Save Huia Yu

Sam yia i pas gel blong mitufala i bin kasem wan dip eksperiens long misin blong hem. Wetem raet we hem i givim, mi serem wan pat blong wanem hem i raetem i kam long mitufala long wik ia:

“Yestedei wan memba we i jes kambak long jos i askem mifala blong go kwiktaem. Taem mifala i go tru , mifala i faenem hem long flo, hem i stap krae bigwan. Wetem wota long ae, mitufala i faenemaot se hem i bin lusum wok blong hem, mo bae oli sakemaot hem long apatmen blong hem, mo bae hem i nogat haos bakegen.”

Gel blong mitufala i gohed: “Kwiktaem nomo mi stat blong openem skripja blong mi, mo stap traem blong faenem wan samting—eni samting—blong helpem hem. Taem mi stap lukaotem wan ves we i stret evriwan, mi tingting se, ‘Mi stap mekem wanem ia? Hemia i no wanem Kraes bae i mekem. Hemia i no wan problem we mi save stretem, be hemia i wan stret pikinini gel blong God we i nidim help blong mi.’ Mo afta mi sarem skripja blong mi, mi nildaon long saed blong hem, mo holem hem afta mitufala i krae tugeta, kasem taem we hem i rere blong girap mo fesem jalenj ia.”

Afta we hat blong woman ia i go daon, gel blong mitufala i yusum skripja blong mekem hem i andastanem tabu praes blong hem mo tijim hem wan long ol impoten trutok blong laef blong yumi—se yumi ol pikinini boe mo gel blong Hem we Hem i lavem, wan God we i gat stret sore long yumi taem yumi harem nogud, mo i rere blong helpem yumi taem yumi girap.

Hem i gud blong save se fas poen blong doktrin we ol misinari oli tijim hem i we God i Papa blong yumi long Heven we i gat lav. Evri trutok we yumi stap kasem i bildim fandesen blong andastaning ia abaot huia yumi.

Susan H. Porter, Praemeri Jeneral Presiden, i tijim se: “Taem yufala i save mo andastanem hamas Hem i lavem yufala fulwan olsem wan pikinini blong God, hemia i jenisim evri samting. I jenisim wei we yu filim abaot yuwan taem yu mekem ol mistek. I jenisim olsem wanem yu filim taem ol had samting i hapen. I jenisim lukluk blong yu long ol komanmen blong God. I jenisim lukluk blong yu long nara man mo hamas yu save mekem samting i defren.”

Yumi save luk jenis ia taem yumi ridim abaot eksperiens blong Moses we hem i stap toktok long God fes tu fes. Long storian blong tufala, God i lanem Moses fulap taem, abaot tabu laen blong hem taem Hem i talem “Moses, …yu yu boe blong mi.” God i eksplenem se Moses i ripresentem Stret Pikinini blong Hem Ia Nomo. Moses i kam blong andastanem moa huia hem, se hem i gat wok blong mekem, mo se hem i gat wan Papa long Heven we i gat lav.

Afta long eksperiens ia, enemi i kam blong temtem hem, i singaotem hem mo talem, “Moses, pikinini blong man.” Hemia i wan wei we i nomol mo i denja tumas, we Setan i stap yusum. Taem papa blong Yumi long Heven i stap traehad blong rimaenem yumi se yumi ol pikinini blong Hem, enemi bae i oltaem singaotem yumi long ol wiknes blong yumi. Be Moses i save finis se hem i moa bitim wan “pikinini blong man.” Hem i askem long Setan, “?Huia yu? From luk, mi mi wan pikinini blong God.” Long semmak fasin, taem yumi fesem ol jalenj blong wol o taem yumi filim olsem se wan i stap traem blong singaotem yumi long ol wiknes blong yumi, yumi nid blong stanap strong long save ia se yumi huia. Yumi mas pruvum yumiwan long God nomo be i no long nara man. Taem yumi mekem hemia, yumi save talem stret tu se “Mi mi wan pikinini blong God.”

Long wan divosen blong ol yang adalt raon long wol, Presiden we yumi lavem, Presiden Russell M. Nelson i tijim se : “Nao yu yu huia? Fas mo impoten samting, yu yu wan pikinini blong God, wan pikinini blong kavenan, mo wan disaepol blong Jisas Kraes. Taem yumi akseptem ol trutok ia, Papa blong yumi long Heven bae i helpem yumi blong kasem bigfala gol blong yumi blong laef long tabu ples blong Hem, blong taem we i no save finis.”

I no blong nating se long skripja ia we i stap kamaot plante taem, God i rimaenem yumi abaot rilesensip blong yumi wetem hem. Aot long evri nem we yumi save yusum blong singaotem Hem long sakramen prea, Hem i wantem yumi singaotem Hem “God, Papa We I No Save Finis.”

Taem yumi kam blong save gud huia yumi, bae yumi biliv moa se Papa blong yumi long Heven we i gat lav, Hem i gat wan plan blong mekem yumi save gobak stap wetem Hem bakegen. Elda Patrick Kearon i bin tijim se: “Naesfala plan blong Papa blong yumi, iven ‘gudfala’ plan blong Hem, i blong karem yu kam hom, i no blong blokem yu long Hem. … God i stap gohed blong wantem gat rilesensip wetem yu.” Tekem taem blong tingting long hemia—Papa blong yumi we i gat paoa mo i gat lav “i stap gohed blong wantem gat rilesensip wetem yu.”

Nomata weaples yu stap long hem olsem wan disaepol, laef blong yumi bae i jenis fulwan sapos yumi andastanem moa huia yumi . Mi save givim tu wei blong helpem yumi gat moa save long saed ia.

Faswan, Prea

Taem Sevya i statem ministri blong Hem long wol ia, spirit i bin lidim Hem i go long waelples, blong Hem i “stap wetem God.” Ating yumi mas jenisim fasin blong yumi blong prea, mo tekem inaf taem blong gat wan tru storian mo “stap wetem God” evri dei.

Mi faenemaot se prea blong mi i kam moa gud taem mi tekem sam taem mo rere blong toktok long Papa blong mi. Skripja i soem long yumi se fasin ia i tru. Josef Smith; Nifae, boe blong Hilliman; mo Inos, olgeta evriwan oli tingting strong mo oli tingting plante bifo oli toktok wetem God olsem we i stap long skripja. Inos i talem se sol blong hem i hanggri taem ol toktok blong papa blong hem i draon dip insaed long hat blong hem. Wanwan long ol eksampol ia i tijim yumi abaot nid ia blong stap rere from taem blong yumi, long saed blong spirit blong “stap wetem God.”

Sevya i talem long ol Man blong Nifae, “Be yu, taem we yu prea, go insaed long rum blong yu, mo afta we yu sarem doa blong yu, prea long Papa blong yu.”

I nomata sapos hem i long ples blong hangem klos o long bedrum, impoten samting i blong faenem wan ples we yu save stap yuwan, blong letem sol blong yu i stap kwaet, mo blong filim trutok blong “voes we i smol mo kwaet.” Yumi save stap rere taem yumi tingting hevi long ol samting we yumi hapi from wetem ol kwestin mo ol wari we yumi wantem serem wetem Papa blong yumi. Yumi mas traehad blong nogat wan semmak kaen prea be blong toktok wetem Papa blong yumi, laod sapos i posibol.

Mi luksave se long ol jalenj blong laef, taem yumi faet wetem ol pikinini o ronron bitwin ol miting, bae yumi no save gat ol kwaet ples o stap rere long tingting blong yumi—be ol kwaet, kwik mo ejen prea ia oli save gat moa mining taem yumi traehad blong “stap wetem God” samples truaot long dei.

Maet i gat sam we oli no prea longtaem o sam we oli filim olsem se God i no harem olgeta. Mi promes se Papa blong yu long Heven Hem i save yu, i lavem yu, mo i wantem blong harem yu. Hem i wantem blong toktok wetem yu. Hem i wantem blong tingbaot huia yu.

Elda Jeffrey R. Holland i tijim se “Hamas yu stap prea, prea moa. Hamas yu stap prea had, prea had moa.”

Hamas yu stap prea o hamas yu stap prea had, hamas yu stap stadi long Buk blong Momon evri dei mo wosip long tempol, bae i rere long maen blong yumi blong kasem revelesen. Taem yumi stap traehad blong mekem storian blong yumi wetem papa long Heven i kam moa gud, bae Hem i blesem yumi blong filim moa se yumi ol pikinini blong Hem.

Nambatu, Kam blong Save Se Jisas i Kraes

Bigfala ripresentesen blong lav we papa long Heven i gat long yumi olsem ol pikinini blong Hem, hem i taem Hem i sendem Pikinini blong Hem, Sevya blong yumiwan, blong helpem yumi kambak hom. Taswe, yumi nid blong save Hem moa.

Sam yia i pas, taem mi stap olsem stek presiden, mi bin givim wan rekomendesen blong wan brata, blong wok olsem wan odinens woka long tempol. Afta we mi eksplenem se bae hem i kam wan gudfala odinens woka, mi mestem mi klik long “No akseptem” afta sendem rekomendesen ia. Afta we mi traem blong jenisim mo i no wok, mi kolem tempol presiden mo talem, “Mi mekem wan bigfala mistek.” Wantaem nomo gudfala tempol presiden ia i talem, “Presiden Eyre, i nogat eni samting yu mekem we bae yu no save kasem fogivnes from mo stretem bak bakegen.” Hemia i tru tumas. Yes, Jisas Kraes i “gat paoa blong sevem man.”

Long 2019 i gat wan bigfala jenis long ol kwestin blong tempol rekomen. Fastaem, wan kwestin i askem sapos yu gat wan testemoni abaot wok blong Jisas Kraes olsem Sevya mo Ridima blong yumi. Naoia kwestin ia i askem sapos yu gat wan testemoni abaot wok blong Hem olsem Sevya mo Ridima blong yu . Atonmen blong Jisas Kraes i no blong ol narawan nomo, be i blong yu mo i blong mi tu. Hem i Sevya blong mi Hem i Sevya blong yu. Wanwan long yumi. Tru long Hem nomo, yumitu save gobak stap wetem Papa blong yumi.

Nao ol brata mo sista, letem yumi lukaotem Hem. Letem yumi stadi long tabu rilesensip blong Hem wetem Papa mo wetem wanwan long yumi. Letem yumi eksperiensem singsing blong lav blong pemaot man we i kam long yumi wanwan, taem yumi stap sakem sin tru long Ridima. Taem yumi save moa long “Hem we i gat paoa blong sevem man,” bae yumi andastanem se yumi, olsem ol pikinini blong God, yumi glad blong Hem—Hem i lukluk moa long yumi—mo praes blong yumi i bigwan.

Mi testifae se yumi gat wan Papa long Heven we i gat lav. Taem yumi kam blong save trutok ia tru long prea we i gat paoa, revelesen blong yumiwan, mo kam long Jisas Kraes, yumi save talem stret naoia mo oltaem se “Mi mi wan pikinini blong God.” Long nem blong Jisas Kraes, amen.