Bwe Aolep Ren Maron̄ Ketak

Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan ko Āliktata, rekar jeraam̧m̧an kōn jemjerā eo eaorōk an juon uwaan Doulul in Anij eo, jemaron̄ bōk jipan̄ eo an tutor ļapļap eo. Jetōb Kwojarjar ejeļā aolep men ko, ej kam̧ool kōn m̧ool eo, im naaj “kakeememej men otemjej n̄an [kōj].” Būreejtōn Russell M. Nelson emakijkij an kar kōnono kōn aorōk eo an ron̄jake ainikien Irooj. Ekar katakin kōj elmen karuwaineneik tōl eo an Jetōb Kwojarjar im ekar āliji an akweļap ippād n̄an kōļapļo̧k maron̄ in jetōb eo ad n̄an bōk revelesōn.

Rainin, ij karuwaineneik kom̧ n̄an ļōmņak kōn jerbal eo an Jetōb Kwojarjar, eļap tata eo ej iookļo̧k katak im katakin gospel eo ilo m̧weo im ilo m̧ōnjar eo. Jetōb Kwojarjar ej itok jān jar kōn tōmak im ilo ad kajjieon̄ in mour erreo kōn mennin letok in eaiboojoj. Bok in katakin eo an Kabun̄ in Katakin ilo Wāween eo an Irooj ej kōļaajrake pedped in katak ko jet an Irooj ekar ejaaki n̄an jipan̄ karuwaineneik im̧we eo an Jetōb Kwojarjar.

Juon iaan pedped in katak eo ej n̄an karuwaineneik tok niknik ilo katak. Etto, jemaron̄ in kar ļōmņak kōn katakin ej āinwōt juon iien n̄an an jinen ak jemān ak rūkaki ro n̄an karuwaineneiktok Jetōb eo n̄an kōppopo eo aer make innām kwaļo̧k ta eo raar katak ippān ro nejier ak membōr in kūlaaj eo, me jerbal eo aer n̄an ron̄jake. Bōtaab em̧ool eļapļo̧k an wejepedik ej n̄an kōj, āinwōt rikatak ro, barāinwōt pojaktok im n̄e rūkaki ro rej ejaake iien ekkatak ko me rej kōketak revelesōn an juon make kajju n̄an būruōd im ad ļōmņak. Innām, āinwōt kar letok n̄an kōj iien ko rem̧m̧an n̄an kwaļo̧k ta eo jej katak kōn ekkatak eo ad jān Jetōb Kwojarjar, jej jipan̄ doon n̄an katakin im ketak. Ilo ad kōjerbal pedped in katak kein an gospel eo, Jetōb eo ej maron̄ bar kwaļo̧k kam̧ool kōn m̧ool eo aer.

Āinwōt ilo aolep men ko, Jisōs Kraist ej waanjon̄ak eo eweppān. E ekar kajjitōk ippād n̄an rūkkatak ro retiljek im bōk eddo in naan in kam̧ool ko ad make. E ekar kajjitōk ippān rikaļoor ro an n̄an kōppopo n̄an ekkatak, n̄an kwaļo̧k ta eo raar katak im jerbal ilo tōmak. E ekar jar kōn er, kar lo kōjatdikdik kwojarjar eo aer, kar ron̄jake er, im kar jipan̄ er jeļā bwe rej iakwe im aikuji er.

Āinwōt rūkaki ro, jemaron̄ kalimjōk eļapļo̧k eddōkļo̧k eo aer, kōn aikuj ko aer, im jipan̄ er ejake imminene in jetōb ko an rikaļoor to̧o̧ņ wōt aer mour. Āinwōt rūkkatak ro, n̄e jej kōjerbal anemkwoj in kāālet eo ad ilo jekjek eo an ekkatak, jej kwaļo̧k n̄an Jetōb Kwojarjar kōn kōņaan eo ad n̄an katakin jān E.

Ij kam̧m̧oolol kōn rūkaki eo ekar kūr eō bwe in juon rūkatak em̧m̧an. Ke ikar jino kaļōj, ekar bōd aō ļōmņak kōn jikuuļ āinwōt juon men eo n̄an niknik ie n̄an maron̄ ikkure sport. Juon raan, ālkin riiti juon peba ikar je, rūkaki eo aō ekar jiron̄ eō ekar ļōmņak ikar juon ekapeel ilo ņa mejļan men ko reppen. Em̧ool ikar jab jeļā ta kar meļeļe in. Liin ekar ba bwe kōn eļapļo̧k kijejeto imaron̄ kar juon rijikuuļ em̧m̧an. Ļōmņak jab in ekar jab pād ilo aō ļōmņak. An itok limoin, rōjan̄, im karuwainene ekar ukōt jeļāļo̧kjeņ eo aō im ekar kōjeraam̧m̧an mour eo aō.

Bar juon pedped in katak ekkar n̄an karuwainenetok Jetōb Kwojarjar ej n̄an kwaļo̧k katak ko rem̧ool. Menin ej meļeļe in bwe ekkatak gospel eo ad im kōmeļeļeik rej ekkejel ilo naan eo an Anij im bwe jeban kōmejāje ak kajjimalele ta eo Irooj ekar jab kwaļo̧k. Ijello̧kin, jen kalimjōk pedped in katak ko raorōk im indeeo, ko rej kōtļo̧k an Jetōb eo kam̧ool kōn m̧ool eo. Bar juon alen, jej aikuj ļoor waanjon̄ok eo an Rilo̧mo̧o̧r. E ekar ba, “Naan in katak eo Aō, e jab Aō, an an Eo ear jilkintok eō.”

Katak eo em̧ool ej loe ilo jeje ko rekwojarjar im katak ko an rikanaan ro raan kein. Kōketak eo an Irooj n̄an ekkatak jeje ko rekwojarjar juon make im āinwōt baam̧le ko im n̄an etal n̄an jar kajjojo wiik n̄an ekkatak gospel eo An ej letok juon m̧ōņōkjān jerbal kabwilōn̄lōn̄ n̄an katak An katak im ron̄ Ainikien. Jej lin̄ūr jeje ko rekwojarjar n̄an meļeļe bwebwenato eo, pedped in katak ko rej katakin, im jerbal eo an m̧ool kein ilo mour ko ad. E juon kōjeraam̧m̧an n̄an bōk jej ko rekwojarjar ilo peid. Pijaikļo̧k an Adam im Iv, Abanadai, akRūkaki Ļapļap eo Jisōs Kraist, lowaj m̧ōko im̧ōmi ak kūlaaj ko n̄an katakin kōj. Ekōjkan ad maron̄ kwōjkwōj ioon naan ko an Anij. Kōn kijejeto ejjab jokod, jemaron̄ katak n̄an meļeļe im iakwe jeje ko rekwojarjar im lōke bwe ewōr ippāer uwaak ko n̄an kajjitōk ko an jetōb.

Ekar wōr juon iien m̧okta jān am kar m̧are ke lio pāleō, Kristi ekar pen n̄an en̄jake iakwe eo an Jemādwōj Ilan̄ im n̄an meļeļe karōk eo An n̄an e. Ke liin ekar jar kōn tōl, juon en̄jake ekar itok bwe liin ej aikuj etal n̄an institute, kōn menin liin ekar jpepe n̄an deļo̧n̄e juon kūlaaj an Kallim̧ur Ekāāl. Wāween eo rūkaki in institute eo an ekar katakin jān jeje ko rekwojarjar, em̧ool wāween eo ekar jibwi, ekar kwaļo̧k ewi jon̄an an kar iakwe naan eo an Anij. Ke liin ekar pād ie, Jetōb Kwojarjar eo ekar unoojdikdik n̄an e bwe ewōr juon men ilo jeje ko rekwojarjar me ekar aikuji. Iakwe eo an rūkaki eo an n̄an jeje ko rekwojarjar im im̧we ko an Jetōb Kwojarjar ekar ejaake juon ikdeelel ilo liin n̄an jino m̧ool in ekkatak naan eo an Anij—eo ekar erom juon iaļ to̧o̧n wōt an mour an oktak em̧wilaļ im jerbal ekwojarjar.

Āliktata, āinwōt an Katakin ilo Wāween eo an Rilo̧mo̧or ej elmakote, ad katakin im katak aikuj aolep iien pedped ioon Jisōs Kraist. Jemaron̄ kōnono emakijkijļo̧k im kautiejļo̧k kōn E im pukot elōn̄ļo̧k iien ko rem̧m̧an n̄an kwaļo̧k naan in kam̧ool, kam̧m̧oolol, im iakwe n̄an E. Jekdo̧o̧n ta jekjek eo, ilo ad keememej E, jemaron̄ kōm̧m̧an bwe “Jetōb eo an en maron̄ pād [ippād].”

Juon wāween n̄an likūt Jisōs Kraist ilo ioļapļap in katak eo ad ej n̄an kōmejajaik bwe E ej waanjon̄ak eo eweppān, kobaik im kwaļo̧k kōn aolep pedped an gospel eo. Jekdo̧o̧ņ n̄e E ejjab kajju keidi n̄an juon bwebwenato an jeje ko rekwojarjar, jej maron̄ in wōt kōnono kōn E āinwōt waanjon̄ak eo an pedped eo kar katakin. Jemaron̄ baj kajjitōk wōt, “Kwomaron̄ ke ļōmņak kōn juon iien ke Jisōs Kraist ekar kwaļo̧k pedped in?”

Jemaron̄ barāinwōt pedped ilo E kōn katak taitōļ ko An, jerbal ko, im bōnja ko, kappukot jab n̄an katak wōt ta eo E ekar kōm̧m̧ane ak meļeļeļo̧k wōn E. N̄an waanjon̄ak, n̄e ekkatak pedped eo an ukweļo̧k, ej aorōk n̄an meļeļe ekōjkan ukweļok. Ak ej barāinwōt aorōk n̄an keememej ta eo Jisōs Kraist ekar kōm̧m̧ane n̄an kōm̧m̧an bwe ukweļo̧k en pidodo im n̄an meļeļe ta eo ukweļo̧k ej katakin kōn E, kōn m̧ool in paotok eo im m̧wil ko An. Ta eo iien eo ad em̧m̧an n̄an ukweļo̧k ej ba kōn An iakwe, kijenmej, im jouj, An tōmak ilo kōjatdikdik kwojarjar eo ad, An kōņaan pinmuur kōn jerawiwi ko ad, im lan̄lōn̄ eo E ej lo ilo jeorļo̧k bōd? Im meļeļe taitōl ko An—ko āinwōt Lamb an Anij, Ripinmuur, im Taktō—ej jipan̄ kōj lo bwe ukweļo̧k ej An kūr n̄an karreo, oktak, im kemour kōj. Pedped ioon ta eo E ekar kōm̧m̧ane n̄an kōj im ta eo ej ba kōn wōn E emaron̄ jipan̄ kōj wōr ad “tōmak n̄an ukeļo̧k.”

Iien n̄an iien, emaron̄ jab m̧ōkaj ad lo m̧wil ko an Rilo̧mo̧o̧r kar kōllaajraki ilo juon bwebwenato an jeje ko rekwojarjar. N̄an waanjon̄ak, n̄e jej riit kōn an Nipai jōk juon wa, jemaron̄ jab pedped wōt ioon Nipai. Ak pedped ioon Rilo̧mo̧o̧r eo emaron̄ jipan̄ kōj lo bwe rekoot in kar jab kōjparoke n̄an katakin kōj kōn em̧m̧an eo an Nipai ak n̄an kwaļo̧k n̄an kōj bōtata eo an Anij—me E ej letok n̄an kōj kajoor n̄an kōjparok kein ko An im lo̧mo̧o̧ren kōj ilo iien aikuj ko.

Jemaron̄ bar pedped ioon jerbal eo eļap an Jisōs Kraist ilo karōk in m̧ōņōņō eo eweppān an Jemādwōj Ilan̄. Emaron̄ ukōt iaļ in mour ko ad n̄an lo jekjek ko ad kōn māj ko mejān karōk eo indeeo an Anij ijello̧kin lo karōk eo kōn māj ko mejān kanniōk an jekjek ko ad. Gospel eo ejjab juon laajrak in kajjitōk ko, ej naan eo em̧m̧an bwe Jisōs Kraist ekar anjo̧ ioon jerawiwi im mej. Ej kōn bōk jouj eo An ekabwilōn̄lōn̄ kōn kōjparok bujen ko ad ippān Anij bwe jemaron̄ mour lan̄lōn̄ kiiō im kōppopo n̄an mour eo ippān Jemād ilo Lan̄ ilo indeeo. Ilo ad katak n̄an lo Jemādwōj Ilan̄ im Rilo̧mo̧o̧r ilo jeje ko rekwojarjar, enaaj em̧m̧anļo̧k ad jeļā Er im jenaaj lo iakwe eo Aer im kareel eo emakijkijļo̧k im kajoorļo̧k ilo mour ko ad make.

Inaaj iien otemjej keememej Jetōb eo ikar en̄jake āinwōt juon jodikdik ke rūkaki eo am ekar katakin kōn raan ko āliktata in mour eo an Rilo̧mo̧o̧r eo. Ekar jipan̄ kōm lo aorōk eo an iien ko ilo ruum̧ eo ilōn̄, Gethsemane, Golgotha, im lōb eo ejjeļo̧k kobban. Ekar kwaļo̧k kam̧m̧oolol eo an em̧wilaļ n̄an Rilo̧mo̧o̧r eo im ikdeelel eo an n̄an ļoor E. An katakin ekar juon kūr n̄an Jetōb Kwojarjar eo n̄an kam̧ool kōn Jisōs Kraist. Im Jetōb eo ikar en̄jake ilo kūlaaj eo ekar kam̧wilaļļo̧k tōmak eo aō im kōļapļo̧k aō iakwe im kam̧m̧olol n̄an Rilo̧mo̧o̧r. Kareel eo an rūkaki jab eo ekar pād wōt ippa aolepān aō mour. Āinwōt kar ba kōn bar juon rūkaki, “Jemaron̄ kōm̧āņāņ peid kōn kijeek in an tōmak.”

Ilo m̧ōko m̧ōd im kweilo̧k ko ilo kabun̄ in, ilo ad pedped ioon Jisōs Kraist, katakin katak eo An, im niknik katak, jej karuwaineneiktok Jetōb Kwojarjar eo n̄an kam̧wilaļļo̧k ad tōmak ilo Jisōs Kraist im jipan̄ kōj eromļo̧k āinwōt E, eo ej jibadbad eo an aolep katakin im katak an gospel eo.

Ij kam̧m̧oolol kōn rūkaki ro ilo mour eo aō, jān ro jinen im jema rem̧m̧an im ritōl ro ijo jokwe ie im rūkaki ro n̄an em̧m̧aan im kōrā ro me raar kūr n̄an katakin im kam̧ool jān pulpit in, ro rej jipan̄ kōj jeļā im ļoor Jisōs Kraist. Im ij kam̧m̧olol kōn Jetōb Kwojarjar, tutor eo eweppān. Ej kōn Jetōb Kwojarjar bwe ijeļā bwe Jemādwōj Ilan̄ ej iakwe kōj im ewōr juon an karōk eweppān n̄an kōj, bwe Jisōs ej riKraist eo, Rilo̧mo̧o̧r im Ripinmuur eo an laļ, im bwe An gospel im Kabun̄ em̧ōj aer jepļaaktok. Ij kam̧m̧oolol ilo kam̧ool kōn men kein ilo etan Jisōs Kraist, amen.