Kōm̧m̧ane Ijo Kuņaam̧ kōn Aolepān Būruōm̧
Lōke Rilo̧mo̧o̧r eo im bōk koņaam̧,ilo kijenmej im tiljek, ilo kōm̧m̧ane ijo koņaam̧ kōn aolepān būruōm̧.
Iiō eo ļo̧k ilo juon tūreep n̄an Europe, ikar loļo̧k jikin kar jerbal eo aō etto, Lufhansa German Airlines ilo Frankfurt Airport.
N̄an kammineneik pilot ro aer, rej kōjerbal jejjo kilen kōjerbal full-motion flight simulator ko me remaron̄ bar ejaki enan̄in jabdewōt jekjek ko rem̧m̧an im reidin̄ lo juon flight. Ilo iiō ko rellōn̄ aō āinwōt juon kapen in baļuun, ikar aikuj in kadedeļo̧k juon teej in ekāke ilo juon flight simulator aolep jiljino allōn̄ n̄an bōk wōt juon pilot license ekāāl. Ij keememej iien n̄ūrbōktak im inepata ko reļļap bōtaab barāinwōt en̄jake eo kōn tōprak eo ālkin pass e test eo. Ikar jodikdik wōt im iakwe idajon̄jon̄ eo.
Ilo loļo̧k eo aō, juon iaan executive ro an Lufthansa ekar kajjitōk ippa eļan̄n̄e ikōņaan kajjion̄ bar kelo̧k kōn juon 747 simulator bar juon kōttan.
M̧okta jān an lōn̄ iien aō lukkuun etale kajjitōk eo, ikar ron̄ juon ainikien—em̧m̧an peļļo̧kin āinwōt eo aō make—ba, “Aaet, eļap aō kōņaan.”
Ālkin wōt aō kar ba naan ko, ekar lōn̄ ļōmņak ko raar itok n̄an ļōmņak eo aō. Ebwe an to jān ke ikar ekkāke kōn juon 747. Tōre ko ikar likao wōt im juon kapen eo elōke. Kiiō ewōr juon āt n̄an mour ekkar n̄ane āinwōt juon kar chief pilot. Inaaj ke kajook eō make im̧aan mejān professional rein?
Bōtaab ekar rum̧wij n̄an aō bōjrak, kōn menin ikar jijetļo̧k ilo jea eo an kapen, door peiū ioon jōbwā ko ijeļā kaki im iakwi, im kar en̄jake, bar juon alen, en̄jake in m̧ōņōņō eo an flight āinwōt baļuun kileplep eo kakōtkōt ilo pij eo im kelōn̄ļo̧k imejatotoļo̧k.
Ij m̧ōņōņō in ba bwe flight eo ekar wejepedik, baļuun eo ekar likio wōt, im n̄a barāinwōt.
Mekarta, en̄jake eo ekar kōttāik eō. Ke ikar ilo tōre ko aō, ekkāke ekar juon men eo ilukkuun jeļā kake. Kiiō ekar bōk aolep aō ļōmņak n̄an kōm̧m̧ane men ko im̧aan tata.
Rikaļoor Ej Aikuj Pokake
En̄jake eo aō ilo flight simulator eo ekar juon kakeememej aorōk bwe n̄an jeļā ilo aolep men—men̄e ilo ekkāke, aōņōņ, keke, ak jeļā—ebōk pokake an juon make im kamminene ejjab jokod.
Kwomaron̄ joļo̧k iiō ko bōk juon kapeel ak kōļapļo̧k juon tōļan. Kwomaron̄ buuļ jerbal jon̄an ej erom juon men kwolukkun jeļā kake. Ak eļan̄n̄e kwoj ļōmņak bwe ej meļeļe kwomaron̄ bōjrak jān kamminene im ekkatak, kwonaaj jidik kōn jidik kwoj jerwane jeļā eo im maron̄ ko kwar joļo̧k eļap iien n̄an būki juon iien.
Menin ej jerbal n̄an kapeel ko āinwōt katak juon kajin, kōjan̄jan̄ juon kein kōjan̄jan̄, im katak ekkāke. Ej barāinwōt jerbal n̄an erom juon rikaļoor an Kraist.
Baj likūti, rikaļoor ej aikuj pokake.
Ejjab juon jibadbad waan, im ejjab waļo̧k kōn jide.
Tōmak ilo Jisōs Kraist ej juon mennin letokt, bōtaab bōke ej juon kāālet jeļā kake me ej aikuj juon kallim̧ur kōn aolepān ad “maron̄, ļōmņak im kajoor.” Ej juon kamminene an aolep raan. Aolep awa. Ebōk katak ejjab jokod im kallim̧ur ekije. Ad tōmak, eo ej ad tiljek n̄an Rilo̧mo̧o̧r eo,erom kajoorļo̧k ilo an idajon̄jon̄e ņae jum̧ae eo jej jelm̧ae ijin ilo mour in. Tōmak ej niknik kōnke jej naajdik wōt, jej niknik kōjerbale wōt, im jeban ebbweer.
Ilo bar juon jekjek, eļan̄n̄e kwoj likjab n̄an kōjerbal tōmak im kajoor in kareel eo an kōn jerbale, ej dikļo̧k ad jeļā men ko juon iien jaar kōkwojarjari—dikļo̧k lōke kōn men ko jaar juon iien jeļā rem̧ool.
Kapo ko me maron̄ kar kapo kōj rej ino dikļo̧k aer kamijak im ļapļo̧k aer emejaja.
Naan in kam̧ool eo an inne emaron̄ naajdik kōj ilo wōt juon iien ekadu kitien. Ej aikuj jab jokod an naajdiki n̄an kaururui wōt.
Ilo Kallim̧ur Ekāāl, Rilo̧mo̧o̧r eo ekar katakin kōn juon būrabōļ kōn juon m̧aajta eo ekar leļo̧k n̄an ro rikarejeran juon lōke kwojarjar—jet jāān kar ņa etan tōļan ko. Ro rikarejeran me raar niknik kōjerbal tōļan ko aer raar koorļo̧ki. Eo karejeran me ekar kalbwin tōļan eo an ilo jem̧ļo̧kin ekar luuji.
Katak eo? Anij ej letok n̄an kōj menin letok ko—an jeļāļo̧kjeņ, an maron̄, an iien em̧m̧an—im E ej kōņaan bwe jen kōjerbali im koorļo̧ki bwe ren maron̄ kōjeraam̧m̧ankōj im kōjeraam̧m̧an ro jet Nejin. Menin eban waļo̧k eļan̄n̄e jej door menin letok ko n̄e jej doori ilōn̄ tata in juon rā āinwōt juon trophy me jej nebare iien n̄an iien. Menin letok ko ad rej ļapļo̧k im orļo̧k wōt n̄e jej kōjerbali.
Kwō Kapeel
“Ak Elder Uchtdorf,” kwomaron̄ ba, “Ejjeļo̧k ippa jabdewōt menin letok ko ak tōļan ko—n̄e ejjab, ejjeļo̧k juon me eaorōk.” Bōlen kwoj kalimjōk ro jet me menin leļo̧k ko ralikkar im kabwilōn̄lōn̄ im ebwe am̧ bajjōk kōn keidi. Kwomaron̄ ļōmņak bwe ilo mour eo m̧oktak, ilo raan eo an mennin letok eo eļap im tōļan ļapļap, jekjek eo am̧ ekar āinwōt lukkuun in ajeeded—eļap tata keidi n̄an ejouj eo im lutōk leplep eo an jekjek ko an ro jet.
O, ewi jon̄an aō kōņaan atbakwoj eok im jipan̄ eok meļeļe m̧ool ļapļap in: Kwoj juon armej ejeraam̧m̧an an meram: ajri in jetōb eo nejin Anij ļapļap! Im kwoj bōk ilo kwe juon kōjatdikdik eļapļo̧k jān jon̄an am̧ maron̄ ļōmņake.
Āinwōt poet ro kar je, kwoj itok n̄an laļ in “ļotak n̄an bōktok kwojarjar eo an lan̄”!
Bwebwenato eo m̧oktata ekwojarjar, im barāinwōt jibadbad eo am̧. Kwar likūt lan̄ n̄an itok n̄an ijin, bōtaab lan̄ ejjan̄in ilo̧k jān kwe!
Watōk eok aolep men ijello̧kin bajjōk.
Kwō kapeel!
Ilo Katak im Bujen Ko, Anij ekar kean̄:
“Bbwe elōn̄ mennin letok kein, im n̄an aolep armej kar leļo̧k juon mennin leļo̧k jān Jetōb eo an Anij.
“N̄an jet kar leļo̧k e juon, im n̄an jet leļo̧k e bar juon, [im] bwe aolep ren maron̄ ļapļo̧k kake.”
Jet iaan mennin letok ko ad rej ellaajrak ilo jeje ko rekwojarjar. Elōn̄ iaer rejjab.
Āinwōt an rikanaan Moronai ekar ba, “Jab kaarmejjete mennin letok ko an Anij, bwe er rellōn̄; im rej itok jān ejja wōt Anij in.” Remaron̄ kwaļo̧k er make ilo “elōn̄ iaļ ko … ; bwe ejja Anij in wōt eo ej jerbale men otemjej ilo men otemjej.”
Im emaron̄ m̧ol bwe menin letok ko ad ilo jetōb rejjab aolep iien alikkar, bōtaab ejjab menin edikļo̧k aer aorōk. Imaron̄ ke kwaļo̧k ippāmi jet iaan mennin letok ilo jetōb me ikar kili ippān ekanooj lōn̄ membōr ro ipeļaakin laļ in? Ļōmņak eļan̄n̄e kwaar jeraam̧m̧an kōn juon ak elōn̄ļo̧k menin letok ko āinwōt:
-
Kwaļo̧k tūriam̧o kake.
-
Kile armej ro me jab kile er.
-
Pukot wūn ko n̄an lan̄lōn̄.
-
Juon rikaenōm̧m̧an.
-
Kile mennin bwilōn̄ ko reddik.
-
Leļo̧k naan in nebar ko rem̧ool.
-
Jeorļo̧k bōd.
-
Ukweļo̧k.
-
Niknik.
-
Kōmeļeļeik men ko ilo alikkar.
-
Ekkejel ippān ajri ro jet.
-
Rejetake ritōl ro an Kabun̄ in.
Kwomaron̄ jab loe menin letok kein aer waļo̧k ilo ward talent show eo. Bōtaab ij kōjatdikdik kwomaron̄ loi ewi jon̄an aer aorōk n̄an jerbal eo an Irooj im ekōjkan am̧ maron̄ kar un̄ur, kōjeraam̧m̧an, ak em̧ool lo̧mo̧o̧ren juon ajri nejin Anij kōn menin letok ko am̧. Keememej: “Jān men ko reddik im reļam waan men ko reļļap rej kūrm̧ool.”
Kōm̧m̧ane Ijo Kuņaam̧ Edik
Ro jeiū im jatū jitōnbōro, ro m̧ōtta, ij jar bwe Jetōb eo enaaj jipan̄ eok kile menin letok ko im tōļan ko Anij ekar litok n̄an kwe. Innām, jen, āinwōt ro rikarejeran Irooj retiljek ilo būrabōļ eo, kōļapiļo̧k im kōdepakpakiļo̧k.
Raan eo enaaj itok n̄e jenaaj jutak im̧aan Jemād eo ilo Lan̄ etūriam̧o kake n̄an leļo̧k juon ļo̧o̧k in eddo eo ad. E enaaj kōņaan jeļā ta eo jaar kōm̧m̧ane kōn menin letok ko E ekar litok n̄an kōj—eo eļap tata, ekōjkan ad kar kōjerbali n̄an kōjeraam̧m̧an ro Nejin. E ejeļā wōn lukkuun kōj, wōn eo kar ļōme kōj n̄an erom, im kōn menin An kōtmene kko n̄an kōj rōutiej.
Bōtaab E ejjab kōtmenbwe jen bōk jet ļamļam ko reļļap, rekabwilōn̄lōn̄, ak tōrjan jon̄an n̄an tōparļo̧k ijōņ. Ilo laļ in E ekar ejaake, eddōkļo̧k ej waļo̧k jidik kōn jidik im kōmaanwa—ak barāinwōt jokkun wōt juon im kije.
Keememej, ej Jisōs Kraist eo me em̧ōj kadede an kar kōm̧m̧ane ijo eļap tata ke E ekar anjo̧ ioon mej im jerawiwi.
Ijo kuņaad ej n̄an ļoor Kraist. Ej ijo kuņaad n̄an oktakļo̧k jān jeraiwiw ko ad, oktakļo̧k n̄an Rilo̧mo̧o̧r eo, im etetal ilo iaļ eo An, juon bun̄tōn ilo juon iien. Ilo ad kōm̧m̧ane menin, ilo niknik im tiljek, āliktata jej joļo̧k tomede ko an jab wānōk ko im bōd ko im jidik kōn jidik erreoļo̧k, m̧ae raan eo eweppān n̄e jenaaj weppān ilo E.
Kōjeraam̧m̧an ko jemaron̄ tōpari. Kallim̧ur ko em̧ōj ejaaki. Kōjām ko repeļļo̧k leplep. Ej ad kāālet n̄an deļo̧n̄ im jino.
Ijjino eo emaron̄ dik. Bōtaab ej OK.
Ijo tōmak ej m̧ōjņo, jino kōn juon kōjatkdikdik ilo Jisōs Kraist im ilo An kajoor n̄an karreoik im kōkāāl.
Jemād ej kajjitōk bwe jen kepaak idajon̄jon̄ in an tōmak im rikaļoor ejjab āinwōt rialooj ro bajjōk bōtaab āinwōt rittōmak ro rekije me rej joļo̧k Babylon im rej door būruier, ļōmņak ko, im jibadōkļo̧k Zaion.
Jejeļā bwe kijejeto ko ad make reban maron̄ kōm̧m̧an ad selestial. Bōtaab remaron̄ kōm̧m̧an bwe jen m̧ool im kallim̧ur n̄an Jisōs Kraist, im E emaron̄ kōm̧m̧an ad selestial.
Kōnke kōn ad Rilo̧mo̧o̧r jitōnbōro, ejjeļo̧k juon jekjek me eban wōr men em̧m̧an. Eļan̄n̄e jej door ad kōjatdikdik im tōmak ilo E, ad anjo̧ naaj waļo̧k. E ej kallim̧ur bwe jenaaj bōk An kōkajoorļo̧k, An kajoor, An jouj eļap. Bun̄tōn kōn bun̄tōn, jidik kōn jidik, jenaaj epaakeļo̧k wōt raan eo eļap im weppān n̄e jenaaj mour Ippān im ippān ro rejitōnbōro ilo aiboojojo indeeo.
N̄an tōparļo̧k ijōņ, jej aikuj kōm̧m̧ane ijo kuņaad rainin im aolep raan. Jej kam̧m̧oolol kōn bun̄tōn ko jaar būki inne, bōtaab jejjab bōjrak ijōņ. Jejeļā bwe ej aitok wōt iaļ eo jej ad bōtaab jejjab kōtļo̧k an men in kabbweer kōj.
En̄in ej ņoņņo̧nmej in wōn kōj—āinwōt rikaļoor ro an Kraist.
Ij libjerjer im kōjeraam̧man aolep membōr ro an Kabun̄ in n̄an lōke Rilo̧mo̧o̧r eo n̄an bōk koņaam̧, ilo kijenmej im niknik, ilo kōm̧m̧ane ijo koņaam̧ kōn aolepān būruōm̧—bwe am̧ lan̄lōn̄ en maron̄ obrak im bwe, juon raan, kwonaaj bōk aolep men ewōr an Jemād. Jān menin ij kwaļo̧k kam̧ool ilo etan Jisōs Kraist, amen.