Paoa blong Givhan long Wan Ia

Ol dia brata mo sista, tangkyu long fetful devosen blong yufala blong kam long Jisas Kraes long ol had taem ia. Yu yu gud tumas, yu yu naes tumas, wanwan long yufala i pikinini blong God. Hem i prea blong mi se bae yumi luksave paoa blong Tabu Spirit taem yumi kam, helpem wan blong kam tru disaepol blong Jisas Kraes mo filim glad blong Hem taem yumi stap wosip insaed long haos blong Lod.

Presiden Russell M. Nelson i talem: “Naoia i taem blong yu mo mi blong rere from Seken Kaming blong Lod mo Sevya blong yumi, Jisas Kraes. Naoia i taem blong yumi mekem wok blong stap wan disaepol olsem fas mo nambawan samting. Long wan wol we i fulap long plante samting we i stopem yumi from gospel, ?hao nao yumi save mekem hemia?”

Hem i givim ansa: “Stap wosip oltaem long tempol bae i helpem yumi. Insaed long haos blong Lod, yumi lukluk moa long Jisas Kraes. Yumi kam blong save Hem. Evri man we i lukaotem Jisas Kraes wetem tru tingting bae oli faenem Hem insaed long tempol..”

?Olsem wanem nao yumi save kam blong helpem wan blong kam tru disaepol blong Jisas Kraes? Yumi givhan long wan ia. Givhan long wei blong Sevya i nidim sore, kaen fasin, fasin blong save wet longtaem mo lav we i no blong jajem wan. Taem yumi stap givhan long wan ,we yumi invaetem wan ia we bae i kam long Kraes mo blong wosip long haos blong Lod blong kasem paoa blong Hem we i pemaot sin. Long narafala toktok, yumi helpem yumi wanwan blong kam ol tru disaepol taem we yumi givhan long wan long ol wei we i save lid i go long haos blong Lod.

Yumi lan long Jisas Kraes se paoa blong givhan long wan wetem lav mo no jajem man. Yu tingbaot woman Sameria long saed blong wel. Woman maet hem i filim se hem i no impoten, hem i stap hemwan, i harem nogud o oli no wantem save long hem. Woman ia i filim se hem i no pat. Truaot long laef blong hem, hem i gat faef man, mo man we hem i stap wetem i no man blong hem. Ol narafala man maet bae oli gat jajmen be oli no save wanem nao hem i stap fesem. Hemia i maet long wan ol risen from wanem hem i kam blong stap hemwan long hot dei ia long wel. Mo yet, hem i wan long ol fas woman we i Jisas Kraes i talem long olgeta se Hem i Mesaea. Long Hem, woman ia i wan pikinini gel blong God.

Jisas Kraes i tijim woman ia se tru long Hem wan i save kasem wota ia we i stap laef we i no save finis. Hem i talem, “Be man we i dring wota ia we mi bambae mi givim long hem, bambae hem i no save tosta bakegen samtaem. Wota ya we mi bambae mi givim long hem i save kam olsem wan springwota we i save ron oltaem insaed long hem, blong givim laef ya long hem we i no save finis.”

Woman blong Sameria ia i filim lav blong Sevya mo kasem wan witnes tru long Spirit se Hem i Mesaea. Afta long witnes ia, hem i gobak long siti mo invaetem ol narafala i kam mo luk, mo plante i biliv se Jisas, “Hem i Kraes, Sevya.” Kraes i givhan long wan ia wetem lav, olsem wan risal, narafalawan oli kam ol disaepol blong Hem.

Yumi lanem se paoa blong givhan long wan ia wetem lav mo sore we i kam long Aposol blong Kraes Pita mo Jon. Yu tingbaot wan man, we leg blong hem i nogud taem hem i bon kam long wol, i silip long get blong tempol i stap askem mane. Man ia maet hem i filim se hem i no impoten, hem i stap hemwan, tingting i stap daon, mo oli no wantem save long hem. Maet hem i filim se hem i no pat.

“Be Pita i talem long hem se, Mi mi no gat mane nating, be wan samting we mi mi gat, bambae mi givim long yu, long nem blong Jisas Kraes, man Nasaret, mi mi talem long yu, !Yu girap, yu wokbaot”

Pita i tekem man ia long raet han blong hem mo i leftemap hem, mo man ia i kam oraet evriwan. Afta long merikel ia, man ia i go insaed long tempol wetem Pita mo Jon, “Mo wantaem nomo hem i girap, i stanap, i stat wokbaot, i stap jiamjiam, i stap presem God.” Pita mo Jon i givhan long wan ia long plante wei we i lid i go long haos blong haos Lod, mo man ia i kam wan tru disaepol blong Kraes.

Ol fren blong mi, i gat ol taem long laef blong mi mi tu mi filim se mi no impoten, mi stap miwan, mo oli no wantem save long mi. Mi bin filim se mi mi no pat Taem mi gat 19 yia, mi bin kasem baptaes mo konfemesen, blong kam wan memba blong Jos Ia blong Jisas Kraes blong Ol Lata-dei Sent. Wan yia afta, mi akseptem kol ia blong go long wan fultaem misin, be mi no save gud yet Jos Histri.

Long eli taem long misin seves blong mi, mi bin lanem se long taem blong ol Man Afrika oli no letem olgeta blong glad from evri blesing blong wosip long haos blong Lod. Taem mi save hemia blong fas taem i mekem mi kros, konfius, gat tu tingting, mo fraet. Ol filing oli strong tumas mekem se mi no luksave Tabu Spirit blong samtaem.

Laki nomo, mi gat wan gudfala misinari kompanion, Kevin Vick, we i givhan long mi wetem lav, fasin blong save wet, mo wetem kaen fasin. Evri naet hem i witnes long ol filing blong mi blong tu tingting, bae hem i jes talem nomo, “Elda Johnson, mi lavem yu.” Afta long tu wik, mi letem miwan filim lav blong Kevin bakegen. Mi gat strong tingting ia blong prea long Papa long Heven long nem blong Jisas Kraes. Taem mi prea, tingting blong kasem long seksen 6 blong Doktrin mo Ol Kavenan, ol ves 21–23, we i talem olsem:

“Luk mi mi Jisas Kraes, Pikinini blong God. “Mi mi laet we i saen long tudak.”

I tru, i tru, mi talem long yu, sapos yu wantem gat wan moa witnes, pulum tingting blong yu i gobak long naet ia we yu bin krae long mi insaed long hat blong yu, se bae yu mas save se olgeta samting ia oli tru.

“?Olsem wanem? ?Mi no bin givim wan filing blong pis long maen blong yu long saed blong poen ia? ?Wanem moa witnes yu save gat bitim hemia we i kam long God?

Taem mi ridim hemia, mi tingbaot. Mi tingbaot dei ia we mi fas mo prea blong save se Buk blong Momon i tok blong God, mo se Josef hem i wan Profet blong Restoresen. Mi tingbaot ol kavenan we ol i bin mekem insaed long haos blong Lod we i konektem mi wetem Jisas Kraes long wan fasin blong miwan. Mi filim lav blong Sevya, sore blong Hem, mo tru tok blong Hem se Jos Ia blong Jisas Kraes blong Ol Lata Dei Sent hem i kingdom blong Hem long wol ia mo i mas stap blong yu rere long Seken Kaming blong Hem. From mi tingbaot hemia, bakegen mi save luksave Tabu Spirit mo blong andastanem gud moa se Jisas Hem i Kraes mo mi mi wan disaepol blong Hem.

Samtaem bae yumi gat ol kwestin we i nogat ansa blong hem mo ol filing se yu yu no impoten, tingting i stap daon, stap miwan, o no wantem save long hem. Be, ol fren blong mi, yumi mas muv i go fored wetem fet long Jisas Kraes mo tingbaot ol toktok blong Hem:

“Hat blong yufala i no mas trabol.”

“Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”

Mi mi wan witnes long samting ia we i tru mo promes blesing blong Sevya.

?Wanem nao yumi save mekem blong meksua se ol givhan blong yumi long wan ia i gat mining long hem? Blong stap laef folem doktrin blong Kraes bae i helpem yumi. Blong stap laef folem doktrin blong Kraes i save givim yumi wan wei blong laef we i moa klin, i krietem paoa blong faea blong spirit long laef blong yumi.

Taem yumi stap traehad blong laef folem ol loa blong Jisas Kraes, Sevya i leftemap yumi i go ova long paoa blong wol ia we i foldaon i stap mo i blesem yumi wetem bigfala jareti, fasin blong gat tingting i stap daon, givim wetem glad, stap kaen, kontrolem yumiwan, pis mo spel.”

“Taem yumi laef folem doktrin blong Kraes, i krietem paoa mo spid we i no jenisim yumi nomo i kam ol stret pikinini blong God be tu i givim strong tingting long yumi blong helpem ol narawan long ol gudfala wei.” Elda Renlund i tijim se “wok blong Sevya i blong hilim [mekem yumi kam gud fulwan]. Wok blong yumi i blong lavem man—blong lavem mo givhan long wei we i save pulum man i kam long Jisas Kraes.”

Wanem yumi save mekem blong laef folem doktrin blong Kraes i kam pat long evri dei i blong stadi Buk blong Momon mo blong tekpat long sakramen evri wik. Presiden Nelson i talem se Buk blong Momon “i tijim doktrin blong Kraes i givim andastaning we i moa fulwan mo i gat moa paoa abaot Atonmen blong Jisas Kraes, we yu save faenem long eni ples. Mi laekem buk ia. Tekpat long sakramen wetem prea evri wik bae i mekem save blong yu blong Atonmen blong Sevya Jisas Kraes mo ol doktrin blong Hem mo blong tanem yu gobak long Papa God. Tingbaot “insaed long ol odinens [prishud], i gat paoa we i olsem hemia blong God, i kamaot,” mo from paoa ia, paoa blong mo paoa we i kam long Jisas Kraes, i mekem ol strong tingting blong yumi mo wanem yu save mekem blong givhan long wan ia.

Stadi blong mi long Buk blong Momon mo blong stap tekpat long sakramen i mekem ol filing blong gat tu tingting i go daon, i leftemap strong tingting blong mi blong givhan long wan ia long wei blong Sevya, mo help blong mekem blong folem Sevya i kam faswan.

Ol fren blong mi, mi promes se taem yumi stap laef folem doktrin blong Kraes mo givhan long wan ia long ol wei we i save lid i go long haos blong Lod, bae yumi save muv i go fored wetem fet long Jisas Kraes iven long medel blong ol kwestin we oli no ansa mo ol filing ia se oli no impoten, oli stap olgeta wan, tingting stap daon, mo oli no wantem save long olgeta. Bae yumi invaetem wan we bae i kam long Jisas Kraes mo blong wosip long haos blong Lod blong kasem paoa blong Hem we i pemaot sin mo lav. Insaed long haos blong Lod, bae yumi “filim sore blong [Sevya]. Bae [yumi] faenem ol ansa long plante had kwestin blong [yumi]. [Bae yumi] andastanem moa gud, glad ia we i stap long gospel blong Hem.” Long nem blong Jisas Kraes, amen.