Buk blong Momon—wan Tresa We I Bigwan long Rod blong Yumi
Taem yumi stap kakae long ol toktok blong Kraes we i stap insaed long Buk blong Momon, Spirit bae i helpem yumi andastanem ol trutok we i no save finis.
?Yu save tingbaot wan taem we wan man i givim yu wan presen we i bin jenisim laef blong yu? Oktoba long yia ia i makem 40 yia we mi bin kasem wan long ol bigfala presen long laef blong mi. Taem mi bin stap long hae skul, mi bin luk wan laet long wan long ol klas met blong mifala we i defren long plante long ol yangfala. Mi filim gud taem mi stap kolosap hem. Wan dei hem i talem long mi se hem i wan memba blong Jos Ia blong Jisas Kraes blong Ol Lata-dei Sent. Afta hem i givim mi wan presen: wan kopi blong Buk blong Momon. Hem i invaetem mi blong ridim sam pej mo mit wetem tufala fren blong hem blong tufala i save ansa long ol kwestin blong mi. Ol fren ia oli ol misinari.
Taem mi mit wetem ol misinari, oli tijim mi doktrin blong Kraes mo invaetem mi blong folem invitesen blong profet Moronae: ”Mo taem we bae yufala i kasem ol samting ia, mi wantem askem strong long yufala se bae yufala i askem God, Papa we i no Save Finis, long nem blong Kraes, sapos ol samting ia oli no tru; mo sapos bae yufala i askem wetem wan tru hat, wetem wan tru tingting blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit.” (Moronae 10:4).
Mi bin ridim sam pej blong Buk blong Momon mo prea. Nomata se mi no save gud wanem ol misinari oli stap tijim long mi, mi filim long hat blong mi se wanem mi stap ridim i gud mo i kam long God. Mi bin kasem ansa long promes blong Moronae: “Tru long paoa blong Tabu Spirit, bae yufala i save trutok long saed blong evri samting.” (Moronae 10:5).
Afta we mi bin baptaes long Jos blong Jisas Kraes blong Ol Lata-dei Sent, sam fren oli traem blong talem long mi se mi mekem rong joes. Be evri taem we mi gat tu tingting o fesem oposisen olsem, mi kasem ansa long ol skripja stadi mo prea blong stap tru long ol kavenan we mi mekem wetem God. Stat long taem ia, Buk blong Momon i stap olsem kompanion blong mi mo i kam wan bigfala tresa long laef blong mi long wol ia.
Buk blong Momon i moa long wan buk. Hem i wan narafala testeman blong Jisas Kraes, we ol profet blong bifo i raetem tru long spirit blong profesi mo revelesen.
Taem we i moa impoten long Buk blong Momon i ministri blong Lod Jisas Kraes Hemwan, long medel blong ol Man blong Nifae stret afta we Hem i Laef Bakegen long Ded. Buk blong Momon “i soemaot ol doktrin blong gospel, i soem plan blong fasin blong sevem man, mo i talem long ol man, wanem oli mas mekem blong kasem pis long laef ia, mo fasin blong sevem man we i no save finis long laef we bae i kam.” (Introdaksen insaed long Buk blong Momon).
Fas edisen blong Buk blong Momon: Wan Narafala Testeman blong Jisas Kraes oli pablisim long wan smol taon long Niu Yok long Maj 1830. Profet Josef Smit i gat 23 yia nomo taem we hem i finis blong transletem buk ia long 1829. Kolosap hem i transletem ful buk ia, i no moa long 75 dei, mo i tekem seven manis blong printim buk ia.
Tedei, i gat kolosap 80,000 ful-taem misinari long moa long 150 kantri we oli stap givim seves olsem ol volontia, oli givim laef blong olgeta blong talemaot witnes se Buk blong Momon i tru mo i testifae abaot Jisas Kraes.
Long wan semina we i jes pas blong ol niu misin lida long Jun long yia ia, Presiden Russell M. Nelson, i serem testemoni blong hem we i gat paoa long saed blong Buk blong Momon: “Buk blong Momon i toktok blong God. Hem i tijim doktrin blong Kraes mo eksplenem moa abaot Atonmen blong Sevya bitim eni narafala buk.”
Mi laekem blong givim long yufala tri tingting we i save mekem jenis blong yumi long Jisas Kraes i kam moa dip tru long wan stadi blong Buk blong Momon.
1. Tingting Strong mo Stap Gohed long Evri Dei Stadi blong Yu.
Semmak olsem Alma mo ol pikinini blong Mosaea, yumi mas “[stadi] strong long ol skripja wetem strong tingting, blong [yumi] save andastanem toktok blong God” mo kam strong long saed blong trutok (Alma 17:2).
Taem mitufala i stap givim seves olsem ol misin lida long Georgia Atlanta Misin, mi mo waef blong mi i leftemap tingting blong evri misinari blong stadi long Buk blong Momon blong 30 minit evri dei. Komitmen ia i mekem fet blong mifala i kam antap mo i helpem mifala blong wet long ol merikel.
Hem i posibol se afta long misin bae yumi nogat semmak amaon blong taem blong stadi skripja evri dei, be mi promes se sapos yu mekem taem blong stadi Buk blong Momon wetem prea evri dei, bae yu faenem bigfala paoa long saed blong spirit mo gat tras long Lod mo ol promes blong Hem.
2. Mekem Stadi blong Yu i Gat Mining Taem Yu Kaekae long Ol Toktok blong Kraes.
Nifae i tijim “Kakae gud long ol toktok blong Kraes; from luk, ol toktok blong Kraes bae i talem long yufala evri samting we yufala i mas mekem” (2 Nifae 32:3
Blong kakae i no minim blong ridim nomo—i minim blong harem gud long hem, tingting hevi, mo putum long aksen. Taem yu stadi Buk blong Momon, tingting long ol wei we i save mekem skripja stadi blong yu i gat moa mining. Eksampol:
-
Yusum ol stadi help insaed long Gospel Laebri ap.
-
Luksave ol trutok we i no save finis we i helpem yumi andastanem plan blong God mo i lidim yumi blong mekem mo kipim ol kavenan wetem Papa blong yumi long Heven .
-
Makem ol impoten toktok mo raetem daon ol tingting blong yu blong holemtaet wanem yu bin lanem long taem blong stadi blong yu.
Buk blong Momon i gat paoa blong ansa long ol kwestin blong sol blong yumi. Olsem Nifae i bin talem, yumi sud: “mi yusum evri skripja long laef blong mifala, blong hem i save stap blong helpem mifala mo blong mifala i lanem samting” (1 Nifae 19:23).
Taem yumi kaekae long ol toktok blong Kraes, bae ol doa blong revelesen i open mo soem yumi wanem yumi nidim blong mekem long ol defren situesen long laef blong yumi blong kam moa kolosap long Hem.
3. Talemaot Testemoni blong Yu long Trutok blong Buk blong Momon.
Semmak olsem we Lihae i wantem blong serem frut blong tri blong laef wetem famli blong hem (luk long 1 Nifae 8:12), taem yumi kasem wan testemoni blong Buk blong Momon, yumi developem wan strong tingting blong serem glad we i kam long save ia abaot gospel blong Jisas Kraes.
Wan long ol misinari blong mitufala, Sista Benson, we i stap naoia long sesen ia i serem wetem mi strong tingting ia blong hem blong helpem smol brata blong hem. Long taem ia, brata blong hem i stap rere blong go long kolej, mo i no save sapos hem i wantem sevem wan ful-taem misin. Mi gat strong tingting ia blong invaetem Sista Benson blong ridim Buk blong Momon long ol fas fo manis long misin blong hem, makem ol fevret ves blong hem, mo afta sendem kopi ia i go long brata blong hem.
Sista Benson i sendem kopi blong Buk blong Momon we hem i makem i go long brata blong hem blong i ridim evri naet. Afta hem i serem wetem mi: “Bifo long misin blong mi, brata blong mi i no save sapos hem i wantem sevem wan ful-taem misin. Sloslo, taem hem i stap ridim Buk blong Momon, hem i faenemaot glad we i stap kam antap long laef blong hem mo stat blong tingting blong sevem wan misin.”
Tu wik bifo Sista Benson i finisim misin blong hem, brata blong hem i kasem misin kol blong hem. Naoia, hem i stap givim seves long Meksiko Tuxla Gutierrez Misin. Tru long Buk blong Momon, Elda Benson i kam blong luk laef blong hem long saed blong spirit, wetem wan klia lukluk, we i lidim hem blong givim seves long Lod mo trastem se evri samting bae i wokaot. Desisen ia i wan merikel— we i kam tru long paoa blong toktok blong Kraes.
Ol brata mo sista, mi leftemap tingting blong wanwan long yufala blong mekem stadi blong yufala long Buk blong Momon i kam moa dip. Mi save se, taem yumi stap kakae long ol toktok blong Kraes we i stap insaed long Buk blong Momon, Spirit bae i helpem yumi andastanem ol trutok we i no save finis mo serem testemoni blong yumi wetem strong tingting long olgeta we Lod i rere long olgeta blong harem mesej blong Hem. Lod i talem: “from olgeta we mi jusum oli harem voes blong mi mo oli no mekem hat blong olgeta i strong tumas ” (Doktrin mo Ol Kavenan 29:7 Mi testifae se olgeta we oli askem God wetem fet bae oli kasem wan testemoni blong ol trutok mo olsem wanem Buk blong Momon i tabu, tru long paoa blong Tabu Spirit. Long hemia, mi testifae long nem blong Jisas Kraes, amen.