O le Igoa lea O le a Valaauina ai Oe

Na aoao mai Peresitene Russell M. Nelson e faapea pe ana fetalai tuusa’o mai le Alii ia i tatou, o le mea muamua lava Na te faamautinoa ua tatou malamalama i ai o lo tatou faasinomaga moni: o i tatou o fanau a le Atua, fanau o le feagaiga, ma soo o Iesu Keriso. Soo se isi lava tofiga o le a iu ina tuuina ai i tatou i lalo.

Sa ou aoaoina lenei mea mo a‘u lava ina ua maua e lo’u atalii matua lana telefoni feaveai muamua. Faatasi ai ma le fiafia tele, sa amata ona ia taina i totonu igoa o lona aiga ma uo i ana tagata faafesootai. I se tasi aso sa ou iloaina ai o loo valaau mai lona tina. I luga o le lau na faaali mai ai le igoa “Tinā.” O se filifiliga agalelei ma mamalu lena—ma, o le a ou tautino atu, o se faailoga o le faaaloalo mo le matua sili ona lelei i lo matou aiga. O le mea masani lava, sa ou fia iloa. O le a le igoa na ia tuuina mai ia te au?

Sa ou faasolosolo atu i le lisi o ana tagata faafesootai, ma manatu e faapea afai o Wendi o le “Tina,” e tatau ona avea a’u ma “Tamā.” E le o iai iina. Sa ou saili mo “Dad.” Ae sa leai lava se mea. Sa liua lo‘u fiailoa i se popole laititi. “Pe na te valaaua a’u o ‘Corey’?” Leai. I se taumafaiga mulimuli lava, sa ou mafaufau ai, “O i matou o tagata taaalo soka—atonu na te valaau mai ia te a’u ‘Pelé.’” Moomooga faivavale. Mulimuli ane, sa ou viliina lana numera, ma e tolu upu na oso a’e i luga o lana lau: “Lē o Tinā”!

Uso e ma tuafafine, o le fea igoa ua valaauina ai oe?

Na valaau e Iesu i latou na mulimuli ia te Ia i le tele o igoa: o Soo. Atalii ma afafine. Fanau a perofeta. Mamoe. Uo. O le malamalama o le lalolagi. Au Paia. Na tauave e [nei igoa] taitasi le taua e faavavau ma faamamafaina ai se sootaga patino ma le Faaola.

Ae i totonu o nei igoa, e tasi le igoa e tulaga ese i le vaega o totoe—o le suafa lena o Keriso. I le Tusi a Mamona, na aoao mai ai ma le mamana le Tupu o Peniamina:

“Ua leai foi se tasi igoa ua foaiina mai e oo mai ai le olataga; o le mea lea, ua ou manao ai ina ia outou ave i luga ia te outou le suafa o Keriso. …

“Ma o le a oo mai, soo se tasi e faia lenei mea o le a maua o ia i le aao taumatau o le Atua, ona o le a iloa e ia le suafa o le a valaau ai o ia; ona o le a valaau o ia i le suafa o Keriso.”

O i latou o e tauaveina i o latou luga le suafa o Keriso e avea ma Ona soo ma molimau. I le tusi o Galuega, tatou te faitau ai ina ua mavae le Toetu o Iesu Keriso, sa poloaiina molimau na filifilia e molimau atu o soo se tasi e talitonu ia Iesu, ia papatisoina, ma maua le Agaga Paia o le a maua se faamagaloga o agasala. O i latou na mauaina nei sauniga paia sa potopoto faatasi ma le Ekalesia, na avea ma soo, ma sa ta‘ua o Kerisiano. O loo faamatala mai foi i le Tusi a Mamona o e talitonu ia Keriso o ni Kerisiano ma o tagata o le feagaiga o ni “fanau a Keriso, o ona atalii, ma ona afafine.”

O le a le uiga o le valaauina i le suafa o Keriso? ”O lona uiga o le osia ma le tausia o feagaiga, manatua pea o Ia, tausia o Ana poloaiga, ma “loto … e tutu o ni molimau a le Atua i taimi uma ma i mea uma.” O lona uiga o le tutu faatasi ma perofeta ma aposetolo a o latou tauaveina le savali a Keriso—faatasi ai ma ona aoaoga faavae, feagaiga, ma sauniga—i le salafa o le lalolagi. O lona uiga foi o le auauna atu i isi e fesoasoani e faamama mafatiaga avea o se malamalama ma auina atu le faamoemoe ia Keriso i tagata uma. Ioe, o se sailiga lenei o le olaga atoa. Na aoao mai le Perofeta o Iosefa Samita e faapea “o se nofoaga lenei e leai se tagata na taunuu i ai i sina taimi.”

Ona o le malaga o le avea ma soo e alu ai le taimi ma taumafaiga e fausia ai “lea fuaitau i luga o lea fuaitau, ma lea mataupu i luga o lea mataupu,” e faigofie lava ona maua i faalagiga faalelalolagi. O nei mea e maua ai na o se taua le tumau ma o le a le lava lava na o i latou. O le togiolaina ma mea o le faavavau ua na’o le “oo mai ma ala mai i le Mesia Paia.” O le mea lea, o le mulimuli i fautuaga faaperofeta ina ia fai le avea ma soo o se mea e faamuamua e talafeagai ma atamai, aemaise lava i se vaitau o le tele o leo ma faatosinaga faatautava. O le fatu lenei o le fautuaga a le Tupu o Peniamina ina ua ia fai mai, “Ou te manao ia outou manatua ia faatumauina le suafa [o Keriso] ia tusia pea i o outou loto, … ia outou lagona ma iloa le leo lea o le a valaauina ai outou, ma le igoa foi, o le a valaauina ai outou e ia.”

Ua ou vaai i lenei mea i lo‘u lava aiga. Sa suia e faavavau le tamā o le tamā o lo‘u tamamatua o Matini Gassner ona sa tali atu se peresitene lotomaualalo o le paranesi i le valaau a le Faaola. I Siamani i le 1909, sa faigata taimi ma sa utiuti lava tupe. Sa galue Matini o se tagata uelo i se kamupani gaosi paipa. I lana lava ioega, o le tele o aso totogi na faaiu i le inupia, ulaula, ma le faatauina o meainu i le falepia. Na iu lava ina lapataia o ia e lona toalua afai e le sui, o le a aluese o ia.

I se tasi aso, sa feiloai ai Matini ma lana uo faigaluega i le agai atu i le falepia ma se tamaitusi ua maanuminumi i lona lima. Sa ia mauaina i le alatele ma ta’u atu ia Matini sa ese lona lagona ina ua uma ona faitaina le tamaitusi sa faaulutalaina Was wissen Sie von den Mormonen?, po o le O le a Se Mea Ua E Iloa E Uiga i Mamona? Ou te mautinoa ua suia le igoa.

O se tuatusi na faailogaina i le pito i tua, sa lava lona manino e iloa ai le nofoaga sa i ai le ekalesia. Sa matuai mamao lava, ae sa ootia i la’ua i mea sa la faitauina ma filifili ai e tietie i le nofoaafi i lena Aso Sa e sailiili ai. Ina ua la taunuu atu, sa la iloa ai o le tuatusi e le o le ekalesia lea sa la faamoemoeina ae o se falemaliu. Sa faatuai Matini—ona, o le mea moni, o se ekalesia i se falemaliu na foliga mai e pei lava e lua ni mea o loo ofoina mai ai.

Ae o le fogafale i luga, i se potu mautotogi, sa laua maua ai se vaega toalaiti o le Au Paia. Sa valaauliaina i laua e se alii i le sauniga molimau. Sa ootia Matini i le Agaga ma sa matua faagaeetia lava o ia i molimau faigofie ma le faatauanau o lea na ia faasoa atu ai lana molimau. Ma o iina, i lena nofoaga sa sili ona le amanaia, na ia fai mai ai ua uma ona ia iloa e tatau ona moni le ekalesia.

Mulimuli ane sa faailoa atu e le alii o ia o le peresitene o le paranesi ma fai atu pe latou te toe o mai. Sa faamalamalama atu e Matini sa nofo mamao o ia ma sa le gafatia ona malaga tai vaiaso. Ma sa na ona fai atu o le peresitene o le paranesi, “Mulimuli mai ia te a’u.”

Sa la savavali atu i ni nai poloka i se fale gaosi oloa lata ane lea sa faigaluega ai se uo a le peresitene o le paranesi. Ina ua mavae se talanoaga puupuu, sa ofoina atu uma ia Matini ma lana uo ni galuega. Ona taitai atu lea o i laua e le peresitene o le paranesi i se fale mautotogi ma faamautu ai fale mo o la aiga.

O nei mea uma na tutupu i totonu o le lua itula. Na siitia atu le aiga o Matini i le vaiaso na sosoo ai. Ono masina mulimuli ane sa papatisoina i latou. O le tagata sa i ai se taimi na iloa ai o ia o se tagata onā sa leai se faamoemoe ua matua filigā i lona faatuatuaga fou o lea sa amata ai ona valaauina o ia e tagata i le taulaga, atonu e le ma se agaalofa tele, “o le ositaulaga.”

Ae o le peresitene o le paranesi, e le mafai ona ou ta‘uina atu lona igoa—ua galo atu o ia ona o le tele o tausaga ua mavae. Ae ou te ta’ua o ia o se so’o, avefeau, Kerisiano, Samaria lelei, ma se uo. O lana faatosinaga o loo lagonaina pea i le 116 tausaga mulimuli ane, ma ua faamanuiaina a’u mai lona avea ai ma so’o.

“O loo i ai se faaupuga e mafai ona e faitauina fatu o se apu, ae e le mafai ona e faitauina apu e sau mai se fatu e tasi.” O le fatu na totoina e le peresitene o le paranesi ua fua mai ai fua e le mafaitaulia. Semanu na te le’i iloaina tele o le 48 tausaga mulimuli ane, e tele augatupulaga o le aiga o Matini i itu uma e lua o le veli o le a faamauina i le Malumalu o Bern Suitiselani.

Atonu o lauga aupito maoae ia tatou te le faalogo i ai ae o i latou tatou te vaaia i faatinoga filemu ma le le faamalieina ma galuega o loo matauina i olaga o tagata faatauvaa o e, o loo taumafai ia avea e faapei o Iesu, o loo femaliuai ma agalelei. O le mea na faia e lenei peresitene tamalii o le paranesi e le o se vaega o se lisi o mea e fai. Sa na o lona ola lava i le talalelei e pei ona faamatalaina i le tusi a Alema: “Latou te lei auina ese atu soo se tasi … sa fia ai, po o se sa fia inu, po o se sa ma‘i, … sa latou lima foai i tagata uma, o e matutua ma e laiti,…o tane ma fafine.” Ma, o se manatu e le tatau ona tatou le amana‘iaina, latou te le’i auina ese atu se tasi “pe e i fafo o le ekalesia pe e i totonu o le ekalesia.”

O i latou o e tauaveina i o latou luga le suafa o Keriso ua iloaina, e pei ona fai mai Iosefa Samita, “O se tagata e tumu i le alofa o le Atua, e le faamalieina i le faamanuiaina na o lona aiga, ae e faasolosolo atu i le lalolagi atoa, ua naunau e faamanuia tagata uma.”

O le auala lea na soifua ai Iesu. O le mea moni, sa Ia faia le tele o mea na le mafai e Ona soo ona tusia uma i lalo. Na tusia e le Aposetolo o Ioane, “O isi mea foi e tele na faia e Iesu, afai e tusia uma lava, o lo’u taofi e le mafai ona ofi i le lalolagi ia tusi pe a tusia.”

Ia tatou tauivi e mulimuli i le faataitaiga a Keriso, faia o mea lelei ma avea le avea ma soo o se faamuamua i le olaga atoa ina ia mafai ai e taimi taitasi tatou te fegalegaleai ai ma isi, o le a latou lagonaina le alofa o le Atua ma le mana faamaonia o le Agaga Paia. Ona mafai lea ona tatou auai faatasi ma le tamā o lo‘u tamamatua ma le faitau miliona o isi o e na tautino mai, e pei o le soo o Anetelea, “Ua ma maua le Mesia.”

I le iuga, o lo tatou faasinomaga e le o faauigaina e le lalolagi. Ae o lo tatou avea ai ma soo ua faauigaina i sauniga tatou te maua, o feagaiga tatou te tausia, ma le alofa tatou te faaali atu i le Atua ma tuaoi e ala i le na o le faia o mea lelei. E pei ona aoao mai Peresitene Nelson, o i tatou moni lava o fanau a le Atua, fanau o le feagaiga, o soo o Iesu Keriso.

Ou te molimau atu o loo soifua Iesu Keriso ma ua Ia togiolaina i tatou. O Ia o le na fetalai mai, “Ua Ou valaauina oe… igoa; e faia oe mo’u.” I le suafa o Iesu Keriso, amene.