Stap Tingbaot ol Sipsip

Kraes I Gudfala Man blong Lukaot long Sipsip. Wanwan long ol sipsip ia oli impoten long Hem. Hem i soem mo tijim yumi hao blong mekem wok blong givhan tru long ol kwaliti blong toktok mo aksen blong wan gud man blong lukaot long sipsip, mo blong save nem blong olgeta sipsip ia, lavem olgeta, faenem olgeta we oli lus, fidim olgeta, mo, long en, lidim olgeta i kambak hom bakegen. Hem i wantem yumi mekem semmak olsem Hem, blong lukaotem ol sipsip.

Yumi save lanem moa abaot blong wok blong givhan long wei blong Lod tru long ol profet blong bifo—mo wan gudfala man blong lukaot long sipsip—Moronae. Hem i bin stap laef long wan taem we i had tumas, hem i no gat janis ia blong yusum fon, ol kompiuta, mo intanet. Be hem i traehad blong kat wan rekod blong ol sipsip. ?Hao nao hem i mekem hemia? Yumi save luk wan praktis ia long Moronae 6. Long japta ia yumi ridim se ol memba “oli kaontem olgeta wetem ol pipol blong jos ia blong Kraes; mo oli tekem ol nem blong olgeta, blong oli save tingbaot olgeta mo fidim olgeta wetem gudfala toktok blong God, blong holemtaet olgeta i stap long stret rod. … Jos i mit tugeta fulap taem, blong livim kakae mo blong prea, mo blong toktok wan wetem narawan long saed blong gudlaef blong sol blong olgeta” (Moronae 6:4–5; oli ademap long italik).

!Blong Moronae, hem i bin abaot pipol nomo —nem blong ol pipol! Hem i bin praktisim prinsipol blong “kaontem mo kipim rekod” mekem se oli save tingbaot evriwan. Hem i luksave eniwan we i gat hadtaem o i lus,, hemia i givim janis long Ol Sent blong toktok raon long gud blong olgeta \ long ol kaonsel. Olsem man blong lukaotem sipsip we i livim ol naenti naen sipsip (mi sua se oli sef) mo go lukaot sipsip ia we i lus (luk Luk 15:4–7), oli askem yumi blong save ol sipsip blong yumi—blong luksave, tingbaot mo mekem olsem we Hem i mekem.

Olsem wan misin lida long India, mi tingbaot mi bin askem wan yang branj presiden abaot sam gol blong hem blong yia we i stap kam: “?Hamas man nao bae yu rere long olgeta blong kasem Melkesedek Prishud?” Kwik taem hem i ansa “!Seven!”

!Mi tingting mo askem miwan se wea nao hem i karem stret namba ia! Bifo mi ansa, hem i karemaot wan pis pepa we i gat ol namba, stat long wan kasem seven we i stap long hem. Ol fas faef laen i gat nem long hem—ol ril pipol we hem mo ol kworom blong ol elda bae oli invaetem mo leftemap tingting blong olgeta blong kasem presen ia blong prishud long laef blong olgeta. Mo yes, mi mas askem abaot emti laen blong sikis mo seven. Hem i talem “O, Presiden,” hem i muvmuvum hed blong hem blong agri, “fo sua bae mifala i baptaesem tu man eli long yia ia olsem bae tufala i save kasem prishud long en blong yia” Gudfala lida ia i andastanem prinsipol ia blong kaontem mo kipim rekod.

Kraes i oganaesem Jos blong Hem long wan wei we bae i had blong fogetem wan sol, from Hem i lavem wanwan long olgeta. Evri man mo woman insaed long wan wod, nomata long yia o jenda, oli gat plante wok—blong lukaot long ol sipsip—mo oli gat wok ia blong tingbaot mo tekem kea long olgeta. Eksampol, wan yang man oli asaenem hem wan bisoprik, ol givhan brata, ol yang adalt advaesa, ol seminari tija, ol kworom presidensi, mo sam narafalawan, blong stap givim seves olsem wan sefti net, we oli taetem strong andanit long yangfala ia blong kasem hem sapos hem i foldaon. Iven sapos oli putum wan net nomo long wan stret posisen, yang man ia bae i sef, bae oli luksave hem, mo tingbaot hem. Be yet, plante taem yumi no luk net ia i stap long stret ples. Plante taem ol pipol oli stap wokbaot i go long klaod blong tudak, mo nogat wan i luksave hemia. ?Olsem wanem nao bae yumi kam ol gudfala man blong lukaot long sipsip? Yumi save lanem blong stap kaontem mo kipim rekod.

Jos i givim yumi ol ripot mo ol tul blong mekem hemia nao—blong tingabaot. Ol fo manis ripot i wan gudfala eksampol. Hem i helpem yumi kaontem mo kipim rekod blong wanwan memba plante taem mo blong luksave olgeta we i no stap kam o we oli nidim help mo lav blong yumi. Aksen mo Intaviu Lis i soemaot olgeta we i nidim atensen blong yumi naoia, semmak olsem ol tempol rekomen ripot mo ol narafala. Ol tul blong kaontem mo kipim rekod i helpem yumi blong lukluk long ol pipol. ?Huia i nidim wan koling, wan prishud advensmen o help blong tekem wan famli nem i go long tempol? ?Huia nao yumi save helpem hem blong rere blong go sevem wan fultaem misin? ?Huia nao i no bin kam long manis ia? Ol tul ia i helpem yumi blong tingabaot ol pipol.

Mi save wan famli blong Yunaeted Stet we i bin kasem wan asaenmen long Afrika. Long fes Sandei blong olgeta, oli wokbaot i go insaed long wan Jos yunit ia nomo long kantri ia, we oli bin welkamem olgeta wetem glad. !Long en blong moning, waef blong man ia oli singaotem hem blong stap olsem Rilif Sosaeti presiden mo man ia olsem lida blong ol Yang Man! Hem i askem long yang branj presiden ia we i luk olsem hem i taed, hamas yang man hem i gat. Fetful lida ia we famli blong hem i fes jeneresen blong joenem Jos i poen i i go biaen long sakramen rum mo i talem, “tufala longwe ia.” Wetem wan strong tingting, hem i karem wan lis blong branj presiden i gobak long haos, mo hariap taem nomo hem i faenemaot se i gat 20 yang man long lis ia. Hem i gobak long branj presiden mo askem tu aktiv yang adalt we tufala i save inglis blong kam kaonsela blong hem mo afta hem i sidaon wetem tufala mo tufala boe ia i luklukbak long evri nem.

Mo afta tufala yang man ia i go wok wetem strong tingting. Blong sam manis, oli faenem evri boe long lis ia. !Nem afta nem, oli welkamem bak ol fren blong olgeta mo oli fidim olgeta long saed blong spirit mo bodi! Long wan yia ia, long ol Sandei, i bin gat wan namba blong samples 21 yang man long atendens. Tangkyu tumas long ol yang man we oli kaontem mo kipim rekod.

Wan gudfala fren blong mi, we i wan yang studen we i jes graduet, hem i muv wetem famli blong hem i go long wan bigfala taon long Amerika blong gohed long stadi blong hem. Kwiktaem oli singaotem hem blong prisaed ova long kworom blong ol elda. Hem i bin fraet smol abaot fas intaviu blong hem wetem stek presiden, be hem i gat strong tingting blong rere mo go . Hem i talem long stek presiden se hem i gat tri gol blong yia we i stap kam: (1) 90 pesen wok blong givhan, (2) wan impoten gospel lesen evri wik, mo (3) wan aktiviti blong kworom we oli planem gud evri manis.

Waes stek presiden ia i smael long fren blong mi mo i askem, “?Yu save givim nem blong wan les aktiv kworom memba we yu save helpem hem mo famli blong hem blong oli go long tempol long yia ia?” Kwestin ia i mekem fren blong mi i sapraes. Hem i tingting gud mo i talem wan nem. “Raetem daon,” stek presiden i talem. Mo afta, eksperiens lida ia i askem semmak kwestin ia tri taem moa—mo afta intaviu i finis. Yang man ia i wokbaot i aot long intaviu ia wetem wan long ol bigfala lesen long saed blong lidasip mo wok blong givhan. Hem i go insaed long intaviu wetem ol program, lesen, mo ol aktiviti. Hem i wokbaot i kam aotsaed wetem ol nem! Ol fofala nem ia i kam mein lukluk blong hem truaot long ministri mo kworom blong hem.

Olsem wan misin lida, long wan Sandei moning mi visitim wan long ol branj blong mi. Mi bin luk se oltaem branj presiden i stap tekemaot wan pepa aot long poket blong hem mo stap raet long hem. Mi mekem desisen ia blong askem hem abaot kad ia afta long las prea. Afta we miting i finis, mo bifo mi save askem abaot kad ia, branj misin lida i ron i kam long ples we ol lida i sidaon long hem mo i givim pepa ia long hem. Kwiktaem mi folem strong lida ia i go long branj misinari kodineta miting blong hem long evri wik. Bifo oli stat, hem i karemaot pepa ia long poket blong hem. Pepa ia i fulap wetem ol nem blong ol memba we oli no bin stap kam long sakramen miting. Long sam minit nomo, wanwan long ol memba blong kaonsel ia i selektem wan o tu nem, oli komitim olgeta blong visitim ol memba ia long semmak dei ia blong mekem sua se oli Oraet mo blong letem olgeta i save se oli misim olgeta. Hemia nao hem i fasin blong kaontem mo kipim rekod.

Mi tingbaot wan distrik we, blong kasem tempol we i moa kolosap long hem i tekem plante aoa long plen . Blong kasem wan laef tempol rekomen long distrik ia i wan fas samting, nomata long save ia se bambae oli neva yusum. Fas Sandei blong evri manis, ol lida oli yusum tul blong kaontem man blong rekodem olgeta memba we oli kasem endaomen finis. Sapos oli faenem se wan tempol rekomen bae i ekspae i no longtaem, eksekutiv sekretari bae i setemap wan intaviu blong riniu wan moa. Olgeta we rekomen blong olgeta i ekspae oli givim kaonsel long olgeta mo faenem wei blong helpem olgeta oli kambak long kavenan rod. Mi bin askem, hamas long ol memba blong olgeta we oli kasem endaomen finis oli gat wan tempol rekomen we i laef. Ansa hem i 98.6 pesen we i gud tumas. !Taem mi askem abaot olgeta sikis we rekomen blong olgeta i ekspae, ol lida ia oli save gud nem blong olgeta mo talem long mi ol wok we oli stap mekem blong tekem olgeta i kambak!

Sam yia i pas, famli blong mi i muv i gobak long Stet. Mifala i bin hapi tumas blong gobak long Jos long ples ia afta long ol gudfala 26 yia long wan yunit we i moa smol mo i stap hemwan. Oli singaotem mi blong kam olsem wan wod misinari. Mifala i bin gat wan gudfala wod misin lida mo mifala i mekem ol samting we i gud tumas mo stap tijim ol gudfala pipol. Mi bin askem blong joenem wan wod kaonsel miting blong lukluk mo blong karem help blong olgeta wetem ol fren we mifala i stap wok wetem. Mi sapraes tumas taem mi luk se oli stap toktok raon nomo long wan wod aktiviti we i stap kam. Afta long miting mi bin go luk wod misin lida mo talem long hem se hem i no bin gat janis blong kambak mo givim ripot blong ol pipol blong mifala. ?Ansa blong hem? “O, mi neva mekem ripot.”

Mi bin talem hemia long wan branj kaonsel miting long Lahore, Pakistan, we mi bin atendem samfala wik i pas. Smol grup ia i sidaon tugeta raon long wan smol tebol, mo oli tokbaot ol pipol nomo. Ol nem. Wanwan long ol lida ia oli mekem ripot long ol wok blong olgeta mo wanwan man mo woman mo ol famli we oli stap tingting long olgeta. Evriwan i gat janis blong serem tingting blong olgeta long wan Gudfala wei we bae i save blesem olgeta ia we oli stap tokbaot. Oli mekem ol plan mo givimaot asaenmen. Hemia i wan gudfala lesen blong kaontem mo kipim rekod blong ol nem blong ol fas jeneresen brata mo sista blong yumi.

Insaed long Jos ia blong Jisas Kraes, ol profet blong bifo mo profet blong tedei oli soem yumi—mo folem wei we Sevya i soem—olsem wanem blong mekem wok blong givhan. Yumi tekem ol nem, yumi tingbaot olgeta, mo yumi toktok raon from gud blong ol sol blong olgeta. Ol lida we oli mekem hemia bae oli neva sot long ol topik ajenda blong ol kaonsel miting blong olgeta! Prinsipol blong kaontem mo kipim ol rekod i wok. Hemia i wei blong Lod. Yumi save mekem i moa gud. Long God, we i krietem yunives mo rul ova long evri samting, wok ia i blong—Hem wok mo glori—i blong Hemwan. Mo hemia i kam tu long yumi, olsem ol tul long ol han blong Hem long gudfala wok blong Hem long saed blong fasin blong sevem man mo blong kam olsem wan god. Ol merikel long laef blong ol ril pipol bae i gat risal. Long nem blong Jisas Kraes, amen.