Bōk Iood Etan Jisōs Kraist

Ilo 2018 eo, ilo University eo an Utah, juon special professorship kar ejaake ņa etan “Dr. Russell M. Nelson im Dantzel W. Nelson Presidential Chair ilo Cardiothoracic Surgery”—cardio, meļeļe in “menono,” im thoracic, meļeļe in “ob.” Ekar nebar jerbal eo aorōk an Būreejtōn Nelson āinwōt juon rim̧wijm̧wij menono im jipan̄ eo ekar bōk jān lio emej kar pāleen, Dantzel Professorship in kar kōļļāik juon jāān in jipan̄ kar ejaake bwe en pād n̄an ilju im jekļaj. Ro kajjojo kāālet er n̄an kain taib in professorship in ebun̄bun̄ ej bōk kile, jipan̄ ilo wōņāān, im jāān in jipan̄ research.

Rim̧wijm̧wij eo m̧oktata kar kāālete n̄an kabwijer professorship eo ekar Dr. Craig H. Selzman, juon rim̧wijm̧wij menono ekapeel me ekar jab juon uwaan kabun̄ in ad. Ilo iien leļo̧k nebar in an professorship eo n̄an Dr. Selzman, elōn̄ rilotok ro raorōk raar pād, ekoba Būreejtōn Nelson im lio pāleen Sister Wendy W. Nelson. Ilo kweilo̧k eo, Būreejtōn Nelson kōnono ilo ettā kōn an kar jerbal in m̧wijm̧wij.

Innām Dr. Selzman ekar kwaļo̧k jon̄an aorōk in n̄an e ke em̧ōj kāālete n̄an professorship in. Ekar kwaļo̧k bwe emen raan ko m̧oktaļo̧k, ālkin juon raan aitok ilo ruum̧ in m̧wijm̧wij eo, ekar lo bwe juon iaan rinan̄inmej ro an kar aikuj in bar ro̧o̧l in m̧wijm̧wij. Ekar m̧ōk im inepata, jeļā bwe ekar bar aikuj in joļo̧k juon bon̄ ilo aujpitōļ eo.

Joteen in, Dr. Selzman kōnono ippān make kōn juon men ekar ukōt mour eo an. Ilo iien eo, ekar ļōmņak: “Ilo Bōļaide, naaj kappeik eō n̄an juon professorship eo ej bōk etan Dr. Nelson. Kar jeļā kake āinwōt juon eo ej dāpij en̄jake ko an, kautiej aolep, im jan̄in kwaļo̧k an illu. Kiiō āt eo eta enaaj ekkejelļo̧k ippān etan, ij aikuj kajjion̄ in ainļo̧k wōt e.” Dr. Selzman ekar kadede juon rim̧wijm̧wij eo lukkuun lo̧ļe. Bōtaab ear kōņaan em̧m̧anļo̧k wōt.

Kar m̧okta, kumi in m̧wijm̧wiji eo an emaron̄ kar kile an m̧ōk im inepata kōnke emaron̄ kar kwaļo̧ke ilo paotokin im ainikien an kōnono. Bōtaab ilo ruum̧ in m̧wijm̧wij eo jotten jab eo, Dr. Selzman ekar kōm̧m̧ane juon kijejeto eo ejetjet n̄an jipan̄ im meļeļe kōn kumi eo an. Ekar en̄jake ekar kōm̧m̧ane juon oktak im jōk ippān n̄an wōnm̧aanļo̧k in kajjion̄ n̄an erom āinļo̧k wōt Dr. Nelson.

Ļalem iiō tok ālik, Būreejtōn Nelson ekar liļo̧k professional peba ko an n̄an University of Utah. Ro routiej jān univeristy of Utah raar itok in kam̧m̧oolol Būreejtōn Nelson. Ilo iien in, Dr. Selzman ekar bar kōnono. Ekar kōnono kōn leta ko ilo jino in etan Būreejtōn Nelson, RMN, ekar ba, “Ewōr juon m̧wil ņa etan ‘RMN’ kōmij ļoore ilo Division of Cardiothoracic Surgery ilo University of Utah.”

Ilo jekjek ko ewōr dikāāļāļ ie, Dr Selzman ekar kōmeļeļeik: “Ij kōm̧m̧ane ta eo kōmij kiiō katakin rikaminene ro ad n̄an kōm̧m̧ane—kalimjōk wōt, bōjrak inepata kake, im kōm̧m̧ane ijo em̧m̧an tata kwomaron̄e. M̧wil in ej mour ilo kōm aolep raan. Kōmij liļo̧k lapel pin ko n̄an aolep ro uwaan division eo im n̄an kajjojo rikaminene kāāl. Ilo tulaļ in pin eo rej leta ko ‘RMN.’ M̧wil eo ņa etan RMN ej pedped in ekkatak eo am, kōmij katakin aolep kake.” Dr Selzman ekar ļōmņak wōt in kōm̧anm̧anļo̧k m̧wil im ikdeelel ko an m̧oktaļo̧k kōnke etan ej kiiō ekkeijelo̧k ippān etan Būreejtōn Nelson.

Men kein raar waļo̧k n̄an Dr Selzman ekar kōm̧m̧an bwe in kajjitkin eō make? “Ilo wāween ta em̧ōj aō oktak jān ke iar ekkeijelļo̧k eta n̄an etan Jisōs Kraist? Ikar ke bōk juon m̧wil an Kraist āinwōt juon tōprak? Ikar ke m̧ool in kajjion̄ erom em̧m̧anļo̧k im āinļo̧k wōt E?”

Ilo en̄jake Eo an Dr. Selzman, jemaron̄ lo ļalem wāween ko me jekjek in ej ainļo̧k wōt eo me jej bōk iood make etan Jisōs Kraist. Jekdo̧o̧ņ men̄e jekjek jab in ej ijjino kōn peptaij, ejjab dedeļo̧k m̧ae iien jej erreoļo̧k im kwojajrar im m̧ōj ad eromļo̧k āinwōt E.

Wāween eo im̧aan tata ej kadkadid Ejjitōn̄ eo an Dr Selzman n̄an Nelson professorship eo ear ekkeijelo̧k etan n̄an etan Būreejtōn Nelson, im Dr. Selzman ekar jino watōk e āinļo̧k wōt Būreejtōn Nelson. N̄e jej bōk iood make etan Jisōs Kraist, jej kōkkejel etad ippān Etan. Jej kile kōj Ippān. Jej m̧ōņōņō in ņa etad Rikūrijtin. Jej kile Rilo̧mo̧o̧r eo im jej peran ilo kwaļo̧k n̄an armej jej uwaan Kabun̄ eo An.

Lukkuun epaakeļo̧k kile ej bar juon wāween—keememej. Ke Dr. Selzman ej etal n̄an opiij eo an, mejān ej kajju kalimjōk medal eo ekar bōke ke kar jitōn̄e n̄an Nelson professorship eo. Medal in ej kakeememej e raan otemjej kōn m̧wil eo an RMN. N̄an kōj, bōk m̧ōttan kwojkwoj eo kajjojo wiik ej jipan̄ kōj keememej Jisōs Kraist ilo aolepān wiik eo. Ilo ad bōk m̧ōttan kwojkwoj eo, jej kōm̧m̧ane ilo keememej wōņāān eo E ekar kōļļāik n̄an lo̧mo̧o̧ren kōj. Jej bar kōkāāl bujen eo n̄an keememej E, kile wōj eo An, im kam̧m̧oolol kōn em̧m̧an eo An. Jej kile im bar kile bwe ej men eo de in im kōn jouj eo An jej mour jān mej in kanniōk im jetōb.

Keememej ej meļeļe in bwe jej ļoor kapilōk eo kar letok jān rikanaan eo Bok in Mormon, Alma. Jej “kōtļo̧k bwe aolep kōm̧m̧an ko [ad] ren n̄an Irooj, im jabdewōt ijo [jej etal ie] en ilo Irooj; … [jej] kōtļo̧k aolep [ad] ļōmņak bwe ren n̄an Irooj; … [im jej] kōtļo̧k bwe iakwe ko an [būruōd] bwe ren pād ioon Irooj indeeo.” Jekdo̧o̧n men̄e jej obrak kōn men ko jet, jej dim wōt ilo keememej E, ejja āinwōt ad keememej etad make, jekdo̧o̧n ta men ko jet jej kalimjōki.

Eddōkļo̧k eo kōn keememej ta eo Rilo̧mo̧o̧r eo ekar kōm̧m̧ane n̄an kōj ej wāween eo kein kajilu—ari Dr. Selzman ekar jino arin Būreejtōn Nelson im m̧wil eo an RMN. Ij tōmak bwe m̧wil eo an Būreejtōn Nelson ej juon tōprak in an juon rikaļoor an Jisōs Kraist ilo aolepān mour eo an. N̄an kōj, an ļapļo̧k wōt ad kile kōn im keememej Jisōs Kraist, eļapļo̧k ad kōņaan eromļo̧k āinwōt E. Āinwōt rikaļoor ro An, jej oktak n̄an em̧m̧anļo̧k eo n̄e jej kalimjōk E, eļapļo̧k jān n̄e jej kalimjōk kōj make. Jej kajjion̄ erom āinwōt E im pukot n̄an jeraam̧m̧an kōn paotok ko An. Emakijkij ad jar n̄an obrak kōn iakwe eo em̧o̧ol, iakwe eo erreo an Kraist.

Āinwōt an Būreejtōn Nelson kar katakin ilo Eprōļ eo: “Ilo an iakwe-em̧ool m̧ōttan mour eo ad, jenaaj joļo̧k kōnanaik ro jet. Enaaj bōjrak aō ekajete ro jet. Jenaaj bōk iakwe-em̧ool n̄an aolep armej. Iakwe-em̧ool n̄an aolep l … armej ej aorōk n̄an eddōkļo̧k eo ad. Iakwe-em̧ool ej peded in m̧wil in anij.” Ippānļo̧k iakwe-em̧ool, jej pukot, “kōpooj, … im kōdepakpakļo̧k” menin letok ko jet an jetōb jān Rilo̧mo̧o̧r, ekoba wānōk, m̧ool, kijenmej, ettā bōro, im niknik.

Arin Jisōs Kraist ej tōlļo̧k kōj n̄an wāween eo kein kemen— kajetjet ippān jibadbad ko An. Jej koba Ippān ilo jerbal eo An. Āinwōt juon rim̧wijm̧wij, Dr. Nelson kar jeļā kajjien āinwōt juon rūkaki, juon rikōmour, im juon researcher. Lapel pin eo kar kōjerbale ilo ra eo an Dr. Selzman ej kōmejajaik jibadbad kein, waļo̧k ilo naan ko katakin; kemour, im kappukot. N̄an kōj, bōk iood make etan Jisōs Kraist ekitbuuj m̧ōņōņō, ļōmņak wōt in, im lo̧udin̄din̄ ilo kajetjet kōttōpar ko ad ippān ko An. N̄e jej koba Ippān ilo jerbal eo An jej “ iakwe, kwaļo̧k, im karuwainene.” N̄e jej koba Ippān ilo jerbal eo An n̄e jej jerbal in karejar n̄an ro jet, eļap tata ro rejerematmat n̄an kakkure im ro me kar ikinejnej, jepepļo̧k, ak kakkure jān en̄jake ko aer ilo mour in.

Eļapļo̧k ad bōk iood make etan Jisōs Kraist kōn ba kajjien, keememej, ari, im kajetjet. Kōm̧m̧ane men kein emen ej tōlļo̧k kōj n̄an wāween eo kein kōļalem—kōkajoor. Jej bōk kajoor eo im kōjeraam̧m̧an ko an Anij ilo mour ko ad. Nelson professorship eo ej leļo̧k n̄an Dr. Selzman kile im jāān in jipan̄ ko bwe en kōjerbali n̄an ukōt m̧anit eo ilo division eo an. Ej kōjerbal “jāān in kōkajoor” in n̄an jipan̄ ro jet. Ilo ejja wāween in wōt, n̄e jej bōk iood make etan Rilo̧mo̧o̧r eo, Jemādwōj Ilan̄ ej kōjeraam̧m̧an kōj kōn kajoor eo An n̄an jipan̄ kōj kakūrm̧ool mijen eo an ilo mour in.

Ilo ad kōm̧m̧ani bujen ko jet ippān Anij, eļapļo̧k ad bōk iood make etan Jisōs Kraist. Kōn menin, Anij ej kōjeraam̧m̧an kōj kōn eļapļo̧k An kajoor. Āinwōt an Būreejtōn Nelson kar katakin: “Kajjojo armej eo ej kōm̧m̧ani bujen ko ilo dānin peptaij im ilo tampeļ ko—im kōjparoki—ekar kōļapļo̧k ad maron̄ bōk kajoor eo an Jisōs Kraist. Nōbar eo kōn kōjparok bujen ko ippān Anij ej kajoor in lan̄ … me ej kōkajoor kōj n̄an jutak ņae apan̄ ko ad, kapo ko, im būrom̧ōj ko em̧m̧alo̧k.”

Eļapļo̧k ad bōk men ko an jetōb. Eļapļo̧k peran eo ad n̄an jum̧ae jekjek ko me āinwōt reppen. Jej kajoorļo̧k ilo kijejeto eo ad n̄an ļoor Jisōs Kraist. Em̧ōkaj ļo̧k ad ukweļok im bar ro̧o̧l n̄an E n̄e jej bōd. Em̧m̧anļo̧k ad karuwainene ilo kwaļo̧k gospel eo An kōn kajoor im mālim eo An. Jej jipan̄ ro rej pād ilo aikuj ilo an dikļo̧k ad ekajet, kanooj dikļo̧k ekajet. Jej bōk juon jeorļo̧k bōd in jerawiwi ko ad. Eļapļo̧k ad aenōm̧m̧an, im eļapļo̧k ad m̧ōņōņō kōnke jemaron̄ aolep iien lem̧ōņōņō. An aiboojoj en jepooļe kōm, im enjeļ ro Am̧ enaaj wōr aer eddo ioom̧.

Rilo̧mo̧o̧r eo ej karuwaineneik kōj, “om̧in maron̄ itok n̄an Jemān ilo eta, im ilo iien eo ejim̧we bōk tarlep eo an.” Ij libjerjere kom̧ n̄an kōm̧m̧ane menin. Itok n̄an Jemādwōj Ilan̄. Bōk ioom̧ make etan Jisōs Kraist. Kile kom̧ Ippān. Keememej E iien otemjeļo̧k. Kajjion̄ in erom āiniwōt E. Koba Ippān ilo Jerbal eo An. Bōk kajoor eo im kōjeraam̧m̧an ko An ilo mour eo ami. Je Etan ilo būruōmi, ilo m̧ōņōņō im kōttōpar. Menin ej lewaj n̄an eok juon “nebar” im̧aan Anij im ej kōkarbōb eok n̄an jojomar eo an Rilo̧mo̧o̧r ilo etam̧. Kwonaaj erom juon ribōk mour ijo eutiej tata ilo aelōn̄ eo an Jemād ilo Lan̄, juon rijolet ippān M̧aanje eo Nejin, ad Rilo̧mo̧o̧r jitōnbōro im Ripinmuur.

E emour. Ilukkuun jeļā. E ej iakwe eok. E ekar leļo̧k mour eo An kōn kwe. E ej akweļap ippam̧ n̄an itok n̄an Jemān kōn E. Ilo etan Jisōs Kraist, amen.