Gud Nius Resipi

Sapos yu bin visitim finis hom stet blong mifala long Louisiana, bae yu save gud ol naes kakae blong mifala—kumbo, jambalaya, étouffée mo lis i gohed

Samtaem, mi filim long miwan se mi save kukum wan long ol naes resipi ia. Las step afta we mi miksim evri ingridien mo folem ol ditel instraksen i blong testem laswan blong save sapos i gat wan samting i nogat. Long taem ia, mi save harem popula man blong kuk, Kreol i talem slo long sora blong mi,“Putum sam moa Toni.” Toni i wan kreol sisening we oli mekem long Opelousas, Louisiana, hom taon blong mi. Plante taem oli yusum olsem “sikret ingridien” blong givim tes long kakae we i no stret evriwan taem yu stap folem resipi.

Waef blong mi Michelle mo mi, i bin gat ona blong givim seves olsem ol misin lida long Louisiana. Mifala i gat wan tradisen blong tijim ol misinari hao blong kukum spesel jambalaya resipi blong hem long las naet blong olgeta long misin hom bifo oli gobak hom long ol famli blong olgeta. Antap long ol testemoni blong olgeta abaot gospel blong Jisas Kraes we i kambak, ol misinari blong mifala oli lego misin wetem wan tangkyu from ol resipi ia.

Sam manis i pas, mi stap lukluk tru long Jos Media Laebri mo mi luk wan link blong ol sot vidio koleksen we i Ol Storian blong Restoresen wetem Presiden Russell M. Nelson. Taetol blong wan long ol sot vidio long lis ia i pulum intres blong mi mo i mekem mi smael. Oli singaotem se “Ol skripja Oli Ol Resipi blong God blong gat Hapi Laef.” Kwiktaem, mi klik long tu minit vidio ia mo wajem Presiden Nelson i stap tijim wan grup blong ol Praemeri pikinini wan simpol mesej we i gat paoa abaot olsem wanem blong stap glad. Hem i tijim: “Taem yu stap mekem kek, ?yu yu stap folem daereksen? Mo bae, ?yu yu kasem wan gudfala risal evri taem?

Hem i gohed, hem i tokbaot se bae hem i kasem naenti faef yia i no longtaem: “Ol pipol oli askem, ‘?Yu yu stap kakae wanem? ?Wanem sikret blong yu?” Hem i ansa, “sikret i ol skripja. Yu save ridim mo testem ol skripja.”

Naoia, yumi gat i stap. Simpol sikret ia blong gat wan hapi laef i blong folem resipi blong God olsem we oli tokbaot long skripja. Mi singaotem “Gud Nius Resipi”

?Wanem nao yu yu mekem sapos wan samting i no go gud taem yu stap folem resipi? Nao, insaed long Gud Nius Resipi i gat “sikret ingridien” ia blong mekem sua se oltaem yu mekem gud long en. Ansa hem i oltaem Jisas Kraes.

Mi ting se yumi evriwan i gat ol taem we yumi filim se ol ingridien blong yumi oli no gud inaf, o yumi gat hadtaem blong folem ol daereksen, o maet yumi mekem samting we i no folem oda, o wan samting i hapen we yumi no save kontrolem, mo lis i gohed.

?Wanem i ansa? Hem i simpol nomo, hem i blong ademap moa long ol samting we i invaetem Jisas Kraes i kam long laef blong yu.

?Bae I luk olsem wanem blong ademap moa Jisas Kraes long laef blong yu?

Taem mi bin stap givim seves olsem misin presiden, mi gat janis ia blong gat miting wetem wanwan long ol yang misinari blong mifala evri sikis wik. Long taem blong miting wetem wanwan misinari, hem i nomol blong ol misinari i lukaotem gaed long olsem wanem blong kam antap mo wok gud wetem ol kompanion blong olgeta.

Long wan taem, wan misinari i kam long intaviu blong hem mo i sidaon. Mi luksave long bodi lanwis blong hem se, wan samting i hevi long tingting blong hem. Mi askem, “?Elda, wanem nao yu wantem tokbaot tedei?” Hem i gohed blong tokbaot sam jalenj we hem i stap fesem wetem kompanion blong hem mo olsem wanem hemia i stap afektem paoa blong tufala blong mekem misinari wok. Wetem wota long ae blong hem, hem i lukluk mi mo askem, “?Presiden, wanem nao bae mi mekem?”

Long taem ia, blong ones mi no save olsem wanem blong ansa. Afta long smol taem, mi askem hem sapos i Oraet blong mitufala i nildaon tugeta mo prea blong Spirit i lidim mitufala. Hem i agri, mo mitufala i nildaon tugeta mo prea from insperesen.

Afta long prea ia, mitufala i nildaon i stap blong sot taem mo afta sidaon long ol jea blong mitufala mo fesem mitufala. Mi askem sapos mitufala i save ridim wan skripja tugeta. Taem mitufala i openem ol skripja blong mitufala, mi stop mo talem long hem, “Elda, taem yumitu ridim skripja ia, plis, askem kwestin ia long yuwan: ?Sapos mi laef folem ol fasin ia, hemia bae i mekem kompanionsip blong mi mo misinari wok blong mitufala i kam gud?”

Afta mitufala i openem skripja long Moronae 7:45 mo ridim laod: “Mo bigfala lav i save wet longtaem, mo i kaen, mo i no jalus, mo i no kam bigwan, i no lukaotem samting blong hem nomo, i no save kros kwiktaem, i no tingting long eni nogud samting, mo i no glad long rabis fasin, be i glad long trutok, i stanap strong long evri samting, i bilivim evri samting, i gat hop long evri samting, i stap strong long evri samting.”

Elda ia i lukluk mi wetem wota long ol ae blong hem mo talem, “Yes, Presiden, be hemia i had blong mekem.” Mi agri mo helpem hem blong tingbaot se hem i wan pikinini boe blong God, wetem tabu paoa blong mekem hemia tugeta wetem Lod.

Afta mitufala i tokbaot smol parabol blong laen we Elda Clark G. Gilbert blong olgeta Seventi, we i rimaenem yumi se yumi nid blong stat long ples we yumi stap mo, tugeta wetem Lod, yumi muv i go fored mo antap long wan gudfala daereksen. Mi luksave se hem i harem nogud yet wetem ol nekis step ia, mekem se mi askem hem blong tokbaot andastaning blong hem abaot skripja ia “tru long ol smol mo simpol samting, ol bigfala samting oli kam blong hapen;.” Hem i gohed blong tokbaot tingting ia se tru long ol smol mo simpol samting, ol bigfala samting oli kam blong hapen. Mi askem hem blong tekem wan minit mo blong faenem tu smol mo simpol samting we hem i save mekem blong stap kaen long kompanion blong hem.

Afta sam taem, hem i serem ol tingting blong hem. Afta mi askem hem blong tekem wan minit mo blong faenem tu smol mo simpol samting we hem i save mekem blong save wet longtaem wetem kompanion blong hem. Kolosap kwiktaem nomo hem i serem tufala tingting blong hem. Hem i klia se hem i bin stap tingting hevi long ol samting ia bifo miting blong mitufala. Mi invaetem hem blong tekem sam long ol not ia i go long God tru long prea mo askem konfemesen, daereksen, ansa, mo insperesen blong olsem wanem blong mekem plan blong hem wetem wan tru hat. Hem i agri. Long en, mi askem hem blong givim smol apdeit long leta blong hem evri wik.

Sam wik i pas, mi save luk long leta blong hem blong evri wik se ol samting i stap kam gud. Be i no se mi stap luk nomo hemia i stap kam gud long ol leta blong hem blong evri wik, be mi stap luk hemia tu long ol leta blong kompanion blong hem. Long nekis intaviu blong mitufala fes tu fes, mi bin luk bigfala jenis blong laet long fes mo spirit blong hem. Mi askem hem, “?Nao Elda, i tru se bigfala lav bambae i neva sot?’” Hem i ansa wetem bigfala smael, “Yes, mo tru long ol smol mo simpol samting, bigfala samting oli kam blong hapen.’”

Taem yu folem Gud Nius Resipi blong gat wan hapi laef, tingbaot tijing blong Presiden Nelson, “Nomata wanem ol kwestin o problem we yu gat, oltaem ansa i stap long laef mo ol tijing blong Jisas Kraes.” Lanem moa abaot Atonmen, lav, sore, doktrin blong Hem, mo gospel hiling blong Hem we i kambak, mo fasin blong gro. !Tanem yu i go long Hem! !Folem Hem!”

Taem yu nidim blong “harem Hem” mo save olsem wanem blong invaetem Jisas Kraes i kam long laef blong yu, tingting blong folem ol step we Presiden Nelson i tijim yumi long hem abaot fasin blong kasem revelesen blong yuwan:

“Faenem wan kwaet ples we yu save go long hem oltaem. Putum tingting blong yu i stap daon long fored blong God. Talemaot hat blong yu long Papa blong yu long Heven. Tanem yu i go long Hem blong yu kasem ansa mo kamfot.

“Prea long nem blong Jisas Kraes abaot ol wari blong yu, ol fraet blong yu, ol wiknes blong yu—yes ol samting we oli hevi long hat blong yu. !Mo afta, yu lisin! Raetemdaon ol tingting we oli kam long maen blong yu. Raetemdaon ol filing blong yu, mo folem wetem ol aksen we Spirit i talem yu blong mekem. Taem yu stap ripitim wei ia evri dei, manis, mo yia , bambae yu ‘gro blong folem prinsipol blong revelesen.’”

Mi testifae se Jisas Kraes i Sevya mo Ridima blong yumi. Hem i bin “mekem i hapen evri samting we yumi nidim blong save gobak long Papa blong [yumi] long Heven.” Long nem blong Jisas Kraes, amen.