Stap Sapotem Wanwan Iong Yumi

I no longtaem i pas, mi ridim wan eksperiens we i tajem hat blong mi bigwan. Kompetisen blong ol olfala ia i tekem ples long—YSA Masta Trak mo Nasonal Fil Jampionsip.

Wan long olgeta we i tekpat long wan taosen faef handred mita iven ia, hem i Orville Rogers we i gat wan handred yia. Man we i raet i raetem:

“Taem pistol i faerap, olgeta blong resis oli stat blong resis i go, wetem Orville we i kam biaen, hem i stap hemwan truaot long resis ia, i stap ron i go sloslo. [Taem] las man we i resis long saed blong Orville i finis, Orville i gat yet tu mo haf raon blong finisim. I gat moa long tri taosen man we oli sidaon kwaet mo wajem hem i ron slo i go raon long ples blong resis—ples i kwaet fulwan mo hemwan i no filim gud.

“[Be] taem hem i stat blong statem las raon, bigfala grup oli girap mo stat blong singaot mo sapotem mo klapem han. Long taem hem i kasem en blong laen, bigfala grup ia oli singsingaot strong. Wetem bigfala sapot blong taosen sapota ia, Orville i givim las paoa blong hem. Bigfala grup ia i glad taem hem i krosem en blong laen mo olgeta we oli resis tugeta oli haggem hem. Wetem tingting i stap daon mo gladhat, Orville i sakem han i go long bigfala grup ia mo lego ples blong resis wetem ol niufala fren blong hem.”

Hemia i namba faef resis kompetisen blong Orville, mo long wanwan long ol nara kompetisen ia, we hem i tekpat tu long hem, hem i kam laswan. Maet sam oli gat tingting ia blong jajem hem rong, wetem tingting ia se hem i no sud kompit nomo from yia blong hem—se hem i nogat ples long resis ia from se hem i pulum tumas taem blong evriwan long kompetisen ia.

Be nomata se hem i finis laswan oltaem, Orville i brekem faef wol rekod long dei ia. Wan we i no stap blong wajem resis ia bae i no save bilivim hemia, semmak long olgeta we oli wajem mo tekpat wetem hem oli no save jajem hem. Nomata se ol ofisol oli kipim ol rul, Orville i no brekem wan rul nating. Hem i stap ron long semmak resis mo folem ol semmak rul olsem ol narafala wan we oli stap resis. Be hamas i had long hem—long taem ia wetem hamas yia mo hamas hem i save mekem wetem bodi we hem i gat —i putum hem long grup blong olgeta we oli gat wan handred yia o moa. Mo insaed long grup ia, hem i brekem faef wol rekod.

Olsem we i tekem Orville blong gat strong paoa long tingting blong resis evri taem, i tekem tu strong paoa long tingting blong sam long ol sista mo brata blong yumi blong gro evri dei long laef, wetem save ia se bae oli jajem rong olgeta nomata se oli stap traem bes blong mekem gud tru long ol jalenj blong folem Sevya mo givim ona long ol kavenan blong olgeta wetem Hem.

Nomata wanem ples yumi stap long hem long wol ia, nomata long yia blong yumi, hem i wan nid we i impoten blong evriwan long yumi i gat filing ia blong stap pat, blong filim se oli wantem mo nidim yumi se yumi gat stamba tingting long laef, nomata long ol situesen o wanem we i no letem yumi blong gro.

Long las pat blong resis, bigfala grup ia i soem bigfala sapot long Orville, taem oli stap givim hem paoa blong stap gohed. I nomata se hem i finis laswan. Blong olgeta we oli tekpat mo bigfala grup ia, hemia i moa long wan kompetisen. Long plante wei, hemia i wan naesfala eksampol we i soem lav blong Sevya.long aksen. Taem Orville i finis resis, oli glad tugeta wetem hem.

Semmak long Masta Jampionsip ia, kongregesen mo famli blong yumi i save kam ol ples blong kam tugeta blong stap sapotem wanwan long yumi—ol kavenan komuniti we i fulap wetem lav blong Kraes blong wanwan long yumi—blong stap helpem yumi blong winim ol jalenj yumi fesem, stap givim paoa mo leftemap tingting be no stap jajem wanwan long yumi. Yumi nidim wanwan long yumi. Tabu paoa i kam long fasin blong stap wan, mo hemia nao from wanem Setan i wantem tumas blong stap seraotem yumi.

Be nomo se, blong sam long yumi, samtaem blong stap atendem jos i had from ol defren risen. I save wan we i gat hadtaem wetem ol kwestin blong fet o wan we i fraet mo wantem stap longwe.hemwan. I save wan man we i kam long wan defren kantri o i gat defren kala, o wan we i gat defren laef eksperiens o defren lukluk we i mekem olgeta i filim se oli defren. I save ol paren we i had blong oli atendem jos from oli no slip inaf mo oli traehad long tingting from oli taet tumas blong lukaotem ol bebi o ol pikinini. I save wan we i stap lukaotem strong paoa long tingting blong kambak afta long sam yia we i no kam long jos o wan wetem filing blong fraet i se oli no gud inaf blong mekem wan samting mo neva stap pat.

Presiden Russell M. Nelson i tijim se: “Sapos wan kapol long wod blong yu i divos, o wan yang misinari i kambak eli long misin, o wan yangfala i no sua long testemoni blong hem, oli no nidim yu blong jajem olgeta. Oli nid blong eksperiensem klin lav blong Jisas Kraes tru long ol toktok mo aksen blong yu.”

Eksperiens blong yumi long jos i minim blong mekem ol impoten koneksen ia wetem Lod mo wetem wanwan long yumi, we laef blong yumi long saed blong spirit mo tingting i nidim tumas. Insaed long ol kavenan we yumi mekem wetem God, stat long baptaes, i wan responsabiliti blong lavem mo kea long wanwan long yumi olsem ol memba blong famli blong God, memba blong bodi blong Kraes, be i no blong stap tikim bokis long wan lis blong ol samting blong mekem.

Lav mo kea olsem hemia blong Kraes i hae mo i tabu. Klin lav blong Kraes hem i jareti . Olsem we Presiden Nelson i bin tijim, “Jareti i lidim yumi ‘blong karem wanwan samting blong yumi’ [Mosaea 18:8] bitim we i blong putum ol hevi samting long wanwan long yumi.”

Sevya i bin tijim, “Nao from we yufala i lavlavem yufala, bambae olgeta man oli luk save se yufala i man blong mi.” Mo Presiden Nelson i ademap: “Jareti hem i top fasin ia nao blong wan tru man blong folem Jisas Kraes.” “Mesej blong Sevya i klia: Ol tru disaepol blong Hem, oli bildim, leftemap, leftemap tingting, pulum intres, mo givim insperesen. … Hao yumi toktok long mo abaot ol nara man … i impoten tumas.”

Tijing blong Sevya long hemia i simpol nomo. Golden Rul ia i kavremap : Mekem long ol nara man olsem we yu wantem ol nara man i mekem long yu. Putum yuwan long ples blong narawan mo tritim hem long wei we bae yu wantem blong bae oli tritim yu sapos yu stap long sus blong olgeta.

Yumi sud tritim ol narawan olsem Kraes nomata sapos oli no ol famli o kongregesen blong yumi. We i tekem tu olgeta we oli stap go long nara relijin o olgeta we oli no go long eni relijin, be oli gohed blong stap ol brata mo sista blong yumi. I tekem tu ol sista mo brata blong yumi long ol narafala kantri mo kalja, mo tu olgeta we oli gat ol defren intres long saed blong politik. Yumi evriwan i pat blong famli blong God, mo Hem i lavem yumi evriwan ol pikinini blong Hem. Hem i wantem se ol pikinini blong Hem i lavem Hem mo tu wanwan long olgeta.

Laef blong Sevya i wan eksampol blong stap lavem, stap kam tugeta, mo stap leftemap olgeta we sosaeti i jajem se oli no klin mo oli sakemaot olgeta. Eksampol blong Hem i wan komanmen blong yumi folem. Yumi stap ia blong lanem ol fasin olsem hemia blong Kraes mo blong kam olsem Sevya blong yumi long en. Gospel blong Hem i no blong stap tikim bokis; be hem i gospel blong stap kam— stap kam olsem Hem mo gat lav olsem we Hem i mekem. Hem i wantem yumi blong kam olsem ol pipol blong Saeon.

Taem mi gat twante yia, mi bin go tru long wan taem blong harem nogud, mo long taem ia, hem i olsem se trutok ia se God i stap i laef, i lus wantaem Mi no save eksplenem fulwan filing ia be blong talem se mi filim se mi lus fulwan. Long taem we mi wan yang pikinini, mi bin save oltaem se Papa long Heven i stap mo se mi save toktok long Hem. Be long taem ia, mi nomo save sapos i bin gat wan God. Mi neva eksperiensem eni samting olsem bifo long laef blong mi, mo mi filim olsem se mi lusum testemoni blong mi.

I mekem se i had long mi blong atendem jos. Mi bin go, be i no fulwan from mi bin fraet se bae oli lukluk mi olsem wan we i “inaktiv” o wan we i “no fetful tumas,” mo mi fraet blong kam wan hadwok long narawan. Wanem mi nidim tumas long taem ia i blong filim tru lav, andastaning mo sapot long olgeta raon long mi, be i no jajmen.

Mi fraet se ol pipol bae oli mekemap ol samting abaot mi, we mi miwan mi stap mekem abaot ol narawan taem oli no stap go long jos oltaem . Nogud eksperiens blong mi i bin tijim mi sam impoten lesen we i gat valiu abaot from wanem hem i wan komanmen blong no stap jajem nogud wanwan long yumi.

?I gat sam we oli stap wetem yumi we oli stap safa kwaet mo, oli fraet se bae ol narawan blong save ol harem hadtaem blong olgeta from oli no save wanem bae oli i mekem?

Lod Hemwan nomo i save hamas ol hadtaem blong wanwan long yumi i had, mo yumi stap resis wetem long rod blong laef—ol harem nogud, ol jalenj, mo ol samting we i stap blokem, yumi we fulap taem ol narawan oli no luk. Hem nomo Hem i andastanem fulwan ol soa we i jenisim laef mo ol nogud fasin we sam long yumi i bin eksperiensem bifo we i stap mekem yumi harem nogud yet naoia.

Plante taem, yumi jajem yumiwan strong tumas, wetem tingting ia se yumi sud stap longwe finis long rod ia. Lod nomo i save wanwan long yumi fulwan wetem ol save mo paoa we yumi gat, mo from hemia, Hem nomo i kwalifae fulwan blong jajem ol wok blong yumi.

Ol brata mo sista, !letem yumi kam olsem ol man we oli stap long stori ia mo oli stap sapotem wanwan long olgeta long rod ia blong disaepol nomata long ol situesen blong yumi! Blong mekem hemia i no nid blong brekem ol rul o putum daon standet blong yumi. Be hem i bigfala seken komanmen—blong lavem ol neba blong yumi olsem yumi lavem yumiwan. Mo olsem we Sevya i tijim se, “Taswe we yufala i mekem olsem long wan brata blong mi we i daon moa … , be i olsem we yufala i mekem long mi nomo,” blong gudtaem o taem blong sik. Hem i talem tu long yumi se, “yufala i mas stap wan, mo sapos yufala i no stap wan, yufala i no blong mi.”

Bae i gat ol taem long wanwan laef blong yumi we bae yumi nao yumi nidim help mo fasin blong leftemap tingting. Letem yumi komitim yumi naoia blong oltaem mekem hemia long wanwan long yumi. Taem yumi mekem, bae yumi kam antap long fasin blong stap wan mo givim wan spes long Sevya blong mekem tabu wok blong Hem blong kasem hiling mo jenisim wanwan long yumi.

Long yufala we i filim se yufala i kam biaen long resis blong laef ia, we i rod ia blong laef long wol, plis, gohed blong go fored. Sevya nomo i save jajem yu fulwan long weaples yu sud stap long hem long taem ia, mo Hem i stret mo i gat lav mo sore. Hem i Bigfala Jaj blong resis ia blong laef, mo Hem nomo i save fulwan hamas i had blong yu stap ron o wokbaot. Hem i save ol samting we yu no strong long hem, paoa blong yu, ol laef eksperiens blong yu, mo ol hadtaem we i haedem mo karem wetem yu, mo tu ol tingting blong hat blong yu. Maet bae yu brekem ol wol rekod. Plis yu no lusum hop. !Plis, yufala i gohed blong go fored! !Plis stap! !Yu yu pat! !Lod i nidim yu, mo mifala i nidim yu!

Long weaples yu stap long hem long wol, nomata sapos yu stap longwe, plis oltaem tingbaot se Papa blong yu long Heven mo Sevya blong yu i save yu fulwan mo tufala i lavem yu, stret evriwan. Tufala i neva fogetem yu. Tufala i wantem blong karem yu kam hom.

Stap lukluk nomo long Sevya. Hem i aean rel blong yu. Yu no lego Hem. Mi testifae se Hem i laef mo se yu save trastem Hem. Mi testifae se Hem i stap sapotem long yu.

Letem yumi evriwan i folem eksampol blong Sevya mo stap sapotem long wanwan long yumi, mi prea olsem long nem blong Jisas Kraes, amen.