Keememej Sip ko

Kraist ej Seperd eo Em̧m̧an. Kajjojo sip in oror eo ej aorōk n̄an E. Ej kōmeļeļeiki jon̄ak eo jej aikuj seperd im katakin kōj jān naan im kōm̧m̧an ko rej bwinjān juon seperd em̧m̧an, ekoba jeļā kajjeen sip eo am̧ kōn etan, iakwe er, kappukot ro rej jōbwābwe, naajdik er, im eļaptata, tōl im kōjepļaak er bar juon alen n̄an kapijuknen eo. Ej kōtmāne kōj n̄an kōm̧m̧ane ejja wāween eo wōt An n̄an seperd e ro jet.

Jemaron̄ ekkatak eļap kōn wāween jerbal in karejar eo an Irooj jān rikanaan eo etto—im rilale sip eo em̧m̧an—Moronai. Ekar mour ilo tōre ko relukkuun eppen, ekar ejjeļo̧k ippān kōjeraam̧m̧an ko jān cell phone ko, kam̧putōr ko, im intōrnōt. Ak ekar tōlarōk n̄an keememej im jeļā kōnsip eo. Ewi wāween an menin tōprak? Jen lale wāween jerbal in ilo Moronai 6. Ijin jej riit bwe membōr ro “rekar bōnbōn ilubwiljin armej ro an kabun̄ eo an Kraist; im etaer kar būki, bwe ren maron̄ keememej im naajdik er jān em̧m̧an eo an naan in Anij, n̄an kōjparok er ilo wāween ejim̧we. … Im Kabun̄ eo eaar kwelo̧k emmakijkij, n̄an jitlo̧k im n̄an jar, im n̄an kōnono ippān doon kōn em̧m̧anļo̧k eo an jetōb ko aer” (Moronai 6:4–5; eoon eo eaorōk kar kobaiktok).

N̄an Moronai, eaar baj wōt kōn armej—āt ko! Ekar kōjerbale pedped in katak eo kōn bōnbōn im etale bwe aolep naaj maron̄ keememej er. Jabdewōt eo ekar en̄taan ak jōbwābwe kar kile er, kōtļo̧k an Armej ro Rekwojarjar kōnono kōn em̧m̧anļo̧k eo aer ilo ko̧o̧njeļ ko. Āinwōt seperd eo ekar etal jān ratimjuonn̄oul ratimjuon (rekōjparok im jokne, ijeļā) ilo̧k ilo̧kōnļo̧k eo ejako (lale Luk 15:4–7), em̧ōj kar kajjitōk ippād bwe jen āinwōt jeļā kōn sip ko ad—n̄an jeļā im keememej im ilo̧k im kōmm̧an āinwōt.

Āinwōt juon ritōl an mijen ilo India, ij keememej ke kar kajjitōk ippān juon branch būreejtōn edik kōn jet ian kōttōbar ko an n̄an iiō eo ej pedo tok: “Ewōr jete em̧m̧aan ro kwonaaj kōpooje er n̄an bōk Priesthood eo an Melkisedek?” Uuwaak eo an em̧ōkaj ekar “Jiljilimjuon!”

Ikar kōļmenļo̧kjeņ jān ia eo jab jeļā kake ekar maron̄ letok lukkuun kain nōm̧ba eo! Mokta jān aō maron̄ uwaak, ekar kwaļo̧ke juon m̧ōttan peba ewōr nōm̧ba ko juon n̄an jiljilimjuon kar jeiki itulaļ in rājet. Ļain ko ļalem m̧okta ewōr āt ko ioer—lukkuun armej ro me e im doulul eo an elder ro renaaj kar etal im karuwaineneik im rōjan̄ er n̄an bōk kōjeraam̧m̧an ko an priesthood eo ilo mour ko aer. Aaet, ikar aikuj kajjitōk kōn ļain ko ejjeļo̧k kobbāer jiljino im jiljilimjuon. “O, Būreejtōn,” ekar ba, kōjjiboululi bōran, “em̧ool kōm̧ naaj peptaiji diktata ruo em̧m̧aan ilo jinoin iiō eo wōn ro remaron̄ bōk priesthood eo ilo jem̧ļo̧kin iiō eo.” Ritōl in em̧m̧an ekar meļeļe pedped in bōnbōn an etale im kile.

Kraist ekar ejaake Kabun̄ eo An ilo juon wāween eo me enej maron̄ pen n̄an meļo̧kļo̧k juon jetōb, bwe kajjojo ej aorōk Ippān. Aolep kajjojo armej ilo juon ward, mekarta iiō eo aer ak nememein armej rot, ewōr jejjo aer jerbal in bōk eddo—seperd ro—ro rej eddoin oņaake er, kōn keememej. Juon likao, n̄an waanjon̄ak, em̧ōj kar jitōn̄ n̄an juon bisoprik, rijerbal in karejar m̧aan ro, rikakpilōklōk rūtto ro an jodikdik, rūkaki in jemenere ro, būreejtōnji ko an doulul, innām jet—aolep rej jerbal āinwōt ok in kōjparok ko, em̧ōj kapene im katotoik ilaļ bwe jodikdik ro ren bauri eļan̄n̄e ej wōtlo̧k. Aaet eļan̄n̄e juon ok ejim̧we likwōje ilo jikin, likao eo enaaj maron̄ lo̧mo̧o̧r, kile, im keememej e. Im aaet, emakijkij ad loe juon ok ejjab pād ilo jikin. Armej ro rej jōbwābweļo̧k n̄an tab in marok ko—im ejjeļo̧k juon ej kile. Ewi wāween ad maron̄ seperd ro rem̧m̧anļo̧k? Jemaron̄ ekkatak kilen bōnbōn im etale.

Kabun̄ in ej jipan̄ kōj kōn riboot ko im kein jerbal ko n̄an kōm̧m̧ane menin—n̄an keememej. Riboot eo an Kuwōta ej juon waanjon̄ak eļap. Ej kōtļo̧k ad bōnbōn im etale n̄an kajjojo membōr elōn̄ kōttan im n̄an kile ro rej etal im jako ak aikuji jipan̄ im iakwe eo ad. Peba in Action im Laajrak in Intōrpiu eo ej kalikkartok ro rej aikuji ad mijōk er kiiō, barāinwōt Kōm̧m̧ane riboot in armej ro rej Kabwijer Peba in Mālim N̄an Deļon̄e Tampeļ eo im ko jet. Kein jerbal kein an bōnbōn im etale rej kōm̧m̧an ad mijōk wōt armej ro. Wōn ej aikuji juon kūr, juon priesthood advancement ak jipan̄ bōk etan juon baam̧le n̄an tampeļ eo? Wōn eo jemaron̄ jipan̄ e n̄an juon jerbal in mijen? Wōn eo ekar jako ilo allōn̄ in? Kein jerbal kein rej jipan̄ kōj keememej armej ro.

Ikar jeļā kajjeen juon baam̧le jān United State ro rekar bōk juon jerbal ilo Africa. Ilo Jabōt eo aer kein kajuon rekar deļon̄e ļo̧k iunit eo de eo an Kabun̄ in ilo laļ eo ijo me rekar m̧ōņōņō in iakiakwe er. Ilo jem̧ļo̧kin jibbon̄ōn̄ eo, kōrā eo pāleen em̧m̧aan eo kar kūri āinwōt būreejtōn eo an Doulul eo an Kōrā ro im ļeo āinwōt ritōl eo an Doulul eo an Likao ro! Ekar kajjitōk ippān juon branch būreejtōn elukkuun m̧ōk ewōr jete likao ro kar ijo. Ritōl in etiljek, kein kajuon membōr ilo baam̧le eo an ekar jitōn̄ļo̧k jikin kwojkwoj eo im ba, “Ruo weo ijeņ.” Em̧m̧aan eo ekar pere, kōn menin ekar bōk juon peba in armej ro ilo branch eo n̄an m̧weo im̧ōn, innām ekar m̧ōkaj an jeļā bwe ekar wōr 20 likao ro ilo peba eo. Ekar ro̧o̧lļo̧k n̄an ippān branch būreejtōn eo im kajjitōk kōn ruo rūm̧m̧an ded ro remaron̄ kōnono ruo kajin n̄an jerbal āinwōt rikakpilōklōk ro an innām ekar jijet ippāer im ļaddik ro ruo n̄an etale āt ko.

Innām rūm̧m̧an ded rein retiljek rekar diwōjļo̧k im jerbal. Ium̧win jejjo allōn̄ tokālik, rekar loe aolep ļaddik ro rej pād ilo peba eo. Āt im bar āt, sip ko rejōbwābwe kar bar karuwaineneiktok jān ro m̧ōttāer im m̧at ilo jetōb im kanniōk! Ilowaan juon iiō, ilo jabdewōt Jabōt, ekar wōr dettan in 21 likao ro rej pād ilo iien jar. Lukkuun kam̧m̧oolol kōn likao ro rekar bōnbōn im etale.

Juon m̧ōtta jitōn bōro, āinwōt juon rijikuuļ em̧ōj an kadiwōjļo̧k, ekar em̧m̧akūt ippān baam̧le eo an n̄an juon bukwōn kileplep ilo Amedka n̄an an kam̧ōjļo̧k an jikuuļ. Kar m̧ōkaj aer kūri n̄an lale doulul eo an elder ro. Kōn jidik mijak kōn intōrpiu eo an kein kajuon ippān stake būreejtōn eo, ekar pojak im etal. Ekar jiron̄ļo̧k stake būreejtōn eo bwe ewōr jilu an kōttōbar ko n̄an iiō eo ej pedo tok: (1) 90 bōjāān jerbal in karejar, (2) kōm̧m̧ane juon katak an gospel em̧m̧an kajjojo wiik, im (3) karōke juon m̧akūtkūt em̧m̧an an doulul eo aolep allōn̄.

Ettōn̄ dikdik n̄an eo m̧ōtta, stake būreejtōn in emāletlet ekar kajjitōk, “kwomaron̄ ke letok juon etan juon membōr in doulul eo ejjab niknik eo me kwomaron̄ aikuj jipan̄ bōke n̄an tampeļ eo ippān baam̧le eo an iiō in?” Menin ekar kōm̧m̧an an eo m̧ōtta ilbōk. Ekar lukkuun ļōmņak im wanlōn̄tak kōn juon āt. “Jeiki ijo,” stake būreejtōn eo ekar ba. Innām ritōl in me eminene ekar kajjitōk ejja kajjitōk eo wōt jilu bar kōttan—innām intōrpiu eo ekar jem̧ļo̧k. Likao in ekar diwōjļo̧k jān intōrpiu eo ekar maron̄ ekkatak juon iaan katak ko reļļap kōn ritōl im jerbal in karejar. Ekar ilo̧k n̄an intōrpiu ippān būrookraam̧ ko, katak ko, im m̧akūtkūt ko. Ekar diwōjļo̧k kōn āt ko! Āt kein emān rekar lukkuun erom̧ juon jibadbad eļap ilo jerbal in karejar eo an im an doulul eo an.

Āinwōt juon ritōl an mijen, ikar loļo̧k juon iaan branch ko aō juon jibbon̄ in Jabōt. Ikar kile bwe branch būreejtōn eo ekar kadiwōj kadeļo̧n̄e juon kaat jān bōjo̧ eo an im jeje ioon. Ikar pepe bwe in kajjitōk ippān kake ālkin an mōj jar in ikkilōk eo. Ke kweilo̧k eo ekar jem̧ļo̧k im m̧okta jen aō kajjitōk kōn peba eo, ritōl eo an branch mijen eo ekar ettōrļo̧k n̄an lokatok eo, ijo ekar likūt peba eo ie. Ikar kair in ļoorļo̧k ritōl in elem̧ōņōņō n̄an kweilo̧k eo an kajjojo wiik an branch missionary coordination. Mokta jān aer kar jinoe, ekar kadiwōj nam̧ōjtak peba eo jān bōjo̧ eo an. Ekar obrak kōn etan membōr ro rekar jako jān kweilo̧k in kwojkwoj eo. Ilowaan jejjo minit, kajjojo membōr in ko̧o̧njeļ eo rekar kālet juon āt ak ruo, kallim̧ur n̄an loļo̧k er ejja raan eo wōt n̄an lukkuun lale bwe ekar EMMAN aer pād im kwaļo̧k n̄an er bwe er rej oon̄ kake er. Kiiō en̄in ej bōnbōn im etale.

Ij keememej juon distric, ebōk awa ko in ekeke ilo baļuun jān tampeļ eo epaaktata, ijo kabwijere juon peba in mālim n̄an deļo̧n̄e tampeļ ekāāl ekar juon kōttōbar eaorōktata, mekarta n̄e āinwōt n̄e ej jāmin naaj kōjerbale. Jabōt eo kein kajuon in kajjojo allōn̄, ritōl ro rej kōjerbale kein jerbal ko n̄an etale membōr ro aer em̧ōj aer bōk mennin letok kwojarjar eo. Eļan̄n̄e rekar loe bwe juon peba in mālim n̄an deļo̧n̄e tampeļ eo m̧ōttan jidik ejem̧ļo̧k kitien an jerbal, rijeje eo eutiej emaron̄ jikejuuļi juon intōrpiu n̄an kōkāāle. Armej ro em̧ōj an jem̧ļo̧k kitien kōjerbale peba in mālim n̄an deļo̧n̄e tampeļ eo me ritel ro rekar ko̧o̧njeļ kake, innām kappukot n̄an jipan̄ er ilo aer jepļaaktok n̄an iaļen bujen eo. Ikar kajjitōk ewōr jete membōr ro em̧ōj aer bōk mennin letok kwojarjar eo aer ewōr ippān juon peba in deļo̧n̄e tampeļ eo. Uwaak eo ekar juon kabwilōn̄lōn̄ 98.6 bōjāān. Ke kar kajjitōk kōn ro jiljino me peba in mālim n̄an deļo̧n̄e tampeļ ko aer ekar jem̧ļo̧k kitien, ritōl ro rekar maron̄ kalikkar er kōn etāer im kōmeļeļeiki n̄a kijejeto eo kar kōm̧m̧ane n̄an kōro̧o̧ļtok er!

Jejjo iiō ko rej m̧ootļo̧k, baam̧le eo aō rekar bar em̧m̧akūt tok n̄an United States. Kōm̧ kar m̧ōņōņō in etal n̄an m̧ōnjar eo ijin ālkin 26 iiō ko rekabwilōn̄lōn̄ ilo iunit ko reddik im remakeļo̧k iaer. Kar kūr eō āinwōt juon ward mijenede. Ekar wōr juon am ward mijen ritōl eo em̧m̧an im kar kōm̧m̧ani elōn̄ men ko rekam̧ōņōņō im ej katakin armej ro rem̧m̧an. Ikar kajjitōk bwe in etal n̄an kweilo̧k eo an ward ko̧o̧njeļ eo n̄an alooje im bōk aer jipan̄ kōn ro m̧ōttāer rekar jerbal ippāer. Ekar ļo̧kjenaō ke aolep rekar kōnono kōn juon m̧akūtkūt an ward ekar pojak in kōm̧m̧an. Ikar kepaake ritōl eo an ward mijen eo ālkin im lale ippān bwe ekar ejjeļo̧k an iien n̄an an bar ro̧o̧ltok im riboot kōn armej ro am. Uwaak eo an? “O, ijjab kijon̄ riboot.”

Ilo keidi ippān juon kweilo̧k an ko̧o̧njeļ an branch ilo Lahore, Pakistan, me ikar pād ie jejjo wiik ko rej m̧ootļo̧k. Kurub jidikdik in edik rekar jijet ipeļaakin juon tebōļ jidikdik, im aolepāer rekar kōnono kōn armej ro. Āt ko. Kajjojo ritōl ekar riboot kōn jerbal in bōk eddo eo aer im kajjojo armej im baam̧le bwe er rekar kea kake. Aolep rekar bōk juon iien n̄an kobaikļo̧k ļōmņak ko kōn wāween ko rem̧m̧antata me remaron̄ in kōjeraam̧m̧ane ro rekar kōnono kaki. Karōk ko rekar kōm̧m̧an im jerbal ko kar liļo̧k. Ej juon katak eo em̧m̧an ilo bōnbōn im etale kōn āt jān ro jeid im jatid rej membōr ro jinoin tata ilo baam̧le ko aer.

Ilo Kabun̄ eo an Jisōs Kraist, jekar bōk kōmeļeļe jān rikanaan ro ad m̧okta im raan kein—im jān jon̄ak eo kar kōm̧m̧ane jān Rilo̧mo̧o̧r eo—ewi wāween ad jerbal in karejar. Jej bōk āt ko, jej keememeji, im jej ko̧o̧njeļ kaki kōn em̧m̧anļo̧k eo an jetōb ko. Ritōl ro rej kōm̧m̧ane menin jāmin m̧aat aer unin kōnono ilo peba in kweilo̧k eo aer ilo kweilo̧k in ko̧o̧njeļ ko aer! Pedped in katak an bōnbōn im etale rej jerbal. Ej wāween eo an Irooj. Jemaron̄ kōm̧m̧an em̧m̧anļo̧k. N̄an Anij, eo ekar kōm̧anm̧an laļ ko im kiene aolepān, jerbal in—jerbal im aiboojoj eo An—ej lukkuun aorōk. Im ej aikuj in bar n̄an kōj wōj kajjojo, āinwōt kein jerbal ko ilo Pā ko Pein ilo jerbal in ekabwilōn̄lōn̄ an lo̧mo̧o̧r im ijo eutiejtata. Kabwilōn̄lōn̄ ko ilo mour ko an armej ro rem̧ool renaaj tōprak eo. Ilo etan Jisōs Kraist, amen.