Ua Faanatinati e le Alii Lana Galuega

O se tulaga lauiloa na amata ai e Charles Dickens lana tusi talafatu The Tales of Two Cities ma le faamatalaga e faapea “O taimi sili ona lelei ia; o taimi sili foi ona leaga.” I se faauigaga e moni lea mea i o tatou aso.

Ua tatou ola i se taimi fememea’i ina [ua] “fesoua’iina le lalolagi.” O le apoapoaiga a Peresitene Russell M. Nelson i le avea ai ma soo o Iesu Keriso, ia avea ma ē e faatupuina le filemu, sa manaia le faamamafaina i le taeao nei e Elder Gary E. Stevenson. O se vaega lea e tatau ai o le fāufāuina o le lotogatasi, filemu, faamalologa mo “taimi sili ona leaga.”

Ua tatou ola foi i “taimi silisili,” o la’u faamamafa lea. Na tautino mai e le Alii, i le faatomuaga o le Mataupu Faavae ma Feagaiga, vaega 1, le atoatoaga o le talalelei o le “folafola atu … i tulu’iga o le lalolagi.” O loo ua faanatinati moni lava e le Alii Lana galuega i o tatou taimi. E ao ia i tatou ona matuai faafetai mo le faanatinatiina, lea na tupu ma o loo tupu e ui lava i nei taimi faigata. Ua tatou ola i se taimi ua maua ai e soo o le Alii le avanoa e faalogo ai i Lona siufofoga ma tali atu ma loto ma mafaufau matala. O tagata o Le Ekalesia a Iesu Keriso o Aso e Gata Ai, ua tuuto i le Faaola ma Ana poloaiga, ua maua le faamoemoe ma le filemu patino maoae.

I taimi eseese i le talafaasolopito o le Ekalesia, sa i ai se faatelega maoae ia i latou na ulu atu i le ala o feagaiga. Na tupu lea ituaiga o vaitau i le va o le 1837 ma le 1850. O nisi o nei uluai Aposetolo i le Ekalesia toefuataiina a le Alii na faamisiona i Malo Aufaatasi. O nei misiona na taunuu i le fiaafe ua auai i le Ekalesia, ma e oo atu i le 1850 sa tele atu tagata o le Ekalesia i Malo Aufaatasi nai lo i le Iunaite Setete. I le taimi lena, sa faatonuina ai e le Alii nei Au Paia e faapotopoto i Iuta. Sa tulai mai se femalagaaiga tele, o nisi na lagolagoina i nonogatupe na tuuina mai i le Tupe Faaagaga mo Femalagaaiga.

Ou te fiafia lava i le tala i le taunuu atu i le Vanu o Sate Leki o se aofaiga tele o tagata liliu mai mai Egelani ma Uelese i le 1852. Sa faafeiloaia le vaega e le Au Peresitene Sili i le gutu o le Ana mo Tagata Faimalaga na faafeao mai e le Faa’ili Pu a Kapeteni Pitt. Sa faamatala e le Deseret News i latou “o se solo a tagata malaga [e aofia ai] tuafafine ma tamaiti, e savavali, mu i le la, ma satia i le tau, ae le faanoanoa; sa lelei uiga faaalia ma tumu i le faamoemoe, ma manino le faaalia i o latou foliga fiafia ma le olioli.”

A o latou “pasia le Vaiaai o le Malumalu, … e faitau afe o alii, tamaitai, ma tamaiti, na faapotopoto, mai vaega eseese o le aai, e auai faatasi i le faafeiloaiga mamalu ma le fiafia.” Sa saunoa atu Peresitene Polika Iaga ia i latou: “Ia faamanuia outou e le Alii le Atua. … Sa matou tatalo pea mo outou; e fiaafe tatalo sa faia mo outou, o lea aso ma lea aso, ia te Ia o lē na poloaiina i tatou e faapotopoto Isaraelu, laveai le fanauga a tagata e ala i le folafola atu o le talalelei, ma tapena i latou mo le afio mai o le Mesia.”

I le agaga o lena sauniga fiafia, sei ou toe faamautinoa atu ia te outou uma tagata faatoa liliu mai ma i latou ua toe foi mai i le Ekalesia a le Alii: Matou te alolofa ia te outou; matou te manaomia outou; e manaomia outou e le Alii. Atonu matou te le faafeiloaia outou i faailipu, ae matou te tatalo ia auai faamanuiaga o le lagi i a outou taumafaiga i luga o le ala o feagaiga lea e tau atu i le Atua le Tama ma Iesu Keriso i le malo selesitila.

O loo i ai se faamaoniga manino e faapea ua faateleina le faatuatua ia Iesu Keriso i o tatou aso. I Le Ekalesia a Iesu Keriso o le Au Paia o Aso e Gata Ai, ua i ai se faatelega maoae i tagata liliu mai ma i le auai o tagata liliu mai. I masina e 36 ua te’a atu, toeitiiti atoa le 900,000 o tagata liliu mai ua auai mai i le Ekalesia. O nei tagata liliu mai e aofia ai le tusa ma le 5 pasene o le faitau aofai o tagata o le Ekalesia. Tatou te faafeiloaia tagata fou ma lima mafola ma le talisapaia loloto mo le ala ua outou filifilia.

O nei tagata liliu mai e 900,000 i le 36 masina ua mavae atu, ua silia ma le faitau aofai o tagata o le Ekalesia i le faamanatuga o lona 110 tausaga i le 1940, lea sa silia laitiiti ma le 860,000 tagata. O le tausaga lea na soifua mai ai Elder Jeffrey R. Holland, ma Elder Dieter F. Uchtdorf, ma sa ou fanau mai ai foi.

O nei tagata liliu mai matagofie e o mai mai itu eseese o le lalolagi. I le uluai ono masina o lenei tausaga, na siitia ai tagata liliu mai i le silia ma le 20 pasene i le tausaga talu ai i Europa, Aferika, Asia, le Pasefika, ma Latina Amerika. I Amerika i Matu ua tatou vaaia ai le faateleina i le 17 pasene. O loo faaauau pea ona agai i luma le galuega a le Alii i ala mamana. O nei numera faatupulaia o se molimau manino lea o le pa’i atu o le talalelei i loto ma suia ai olaga i mea uma.

I o tatou aso, o nei tagata liliu mai taua ua le toe faapotopoto i se nofoaga tutotonu. Ona o le faatuatua ma le tuuto o tagata o le Ekalesia, ua maua ai punaoa e lagolago ai potopotoga—i le fauga o falesa ma malumalu—i le lalolagi atoa. Faatasi ai ma ki e tatau ai o le perisitua ma punaoa ua saunia, ua avanoa nei sauniga faaola i le tele o vaega o le lalolagi.

Po o fea lava o tatou nonofo ai, e moomia e tagata o le ekalesia o i ai nei ona talileleia le fiaselau o afe o tagata fou e pei ona sa tatou faia ai i le Au Paia Peretania ma Uelese sa ou faamatalaina mai lo tatou uluai talafaasolopito. Sa ou fiafia i le lauga a Elder Gerrit W. Gong i le sauniga lenei, lea na ia aoao mai ai i tatou e faapea, e le tatau ona i ai se tasi e nofo na o ia pe faalelagona pe faaleagaga.

O lo tatou tiute paia o le talia ma talileleia tagata fou e liliu mai ma tagata ua toefoi mai. A o faanatinati e le Alii Lana galuega, e ao ona tatou alolofa, faafailele, ma auauna atu ia i latou o e taliaina Lana talalelei. E mafai ona tatou fesoasoani e fausia se nuu o Siona, lea e “tasi ai lo tatou loto tasi le mafaufau, ma [nonofo] ai i le amiotonu.” Ina ia tasi ma le Alii, e tatau ona tatou tasi i luma o le Alii. O tagata uma o le ekalesia po o le a lava le aso o le papatisoga ua i ai le tiutetauave fefaasoaai e talileleia isi.

O la’u fautuaga i tagata o le Ekalesia o le fusi faataamilo o o tatou lima i nei tagata taua filifilia ua latou talia le talalelei a Iesu Keriso.

Sa aoao mai i tatou e Peresitene Gordon B. Hinckley e manaomia e se tagata fou liliu mai “se uo, se tiutetauave, ma le faafaileleina i ‘le afioga lelei a le Atua’ (Moronae 6:4).” E mafai ona tatou i ai faatasi ma uo o e faamautinoa atu i nei tagata fou liliu mai o i latou o ni ō e le na o ni malo faaaloalogia. E mafai ona tatou fesoasoani ia i latou ia malamalama o i latou o soo o Iesu Keriso, o ē mafai ona auauna atu i isi ma talia valaauga e galulue ai. E tatau i talavou liliu mai ona mafaufau e auauna atu i se misiona talai. E ao i tagata uma ona filima‘oti e tauivi e ola i se olaga e faapei o Keriso.

E toatele e auai i le Ekalesia i se osigataulaga tele faaletagata lava ia, ma e matuai moomia le alofa ma le lagolago a o latou uso a Au Paia.

Ia te outou o e fou pe ua toefoi mai i le faatuatuaga, e i ai luitau tou te ono feagai. Ia onosai ia te oe lava. Ua uma ona aoao outou e faifeautalai i aoaoga faavae e tatau ai ma ua faamalamalama atu feagaiga ma sauniga o le malo, ua faatulaga mai i tusitusiga paia ma i le Tala‘i La‘u Talalelei.

O le mauaina o sauniga ma feagaiga ma ola ai i poloaiga o se mea e tatau ai. Taulai atu i feagaiga e tatau ai mo le faaeaga. O le talalelei ua mafai ai ona maua le faaeaga, lea e moomia ai le osia ma le tausia o feagaiga paia faataasi ma le Atua. Vagana ai le papatisoga, faamauga, ma le faaeeina o le Perisitua Mekisateko mo alii, o feagaiga tatou te ulu atu i ai e faatino i le malumalu. Mo e ua maliliu, o nei sauniga faaola taitasi e na o le malumalu e faatinoina ai. E tusa ai ma lena, o le saunia o oe lava mo le malumalu e tatau ona avea nei loa ma sini.

O le a i ai taimi e te lagona ai le le agavaa i mea ua e iloa. O le malamalama i le talalelei o se faamanuiaga sili e maua auaua’i i le aluga o taimi, ae e le o se sauniga faaola. O le talalelei e le o se suega o le malamalama. Peitai, e pei ona sa folafola mai e Peresitene Russell M. Nelson: “A o outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—i aso uma. … A outou mafaufau loloto i mea tou te suesueina, o le a matala mai pupuni o le lagi, ma o le a outou maua tali i a outou lava fesili ma le taitaiga mo o outou lava olaga.”

E le gata i lea, o tausaga taitasi i le faataamilosaga o mataupu aoaoina a le Ekalesia i sauniga o Aso Sa, e aofia ai le Feagaiga Tuai, le Feagaiga Fou, le Tusi a Mamona, ma le Mataupu Faavae ma Feagaiga. I le aluga o taimi o le a e lagonaina le talitonuga mautinoa atili a o tuputupu a’e lou malamalama i le talalelei. O le suesue e le aunoa i tusitusiga paia o le a faamanuiaina ai ma faamauoa o outou olaga e ala i le faalolotoina o lo outou liua i le talalelei a Iesu Keriso.

O le aoaoina o le aoaoga faavae mamā a Iesu Keriso o se tulimataiga i le olaga atoa, i le malamalama i le aoaoga faavae ma le ola i se olaga faapei o Keriso. O feagaiga e tatau ai ua saunia ai se auivi lea ua tatou faamatalaina o le ala o feagaiga. Na aoao mai ma le mamana nei mataupu faavae e Peresitene Nelson. O tagata uma o le ekalesia, aemaise tagata fou ma i latou ua toefoi mai, o le a faamanuiaina i le suesue ma faaaoga savali faaperofeta e uiga i feagaiga ma le ala o feagaiga.

Afai e te faatuina se sini mo le mauaina ma le agavaa o feagaiga taitasi e tatau ai mo le faaeaga, o le a e i ai i luga o le ala e tau atu i le malo selesitila. O le malumalu ma sauniga o le malumalu e tatau ona avea ma a tatou taulaiga. O le tele o feagaiga o loo avanoa mo tagata taitoatasi. O le feagaiga e tasi, o le faaipoipoga e faavavau, e aofia ai le tuufaatasia o au taumafaiga ma se soa. O la tatou sini e tatau ona i ai o le sueina lea o lena soa e faavavau.

Peitai, aua e te faavaivai pe afai e le mafai ona faia se faaipoipoga e faavavau i lenei taimi. Ua uma ona aoao mai perofeta e faapea, e leai se faamanuiaga o le a taofia mai tagata faamaoni o le ekalesia e tausia poloaiga. O se tasi o perofeta o le Tusi a Mamona, le Tupu o Peniamina na manaia lava lana saunoaga: “O i latou o e e tausi i poloaiga a le Atua … e faamanuiaina i latou i mea uma, … ma afai latou … te tutumau i le faamaoni e oo i le iuga, … e mafai ona latou mau faatasi ma le Atua i se tulaga o le fiafia e le gata.”

O le a e iloaina, pe afai e te lei iloa, e le atoatoa tagata o le ekalesia. O aoaoga faavae ua faaalia ua manino ai o la tatou malaga fai i lenei lalolagi, o le a tatou faia ai mea sese. Ua tatou ola i se lalolagi e le atoatoa ma pa’ū, e le o se lalolagi selesitila. O le olaga lenei o se taimi o tofotofoga, o i ai avanoa faifaipea e salamo ai ma faamaonia i tatou lava.

Tatou te lagonaina uma le le agavaa a o tatou tauivi ia avea faapei o Iesu Keriso. O Lana Togiola ua mafai ai ona tatou salamo i aso taitasi pe a tatou sasi. Pei ona fai mai Nifae, se tasi perofeta o le Tusi a Mamona: “E tatau ona [tatou] fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tamā: O le a outou maua le ola e faavavau.”

A o tatou mafaufau loloto i luitau o o tatou taimi, e tatau ona tatou manatua o le Faaola i le taimi o Lana misiona, sa soifua foi i taimi o le fesouaiga ma vevesiga. O Lana tulimataiga sa lē o luitau faaupufai o na aso; sa o le faaatoatoaina o le Au Paia.

O le mulimuli ai i aoaoga faavae a le Faaola ma aoaoga e lei faigofie lava i se lalolagi vāvāō e le aunoa. Sa lei faigofie mo le Faaola i se lalolagi femoumoua’i i le taimi o lona aumau ai i le lalolagi, sa lei faigofie mo o tatou uluai taitai ma tagata o le ekalesia, ma e le faigofie foi ia i tatou. O le mea e lelei ai, ua saunia e perofeta soifua le taiala tatou te moomia patino mo o tatou taimi. O le a faaauau pea e Peresitene Dallin H. Oaks lena talatuu mamana faaleagaga.

Ou te molimau atu o le aoaoga faavae o le Ekalesia a Iesu Keriso e faavavau ma e moni. Ou te tuu atu lau molimau mautu ma le mautinoa o loo soifua Iesu Keriso, ma ona o Lana Togiola, ua mafai ai ona tatou tasi ma Ia. I le suafa paia o Iesu Keriso, amene.