Kasem Tes mo Mekem Yu Kam Strong Moa Tru long Kraes

Ol dia brata mo sista blong mi, mi filim lav blong Lod taem yumi mit tugeta. Bae mi toktok long yufala wetem tingting we i stap daon. Mi prea se Spirit bae i karem i go insaed long hat blong yufala wanem we Lod bae i wantem yufala blong harem, we i moa long ol toktok k we bae mi talem.

Taem mi yangfala, mi wantem blong lanem fisiks [physics] mo matematik long ol yia we mi stap long kolej . Mi filim se i tumas long mi. Mi stat blong filim se mi stap traem blong lanem wan samting we i had tumas long mi. Moa mi filim se i tumas , moa mifilim se mi no gat inaf paoa blong stap traehad. Tingting blong mi we i foldaon i lidim mi blong filim se ol hadwok blong mi oli no gat yus. Mi stat tingting blong givhap mo stadi wan samting we i moa isi.

Tingting blong mi i foldaon. Taem mi prea, mi filim pis mo tras blong Lod. Mi filim Hem i talem long maen blong mi, “Mi stap testem yu, be mi stap tu wetem yu.”

Long tetaem ia mi no save wanem evri toktok ia i minim. Be mi save wanem blong mekem—Mi go wok long hem.

Taem mi stap tingting hevi mo wok long ol yia we i kam, mi kam blong andastanem mesej ia blong leftemap tingting insaed long ol skripja: “Mi save mekem evri samting, long paoa blong Kraes ya we i stap mekem mi mi strong.”

Mi lanem se ol hadwok blong mi wetem fisiks i bin wan tru presen we i kam long Lod. Hem i stap tijim mi se wetem help blong Hem, mi save mekem ol samting we i no posibol, sapos mi bin gat fet ia se Hem bae i stap long taem ia blong helpem mi. Tru long presen ia, Lod i stap wok blong pruvum mi mo mekem mi kam strong moa.

Toktok ia pruvum i gat sam mining. Blong pruvum wan samting, i no blong testem nomo. Hem i blong mekem paoa blong hem i kam strong moa. Blong testem wan pis blong aean hem i blong meltem. Bae oli mekem i hot, fosem mo prestem kasem taem we tru wok blong hem i kamaot klia. Aean ia i no lusum paoa taem oli stap mekem tes long hem. Be i tru, hem i kam wan samting we man i save trastem, i kam wan samting we i strong inaf blong mekem ol bigfala wok.

Lod i testem yumi blong pruvum yumi kolosap long semmak wei blong mekem yumi kam strong moa. Tes ia i no kam long ol isi taem o taem i gat kamfot. Hem i kam long ol taem we yumi filim se oli pusum yumi i go ova long wanem we yumi ting se yumi save mekem. Lod i tijim se bae yumi gohed blong kam antap mo blong neva taet long ol hadwok blong yumi, se bae yumi neva givap mo bae yumi gohed blong stap traehad.

Taem yumi gohed blong gat fet long Jisas Kraes—iven sapos yumi filim se ol samting oli no posibol long taem ia—bae yumi kam moa strong long saed blong spirit. Ol tabu skripja oli tokbaot plante trutok ia.

Eksampol, Lod i testem profet Moronae mo mekem hem i kam strong moa long semmak wei. Hem i stap hemwan long ol las yia blong hem. Hem i bin raetem se hem i nogat ol fren, se oli kilimded papa blong hem, se oli prapa spolemgud ol pipol blong hem. I gat olgeta we oli lukaotem blong tekemaot laef blong hem.

Be yet, Moronae i no lusum hop. Be, hem i raetemdaon testemoni blong hem abaot Jisas Kraes long ol buk we i blong ol pipol we hem bae i no laef blong luk olgeta, we i tekem tu, ol laen blong ol pipol we oli wantem blong kilim hem. Hem i bin raetem blong yumi. Hem i save se sam bae oli jikim ol toktok blong hem. Hem i save se sam bae oli no akseptem olgeta. Be yet, hem i gohed blong stap raet.

Fet blong Moronae i kam klin mo strong moa long taem we Lod i stap testem hem. Hem i kam moa klin. Ol toktok blong hem i gat paoa blong wan we i gohed blong stap fetful kasem en. Yumi save filim paoa ia taem yumi stap ridim testemoni blong hem:

“Nao mi, Moronae, mi raetem smol olsem we mi ting se i gud; mo mi raetem long ol brata blong mi, Ol Man blong Leman; mo mi wantem se oli mas save se bitim fo handred mo twante yia i bin pas i go, stat long taem we saen i bin kamaot blong taem we Kraes i bin kam.

“Mo mi silim ol histri ia, afta we mi bin talem samfala toktok long fasin blong askem strong long yufala.

“Luk, mi wantem askem strong long yufala se, taem we bae yufala i ridim ol samting ia, sapos hem i waes tingting long God se bae yufala i ridim olgeta, se bae yufala i save tingbaot hamas sore Lod i bin gat long ol pikinini blong ol man, stat long taem we hem i mekem Adam we i kam daon kasem taem we bae yufala i kasem ol samting ia, mo tingting hevi long hem insaed long hat blong yufala.

“Mo taem we bae yufala i kasem ol samting ia, mi wantem askem strong long yufala se bae yufala i askem God, Papa we i No Save Finis, long nem blong Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit.

“Mo tru long paoa blong Tabu Spirit, bae yufala i save trutok long saed blong evri samting.”

Testemoni blong Moronae i kam klin tru taem hem i bin stap hemwan, be i saenaot wetem laet blong lidim evri jeneresen blong lukaotem Papa blong yumi long Heven mo Sevya, Jisas Kraes.

Wan narafala profet blong Buk blong Momon, Jekob, Lod i bin testem hem mo mekem hem i kam strong moa olsem wan pikinini we i stap fesem ol hadtaem mo plante harem nogud. Be papa blong hem Lihae, i bin tijim hem se God bae i blesem hem tru ol hadtaem blong hem.

“Mo luk, taem we yu smol, yu bin safa plante hadtaem mo plante harem nogud, from ol rabis fasin blong ol brata blong yu.

“Be, Jekob, fasbon blong mi we mi gat long waelples, yu save ol bigfala samting blong God; mo bae hem i konsekretem ol hadtaem blong yu blong oli kam wan blesing blong yu.

“Taswe, bae God i blesem sol blong yu, mo bae yu stap sef i stap wetem brata blong yu, Nifae; mo ol dei blong yu bae yu wok blong God. From hemia, Mi save se hem i pemaot yu, from Ridima blong yu i gat stret mo gud fasin; from yu bin luk se long en blong taem we evri wok blong God i kamtru, hem i kam blong karem fasin blong sevem man i kam long evri man.”

Profet Josef Smit i bin eksperiensem kaen tes ia mo fasin blong kam strong moa, taem hem i bin stap long Libeti Kalabus. Long ol bigfala harem nogud blong hem, Profet Josef i singaot:

“O God, ?yu yu stap wea?

“?Kasem wetaem nao bae yu holembak han blong yu?”

Lod i luk long safaring blong Josef, mo paoa blong jenis we i mekem hem ikam moa tabu, long taem we hem i stap strong mo fetful, mo Hem i ansa:

“Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo;

“Mo afta, sapos yu mekem gud blong stap strong, God bae i leftemap nem blong yu long heven; mo bae yu win ova long evri enemi blong yu.”

Bigfala eksampol blong testem mo mekem wan i kam strong moa i hapen tru long Atonmen blong Sevya. Hem i tekem long Hemwan ol sin blong wol. Hem i karem ol sobodi mo ol harem nogud blong yumi. Hem i dring aot long konkon kap. Hem i pruvum blong stap fetful long evri taem ia.

From bigfala Atonmen blong Hem, Jisas Kraes i save mekem yumi kam strong moa long ol taem blong tes blong yumi . Hem i save olsem wanem blong givhan long yumi from se Hem i bin filim evri jalenj we bae yumi oltaem filim long laef blong wol ia. “Hem bae i tekem long Hem ol sobodi mo ol sik blong ol pipol blong Hem … mekem se hem i save … olsem wanem blong helpem ol man blong hem long saed blong ol samting we oli no strong long olgeta.”

Yumi lanem se long Garen blong Getsemane, Sevya i bin askem long Papa sapos i save tekemaot tes ia long Hem—be afta Hem i talem tu se, sapos hem i tingting blong Papa, bae Sevya i mekem. Long nara toktok, iven Sevya i gat tu tingting mo no sua, be Hem i gat fet long Papa blong Hem long Heven.

Ol brata mo sista, ol taem blong tes blong yu mo fasin blong kam strong moa , maet i no olsem blong Moronae, Jekob o Profet Josef. Be bae i kam. Bae i save kam kwaet, tru ol tes blong famli laef. I save kam tru long siknes, tingting we i foldaon, harem nogud o gat filing se yu stap yuwan.

Mi serem witnes blong mi se ol taem ia oli no wan pruf se Lod i lego yu. Be, oli ol pruf se Hem i lavem yu inaf blong mekem yu kam klin mo kam moa strong. Hem i stap mekem blong yu kam strong inaf blong kwalifae from laef we i no save finis.

Sapos yumi stap gohed blong stap fetful long seves blong yumi, Lod bae i mekem yumi kam klin. Hem bae i mekem yumi kam strong moa . Mo wan dei bae yumi lukluk i gobak mo luk se ol hadtaem ia oli ol pruf blong lav blong Hem. Bae yumi luk se hem i stap stretem yumi blong mekem se yumi save stanap wetem Hem long glori. Olsem we Aposol Pol i bin talem long en blong laef blong hem se, “Long laef blong mi we mi mi bilif strong long Kraes, i olsem we mi mi stap resis strong long wan resis, mo naoia mi mi kamtru finis long en blong hem, mo mi mi stap holem strong yet fasin blong bilif.”

Mi testifae se God i save yu. Hem i save ol hadtaem we yu fesem. Hem i stap wetem yu. Hem bae i neva fogetem yu. Mi testifae se Jisas Kraes, Hem i Pikinini blong God. Hem i paoa blong yumi, Ridima blong yumi, hop blong yumi. Sapos yumi trastem Hem, bae Hem i mekem yumi gat paoa long saed blong spirit i semmak long evri hadtaem we oli singaotem yumi blong go tru long hem. Mi testifae olsem long tabu nem blong Jisas Kraes, amen.