Stap Tingbaot Presiden Nelson

Tu dei afta we oli klosem jeneral konfrens, ol lida blong Jos mo ol famli memba oli presem Presiden Russell M. Nelson olsem wan papa mo hasban we i fulap long lav, wan dia fren, wan disaepol we i givim hem fulwan long Lod Jisas Kraes, mo wan profet blong God we i gat insperesen.

Laef blong Presiden Nelson “i talemaot witnes blong testemoni blong hem olsem wan profet mo wokman blong Lod Jisas Kraes,” Presiden Dallin H. Oaks i talem long fenerol seves blong Presiden Nelson long 7 Oktoba, 2025, long Konfrens Senta. Presiden Oaks i singaotem Presiden Nelson, we i bin lusum laef blong hem long pis long hom blong hem long 27 Septemba, se, “[Presiden Nelson] i bes fren blong mi mo i wan gudfala tija.”

Presiden Oaks i singaotem tu se Presiden Nelson i “wan long ol misinari blong Isrel we i gat bigfala paoa we i bin stap mekem plante wok.” Hem i talem se, “Smael blong hem, naes voes blong hem, mo paoa blong stap long fored blong hem, i mekem ol hat [blong ol kantri mo lida blong nara fet] oli sopsop.”

Presiden Oaks mo faef nara spika oli givim ona long Presiden Nelson from lav, seves, mo dedikesen blong hem long Lod Jisas Kraes mo ol pikinini blong God raon long wol.

Tugeta wetem ol nara spika, hem i talem tangkyu long Sista Wendy Watson Nelson blong stap kea mo sapotem Presiden Nelson truaot long ol 19 yia we tufala i mared i stap. Hem i talem tangkyu long waef blong Presiden Nelson we i bin ded finis, Dantzel White Nelson, mo ol 10 pikinini blong tufala blong oli stap fetful long “wanem we Presiden Nelson i bin tijim mo laef folem.”

Elda Henri B. Eyring, we i wok wetem Presiden Oaks mo Presiden Nelson long Fas Presidensi, i testifae abaot koling blong Presiden Nelson olsem wan profet, mo hamas hem i save mekem, mo hat blong hem blong wantem blesem ol narawan.

“Taem mi stap wok long saed blong hem long Fas Presidensi, long stat blong Jenuware 2018, miwan mi kam wan witnes long trutok ia se Lod i stap givim insperesen long profet blong Hem,” Elda Eyring i talem. “Mi glad tumas blong save gud Presiden Russell M. Nelson.”

Long ol toktok blong olgeta, Elda Jeffrey R. Holland blong Kworom blong Olgeta Twelef Aposol mo Presiden Camille N. Johnson, Jeneral Presiden blong Rilif Sosaeti, tufala i presem Presiden Nelson from kaen fasin blong hem we i stap oltaem from ol pipol we oli stap insaed mo aotsaed long Jos.

“Blong gat janis ia blong luk hem i lavem ol pipol mo ol pipol oli lavem hem, i bin sam memori we oli naes tumas,” Elda Holland i talem. Hem i tingbaot Presiden Nelson olsem “hem we i joenem mo holem ol han tugeta mo hem we i hilim ol hat.”

Presiden Johnson i talem tu se, “Presiden Nelson i bin jenisim wol tru long wan afta wan narawan, mo tru long wan storian afta wan narawan, mo hem i bin invaetem yumi blong mekem semmak taem yumi stap kasem paoa long God olsem ol kavenan woman mo man.”

Tu pikinini blong Presiden Nelson, Laurie N. Marsh mo Russell M. Nelson Jr., tufala i talem se papa blong olgeta i bin laef wetem plante glad from se hem i mekem Sevya Jisas Kraes i stamba insaed long laef blong hem, mo hem i mekem wok blong givhan f i go long ol narawan i kam faswan long laef blong hem.

“Mifala i groap long wan hom we Sevya i stamba insaed long hem mo i fulap wetem glad,” Sista Marsh i talem. Hem i talem se gol blong famli hem i blong kam wan famli we i no save finis.

Brata Nelson ademap se papa blong hem i neva taet long seves blong hem. “Presiden Nelson i soem long yumi tru long eksampol se i nogat ‘spel’ long Restoresen ia we hem i stap luk.” Hem i talem se taem oli singaotem hem blong lidim Jos, papa blong hem i promes blong wok blong Papa mo Pikinini go kasem dei we bae hem i ded. “Hem i bin mekem hemia nao.”

Marjorie N. Lowder mo Gloria N. Irion, ol gel blong Presiden Nelson, tufala i givim ol prea long seves ia. Tabenakol Kwaea long Tempol Skwea i givim miusik.

Fenerol blong Presiden Nelson i hapen i no longtaem afta nomo long wan kam tugeta we oli mekem blong soem respek long hem long 1 Oktoba mo wan brodkas we i kam long Tabenakol long Tempol Skwea. Presiden Oaks, Elda Holland mo Eyring, Prisaeding Bisop Gérald Caussé, Elda Carl B. Cook long Presidensi blong Ol Seventi, mo Praemeri Jeneral Presiden, Susan H. Porter, oli bin givim ol toktok blong respek, oli serem ol naes eksperiens blong olgeta we oli gat taem oli stap wok wetem Presiden Nelson mo oli serem ol filing blong olgeta abaot laef blong hem we i fulap long eksampol, ministri blong hem olsem blong Sevya, mo ol tijing blong insperesen.

Long toktok blong hem blong respek, Presiden Oaks i singaotem Presiden Nelson se hem i “wan profet blong lav” mo we hem “i prijim gospel blong lav.”

Blong lanem moa abaot laef mo ministri blong Presiden Nelson, luk long In Memoriam: President Russell M. Nelson, 1924–2025, oli pablisim olsem wan samting we oli ademap long Novemba 2025 magasin blong Jos.