Lav blong Atonmen blong Jisas Kraes

Sapos yu bin mekem ol bigfala sin mo stap long proses blong sakem sin o wantem blong sakem sin fulwan, mo blong filim bigfala glad we i kam tru long fasin blong fogiv, plis save se merikel ia i stap wet long yu. Sevya i gohed blong stap singaot , “Kam long mi.”

Blong mekem fet blong yu i kam moa strong long Sevya, Jisas Kraes, hemia bae i wekemap ol tingting blong sol blong yu blong wantem blong save Hem, blong biliv long Hem, mo blong givim hat blong yu long Hem. Inos i askem abaot fogivnes blong hemwan se, “Lod, ?yu mekem samting ia olsem wanem?” Lod i ansa, “From fet blong yu long Kraes, we yu yu neva bin harem o luk hem.”

Mo Moronae i talem tu se, “sapos bae yufala i tanem baksaed blong yufala long evri fasin we i no olsem blong god, mo lavem God wetem ful paoa blong tingting, ful maen mo ful paoa blong yufala, afta nao, gladhat blong hem i naf blong yufala.”

Taem yu tanem yu i go longwe long sin, tanem yu i go long God mo mekem fet blong yu i kam strong moa long Jisas Kraes, hemia i wan naesfala stat. Blong folem tingting blong God wetem tingting we i stap daon, i tekem tu, fasin blong talemaot ol bigfala sin blong yu long bisop o branj presiden, be fogivnes blong yu we i fulwan i kam tru long Sevya. Fasin blong fogiv i wan tabu presen we i kam tru long gladhat blong Jisas Kraes .

Blong wantem gobak long God wetem tru hat, i kam wetem strong tingting ia blong ones fulwan wetem Papa blong yu long Heven, wetem yuwan, wetem olgeta we oli harem nogud mo wetem prishud lida blong yu. Papa blong yu long Heven i stap glad taem yu stretem yu blong kam long Hem wetem wan hat we i fulap wetem sore mo wan spirit we i wantem blong sakem sin. Blong gat wan spirit we i wantem sakem sin i blong stap putum yuwan long ol han blong God wetem tingting we i stap daon; blong gat wan hat we i fulap wetem sore i wanem we Aposol Pol i bin tokbaot se “taem we man i harem nogud be i luk long God,” bae hem i wantem tumas blong tanem hem i go long God nomata eni samting we hem i mas mekem blong kasem.

Strong filing blong yu i lidim yu blong wantem blong stretem wanem we yu bin brekem. Be yet, taem yu luksave se sam samting i no stap long paoa blong yu blong mekem gud bakegen,yu prea strong se Lod, tru long gladhat blong Hem, bae i help blong hilim olgeta we oli bin harem nogud from risal blong ol aksen blong yu.

Ol risal blong ol bigfala sin long ol narawan, plante taem bae i wan bigfala harem nogud we i had tumas blong winim. ?Yu stap folem eksampol blong ol boe blong Mosaea, we “oli wokhad blong stretem ol samting nogud we oli bin mekem?”? Toktok wetem olgeta we yu respektem abaot wanem we maet yu no stap luksave.

Taem mi stap rere from toktok ia, mi no ting se bae mi kasem wan imel, we i kam long wan we i stap long proses blong sakem sin mo wantem tumas blong kambak long Jos. Fas waef blong hem i stap safa yet long wanem we hem i lusum “aot long mared blong [tufala] we i no save finis, [ol hadtaem wetem ol pikinini], lusum faenens sekiuriti, … no [save] pem ol samting we oli nidim, [mo] bigfala harem nogud from tras we i brok.”

Hem i bin serem wetem mi olsem wanem prishud lida blong hem “i filim glad blong [askem hem] blong prea mo tingting long wanem [moa hem i save mekem blong fas waef mo ol pikinini blong hem].” Wetem raet we hem i givim, mi serem wan pat blong imel blong hem:

“[Fastaem] mi ting se [mane] we mi givim folem kot oda i moa bitim wanem we oli askem, be branj presiden blong mi i leftemap tingting blong mi blong fast mo prea abaot hemia

“Long stat, mi fesem hadtaem wetem tingting ia blong givim moa bitim agrimen we i stap. From se ol sin blong mi oli no long saed blong mane, mi stap tingting se wanem stret i minim ‘blong givim moa bitim wanem we oli askem. … [be] kwiktaem mi luk save se hem i no abaot mane nomo.

“Ol prishud lida blong mi oli bin mit wetem [fas waef blong mi] mo ol pikinini blong mi mo luksave se oli stap safa yet mo oli no oraet. …

“Niufala gol blong mi i blong muv i go fored wetem fet. … Mi talem nomo se mi wantem help mo no askem blong oli givim eni samting i kambak. … Mi disaed blong [sendem wan stret amaon long fas waef blong mi] long evri pei jek blong mi, we i wan bigfala pat blong salari blong mi. Kolosap long taem blong mekem fas peimen, Lod [i talem long maen blong mi se mi nidim] blong pem [dabol long amaon ia].

“Mi bin lanem se fasin blong givim mane from wanem we mi bin mekem blong wan i safa, i no abaot mane nomo. Hem i abaot fasin blong komitim laef blong mi wetem tingting i stap daon long Lod. … Mane ia i blong putumbak wanem we mi tekemaot long famli blong mi, from ol pua joes blong mi. Hem i abaot blong stap mekem mo kipim ol promes be no wet blong kasem bak eni samting, mo stap helpem hem blong no wari abaot ol bil blong pem, mekem se hem i save lukaotem Spirit.”

Ol hadwok blong putumbak wanem we yu bin brekem, maet i no nidim mane, be taem yu kaonsel wetem Lod wetem tingting we i stap daon, bae yu faenem se i gat moa samting we yu save mekem.

Taem yu lukaotem fogivnes blong Lod, gat longfala tingting taem yu stap wet blong kasem ful apruvol blong Hem. Tingting long skripja ia:

“Oli … bin putum tingting blong olgeta i stap daon go kasem daon olgeta; mo oli bin prea strong long God; yes, go kasem fuldei. … [Be] Lod i bin tekem taem blong harem prea blong olgeta from ol rabis fasin blong olgeta.”

“Be Lod i harem ol prea blong olgeta, mo i stat … blong tekemaot ol hevi samting; … mo … oli stat blong kam antap gud smolsmol.”

Gat longfala tingting from Lod i givim sloslo, ol blesing mo apruvol blong Hem long yu.

Folem taem blong Lod, bae yu filim voes blong Hem i stap talem long yu se, “Mi wantem se bae yu nomo wari from ol samting ia.” Wan dei, taem yu gohed blong tanem yu i go long Sevya, Papa blong yu long Heven bae i “tekemaot ol rong long [hat blong yu] tru long ol gudfala wok blong Pikinini blong hem.”

Long yu we yu filim nogud from ol bigfala sin blong wan narawan, mi wantem blong serem lav mo sore blong Sevya, mo kamfot mo pis blong Hem long yu.

Filing ia blong harem nogud we yu bin filim, hat we i soa, lusum wan we yu lavem, bigfala harem nogud from tras we i brok, laef blong yu we i tanem i go long wan wei we yu no ting se bae i olsem—Mi givim long yu hop blong mi we i fulwan se, Sevya i save yu mo lavem yu. Lukaotem Sevya. Hem i kamfot mo paoa blong yu; Hem bae i sendem ol enjel blong Hem blong leftemap tingting blong yu. ?Wetaem nao harem nogud blong yu bae i finis, bae i godaon mo bae yu fogetem ol rabis memori? Mi no save. Be hemia wanem mi save: Hem i gat paoa blong givim hop long taem we yu stap safa.

Ol brata mo sista we yumi lavem olgeta long Grand Blanc, Michigan , wetem strong fet we oli gat long Jisas Kraes, wetem strong paoa long tingting mo kaen fasin, oli bin kasem mo bae oli kasem long ol wik mo manis we i stap kam, bigfala lav mo gladhat blong Sevya we i bigwan tu mas.

Taem yu gohed blong putum tras blong yu long Hem, ol klaod blong tudak mo ol harem nogud blong yu long naet bae i jenis i kam ol krae blong bigfala glad mo pis from wan niu stat. “Harem nogud blong yumi bae i tanem i kam glad. … Mo glad blong yu bae i no gat [wan] i karemaot long yu.” Taem ia bae i kam. Mi testifae se bae i kam.

Yumi save faenem lav blong atonmen blong Jisas Jisas Kraes long ol bigfala had situesen, be oltaem yumi evriwan i nidim oltaem gladhat blong atonmen blong Sevya blong yumi. Presiden Dalin H. Oaks i bin tijim yumi se: “From eksperiens blong Hem we i pemaot man taem Hem i stap long wol ia, Sevya blong yumi i save givim kamfot, hilim, mo mekem evri man mo woman long eni ples i kam strong moa, be mi biliv se Hem i mekem olsem nomo long olgeta we oli lukaotem Hem, mo askem help blong Hem. Aposol Jemes i tijim: “Long fes blong Hae God, yufala i mas mekem tingting blong yufala i stap daon, nao hem bambae i leftemap yufala” (Jemes 4:10). Yumi kwalifae from blesing ia taem yumi biliv long Hem mo prea from help blong Hem.”

Mi kasem raet long dia fren blong mi mo Jeneral Atoriti Seventi we i ritae finis, Elda Robert E. Wells we naoia hem i gat 97 yia, blong serem eksperiens blong hem we i blong 60 yia i pas:

Taem hem i stap laef long Paraguay long 1960 mo hem i wok olsem wan intanasonol bank ofisa, Robert Wells, we i bin gat 32 yia long tetaem ia, mo waef blong hem, Meryl, tufala tugeta i paelot long tu defren plen, mo stap flae long Uruguay i go hom long Paraguay. Taem oli stap pas tru long ol tik klaod, Robert mo Meryl tufala i lusum koneksen blong luk tufala mo kondaktem tufala wanwan. Kwiktaem Robert i kasem graon, mo afta, hem i faenemaot se plen blong waef blong hem i kasem wan rabis aksiden. Waef blong hem mo tufala fren we tufala i flae wetem hem, olgeta evriwan oli ded. Long haos long Asunción, i gat ol pikinini blong tufala we wan i gat seven yia, wan i gat faef yia mo wan i gat tu yia.

Elda Wells i tokbaot bigfala harem nogud blong hem:

“Ol toktok bae i neva inaf blong talem bigfala harem nogud we i fulap insaed long mi, we i stap kakae ol filing blong mi mo mekem ol tingting blong mi oli no save wok gud. Mi no save stop blong krae from ol filing blong bigfala harem nogud we mi bin filim. Blong mekem i mowas, taem we maen blong mi i stap traem blong akseptem filing ia se waef blong i go finis, mi stap eksperiensem bigfala sem blong stap filim se mi nao mi responsibol long aksiden ia.”

Robert i blemem hemwan from se hem i no bin mekem blong oli jekem gud kondisen blong plen mo no bin givim moa gud tul instraksen blong flae long plen long waef blong hem. Hem i filim sem se hem i no bin kea.

Robert i talem:

“Maen blong mi i stap long wan ples we ol samting i fasfas mo wari i tumas. … Mi stap ia nomo—[from ol pikinini] mo i no blong ol nara risen.”

“Mi … lusum tingting ia blong wantem gohed blong laef.”

wetem taem , Robert i kasem blesing ia blong kasem wan bigfala eksperiens long saed blong spirit. Hem i talem:

“Kolosap wan yia i pas, long wan naet taem stap mi nildaon mo stap prea, wan merikel i hapen. Taem mi stap prea mo krae long Papa blong mi long Heven, mi filim olsem se Sevya i kam long saed blong mi mo mi harem wan voes we i stap talem ol toktok ia long sol mo sora blong mi se: ‘Robert, atonmen mo sakrifaes blong mi i bin pemaot ol sin mo ol mistek blong yu. Waef blong yu i fogivim yu. Ol fren blong yu oli fogivim yu. Bae mi karemaot ol harem nogud blong yu. …’

“Stat long taem ia, harem nogud from sem [mo hop we i lus], i kamaot long mi long wan wei we i gud tumas. !Hem i bin sevem mi! Kwiktaem mi andastanem paoa blong Atonmen blong Sevya we i raonem mi … mo se hemia i kam stret blong mi. Mi … eksperiensem laet mo glad olsem we mi neva bin save bifo. Mi kasem wan presen we mi no wok from—presen blong gladhat blong Lod. … Oli no sud givim long mi nating—mi no mekem eni samting blong kwalifae from, be Hem i givim long mi.”

Ol brata mo sista, letem yumi wanwan, “tru long gladhat blong God, yumi kam stret evriwan tru long Kraes mo tru long blad blong Hem we i ron, blong mekem se yumi kam klin evriwan, we yumi no gat mak.”

Mi testifae abaot lav, sore, mo gladhat blong Sevya mo Ridima blong yumi. Hem i stap laef. Yumi i blong Hem; yumi i ol pikinini blong kavenan. Taem yumi biliv long Hem, folem Hem mo trastem Hem, bae Hem i leftemap yumi aot long ol harem nogud mo ol sin blong yumi. Mo karem yumi afta long laef long wol ia, i go insaed long haos blong Papa blong yumi, blong yumi laef wetem Hem blong oltaem mo oltaem. Long nem blong Jisas Kraes, amen.