiboojoj an Jerbal” n̄an kōj, men̄e ilo ibuļōn̄ jekjek ko rapan̄tata. Jej loe kajoor ilo “Peran ilo Im̧aan Mejān Anij,” aaet men̄e jej en̄jake metak bōro. Elder M. Russell Ballard ekar kakeememej kōj elōn̄ kōttan, “Ej ilo men ko repidodo me [jenaaj] lo … aenōm̧m̧an, lan̄lōn̄, im m̧ōņōņō.”

Kōjerbale kwojarjar eo me ej ilo Kraist ej kōm̧m̧an ad likūt armej im̧aan m̧okta jān jerbal ko im jem̧jerā ko an indeeo im̧aan m̧okta jān m̧wil ko ekadu kitieer. Jej mijōk wōt “keememej ta eo eaorōktata” ilo jerbal in lo̧mo̧o̧r eo an Anij im mour ijo eutiejtata ijjelo̧kin ad boub ilo kōjjekiik jerbal in karejar eo ad. Jej kōm̧m̧an an lōn̄ ad iien n̄an likūt men ko raorōk jemaron̄ kōm̧m̧ani ijjelo̧kin kaddoik laļļo̧k kōn men ko jejjab maron̄ kōm̧m̧ani. Irooj ej kakeememej kōj: “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” Ej juon naan in rōjan̄ ekajoor n̄an kōm̧m̧ane ilo erreo im ettā bōro, jekdo̧o̧n ta jekjek ko ad

Kōrā eo jibū Marta Cziesla ekar juon waanjon̄ak em̧m̧an ilo kōm̧m̧ani “men ko reddik im reļam waan” n̄an bōktok men ko reļļap. Em̧m̧an ippem̧ kūr e Oma Cziesla. Oma ekar kaorōke gospel eo ilo bukwōn eo an edik ilo Selbongen ilo East Prussia ippān doon ippān kōrā eo jibū jibun̄ Mae 30, 1926.

Marta Cziesla ej pād (iaan m̧ooņ) ilo raan in peptaij eo an.

Ekar iakwe Irooj im gospel eo An im ekar pepe n̄an kōjparok bujen ko ekar kōm̧m̧ani. Ilo 1930 ekar m̧areiki jim̧aaō, eo ekar jab juon membōr in Kabun̄ in. Ilo tōre in ekar erom̧ lukkuun pen n̄an Oma n̄an an etal n̄an kweilo̧k ko an Kabun̄ in kōnke jikin kallib ettoļo̧k jān jikin jar eo epaaktata. Ak ekar mijōk wōt ta eo emaron̄ in kōm̧m̧ane. Oma ekar wōnm̧aanļo̧k wōt im jar, riiti jeje ko rekwojarjar, im al al ko an Zaiion

Jet armej remaron̄ kar ļōmņak bwe ekar jab ikutkut tok ilo tōmak eo an ak ekar ettoļo̧k jān m̧ool eo. Ke ullepa im jema rekar ļotak, ilo an ejjeļo̧k priesthood ilo m̧weo im ejjeļo̧k kweilo̧k ko an Kabun̄ in ak maron̄ būki kain̄i ko repaake, bar juon alen ekar kōm̧m̧ane ta eo emaron̄e im mijōk wōt katakin ajri ro nejin “n̄an jar, im n̄an etetal jejjet im̧aan mejān Irooj.” Ej riiti ļo̧k n̄an er jān jeje ko rekwojarjar, al ippāer al ko an Zaion, im aaet jar ippāer—aolep raan. Juon jibukwi bōjjāān en̄jake ko an Kabun̄ rej dilepen m̧weo.

Ilo 1945 jibū ekar jerbal ilo jikin tariņae ettoļo̧k jān m̧weo. Ke rikōjdat ro rekar kepaakeļo̧k jikin kallib eo aer, Oma ekar bōk ajri jidikdik ro ruo nejin likūt wōt jān jikin kallib eo eakwe im etal im kappukot juon jikin ekōjparok ļo̧k. Ālkin juon iien ito itak epen im kaam̧jak, rekar āliktata loe jikin kone eo ilo Māe 1945 ilo turear in Germany. Ejjeļo̧k bar juon men ippāer ijjelo̧kin nuknuk ko ilo ānbwinnier. Ak Oma ekar etal wōt kōn ta eo ekar maron̄ kōm̧m̧ane: ekar jar ippān ajri eo nejin—aolep raan. Ekar al ippāer al ko an Zaion ekar kakkilōklōki—aolep raan.

Mour eo an ekar lukkuun pen im elōn̄ iiō ko ekar mijōk wōt baj an lukkuun lale bwe en wōr m̧ōn̄ā ioon tebōļ eo. Ak ilo 1955 jema, innām 17 iiō rūtto, ekar etal n̄an jikuuļ in kaam̧tō ilo bukwōn eo an Rendsburg. Ekar etetal laļ iturin juon em̧ im ekar loe juon peba jidikdik namōj dipin m̧weo ej jeje “Kirche Jesu Christi der Heiligen der Letzten Tage”—“Kabun̄ eo an Jisōs Kraist im Armej ro Rekwojarjar.” Ekar ļōmņak,, “Menin kaitoktoklimo, en̄in ej Kabun̄ an Jinō.” Innām ke ekar ro̧o̧ltok, ekar jiron̄ļo̧k Oma bwe ekar loe Kabun̄ eo an.

Komaron̄ ke pijaik ļo̧k ewi jon̄an ekar aikuj en̄jake ālkin enan̄in 25 iiō ko jab kobaļo̧k ippān Kabun̄, Ekar pepe n̄an an etal Jabōt eo tok juon im kareel jema bwe in mijeļo̧k e. Rendsburg ekar ļapļo̧k jān 20 mile (32 km) ettoļo̧k jān jikin jidikdik eo rekar jokwe ie. Ak men ej jāmin dāpij Oma jān an etal n̄an pād jar. Jabōt eo tok juon, ekar iuwe ioon baajkōļ eo an ippān jema im jema ekar iuwe n̄an mōnjar eo

Ke kweilo̧k in kwojkwoj eo ekar jinoe, jema ekar jijet ilo jea ko iliktata, kōjatdikdik bwe ejjab etto enaaj m̧ōj. Kabun̄ in ekar an Oma im jab an. Ta eo ekar loe ekar jab em̧m̧an, ruo wōt kōrā ro rerūtto rekar pād im ruo mijenede ro reddik rekar kōm̧m̧an aolep men ilo kweilo̧k eo. Innām rekar jino in al, im rekar al al ko an Zaion me jemaron̄ ekar ron̄ kaki jān ke ekar juon ļaddik jidikdik: “Come, Come, Ye Saints,” “O My Father,” “Praise to the Man.” Ron̄ake an jarlepju in edik al al ko an Zaion ekar jeļā jān ke ekar ajri wōt ekar deiļ menono eo an, im ekar jeļā ilo ejjeļo̧k pere bwe Kabun̄ eo ekar m̧ool

Kweilo̧k in kwojkwoj eo kein kajuon jibū ekar pād ie ālkin 25 iiō ko ekar kweilo̧k eo ijo me jema ekar bōk juon an make kapen kōn m̧ool eo an jepļaaktok eo an gospel eo an Jisōs Kraist. Ekar peptaij jilu wiik ko tokālik ilo Jeptōm̧ba 25, 1955, ippān ļo̧k jim̧aaō im ullepa.

Em̧ootļo̧k de elōn̄ļo̧k jān 70 iiō ko jān ke kweilo̧k in kwojkwoj jidikdik eo ilo Rendsburg. Ekkā aō ļōmņak kōn Oma, ewi wāween an en̄jake ilo bon̄ōn̄ ko emaake iaan, kōm̧m̧ani men ko reddik im reļam̧ waan an maron̄ kar kōm̧m̧ani, āinwōt jar, riit, im al. Ilo aō jutak ijin rainin ilo kweilo̧k in eļap im kōnono kōn jibu Oma, kijejeto eo an n̄an kōjparok bujen ko an im lōke ilo Irooj mekarta en̄taan ko an ej kobrak būruwō kōn ettā bōro im kaam̧m̧ool—jab wōt n̄an e ak n̄an elōn̄ iaan Armej ro Rekwojarjar rem̧m̧an jān peļaakin laļ in eo ej mijōk wōt kwojarjar ilo Kraist ilo jekjek ko aer rapan̄, bōlen loe oktak eo edik kiiō ak lōke ilo men ko reļļap enaaj itok jet raan ilo ilju im jekļaj.

Ikar ekkatak jān en̄jake eo aō make bwe men ko reddik im relam waan an gospel im tiljek mijōk wōt an Kraist tōl kōj n̄an lan̄lōn̄ eo em̧ool, bōktok kabwilōn̄lōn̄ ko rekajoor, im letok n̄an kōj lōke eo aolep kōjeraam̧m̧an ko kar kallim̧ūr kake renaaj itok. En̄in ej an m̧ool n̄an kom̧ ej āinwōt an m̧ool n̄an n̄a. Ilo naan ko an Elder Jeffrey R. Holland, “Jet kōjeraam̧m̧an ko em̧ōkaj aer itok, im jet rejjab itok m̧ae lan̄, bōtaab ro rej kautiej gospel eo an Jisōs Kraist, rej itok Jān menin ij kam̧ool ilo etan Jisōs Kraist, amen.