Fai Lau Vaega ma Lou Loto Atoa
Ia faatuatuaina le Faaola ma punouai, onosai ma le filiga, i le faia o lau vaega ma lou loto atoa.
I le tausaga ua te’a i se malaga i Europa, sa ou asiasi atu ai i lo’u falefaigaluega tuai, o le Kamupani Vaalele a Lufthansa German i le Malaevaalele i Frankfurt.
Ina ia aoao faamasani o latou pailate, latou te faatautaia ni faataitaiga faigata e faaaoga ai se masini e taulima ma faagaoioia ai se vaalele, lea e mafai ona toefatu ai le toeitiiti o soo se tulaga masani ma faafuasei o se malaga. I le tele o o’u tausaga o se kapeteni o se vaalele, sa tatau ai ona ou pasia se siaki mo se malaga i totonu o le masini faataitai i le tai ono masina ina ia aoga ai pea lo’u laisene o se pailate. Ou te manatua lelei lava na taimi o le malosi o le popole ma le atuatuvale, faapea foi ma le lagona o le ausiaga pe a pasi le suega. Sa ou talavou i lena vaitaimi ma fiafia tele i le lu’i.
I le taimi o la’u asiasiga, sa fesili mai ai se tasi o faatonu o le Lufthansa pe ou te toe fia faataitai ma toe ave tasi le masini faataitai 747.
A o le’i o’u maua le taimi e mafaufau lelei ai i le fesili, sa ou faalogoina se leo—sa matuai pei lava o lo’u lava leo—o fai mai, “Ioe, ou te matuai manao lava i ai.”
O le taimi lava na ou fai atu ai ia upu, na lolofi mai ai ni manatu i lo’u mafaufau. Ua umi se taimi talu ona ou aveina le 747. O lena vaitaimi o au o se kapeteni talavou ma le talitonu mautinoa. O lea la ua i ai so‘u tulaga tauleleia e ola ai o se pailate sili sa i ai muamua. Pe o le a ou faalumaina au lava i luma o nei au atamamai?
Ae sa fai si tuai ona toe sui lo’u mafaufau, o lea sa ou saofai ai i le nofoa o le kapeteni, tuu ou lima i luga o le foeuli na ou masani ma fiafia i ai, ma toe lagonaina ai le olioli tele o le lele a o ūū o le vaalele tele i le auala saoasaoa ma masii atu i le lagi lanumoana.
Ou te fiafia e faapea atu sa manuia le malaga, sa lelei foi le vaalele, ma sa faapena foi ma lo’u manatu ia te a’u lava.
E ui i lea, o le aafiaga sa faalotomaulaloina mo a’u. I le taimi o lo’u malosi, o le aveina o se vaalele sa toetoe lava o se natura lona lua. O le taimi nei, na alu atoa ai lo’u mafaufau e fai ai mea masani.
O le Avea ma Soo e Manaomia ai le Lotopulea
O lou aafiaga i lenei masini avevaalele faataitai, sa o se faamanatu taua e faapea, o le lelei i soo se mea—pe o le avevaalele, alovaa, lulu, po o le iloa—e manaomia ai le lotopulea ma le faataitai faifaipea.
Atonu e te faaaluina le tele o tausaga ia maua ai se tomai pe atiae ai se taleni. Atonu e te matuai galue malosi lea e avea ai o se mea ua e matuai masani ai. Ae afai e te manatu o le uiga o lena mea, e mafai ona tuu lou faataitaia ma lou suesue i ai, o le a faifaimalie ona aveesea lou malamalama ma tomai na e mauaina i se tau maoae.
O lenei mea e faatatau foi i tomai e pei o le aoaoina o se gagana, taina o se mea faimusika, ma se aveina o se vaalele. E faatatau foi i le avea o se soo o Keriso.
I se faaupuga faigofie, o le avea ma soo e manaomia ai le lotopulea.
E le o se taumafaiga faasamasamanoa, ma e le tupu faafuasei.
O le faatuatua ia Iesu Keriso o se meaalofa, ae o lona mauaina o se filifiliga magafagafa e manaomia ai le tuuto atu o o tatou “manatu, mafaufau, ma le malosi atoa.” O se faataitaiga i aso uma. Itula uma. E manaomia ai le aoaoina faifaipea ma se tuuto filimaoti. O lo tatou faatuatua, o lo tatou faamaoni i le Faaola, e oo ina malosi atu a o tofotofoina e faasaga i mea faafeagai tatou te fetaiai iinei i le olaga faaletino. E tumau ona o loo tatou fafagaina pea, o loo tatou faaaogaina pea, ma e tatou te le fiu ai lava.
I se isi itu, afai tatou te le faaaogaina le faatuatua ma lona mana faatalitonuina, o le a faaitiitia lo tatou mautinoa i mea sa tatou mafaufau i ai e paia—tau le talitonu i mea sa tatou iloa e moni.
O faaosoosoga sa le mafai ona tosinaina i tatou ua amata ona tau le matautia ae ua sili atu ona manaia.
O le afi o le molimau o ananafi e na o se taimi lava tatou te mafanafana ai. E manaomia ona fafaga e le aunoa ina ia faaauau ai ona susulu malamalama.
I le Feagaiga Fou, na aoao mai ai e le Faaola se faataoto e uiga i se matai na tuuina atu i ana auauna taitoatasi se faatuatuaga paia—o se aofaiga o tupe na ta’ua o taleni. O auauna sa faaaogaina ma le filiga a la’ua taleni sa faateleina. O le auauna sa tanumia lana taleni sa iu ina aveesea mai ai.
O le a le lesona? O meaalofa a le Atua ia i tatou—o le malamalama, o le gafatia, o le avanoa—ma e finagalo o Ia ina ia tatou faaaoga ma faateleina ina ia mafai ona tatou manuia ai ma manuia ai isi Ana fanau. E le tupu lena mea pe a tatou teu maualuga na meaalofa i se fata e pei o se ipu [faailoga] tatou te faamemelo i ai mai lea taimi i lea taimi. Na pau le ala e faalautele ma faateleina ai a tatou meaalofa o lo tatou faaaogaina lea.
E Talenia Outou
Atonu e te faapea mai, “Ae Elder Uchtdorf, e leai ni a’u meaalofa po o ni taleni—e leai ni meaalofa po o ni taleni e taua.” Atonu e te vaai atu i isi o a latou taleni e iloa lelei ma mataina ma ua e lagona si ou le taualoa pe a faatusatusa i ai. E te ono faapea, i le muai olaga, i le aso o le tufagā meaalofa ma taleni maoae, sa foliga mai lau ipu e gaogao faanoanoa—aemaise lava pe a faatusa i ipu tutumu ma taumasuasua a isi.
Oka maimau pe ana mafai ona ou opoina oe ma fesoasoani ia e malamalama i le upumoni maoae lenei: O oe o se tagata faamanuiaina o le malamalama; o le atalii/afafine agaga o se Atua e le gata mai! Ma ua ia te oe se gafatia e le mafai e lou malosi ona iloa.
E pei ona tusia e fatusolo, e te sau i le lalolagi “ma soloaiga o ao o le mamalu”!
O le afuaga o lau tala e paia, ma e faapena foi lou faasinomaga. Na e tuua le lagi e te sau iinei, ae e le’i tuua lava oe e le lagi!
O oe o soo se mea ae e le o le lē taualoa.
E te talenia!
I le Mataupu Faavae ma Feagaiga, na folafola mai e le Atua:
“E tele meaalofa, ma e tuu atu e le Agaga o le Atua i tagata taitoatasi se meaalofa.
I ni isi ua tuuina mai i ai se tasi, ma i isi ua tuuina atu i ai se isi, ina ia mafai ona manuia ai o tagata uma.”
O nisi o a tatou meaalofa o loo lisiina i tusitusiga paia. O le tele e le o lisia ai.
E pei ona saunoa mai le perofeta maoae o Moronae, “Ia outou le faafitia meaalofa a le Atua, ona e tele i latou; ma ua foaiina mai i latou mai le Atua e tasi.” E ono faaali mai i latou lava e “eseese ala … ; ae o le Atua e tasi o lē na te galueaiina i soo se mea ma i mea uma.”
Atonu e moni o a tatou meaalofa faaleagaga e le o taimi uma e mataina ai, ae e le faapea ai la e itiiti o latou taua. E mafai ona ou faasoa atu ia te outou ni meaalofa faaleagaga ua ou matauina i tagata o le au paia i le salafa o le lalolagi? Mafaufau pe ua faamanuiaina oe i se tasi pe sili atu o meaalofa e pei o le:
-
Faaali atu o le agaalofa.
-
Matauina o tagata e le o amanaiaina.
-
Mauaina o mafuaaga e olioli ai.
-
Avea o se faatupu filemu.
-
Maitauina o vavega laiti.
-
Tuu atu o faamālo faamaoni.
-
Faamagalo atu.
-
Salamo.
-
Tumau.
-
Faamalamalama faafaigofie atu o mea.
-
Fesootai ma tamaiti.
-
Lagolagoina o taitai o le Ekalesia.
Atonu e te le vaaia o faaalia nei meaalofa i le faaaliga taleni a le uarota. Ae ou te faamoemoe o mafai ona e vaaia lo latou taua i le galuega a le Alii, ma le ala atonu ua e pai atu ai, faamanuia, pe oo foi ina laveaiina ai se tasi o fanau a le Atua e ala i au meaalofa. Manatua foi: “O mea laiti ma faatauvaa e faataunuu ai mea tetele.”
Fai Lau Vaega Itiiti
O’u uso e ma tuafafine pele, uo pele, ou te tatalo o le a fesoasoani le Agaga ia te oe ia iloa meaalofa ma taleni ua tuuina mai e le Atua ia te oe. Ma, ia tuu mai ia i matou, pei o auauna faamaoni i le faataoto a le Alii, ia faateleina ma faalautele i latou.
O le a oo mai le aso o le a tatou tutu ai i luma o lo tatou Tama oi le Lagi agaalofa e tali atu mo lo tatou tulaga faatausimea. O le a Ia fia iloa po o a ni mea sa tatou faia i meaalofa sa Ia tuuina mai ia i tatou—aemaise, pe na faapefea ona tatou faaaogaina e faamanuia ai Ana fanau. Ua Ia silafia o ai moni i tatou, o ai ua mamanuina i tatou e avea ai, o lea la, e matuai maualuluga Ona faamoemoega mo i tatou.
Peitai e le faamoemoe o Ia ia tatou faia se oso maoae, toa, pe o se tagata paoā e oo ai iina. I le lalolagi na Ia foafoaina, o le tuputupu ae e faifaimalie ma faato’ato’a—ae e faifaisoo ma e le fetuunaia.
Ia manatua, ua uma ona fai e Iesu Keriso le vaega paoā ina ua Ia manumalo i le oti ma le agasala.
O la tatou vaeag o le mulimuli lea i le Keriso. O la tatou vaega o le liliu ese mai le agasala, faasaga atu i le Faaola, ma savali i Lona ala, e tasi le laa i le taimi. A o tatou faia o lea, i le filiga ma le faamaoni, o le a iu ina tatou lafoai ese filifili o le le atoatoa ma sese, ae faifaimalie ona faaleleia, seia oo i lena aso atoatoa o le a faaatoatoaina ai i tatou ia te Ia.
E mafai ona tatou tau atu i faamanuiaga. Ua faatulaga folafolaga. Ua matala mai le faitotoa. O la tatou filifiliga le ulufale atu ma amata.
Atonu e itiiti le amataga. Ae sa le afaina lena.
A vaivai le faatuatua, amata i se faamoemoe ia Keriso Iesu ma i Lona mana e faamama ma faaleleia.
Ua fetalai mai lo tatou Tama ina ia tatou amatalia lenei lui o le faatuatua ma le avea ma soo, ia le o ni turisi faasamasamanoa, ae o ni tagata talitonu ma le lotoatoa o e ua lafoaia Papelonia ae tuu atu o latou loto, mafaufau, ma savaliga agai ia Siona.
Ua tatou iloa o na’o a tatou taumafaiga e le mafai ona tatou selesitila ai. Ae e mafai ona tatou faamaoni ma tuuto ai ia Iesu Keriso, ma e mafai ona Ia faaselesitilaina i tatou.
Ona o lo tatou Faaola pele, e leai ai se mea e tau o se e leai se taunuuga matagofie. A o tatou tuu atu lo tatou faamoemoe ma le faatuatua ia te Ia, e mautinoa lava lo tatou manumalo. Ua Ia folafola mai ia i tatou e maua Lona malosiaga, Lona mana, ma Lona alofa tunoa faateleina. O lea laa ma lea laa, itiiti, o le a tatou ola latalata atu ai lena aso maoae ma le atoatoa, o le a tatou nonofo ai faatasi ma Ia ma e pele ia i tatou i le mamalu e faavavau.
Ina ia i ai iina, e ao ona fai la tatou vaega i le asō ma aso uma lava. Tatou te faafetai mo laa sa tatou faia ananafi, ae tatou te le gata ai iina. Ua tatou iloa o loo i ai le tatou ala umi e ui ai, ae tatou te le tuu lena mea e faavaivaia i tatou.
O le ute lena o ituaiga o tagata e i ai i tatou—o ni soo o Keriso.
Ou te uunaia ma faamanuia atu i tagata uma o le Ekalesia ia lava le faatuatua i le Faaola, e auai, ma le faatoatoa ma le filigai le faia o lau vaega ma lou loto atoa—ina ia tumu ai lou olioli, ma e i ai se aso, o le a e maua ai mea uma o loo i ai i le Tama. Ou te molimau atu ai i lenei mea i le suafa o Iesu Keriso, amene.