Famli: Wan Ofisol Toktok—Ol Toktok blong God

Jeneral Konfrens ia blong Oktoba 2025, i makem 30 yia betdei blong “Famli: Wan Ofisol Toktok I Go long Wol.” Tabu wok ia blong mekem ofisol toktok ia, wetem ol toktok we i kam tru long revelesen, oli krietem “blong holem taet mo mekem famli i kam strong olsem stamba yunit ia blong sosaeti.”

Evriwan i pat long wan famli, nomata yu wan mama, papa, pikinini gel, pikinini boe, apu pikinini, apu man mo woman, anti, angkel, brata, sista kasen. Moa impoten nao se wanwan long yumi, olsem we ofisol toktok i talem “i wan spirit pikinini boe o spirit pikinini gel blong papa wetem mama long heven we oli laekem olgeta tumas … [mo oli] gat bigfala janis blong save kam olsem wan god. wetem wan tabu fasin mo laef.”

Taem oli singaotem mi long tabu wok ia blong stap olsem wan aposol long 2015, oli advaesem mi se, “Naoia, ofisol toktok ia i blong yu. Nem blong yu [mo poenem toktok ia ‘Kworom blong Olgeta Twelef Aposol’ long taetel] i stap stret long ples ia. Filim mo tijim wetem strong tingting.”

Mi laekem famli ofisol toktok. Mi testifae raon wol stat long Afrika kasem Ostrelia mo evri ples long medel blong tufala abaot wok blong famli insaed long plan blong God we i no save finis. Ofisol toktok ia i kamaot long wan tabu ples, mo from hemia yumi mas tekem ol toktok we i kam long God i tabu.

Tingbaot, ol brata mo sista, olsem we mi bin talem long wan jeneral konfrens we i pas long pulpit ia se, “Ol toktok oli impoten.”

Letem mi givim long yufala sam tingting biaen long ofisol toktok ia olsem wan stamba mesej blong bilivim blong yumi.

Long 1994, wan yia bifo oli talemaot ofisol toktok ia, Kworom blong Olgeta Twelef Aposol oli bin toktok raon long olsem wanem sosaeti mo ol gavman oli no stap folem tol loa blong God long saed blong famli, mared, mo man o woman [jenda]. “Be hemia i no en blong wanem we mifala i luk,” Presiden Russell M. Nelson i eksplenem afta. “Mifala i luk ol hadwok blong ol defren komuniti we oli karemaot evri standet mo limit long saed blong seks aktiviti. Mifala i luk ol man mo woman we oli konfius abaot jenda blong olgeta. Mifala i luk evri samting ia oli stap kam.”

Olgeta Twelef oli tingting strong blong rere long wan pepa, wan ofisol toktok, we i tokbaot bilif blong Jos long saed blong famli. Long semmak yia ia, ol Aposol ia, ol sia we God i bin singaotem, oli rere long wan ofisol toktok abaot famli. Presiden Dallin H. Oaks i tokbaot taem ia we oli tanem olgeta i go long Lod long prea abaot “wanem [oli ] sud talem mo olsem wanem oli sud talem.” Oli i soem long Fas Presidensi: Presiden Howard W. Hunter, Presiden Gordon B. Hinckley, mo Presiden Thomas S. Monson blong oli talem tingting blong olgeta long hem.

Sam manis afta long Maj 1995, Presiden Hunter i ded mo Presiden Hinckley i kam namba 15 Presiden blong Jos. Naoia, ofisol toktok ia i stap long ol han blong hem. ?Wetaem nao i stret taem blong mekem ofisol toktok ia i go long Jos? Taem ia i kam sikis manis afta.

Sam dei bifo namba 23 Septemba, long jeneral Rilif Sosaeti miting we i folem jeneral konfrens, Presiden Hinckley mo ol kaonsela blong hem oli mit mo kaonsel tugeta wetem Rilif Sosaeti Jeneral Presidensi. Ol sista, semmak olsem ol Aposol, olgeta tu oli wari bigwan abaot ol woman mo ol famli. Oli mekem plan blong lukluk long famli, long ol miting we i stap kam.

Oli askem Presiden Hinckley, blong toktok long ol woman long miting ia. Hem i bin stap tingting hevi long daereksen blong ol toktok blong hem. Taem miting i stap gohed, hem i talem niufala nem ia we pablik i no save yet “Famli: Wan Ofisol Toktok i Go long Wol.” ?Miting blong ol woman ia hem i raet taem mo ples blong mekem ofisol toktok ia abaot famli?

Jeneral Rilif Sosaeti Presiden Elaine Jack i eksplenem afta se: “Long taem ia mifala i no bin save se ofisol toktok blong famli i abaot wanem. [Mifala] i bin save tru long taetol blong hem, be mifala i filim se eni samting abaot famli … bae hem i wan gudfala samting. … Mi bin filim gud se mifala i gat ol memba blong Kworom blong Olgeta Twelef we oli stap kasem revelesen ia.”

Rilif Sosaeti miting long Satedei ia hem i bin wan histri. Presiden Hinckley i bin introdiusum ofisol toktok blong famli, wetem ol impoten toktok ia: “Wetem fulap giaman tingting we i mekem yumi no luksave trutok, wetem fulap giaman toktok abaot ol standet mo ol valiu, wetem fulap temtesen we i luk naes we i stap pulum tingting blong yumi sloslo i go long wol, yumi filim blong wonem o givim woning bifo … blong ol standet, ol doktrin, mo ol praktis we i pat long famli we oli profet, ol sia, mo ol reveleta blong jos ia oli gohed blong ripitim truaot long histri.”

Afta hem i ridim ful ofisol toktok ia. Olsem we Lod i talem, “I nomata oli kamaot tru long voes blong miwan o tru long voes blong ol wokman blong mi, i semmak.”

Ofisol toktok i talem se, “Famli, God nao i odenem.” Mi laekem hamas toktok ia i klia gud. Ofisol toktok ia i wan woning blong yumi laef folem long wol ia wetem save ia se yumi gat tabu paoa mo fiuja we i no save finis long fored blong yumi. Presiden Nelson i talem se, “Yufala i ol stret spirit pikinini blong God. … No mekem mistek long hemia: Paoa blong yufala blong gro i tabu. Wetem strong tingting blong lukaotem samting, , God bae i soem long yufala smol pat blong huia bae yufala i save kam olsem.”

Taem ofisol toktok ia i kamaot, hem i no bin folem lukluk blong plante long wol ia. I no long taem ia. I no long taem naoia. I gat olgeta we oli harem nogud from ofisol toktok ia long saed blong famli, mared, mo jenda. Sam oli askem blong Jos i no mekem i strong tumas long olgeta, blong jos i lukluk bak mo iven blong i karemaot ofisol toktok ia.

Ol brata mo sista, olsem we Presiden Hinckley i bin talem, ofisol toktok ia abaot famli, i doktrin. Ol prinsipol ia oli no soem wan rong rod, oli folem gud ol wei blong Lod mo kavenan rod blong Hem. Ol tijing blong ofisol toktok ia, Lod Jisas Kraes nao i soem long ol Aposol blong Hem long taem bifo mo tedei. Hemia i Jos blong Hem; Hem nao i putum ol trutok ia we yumi stap laef folem.

Sam long yufala i maet tingting long ofisol toktok ia mo talem se, “Mi no agri long hemia.” “toktok ia i mekem man i no filim gud.” “Famli blong mi i no olsem ia.” “toktok ia i mekem mi no fil pat.”

Long olgeta we i wari, save se yu yu wan pikinini blong papa mo mama long heven, yu yu pat blong famli blong Papa blong yu long heven. I nogat wan man i save gud yu o kea moa abaot yu bitim Hem. Tanem yu i go long Hem, talemaot hat blong yu long Hem, trastem Hem mo ol promes blong Hem. Yu gat famli long Sevya Jisas Kraes, we i lavem yu. Hem i kam long wol ia blong pemaot sin blong yumi, mo tekem long Hem ol mistek mo ol harem nogud blong yumi i. Hem i andastanem wanem yu stap fesem mo stap filim. Tanem yu i go long Hem, trastem se Hem bae i sendem Tabu Spirit blong stap wetem yu, leftemap yu, mo gaedem yu. Filim lav blong Olgeta “we i seraotem hemwan i go long evri ples long ol hat blong ol pikinini blong ol man … hem i samting we evri man i wantem moa plante long ol narafala samting … mo hem i wan glad we i bigwan olgeta long sol.”

Evri Aposol blong Lod oli lavem yufala tumas. Mifala i prea from yufala mo lukaotem daereksen blong Lod from yufala. Stap wetem mifala. Yufala i laef long wan taem blong fulap jalenj, taem devel i stap traehad blong winim yufala. No letem hem i winim yufala. Mo sapos yufala i go finis, kambak. Ol han blong mifala mo ol han blong olgeta we oli lavem yufala i open i stap.

Ofisol toktok i talem se, “Ol papa mo mama oli gat wan tabu wok blong lukaotem gud pikinini blong olgeta wetem lav mo fasin blong stap stret mo gud.” Buk blong Momon i givim wan seken witnes long trutok ia. Long fas ves blong fas japta, yumi ridim, “Mi, Nifae, mi tu mi bin bon long wan gudfala papa mo mama.” ?Hamas long yumi i bin statem Buk long Momon—mo statem bakegen mo bakegen—kasem poen ia we yumi savegud ol toktok ia? Putum long hat blong yumi.

Wan long ol fevret toktok blong mi insaed long ofisol toktok ia hem i hemia: “Hapines insaed long famli laef i gat gudfala janis blong kamtru sapos laef insaed long famli i stanap long ol tijing blong … Jisas Kraes.”

?Hu i no wantem stap hapi?

?Mo wanem hem i ol tijing blong Jisas Kraes? Bakegen, insaed long ofisol toktok: “Fet, prea, fasin blong sakem sin, fasin blong stap fogiv, respek, lav, fasin blong kea, wok, mo ol samting o pleplei we oli gud.”

?Laef blong hu bae i no kam gud sapos hem i no folem ol ki prinsipol ia? I nogat wan long yumi bae i mekem i stret gud; be yumi save folem waes toktok blong Presiden Hinckley: “Mekem evri bes we yu save mekem.”

Yumi ridim long ofisol toktok se, “Ol papa oli mas lidim ol famli blong olgeta … long lav mo stret mo gud fasin” mo “mama oli gat wan tabu wok blong lukaotem gud pikinini blong olgeta.” Prisaed i no minim se yu kontrolem, mo lukaot gud i no minim se bae i kam wan seken responsabiliti. God i bin givim long ol man mo woman, ol impoten wok we oli defren be oli stap long semmak level we oli go gud tugeta.

Letem mi serem wan stori abaot miwan.

. Mi mo waef blong mi i bin lanem blong wok gud moa olsem ol patna long wan semmak level afta long wan taem we mi bin disaed blong mekem wan impoten desisen, mo mi no bin tok raon long hem wetem waef blong mi. Aksen blong mi i bin sapraesem hem, i mekem hem i no hapi, mo putum hem long wan had situesen. Afta long taem ia, hem i putum han blong hem long solda blong mi mo talem strong se “Ron, plis, neva mekem olsem long mi bakegen.” Stat long taem ia, mitufala i bin stap long semmak pej oltaem.

Yumi faenem insaed long ofisol toktok blong famli se: “Long ol tabu wok ia, papa mo mama, tufala i mas helpem wanwan long tufala, olsem we tufala i semmak.”

Semmak hem i wan toktok we i impoten. Blong plante yia we i pas, Sista Rasband mo mi i bin wok tugeta long wanem we ofisol toktok ia i talem olsem “ol tabu responsabiliti blong yumi,” we i helpem mitufala blong wok tugeta. Taem wanwan long ol pikinini blong mitufala oli mared, Sista Rasband mo mi i givim kaonsel long olgeta wetem ol hasban mo waef blong olgeta long olsem wanem blong stap ol semmak patna.

Taem yumi laef wetem wan ae we i lukluk nomo long glori blong God, yumi respektem yumi wanwan mo sapotem yumi wanwan. Olgeta tabu paten ia blong stret mo klin fasin bae i mekem pis i stap long wanwan laef blong yumi, ol famli blong yumi, mo sosaeti.

Papa blong yumi long Heven i givim ofisol toktok long famli blong gaedem yumi i go hom long Hem. Mo blong helpem yumi lanem samting mo fulumap yumi wetem lav, paoa, stamba tingting, mo andastaning we i no save finis. Wetem ful sol blong mi, mi askem strong long yufala blong stap kolosap long Hem wetem Pikinini Boe blong Hem we Hem i lavem tumas. Mi promesem yufala se taem yufala i mekem olsem, Spirit bae i givim insperesen, gaedem yufala mo helpem yufala blong filim long hat blong yufala promes pis ia we “i bigfala moa, i bitim save blong yumi.” Long nem blong Jisas Kraes, amen.