Naoia Mi Save Lukluk
Paoa we Buk blong Momon i gat long laef blong mi, i wan merikel semmak olsem spet mo graon ia we oli putum long ol ae blong blaen man ia.
Wetem fasin blong gat tru lav, yumi evriwan i joenem Presiden Oaks blong soem respek from ded blong Presiden Russell M. Nelson. Mo wetem semmak lav mo bigfala harem nogud, yumi evriwan i luksave bigfala trabol long Michigan we i jes hapen mo klosap evri dei raon long wol. Yumi luksave olgeta samting ia wtem lav mo tras long Lod Jisas Kraes.
Long japta naen long buk blong Jon, hem i raetem abaot eksperiens we Jisas wetem ol disaepol blong Hem, oli pas long man ia we oltaem i stap askem mane., Man ia i blaen taem hem i bon. Hemia i mekem ol disaepol blong Jisas oli askem sam kwestin we i had lelebet long saed blong relijin abaot hamas man ia i save mekem. Blong ansarem kwestin blong olgeta, Masta i mekem wan samting we i simpol nomo, be yet, hem i intresting. Hem i spet long graon mo i mekem smol sofmad long hem. Afta Hem i putum long ol ae blong man ia, mo i sendem hem i go blong wasem ae blong hem long Wota blong Saeloam. Blaen man ia i obei mo mekem evri samting ia mo “hem i save luk ol samting,” skripja i talem. Olsem wanem i impoten blong gat pruf, we i defren long ol tingting o raorao iven blong mekem nogud long wan man we i ol samting agensem trutok.
Ol enemi blong Sevya oli fraet se merikel ia bae i mekem ol man oli luk se Sevya i gat moa atoriti bitim olgeta, mo oli go luk blaen man ia we naoia i lukluk, mo talem wetem kros se, “Mifala i save we [Jisas] i man blong mekem sin.” Man ia i lisin long olgeta smol taem mo i talem, “Mi mi no save we man ya i man blong mekem sin, [be] wan samting nomo we mi mi save. Fastaem mi mi blaen, be naoia mi save lukluk.”
Jisas i eksplenem long eksperiens ia mo i talem long ol disaepol blong Hem se, evri samting ia i hapen olsem blong “God i save soemaot paoa blong hem.” Tingbaot se i bin gat tu taem insaed long storian ia we i talem se Jisas i “[anoentem]” ol ae blong blaen man ia, wan aksen we bae man ia i mas wasem ae blong hem long en. Skripja ia we i talem “God [bae i] soemaot paoa blong hem” i save minim odinens we oli stap mekem.
Wan nara trutok we i klia long ples ia hem i ol tul we Krieta blong heven mo wol i yusum, blong givim merikel ia: !spet mo graon! O samting we i no nomol tumas blong yusum, i talemaot se God i save blesem yumi long eni kaen wei we Hem i jusum. Olsem Neman we i no wantem swim long Jodan Reva o ol pikinini blong Isrel we oli no wantem luk i go long snek long wud, hem i isi tumas blong yumi no luksave Jisas Kraes from se ol tul we oli yusum i nomol o i isi tumas.
Be yumi tingbaot long Buk blong Momon se sam samting oli simpol mo oli gat valiu mo we bifo long taem we Jisas bae i bon, bae oli profesae se “i no gat wan samting blong pulum ae blong yumi, blong yumi stap lukluk hem, no blong pulum yumi, blong yumi biaen long hem.” Hamas taem God i bin sendem ol bigfala mesej blong Hem tru long wan Rilif Sosaeti presiden we oli jes singaotem mo i wari tumas, o wan boe long wan fam long Niu Yok, o wan bebi we i stap slip long ples blong animol.
?Afta wanem, sapos ol ansa blong ol prea blong yumi i kam long ol wei we oli simpol, o had lelebet? ?Yumi glad blong traehad blong laef folem gospel blong Kraes nomata hamas spet mo graon we i nidim blong tekem? Ating bae i no oltaem klia long yumi from wanem ol samting i hapen, mo samtaem, bae yumi evriwan i filim olsem senia sista ia we i talem, “Lod, ?hao abaot wan blesing we i no haed insaed long wan nara samting?”
Tingting long pruf blong wan nara trutok, trutok abaot tabu prishud. Taem Luk i stap rekodem oganaesesen blong Jos long taem blong Jisas Kraes, hem i raetem se: “Nao Jisas i singaot ol twelef man blong hem oli kam wanples mo i givim paoa long olgeta,” ol presen we oli no givim folem gud nem blong yu, o folem kastom, o laen blong yu. Wan yunivesiti blong relijin o skul blong seminari i no givim ol presen ia. Oli givim nomo tru long fasin blong putum han antap long hed, tru long ol han blong wan we i gat atoriti blong putum han antap long hed, mo i folem semmak laen ia kasem Hem we i gat evri tabu paoa ia faswan, we i Lod Jisas Kraes.
Mo long wan jos we i andastanem presen blong sore, ?bae hem i no wan nara naesfala pruf blong luk hamas jos ia i tru fulwan blong luk ol blesing mo kavenan ia i pas long ol famli blong yumi we oli ded, olgeta long ol famli blong yumi we oli bin go fastaem long yumi? ?Bae oli mas panisim olgeta from oli no bin save gospel o from se oli bon long wan taem o wan ples we ol tabu odinens mo kavenan i no gat blong oli tekpat long hem? Jos Ia blong Jisas Kraes blong Ol Lata-dei Sent i gat ol tabu haos blong Lod we oli dediketem blong mekem ol wok blong sevem man wetem sore, evri dei mo naet long bihaf blong olgeta we oli ded, mo tu, givim janis long olgeta we oli laef blong wosip mo mekem ol odinens blong olgeta. Long save blong mi, yu no save luk pruf ia blong trutok blong God, lav blong Hem long evriwan raon long wol, long olgeta we oli laef mo ded—be yu luk long wan jos ia nomo, we i soem trutok speseli long ol toktok ia: Jos Ia blong Jisas Kraes blong Ol Lata-dei Sent.
Fastaem we ol ae blong mi i open mo laef blong mi i jenis tru long pruf blong trutok, i no bin kam olsem sofmad we oli putum long ae, o wota blong Siloam. No, tul blong trutok we i bin givim mi hiling we i kam long Lod, i bin kam olsem ol pej insaed long wan buk, !yes, Buk blong Momon: Wan Nara Testeman blong Jisas Kraes! Sam man we oli no biliv oli bin agensem fulap ol toktok abaot buk ia, mo kros blong olgeta i semmak long ol strong toktok blong olgeta we oli talem long blaen man ia se i no posibol blong hem i eksperiensem wanem hem i bin save se hem i bin eksperiensem.
Plante man oli talem strong se ol wei we buk ia i bin kam i no mekem sens, i had blong bilivim, i mekem man i sem, mo i no tabu. Hemia i ol strong toktok we i kamaot long wan we i ting se hem i save olsem wanem buk ia i bin kam long wol nomata we wan wei ia nomo we oli tokbaot buk ia, hem i we oli bin transletem “tru long presen mo paoa blong Tabu Spirit.” !Hemia nao! Hemia nomo. Long eni situesen, paoa we Buk blong Momon i gat long laef blong mi, i wan merikel semmak olsem spet mo graon ia we oli putum long ol ae blong blaen man ia. Long mi, hem i bin wan aean blong sefti long sol blong mi, wan strong laet blong revelesen we i klia, wan laet we i saenem rod taem tudak i kam, mo laet ia i bin saen mo bae i gohed blong saen. Mo i tru se i bin saen, mo i tru se bae i saen.
Mo wetem lukluk ia we buk ia i givim long mi abaot lav mo sore blong Sevya long ful wol ia, mi serem witnes blong mi, olsem we papa mo mama blong blaen man ia talem, se ol man oli mas bilivim boe blong tufala from “hem i bigman finis.” Mo mi tu mi semmak. Hem i bigwan inaf blong oli bilivim hem. Mo mi tu mi semmak. Bae mi mi gat 85 betdei blong mi long tu manis taem. Klosap nomo mi ded, be mi kambak. Mi bin wokbaot wetem ol king mo profet, ol presiden mo aposol. Be hemia we i moa gud i we, samtaem mi fulap long Tabu Spirit blong God. Mi trastem se witnes blong mi i mas hevi inaf blong man i save luksave.
Ol brata mo sista, mi save long ful sol blong mi se Jos Ia blong Jisas Kraes blong Ol Lata-dei Sent, i wan tru restoresen blong Niu Testeman Jos—mo mi save moa—from se mi no save tanem baksaed long pruf blong restoresen ia. Stat long ol fas eksperiens ia, mi ting se mi bin gat wan taosen—?o ten taosen?—nara pruf se wanem we mi bin tokbaot tedei, oli tru. Mi mi glad tumas naoia blong joenem mo hang long solda blong fren blong mi long ol rod blong Jerusalem, mo singsing wetem voes blong mi we i olfala:
Long nem blong Jisas Kraes, amen.