“?Yu Yu Lavem Mi Moa?”
Sapos yumi wantem soem lav blong yumi long God, yumi mas andastanem olsem wanem Hem i luksave lav blong yumi.
Insaed long parabol blong pikinini we i bin lus, bigfala brata i faenem i had long stat blong selebret taem smol brata blong hem i kambak afta long wan longfala taem blong ol pua joes mo “hem i stap spolem mane ya blong hem long ol rabis fasin.” Hae tingting mo fasin blong stap stret blong bigfala brata ia i holembak hem blong akseptem glad ia se brata blong hem i sakem sin mo kambak. Maet, yumi tu, yumi stap letem ol janis oli kam pasem yumi i go mo no letem olgeta we yumi lavem oli save, tru long ol toktok mo aksen blong yumi, abaot tru lav blong yumi long olgeta.
I gat plante eksampol we i gat paoa insaed long ol skripja abaot tru lav we oli soem mo kasem: Naomi mo Rut, Amon mo King Lamonae, pikinini we i bin lus mo papa blong hem, Sevya mo ol disaepol blong Hem.
Taem oli givim fri lav mo kasem lav ia wetem tru hat, wan klin sekol i hapen wetem wan lav we i kam moa bigwan bitwin hem we i givim mo hem we i kasem.
Lav blong God i stret gud evriwan, i nogat en, i stap tru, mo “i moa swit.” Hem i fulumap sol wetem “bigfala glad.” Be, samtaem bae yumi faenem i had blong luksave lav blong God long laef blong yumi. Be, Papa blong yumi long Heven we i gat lav ia we i stret gud evriwan i wantem tumas blong yumi eksperiensem lav blong Hem we Hem i “toktok long [yumi] folem … andastaning [blong yumi].” Hem bae i soem lav blong Hem long yumi long ol wei we yumiwanwan i save luksave. Yumi save eksperiensem lav blong God long yumi taem yumi luk ol naesfala ples raon long yumi, o kasem ol ansa blong ol prea, o gat ol tingting we i kam long maen taem we yumi nidim, o eksperiensem ol gudfala taem blong glad. Bigfala lav we Papa long Heven i soem long yumi we i kam long hat mo tingting blong Hem i taem Hem i letem Pikinini ia blong Hem we Hem i Lavem Tumas blong ded from ol sin blong yumi.
Olsem bigfala brata blong pikinini ia blong papa we i bin lus, lukluk blong yumi plante taem i stap nomo long yumiwan. Yumi fulap long fasin blong stap lukaotem pruf blong lav blong God long yumimo yumi harem nogud taem yumi no faenem. Be naesfala lesen i we, moa yumi lukluk nomo blong soem lav blong yumi long God, moa bae i isi blong yumi luksave lav blong Hem long yumi. Ating, hemia i from wanem Sevya i ansa long kwestin ia “?Wanem loa blong God we i hae moa long ol narafala loa, i winim olgeta evriwan?” wetem simpol mo impoten invitesen ia: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”
Samtaem, wei we yumi soem lav blong yumi long olgeta we oli moa kolosap long yumi hem i no long semmak wei we olgeta oli luksave lav ia. Hemia bae i givim filing blong harem nogud long hem we i givim samting, mo hem we i kasem samting. Bae i help blong askem olgeta we yumi lavem, olsem wanem oli luksave aksen blong lav. I semmak, sapos yumi wantem soem lav blong yumi long God, yumi mas andastanem olsem wanem Hem i luksave lav blong yumi. I gud tumas we, Hem i soem sam wei long ol skripja we yumi save soem lav blong yumi long Hem.
?Yu Yu Lavem Mi Moa, I Winim Ol Nara Samting Ia?
Long storian blong Pita mo Lod we i laef bakegen long Lugun blong Taebirias, yumi lanem abaot ol wei we yumi save soem lav blong yumi long Lod.
“Jisas i talem long Saemon, pikinini blong Jon. ?Yu yu lavem mi moa, i winim we ol narafala ya oli lavem mi?” Pita i talem long hem se, Yes Masta, yu save we mi mi lavem yu.”
Ki kwestin we i kam long Lod, i we “?yu yu lavem mi moa, i winim ol nara samting ia Yumi soem lav blong yumi long Lod taem yumi putum Hem faswan long , “ol nara samting ia” mo “ol nara samting ia” i save eni man, eni aktiviti, o eni samting we i tekem ples blong Hem blong stap olsem wan we i gat moa impoten paoa long laef blong yumi.
Bae i neva gat inaf taem long wan dei, wik, manis, o wan yia blong finisim evri samting we yumi wantem o nidim blong mekem i hapen. Pat blong tes blong laef ia i blong yusum gud taem blong yumi mo mekem wanem we i moa impoten blong gud blong yumiwan blong oltaem mo lego ol samting we oli no impoten tumas.
Presiden Russell M. Nelson i talem se: “Kwestin blong wanwan long yumi… i semmak. … ?Yu yu wantem letem God i paoa ia we i moa strong insaed long laef blong yu? ?Bae yu yu letem ol toktok blong Hem, ol komanmen blong Hem, mo ol kavenan blong Hem oli lidim tingting blong yu long wanem yu stap mekem evri dei? ?Bae yu yu letem voes blong Hem i kam faswan ova long eni nara samting? ?Yu yu wantem letem wanem we Hem i nidim yu blong mekem i kam faswan long evri nara bigfala tingting we yu yu gat? ?Yu yu wantem se tingting blong yu i draon insaed long tingting blong Hem?” Yumi soem fasin blong stap wan disaepol mo lav blong yumi long God taem yumi putum Hem i kam faswan.
Fidim Sipsip blong Mi
Nekis ves long semmak stori ia, bitwin Pita mo Sevya, yumi lanem wan nara wei se Lod i luksave ol aksen blong lav blong yumi: “Mo bakegen [Lod] i askem long hem se, “Saemon, pikinini blong Jon. ?Yu yu lavem mi?” Pita i ansa, Yes Masta. Yu save we mi mi lavem yu. Nao Jisas i talem long hem se, Ale, yu lukaot gud long ol sipsip blong mi.”
Yumi soem lav blong yumi long Papa long Heven taem yumi givim seves, lisin, lavem, leftemap, o givhan long ol pikinini blong Hem. Seves ia bae i simpol olsem kam blong save gud ol narawan mo no mekem jajmen. Long Doktrin mo Ol Kavenan seksen 76, yumi save luk fasin blong olgeta we bae oli go insaed long selestial glori: “Oli luk ol samting olsem we God i luk olgeta, mo oli save ol samting olsem we God i save olgeta.” Oli luk ol narawan olsem we God i luk olgeta, mo Hem i luk olgeta olsem, huia bae oli save kam olsem, wetem tabu paoa we fulap long glori.
Afta we mi kambak long misin blong mi, mi tekova long lon-kea bisnis we mi mo brata blong mi i bin statem taem mitufala i yangfala. Mi bisi tu wetem ol stadi blong mi blong yunivesiti. Wan wik long spring taem , tingting blong mi i fasfas tumas from ol faenol eksam we i stap kam kolosap mo hevi ren we i mekem i no posibol long mi blong finisim ol wok raon long yad
Long medel blong wik, skae i klia, mo mi mekem plan blong finisim wok blong ol yad afta long ol klas. Be taem mi kasem hom, trak mo ol tul blong mi oli no nogat. From mi wantem save wanem i hapen s, mi visitim ol yad we mi mekem plan blong go klinim,; wanwan yad ia oli klin gud finis. Taem mi visitim las yad i stap long lis , mi luk smol brata blong mi i stap pusum lonmo. Hem i luk mi, i smael, mo i tata long mi. Hat blong mi i fulap wetem tangkyu long , mi haggem hem mo talem tangkyu. Aksen blong seves blong hem ia we i gat mining i mekem lav mo fasin blong mi blong stap tru long hem i kam moa strong. Blong givim seves long wanwan long yumi hem i no wan wei blong mistek we yumi soem lav blong yumi long God mo Pikinini blong Hem we Hem i Lavem Tumas.
Luksave han blong God long Evri Samting
Yumi soem lav blong yumi long God tu taem yumi gat hat blong talem tangkyu. Lod i talem se, “Mo man i no save mekem God i kros long wan samting, … be nomo, olgeta we oli no luksave han blong God long evri samting.” Yumi soem lav blong yumi long God taem yumi akseptem Hem olsem stamba blong evri gudfala samting long laef blong yumi.
Long ol eli dei blong statem wan kampani, mi mo bisnis patna blong mi bae i prea wetem tru hat bifo long ol impoten miting, blong askem help long Papa long Heven. Taem i pas, God i ansarem ol prea blong mitufala, mo ol miting blong mitufala i go gud. Afta long wan miting, bisnis patna blong mi i poenemaot se mitufala i bin kwik blong askem help mo slo blong talem tangkyu. Stat long taem ia, mitufala i mekem i kam wan fasin blong givim ol prea blong talem tangkyu wetem tru hat, luksave han blong Lod long ol sakses blong mitufala. Yumi soem lav blong yumi long God wetem “wan fasin blong talem tangkyu.”
Sapos Yufala I Lavem Mi, Bambae Yufala I Save Obei long Ol Tok blong Mi
Wan nara wei we yumi soem lav blong yumi long Papa long Heven mo Pikinini blong Hem we Hem i Lavem Tumas i blong jusum blong obei long Tufala. Sevya i talem se “Sapos yufala i lavem mi, bambae yufala i save obei long ol tok blong mi.” Kaen fasin blong obei ia yu nomo yu jusum blong mekem,wan i no fosem yu be hem i kam long hat mo tingting blong wantem soem lav. Papa long Heven i wantem yumi blong wantem obei. Sista Tamara W. Runia i singaotem hemia “gat fasin ia blong obei wetem lav mo respek.” “Nomata yumi no obei long stret fasin yet, yumi traem obei from lav blong yumi long God, naoia, yumi jusum blong stap, bakegen mo bakegen, from yumi lavem Hem.” Hem i talem
Papa long Heven i givim yumi ejensi blong givim insperesen long yumi blong wantem blong jusum Hem. Wok mo glori blong Hem i no blong mekem man i s kasem laef we i no save finis nomo be i tekem tu wan hop we bigfala tingting blong hat blong yumi i wantem blong gobak long Hem. Be, bae Hem i neva fosem yumi blong obei. Insaed long hym “Save Hemia, Se Evri Sol I Fri,” yumi singsing:
Olsem wan misin lida, mi mo waef blong mi Christina, i kasem insperesen we i kam long plante misinari we oli jus blong obei, i no from se hem i wan misinari standet nomo be from se oli wantem blong soem lav blong olgeta long Lod taem oli jusum blong ripresentem Hem wetem tingting we i stap daon.
Elda Dale G. Renlund i talem se: “Gol blong Papa blong yumi long Heven long saed blong stap papa mo mama, i no blong gat ol pikinini blong Hem blong mekem wanem we i raet; hem i blong gat ol pikinini blong Hem blong oli jusum blong mekem wanem we i raet, mo long en, blong kam olsem Hem. Sapos Hem i wantem nomo blong yumi stap obei, bae Hem i yusum ol kwik praes mo panismen blong gat paoa long ol fasin blong yumi.” Yumi soem lav blong yumi long God taem yumi jusum blong obei mo folem Hem.
Papa blong yumi long Heven mo Sevya blong yumi i luksave ol aksen blong lav blong yumi long Tufala taem yumi putum Tufala i kam faswan long laef blong yumi, givim seves long wanwan long ol narawan, talem tangkyu wetem glad long evri blesing we i kam long Tufala, mo jusum blong obei mo folem Tufala.
Mi testifae se wanwan long yumi i ol pikinini blong God, mo Hem i lavem yumi stret gud evriwan. Mi testifae se Hem i wantem tumas blong yumi eksperiensem lav blong Hem long ol wei we yumi luksave mo andastanem. Be wanem we i gud i we bae yumi eksperiensem lav blong Hem long yumi moa semmak olsem we yumi soem lav blong yumi long Hem. Long nem blong Jisas Kraes, amen.