Ol Profet blong God
Blong lisin mo obei long voes blong wan profet hem i impoten tumas blong stap hang strong long evri gud samting kasem Seken Kaming.
Ol dia yut, !yumi gat wan naesfala konfrens sesen! Yumi harem finis trifala Aposol blong Jisas Kraes we i stap laef i bin toktok. !Hem i wan naesfala blesing! Mo bae yumi harem wan moa, we i Elda Henry B. Eyring. !Kaekae long saed blong spirit i stap gohed!
Taem mi toktok las yia, yumi bin lanem olsem wanem blong fesem wol ia tru long eksperiens blong Deved mo Golaeat. ?Tingbaot ol faef ston blong Deved? Tedei bae mi serem wan OlTesteman stori we mi bin ridim taem mi gat semmak yia olsem yufala, mo i mekem mi mi wantem blong kam hiro olsem hem. Baebol i no talem long yumi nem blong hem, be bae yumi singaotem hem woman blong Sunem, from se hemia i nem blong taon blong hem.
Wan dei profet Elisa i stap wokbaot tru long Sunem, mo yumi ridim se long ples ia “wan rij woman i stap, mo hem i [invaetem] profet ya blong i kam kakae wetem hem mo man blong hem. Nao i stat long taem ya, taem profet ya i go … kakae wetem hem mo man blong hem.” Mi tingting long profet Elisa se hem i bin glad long invitesen ia blong kaekae long haos blong woman ia. Hem i bin stap go finis blong samtaem, wan dei woman ia i talem long hasban blong hem se, “Mi mi savegud we man ya we i stap kam long ples ia oltaem hem i tabu, i wan man blong God.”
Woman ia i talem se, “Naoia, mi mi savegud.” Hem i olsem se woman ia i invaetem Elisa i go long haos blong hem be hem i no save se Elisa i wan profet; woman ia i kasem testemoni blong hem tru long Tabu Spirit taem hem i lisin gud long wanem we Elisa i bin talem mo tijim. (!Tingbaot, se i no bin gat pikja long taem ia! Mo i had blong luksave profet tru long fes blong hem nomo olsem.)
Be stori i no stop long ples ia. Wan dei, woman ia i talem long man blong hem, “I gud yumi wokem wan smol rum blong hem antap long ruf* blong haos ya, mo yumi putum wan bed i stap long hem wetem tebol mo jea mo laet. Nao sapos hem i kam visitim yumi, bambae i save stap long hem.”
!Fetful woman ia i wantem blong mekem wan rum long haos blong hem blong mekem se profet ia, taem i wokbaot tru long siti, bae i gat wan ples blong stap long hem!
Tedei, yumi save lanem wan lesen we i gat paoa aot long eksperiens ia.
Lod i testifae long woman Sunem ia se Elisa i wan profet blong God, mo hem i tekem aksen taem hem i openem haos blong hem blong welkamem profet ia.
Yumi tu yumi save kasem wan testemoni blong yumiwan abaot ol profet blong God tedei mo openem ol hat mo maen blong yumi—haos blong yumi—long mesej we Papa long Heven i gat blong yumi tedei long ol lata dei ia.
Ol dia yut, mi invaetem yufala blong askem kwestin ia long yufalawan: Mi mi gat wan testemoni blong miwan abaot ol profet blong God we i stap laef?
Letem yumi stat long stat.
?Wanem nao i, wan profet? Profet i wan man we God i singaotem hem blong toktok long bihaf blong Hem. I gat ol profet long wol tedei, semmak nomo olsem long taem blong bifo.
Ol profet oli ol sia mo reveleta. Hemia i minim se oli save luk wanem we ol narawan oli no save luk, mo oli save profesae abaot ol samting we bae oli hapen long fiuja. Oli save mekem yumi rere from ol trabol taem. Ol profet oli kasem ol komanmen mo revelesen we i kam long Lod. Namba naen toktok blong biliv i tokbaot revelesen we i stap gohed long ol las dei ia. hem i talem se, “Mifala i biliv long evri toktok we God i bin talemaot finis, evri toktok we Hem i stap talemaot naoia, mo mifala i biliv we bambae Hem i talemaot yet plante bigfala mo impoten samting abaot kingdom blong God.”
Elda Gary E. Stevenson i talem, “Lod i gohed blong rivilim ol komanmen mo tingting blong Hem long profet blong Hem tedei from we Hem i wantem tumas blong lidim yumi blong stap hapi long laef ia mo long selestial glori long nekis laef.”
Mo tu, ol profet oli talemaot gospel mo oli ol tija we oli gat insperesen mo ol man blong pasem mesej blong God i go long evriwan long wol.
Wanwan memba blong Fas Presidensi mo Kworom blong Olgeta Twelef i wan profet, sia, mo reveleta. Oli stap givim kaonsel anda long daereksen blong Lod, mo oli gat atoriti blong talemaot mo intepretem doktrin mo putum polisi blong Jos blong Hem. Wetem kea, oli prea mo tingting gud, blong ol desisen blong ol kworom ia i mas kam wan. Folem wei ia, Lod i talemaot long yumi se tingting blong Hem bae i hapen.
Ol profet oli testifae abaot Kraes—laef blong Hem, ministri blong Hem, mo tabu paoa blong Hem.
Letem yumi ridim sam testemoni blong ol profet insaed long Buk blong Momon.
Abinadae i stap talemaot:
“God hemwan bae i kamdaon long medel blong ol pikinini blong ol man, mo bae hem i pemaot ol pipol blong hem.
“Mo from hem i stap laef long bodi blong mit mo bun, bae oli singaotem hem Pikinini blong God.”
Mo tu, Samuel Man blong Leman i testifae se Jisas Kraes i “Pikinini blong God, Papa blong heven mo wol, Krieta blong evri samting stat long stat.”
Mo profet Moronae i talem, “mi bin luk Jisas, mo … hem i bin toktok wetem mi stret long fes blong mi.”
Taem Kraes i visitim Ol Man blong Nifae, wan long ol fas samting we Hem i mekem i we Hem i singaotem ol twelef Aposol. Mo Hem i talem long ol pipol, “Bae yufala i kasem “blesing sapos yufala i mekem folem ol toktok blong olgeta twelef ia we mi bin jusum aot.”
Naoia, bae mi serem sam toktok blong ol papa mo mama o ol nara famli memba we oli lukaot long ol pikinini. Lod Hemwan i tijim Adam mo Iv long ol trutok abaot plan ia blong fasin blong sevem man. Mo afta Hem i talem long olgeta, “Mi givim wan komanmen long yu, blong yu tijim olgeta samting long ol pikinini blong yu mo yu no holemtaet wan samting.”
?I minim wanem blong tij mo no holemtaet wan samting? Hem i blong lanem ol trutok blong gospel, gat wan testemoni blong yuwan abaot olgeta, mo serem save ia wetem ol pikinini blong yumi. Hemia i blong sapotem evri kaen fasin blong tijing. Hem i blong laef folem save mo testemoni ia.
Buk blong Momon i tokbaot ol 2,060 yang boe olsem “ol man we oli bin tru long evri taem long eni samting we ol ami lida blong olgeta oli trastem olgeta blong mekem.” Ol yang man ia oli fetful blong obei long Hileman, we long taem ia hem i ami lida mo tu profet blong olgeta, mo oli luksave se mama blong olgeta i bin fulumap hat blong olgeta wetem trutok mo fet.
Ol papa mo mama, long wol ia we i gat fulap voes mo samtaem bigfala tudak, God Hemwan i givim komanmen long yumi blong tijim ol pikinini blong yumi long laet mo trutok. Hem i trastem yumi wetem responsabiliti ia blong tijim ol pikinini blong yumi abaot trutok blong gospel ia we i sevem man. Sapos yumi no mekem hemia, wol bae i no save mekem.
Ol dia yang fren, mi gat wan invitesen blong yufala: Long ol dei we i stap kam, mi invaetem yufala blong nildaon, openem hat blong yufala, mo prea wetem fet i go long Papa long Heven, askem Hem blong konfemem long yufala se ol profet mo aposol blong Hem we Hem i jusum, oli ol voes blong Hem long wol ia tedei.
Woman blong Sunem i tijim yumi se yumi save gat testemoni ia tru long Tabu Spirit. Mi promes se taem yumi save se olgeta ia God i bin jusumaot olgeta, laef blong yumi bae i kam moa isi nomata ol jalenj we yumi stap fesem, taem bae yumi obei long voes blong olgeta wetem tras, fet mo hop. Blong lisin mo obei long voes blong wan profet hem i impoten tumas blong stap hang strong long evri gud samting kasem Seken Kaming blong Sevya blong yumi.
Rabis fasin blong wol ia i stap kam antap, be Jos Ia blong Jisas Kraes mo kingdom blong Hem oli moa strong bitim bifo. Saeon i stap flasem gud hem bakegen, mo tron blong Kraes bae i no save foldaon. Lod i wantem yumi blong stap strong long testemoni blong yumi, blong fulap wetem fet, mo sakem sin evri dei. Sevya blong yumi, Jisas Kraes i gat tras long wanwan long yumi blong gohed blong mekem wok blong Hem.
Profet Josef Smit i bin talem long wan taem se, “Ol brata, ?Bae yumi no gohed long wan bigfala wok olsem?” Be, from we mesej blong mi hem i speseli blong yufala, ol yut, mi laekem blong yusum toktok ia ol yut long ples blong ol brata. ?Yu Rere?
“[Ol Yut], ? Bae yumi no gohed long wan bigfala wok olsem? Go fored be i no go biaen. !Gat strong paoa long tingting[ol yut]; mo gohed, go fored kasem viktri! Letem ol hat t blong yufala i hapi, mo stap glad tumas.”
Mi glad tumas long gaed mo ol tabu wok blong ol profet we oli stap laef. Mi talemaot testemoni blong mi se, God i singaotem olgeta blong tekem i go fored, stanemap, mo lidim kingdom blong Hem long wol ia tedei. Mo oltaem bae i olsem. Oltaem bae Lod i jusum ol wokman blong Hem. Long nem blong Jisas Kraes, amen.