Ejeraaṃṃan Ro Rej Kōm̧m̧an Aenōṃṃan

Pijaikļo̧k ippa kwoj juon jodikdik ilo Kaperneum, epaake Lom̧aļo in Galili, ilo iien jerbal eo an Jisōs Kraist. Naan eo kar ajeeded kōn juon rabbi—juon rūkaki—eo naan eo an ekar kan̄ōļo̧k jarlepju ko. Ro riturud rej karōk in etal n̄an juon toļ ej kalimjōkļo̧k lojet n̄an ron̄jake E.

Kwoj koba ippān ro jet ilo iaļ būn̄aln̄al eo ļo̧k n̄an Galili. Ke kwōj tōpraļo̧k ijo, juon jarlepju eļap ekar kukļo̧k n̄an ron̄jake Jisōs ekabwilōn̄ eok. Jet rej unoojdikdik “Messaia.”

Kwoj ron̄jake. Naan ko An rej un̄ur būruōm̧. Ilo iaļ eo n̄an jikūm̧, kwoj kāālet ikōn̄ ioon bwebwenato.

Kwoj kejakļo̧kjen kōn men ko rekabwilōn̄lōn̄—men ko me reļļapļo̧k wōt jān kien Moses. Ekar kōnono kōn oktakļo̧k n̄an jepe eo juon im iakwe rikōjdāt ro am̧. E kar kallim̧ur, “Em̧ōņōņō aolep rikaenōm̧m̧an, bwe naaj kūr er ro nejin Anij.”

Ilo lukkuun mour eo am̧, ilo am̧ en̄jake eddo in raan ko reppen—jab jeļā ta im mijak—āinwōt n̄e aenōm̧m̧an ettoļo̧k.

Kwōj irjōtļo̧k, kwoj ikijeļo̧k ke kwōj tōparļo̧k m̧weo m̧ōm̧. Baam̧le eo am̧ ej kuk ippān doon, jemōm̧ ej kajjitōk, “Jiron̄ kōm ta eo kwar ron̄ im en̄jake.”

Kwōj kwaļo̧k ke Ear karuwanene eok n̄an kōtļo̧k bwe meram eo am̧ en romaak im̧aan ro jet, kappukot n̄an jim̧we wōt jekdoon rej kaen̄taan eok. Ainikiōm̧ eudiddid ilo am̧ im̧ōk: “Em̧ōņōņō aolep rikaenōm̧m̧an, bwe naaj kūr er ro nejin Anij.”

Kwōj kajjitōk, “Imaron̄ ke lukkuun erom juon rikaenōm̧m̧an n̄e laļ in elim̧otak, n̄e būruō eobrak kōn mijak, im n̄e aenōm̧m̧an āinwōt ettoļo̧k?

Jemōm̧ ej arromeļo̧k jinōm̧ im uwaak ilo mera, “Aaet. Jej ijjino ilo jikin eo ettā tata—būruōd. Innām ilo m̧oko m̧ōd im baam̧le ko ad. Ilo ad kaminene ijo, kaenōm̧m̧an emaron̄ ajeeded n̄an jukjuk in pād ko ad.”

Kōm̧ōkaj m̧aantak 2,000 iiō ko. Aikuj jab pijaikļo̧k—en̄in ej lukkuun mour eo ad in. Men̄e eddo ko kar en̄jake jān diktak in epepen eo rainin eoktak jān ko ke kwar jodikdik ilo Galili—jepel bōro, ukot kwojarjar n̄an men ko an laļ, ukot nana, illu lowaan iaļ, illu, im men ko wōj jān social media—epepen kein jim̧or rej jelm̧ae poktak in manit im poktak.

Kam̧m̧oolol, jodikdik ro ad rej bar epaakeļo̧k Kwaļo̧k eo-ioon-Toļ ko aer—jemenere, N̄an Kōkajoorļo̧k Jodikdik ro kweilo̧k ko, im Itok, Ļoor Eō Ijin rej bōk ejja kūr ko wōt jān Irooj: n̄an rome meram ko aer im̧aan ro jet, kappukot n̄an jim̧we jekdoon n̄e kaen̄taan er, im iakwe rikōjdat ro aer.

Rej bar bōk naan in kōketak ko jān rikanaan ro remour an Jepļaaktok eo: “Rikaenōm̧m̧an ro Jej Aikuji.” Jab errā ijelo̧kin jab kōņaan errā. Ukōt iakwelel im juwa n̄an jeorļo̧k bōd im iakwe. Kalōk buruon ippān doon im meļeļe, ejjab men ko rej kōm̧m̧an kalijekļo̧k im jepelļo̧k. Ilo ejja kallim̧ur eo: “Em̧ōņōņō aolep rikaenōm̧m̧an, bwe naaj kūr er ro nejin Anij.”

Bōro ko būruōn diktak in epepen eo rainin rej obrak kōn juon naan in kam̧ool kōn Jisōs Kraist im juon kōjatdikdik n̄an jekļaj. Ijoke rej bar kajjitōk, “Imaron̄ ke lukkuun erom juon rikaenōm̧m̧an n̄e laļ eo ej pād ilo aitwerōk, būruō ej obrak kōn mijak, im anenōm̧m̧an āinwōt ettoļo̧k?”

Uwaak eo epan̄ijn̄ij ej aaet! Jej kautiej naan ko an Rilo̧mo̧o̧r: “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. … En jab pok būruemi, im en jab lōļn̄o̧n̄.”

Rainin, kaenōm̧m̧an ej ijjino ilo jikin eo ettā tata—ilo būruōd. Innām ilo m̧ōko im baam̧le ko ad. Ilo ad kamminene ijo, kaenōm̧m̧an naaj ajeeded n̄an ro rūturid im jukjuk in pād ko.

Jen kaitokļo̧k wōt ad ļōmņak kōn jikin kein jilu ko juon rikwojarjar kein ej “kōm̧m̧an aenōm̧m̧an.”

M̧oktata ej ilo būruōd. Juon men ealikkar kōn jerbal eo an Kraist ej kwaļo̧k wāween An kar kan̄ōltok ajri ro n̄an E. Menin ej kwaļo̧k uwaak eo. Kalimjōkļo̧k būruōn kaenōm̧m̧an eo erreo an juon ajri emaron̄ juon kakōm̧kōm̧ n̄an būruōd. Erkein wāween an jet ajri in būraimere uwaake “Ilo wāween rōt jej juon rikaenōm̧m̧an?”

Ij kwaļo̧k uwaak ko aer kajju jān būruier! Luke ekar ba, “Jipan̄ ro jet aolep iien.” Grace ear kwaļo̧k aorōk in jeorļo̧k an doon bōd, mekarta n̄e āinwōt ejjab jejjet. Anna ear ba, “Iar lo juon eo ejjeļo̧k ej ikkure ippan, innam iar etal in ikkure ippan.” Lindy ej ļōmņak bwe n̄an juon rikaenōm̧m̧an ej ilo jipan̄ ro jet. “Innām kwōj lem̧aanļo̧k n̄an ro jet. Enaaj wōnm̧aanļo̧k wōt.” Liam ear ba, “Jab bōro nana n̄an armej, jekdoon n̄e renana n̄an kwe.” London ear ba, “N̄e juon armej ej kakūtōtōik eok ak nana n̄an kwe, kwoj ba, ‘Jouj bōjrak.’” Trevor ear kileļo̧k, “N̄e epād wōt juon donut im aolep rekōņaan, kwoj ajeej.”

Uwaak kein an ajri rein rej kein kam̧ool n̄an n̄a bwe jej aolep ļoktak kōn kōkā ko n̄an jouj im meanwōd. Gospel eo an Jisōs Kraist ej kaorōk im kobaik m̧wil kein rekwojarjar, ekoba kaenōm̧m̧an, n̄an lowaan būruōf, kōjeraam̧m̧an kōj ilo mour in im eo tok juon.

Kein karuo, kalōk kaenōm̧m̧an ilo m̧oko m̧ōd ilo kōjerbal jon̄ak eo an Irooj n̄an im̧we jemjerā ko ad ippān doon: jeļā ņae, meanwōd, meoeo im ettā bōro, im jān iakwe jab ankilaan riab.

En̄in juon bwebwenato me ej kwaļo̧k wāween an juon baam̧le kar kōm̧m̧an aenōm̧m̧an ilo men ko an baam̧le, mour kōn pedped kein.

Ajri ro ilo baam̧le in ar jab em̧m̧an jemjerā eo aer ippan juon rūtto ilo baam̧le in me em̧m̧ōļkaro, kōjekdoon armej, im lej. Ajri ro, metak im kūtōtō, kar jino ļōmņak eļan̄n̄e jekjek eo de in n̄an wōnm̧aanļo̧k ej n̄an kōm̧m̧an ejja kein m̧wil rōtkein.

Juon jota baam̧le eo rara kuk tok im kōnono kōn ao in inepata eo im an jelet aolep. Im juon ļōmņak ar walōn̄tak—ejjab baj uwaak wōt, ak juon kein kamelmel.

Ijello̧kin ukōtļo̧k ilo ikōn̄ im ukōt nana n̄an nana, ajri ro renaaj kōm̧m̧ane juon men jab kōtmane: ren kar ukōtļo̧k ilo jouj. Ejjab dāpdep illu n̄an kōmanit, ak juon lutok leplep in naan jouj im kōm̧m̧an ko rem̧m̧an, jekdoon ta jekjek in kōm̧m̧an n̄an kwe. Aolep raar errā in kōm̧m̧ane menin ilo jidik iien, ālkin renaaj kuk tok n̄an etale.

Mekarta jet raar abōb ilo jino in, raar kallim̧ur n̄an ļoor karōk eo kōn bōro m̧ool.

Ta eo ekar waļo̧k tokālik ekar kabwilōn̄lōn̄.

Ekar meraļo̧k aer kōnnaan ippān doon. Ettōn̄dikdik ko raar bōk jikin kōrraat. Rūtto eo, juon iien kar ettoļo̧k im lāj, ekar jino oktak. Ajri ro, kajoor kōn kāālet eo aer n̄an tōl kōn iakwe, kar lo m̧ōņōņō ilo oktak eo. Oktak eo ekar lukkun ļap ke raar jab aikuji kweilo̧k in etale eo aer. Jouj ar jerbal.

Ilo iien, jemjerā ko reool raar ejaak, im kar lōn̄aj aolep. N̄an erom rikaenōm̧m̧an, jej jeorļo̧k an ro jet bōd im kalōk ro jet ijelo̧kin jiped laļo̧k er.

Kajilu, aenōm̧m̧an ilo ukjuk in ād ko ad. Ilo iien jorāān ko an Pata eo Kein Karuo, Elder John A. Widstoe ear katakin: “Wāween eo de in n̄an kaļōk juon jukjuk in pād eo eaenōm̧m̧an ej n̄an kaļōk m̧aan im kōrā ro me rej iakwe im rikōm̧m̧an aenōm̧m̧an. Kajjojo armej, kōn katak eo an Kraist im kabun̄ eo An … ej kabwijer ilo pein make aenōm̧m̧an eo an [aolepen] laļ in.”

Bwebwenato in eaiboojoj an pijaikļo̧k ļōmņak in.

Jet iiō remootļo̧k, ruo em̧m̧aan—juon Muslim imam im juon rūkaki in Rikūrijtin jān Nijeria—raar jutak ijelman doon ilo juon poktak ekametak ikijeen kabun̄. Kajjojo raar en̄taan. Ijoke, jān kajoor in kōmour an jeorļo̧k bōd, raar kāālet in etetal ilo juon iaļ ippān doon.

Imam Muhammad Ashafa im Pastor James Wuye raar erom ro m̧ōtta im kar jab kōtmene rim̧ōttā lo aenōm̧m̧an. Ippān doon, erro kar ejaake juon jikin an ro jān tōmak ko kajjojo iiaio. Kiiō rej katakin ro jet in pinej tarin dike n̄an kōjatdikdik. Āinwōt ruo katten kar kāālet er n̄an Nobel Peace Prize eo, ejjab to raar bōk kōjeraam̧m̧an an Commonwealth Peace Prize eo.

Rein raar rikōjdat m̧okta rej kiiō itoitak ippān doon n̄an kalōk ta eo ear rup, rej rikam̧ool ke kur eo an Rilo̧mo̧o̧r n̄an erom rikaenōm̧m̧an jejjab maron̄e wōt—ak ekajoor.

N̄e jej jeļā aiboojoj eo an Anij, innām jej “kom̧ ban kar kōņaan n̄an kōmetak bar juon, ak n̄an mour ilo aenōm̧m̧an.” Ilo kurub in jar ko ad im jukjuk in pād ko, jemaron̄ kāālet in kalimjōk doon āinwōt ro nejin Anij.

Ilo kakkobaba, n̄aij lewaj juon kūr. Kaenōm̧m̧an ej aikuji jerbal—naaj ta menin, n̄an kōj kajjojo, jino jān ilju? Komaron̄ ke kōm̧m̧ane karōk in kaenōm̧m̧an tarrin juon wiik, jilu bun̄tōn?

1. Juon m̧weo ejjeļo̧k tarpok ie: N̄e akweel ej jino, bōjrak im bar jino kōn naan im kōm̧m̧an ko rejouj.

2. Kalōk iiaio ko ilo Digital: M̧okta jān post, reply, jeje online, kajjitōk? Menin enaaj ke kalōk meļeļe ak iiaio ko rem̧m̧an?” N̄e jaab, bōjrak. Jab jilkinļo̧k. Ijelo̧kin, jeer men ko rem̧m̧an. Kajeeded aenōm̧m̧an ijello̧kin kōjdat.

3. Kōkm̧anm̧anļo̧k im kōjepļaaktok: Kajjojo ro uwaan baam̧le remaron̄ pukotļo̧k jemjerā ko n̄an joļo̧k bōd, jerbal in karejar, kōkm̧anm̧an, im kōjepļaaktok.

Emootļo̧k de jejjo allōn̄ jān iien eo ikar bōk juon im̧we ekajoor eo ekar tōl n̄an enaan in: “Em̧ōņōņō Aolep Rikaenōm̧m̧an.” N̄an kōjem̧ļo̧ke, imaron̄ ke kwaļo̧k im̧we ko raar un̄ur būruō kōn menin.

Kaenōm̧m̧an ej juon m̧wil an Kraist. Rikaenōm̧m̧an ro jet iien watōk er jajeļo̧kjeņ ak m̧ōjņo̧—ilo aolep jait ko. Ijoke, juon rikaenōm̧m̧an ejjab m̧ōjņo̧ ak ekajoor ilo wāween eo me laļ in emaron̄ jab meļeļe kake. Kaenōm̧m̧an ebōk peran im jeļā ņae ak ejjab kajejtokjen pedped. Kaenōm̧m̧an ej kwaļo̧k bōro ko repeļļo̧k, jab kōlmenļo̧kjen ko rekilōk. Ej kōm̧m̧an ad kepaake bar juon kōn pa ko peid rej erļo̧k, jab kilōk. Kaenōm̧m̧an ejjab juon men ekāāl. Jisōs Make ear katakin, jimor ilo Baibōļ im ilo Bok in Mormon. Kaenōm̧m̧an kar katakin jān rikanaan ro raan kein jān raan ko m̧okta an Jepļaaktok eo jekdo̧o̧n n̄an rainin.

Jej kakūrm̧ool eddo eo ad ekwojarjar āinwōt ajri ro nejin Jemedwōj Ilan̄ ilo ad kajjieon̄ erom rikaenōm̧m̧an ro. Ij kam̧ool kōn Jisōs Kraist, eo ej Irooj in Aenōm̧m̧an, Nejin Anij eo emour, ilo etan Jisōs Kraist, amen.