Faatumulia i le Uiga Auaumama o le Legāoiā

Ia Me 2021, a o asiasi atu i galuega toefaafou o le Malumalu o Sate Leki, na maofa ai Peresitene Russell M. Nelson i taumafaiga a paionia o e, faatasi ai ma le utiuti o punaoa ma le faatuatua le maluelue, na fausia ai lena maota paia, o se maota iloga faaleagaga sa tumau le mausali mo se taimi umi. Ae ui i lea, sa ia matauina foi aafiaga o le pala, o le umi na mafua ai ni ava i maa o le uluai faavae o le malumalu ma le le mausali o galuega i maa, o ni faailo manino o le manaomia o se faamalosiga o le fausaga.

Ona aoao mai lea e lo tatou perofeta peleina i tatou e faapea, e pei lava ona sa manaomia ona faatino ni faatinoga tetele e faamalosia ai le faavae o le malumalu ina ia mafai ona ia talitalia le malolosi o tulaga faalenatura—atonu o faatinoga tatou te lei faia muamua lava—e faamalolosia ai o tatou lava faavae faaleagaga ia Iesu Keriso. I lana savali e manatua pea, sa ia tuu mai ia i tatou ni fesili o’oo’o se lua e manatunatu i ai le tagata lava ia: “O le a le mautu o i ai lou faavae? Ma o a ni faamalosiga o loo manaomia e lau molimau ma le malamalamaaga o le talalelei?”

Ua tuuina mai e le talalelei a Iesu Keriso ia i tatou ni auala musuia ma faalelagi ma aoga e taofiofi ai le pala faaleagaga i o tatou agaga, e faamalosia mamana ai o tatou faavae ma fesoasoani tatou te aloese ai mai ava i o tatou faatuatua ma le le mautu i a tatou molimau ma o tatou malamalamaaga o upumoni paia o le talalelei. O le tasi o mataupu faavae e faapitoa le talafeagai mo le ausia o lenei faamoemoe o loo maua i le aega 12 o le Mataupu Faavae ma Feagaiga, o se faaaliga na tuuina mai e ala i le Perofeta o Iosefa Samita ia Iosefa Knight, o se alii amiotonu o lē na saili ma le faatauanau ia malamalama i le finagalo o le Alii, e le mo nao se suiga i fafo, ae ia tu atu ma le le maluelue i lona avea ma soo—“mausali pe o poutu o le lagi.” Na tautino mai e le Alii:

“Faauta, Ou te tautala atu ia te oe, ma i latou uma foi o e ua i ai manaoga e aumai i luma ma faatu lenei galuega;

“Ma e leai se tasi e mafai ona fesoasoani i lenei galuega vagana ai ua lotomaualalo o ia ma tumu i le alofa, ua i ai le faatuatua, faamoemoe, ma le alofa mama, ua faautauta i mea uma, i soo se mea e tuu atu i lana tausiga.”

O le taitaiga a le Faaola, ua tusifaamaumauina i lenei faaaliga paia, ua faamanatu mai ai ia i tatou o le legāoiā o se faamalosiga alagatatau mo se faavae mautu ia Iesu Keriso. O se tasi lea o uiga auaumama e matuai alagatatau, e le mo na o i latou ua valaauina e auauna atu, ae e mo i latou uma foi ua osia feagaiga paia ma le Alii ma talia e mulimuli faamaoni ia te Ia. O le legāoiā e ogatasi ma faamalolosia ai isi uiga auaumama faaKeriso na ta’ua i lenei faaaliga, o le lotomaualalo, faatuatua, faamoemoe, alofa mama, ma le alofa le pona lea e tafe mai ia te Ia. E le gata i lea, o le atinaega o le legāoiā o se auala anoa lea e puipui ai o tatou agaga e faasaga i mea pala faaleagaga e maaleale ma e le gata, e afua mai i faatosinaga faalelalolagi lea e mafai ona faavaivaia ai lo tatou faavae ia Iesu Keriso.

Faatasi ai ma agavaa ua umia e soo moni o Keriso, o le legāoiā e tumatila o se ataata o le Faaola lava Ia, o se fua faapelepele o le Agaga, e avanoa mo tagata uma o e naunau ia taialaina i tosinaga faalelagi. O le uiga auaumama lea e aumaia le autasi i le loto, mamanu ai manaoga ma lagona i le poto ma le toafimalie. I tusitusiga paia, ua faaalia mai ai le legāoiā o se vaega taua o le faagasologa i la tatou malaga faaleagaga, e taitai atu ai i tatou agai i le onosai, faaleatua, ma le agaalofa, a o faaleleia atili ai o tatou faalogona, a tatou upu, ma a tatou faatinoga.

O soo o Keriso o e tauivi e atinae lenei uiga auaumama faaKeriso e faateleina le lotomaualalo ma tumu i le alofa. E aliae se malosiaga mamalu i totonu o i latou, ma oo ai ina gafatia lelei atu ona taofiofi le ita, faafailele le onosai, ma taulima isi ma le faapalepale, faaaloalo, ma le mamalu, e tusa lava pe matamataita le oo mai o faigata. Latou te tauivi ina ia le vave tali atu ae filifili e tali atu ma le atamai faaleagaga, e taialaina e le agamalu ma tosinaga faifaimalie a le Agaga Paia. O lea auala, latou te tau le lamatia ai i le pala faaleagaga ona, e pei ona aoao mai le Aposetolo o Paulo, latou te iloa e mafai ona latou faia mea uma lava e ala ia Keriso, o le e faamalosi ia i latou e tusa lava pe feagai ma tofotofoga ia e mafai ona luluina ai a latou molimau e uiga ia te Ia.

I lana Tusi ia Tito, na faailoa atu ai e Paulo le fautuaga paia e uiga i agavaa o i latou o e mananao e fai ma sui o le Faaola ma fai Lona finagalo i le faatuatua ma le tuuto. Fai mai o ia, e tatau ona latou alolofa i tagata ese, faautauta, amiotonu, ma amioatua—o uiga auaumama e atagia manino ai tosinaga o le legaoia.

Ae peitai, sa lapataia e Paulo e tatau ona latou “le finauvale, e le itaitagofie, … [ma] e le fasi tagata.” O na uiga e feteenai ma le mafaufau o le Faaola ma e faatuai ai le tuputupu a’e faaleagaga. I le anotusi faaletusi paia, o le, “le finauvale” o se tagata e musu e gaoioi faasausili ma le faamaualuga; o le “e le itaitagofie” o se tagata e aloese ma le osofia masani ia le to’a ma itagofie; ae o le “e le fasi tagata” e faasino i se tagata o lē e tetee i finauga, malovale, ma amioga pa’aā i faaupuga, faaletino, ma faalelagona. A o tatou tauivi e suia a tatou amioga i le faatuatua ma le lotomaualalo, e mafai ona tatou taula ma le mausali i le papa mau o Lona alofa tunoa ma avea ai o ni meafaigaluega mamā ma iila i Ona aao paia.

I le tomanatu ai i le manaomia ona atinae le uiga auaumama o le legāoiā, ou te manatua ai upu a Hana, le tina o le perofeta o Samuelu—o se tamaitai na maoae lona faatuatua, o lē, e ui lava i le tele o tofotofoga, sa ofoina atu se pese o le agaga faafetai i le Alii. Fai mai o ia, “Soia tou te faatele a outou upu faamaualuga naua; e alu ae ai le faaonoono i o outou gutu: aua o Ieova o le Atua sisila mai o ia, o ia foi le na te fuatia amio.” O lana pese na tele atu o se tatalo—o se valaaulia mo ia lava ina ia faatino ma le lotomaualalo, amio pulea, ma faato’ato’a. Ua faamanatu mai e Hana ia i tatou o le malosi faaleagaga moni e le faaalia i amioga pa’aā po o upu faasausili, ae i uiga faaalia o le legāoiā ma magafagafa e ogatasi ma le poto o le Alii.

O le tele o taimi, e faaea e le lalolagi amioga e fanau mai i amioga pa’aā, faasausili, lē onosai, ma le soonafai, lea e masani ona tauamiotonu ai na uiga e ala i faiga faamalosi o le olaga i aso taitasi, ma le lilifa atu agai i le faamaonia o le taliaina ma le lauiloa. A tepa ese la tatou vaai mai le uiga auaumama o le legāoiā ma lē amanaia le tosinaga mālū ma faato’ato’a a le Agaga Paia i a tatou amioga ma faamatalaga, e faigofie lava ona tatou pauu atu i mailei a le fili, lea e mautinoa lava le taitai atu ai o i tatou e tautatala i upu ma fai uiga o le a tatou matuai salamo ai lava, pe o totonu o a tatou mafutaga faaleagafesootai, faaleaiga pe faale-ekalesia foi. Ua valaaulia i tatou e le talalelei a Iesu Keriso e faaaoga lenei uiga auaumama ae maise lava i taimi o luitau, aua o taimi tonu lava ia e faaalia ai uiga moni o se tagata. Pei ona fai mai Martin Luther King Jr. i se tasi o taimi, “O le fuafaatatau tupito o se tagata, e le o le po o fea o tu ai i taimi o le sololelei ma faigofie, ae o le mea e tu ai i taimi o luitau ma finauga.”

I le avea ai ma tagata o le feagaiga, ua valaauina i tatou e ola ma o tatou loto ia mauaa mausalī i folafolaga paia ua tatou faia i le Alii, mulimuli ma le toto’a i le mamanu ua Ia faatuina e ala i Lana faataitaiga atoatoa. Ma ua Ia folafola mai, “E moni, e moni, ou te fai atu ia te outou, o la’u mataupu lenei, ma o soo se tasi e atiae i luga o lenei mataupu, ua atia’e i luga o la’u papa, ma o le a le manumalo faitotoa o seoli e faasaga ia te i latou.”

O le auaunaga a le Faaola i luga o le fogaeleele sa faailogaina i le uiga auaumama o le legāoiā i vaega uma o Lona tagata. E ala i Lana faataitaiga atoatoa, sa Ia aoao mai ai i tatou ina ia “onosai i puapuaga, aua le faifai atu ia te i latou o e e faifai mai.” E pei ona sa Ia aoao mai e le tatau ona tatou gauai atu i le ita ona o finauga ma feeseeseaiga, sa Ia folafola mai, “E ao ina outou salamo, ma avea e pei o se tamaitiiti.” Sa Ia aoao mai foi, o i latou uma o e mananao e o mai ia te Ia ma le faamoemoe atoa o le loto, e ao ona faalelei ma i latou o loo feita pe ma i latou o i ai se mea e faasaga ia i latou. Faatasi ai ma se uiga faaalia o le legāoiā ma se loto mutimuti alofa, sa Ia faamautinoa mai ai ia i tatou e faapea, a leaga, agaleaga, le faaaloalo le faiga o i tatou, o le a le aluese Lona agalelei mai ia i tatou, ma o le a le aveesea le feagaiga o Lona filemu mai o tatou olaga.

I ni nai tausaga ua mavae, sa ma maua ai ma lo’u toalua se avanoa paia e feiloai ai faatasi ma nisi o tagata faamaoni o le Ekalesia i le Aai o Mekisiko. O le toatele o i latou, sa onosaia a le o le tagata lava ia pe e ala i sē pele ia i latou, ni tofotofoga e lemafaamatalaina e aofia ai le avefaamalosia, fasioti tagata, ma isi faalavelave matautia.

A o ma tilotilo atu i foliga o na Au Paia, ma te lei vaaia ai se ita, inoino, po o se manao e tauimasui. Nai lo lena, sa ma vaaia se lotomaualalo leleoa. O o latou foliga, e ui ina sa faailogaina i le faanoanoa, sa susulu mai ai se moomoo faamaoni mo le faamalologa ma le faamafanafanaga. E ui ina sa nutimomoia o latou loto ona o mafatiaga, sa fetaomi pea i luma nei Au Paia ma le faatuatua ia Iesu Keriso, ma filifili ia le faatagaina o latou puapuaga e avea ma āva i lo latou faatuatua pe mafua ai le maluelue i a latou molimau o le talalelei.

I le faaiuga o lena faapotopotoga paia, sa ma feiloai atu ia i latou taitoatasi. O faatalofa uma, o opo uma na avea o se molimau leleoa e faapea, faatasi ai ma le fesoasoani a le Alii, e mafai ai ona tatou filifili e tali atu ma le legāoiā i tulaga le fiafia ma luitau o le olaga. O a latou faataitaiga leleoa ma le agavaivai na avea o se valaaulia alofa e savavali i le ala o le Faaola ma le legāoiā i mea uma. Sa ma lagonaina e pei sa ma i ai i le afioaga o ni agelu.

O Iesu Keriso, o lē silisili o tagata uma, sa tigaina mo i tatou seia oo ina tafe Lona toto mai puafu uma, ae Na te le’i faatagaina le ita e faamu ai Lona finagalo, pe na mamulu atu i Ona laufofoga ni upu pa’aā, leaga, pe tufanua, e oo lava i le lotolotoi o puapuaga faapena. Faatasi ai ma le legāoiā atoatoa ma le agamalu e le mafaatusalia, sa lei mafaufau o Ia mo Ia lava, ae o fanau taitoatasi a le Atua—i le tuanai, taimi nei, ma le lumanai. Sa molimau mai le Aposetolo o Peteru e faatatau i le uiga auaumama musuia o Keriso ina ua ia tautino mai, “O lē sa agateleina, ae le’i toe agatele atu, na faatigaina o ia, ae le’i faamata’u atu, a ua tuuina atu o ia e ia i lē na te faamasino tonu.” E oo lava i le totonugalemu o Lona tiga tele, sa faaalia lava e le Faaola le legāoiā atoatoa ma paia. Sa Ia tautino mai, “E ui i lea, ia i ai i le Tama le viiga, ma sa ou inu ma faauma ai a’u tapenapenaga mo le fanauga a tagata.”

Ou uso e ma tuafafine pele, ou te tuuina atu se valaaulia faatauanau ia i tatou uma ina ia teuteu o tatou mafaufau ma loto i le uiga auaumama faaKeriso o le legāoiā, o se tali paia lea i le valaau faaperofeta a lo tatou pele o Peresitene Russell M. Nelson. A o tatou tauivi ma le faatuatua ma le filiga e lalaga le legāoiā i totonu o a tatou faatinoga ma upu, ou te molimau atu o le a tatou faamalolosia ma taula o tatou olaga ia sili ona mausali i luga o le faavae mautinoa o lo tatou Togiola.

E tuuina atu ma le faamaoni lau molimau e faapea, o le tulitulimatagauina pea o le legāoiā e faamama ai o tatou agaga ma faapaia ai o tatou loto i luma o le Faaola, e faalatalata malie atu ai i tatou ia te Ia ma saunia ai i tatou, ma le faamoemoe ma le filemu, mo lena aso mamalu pe a tatou feiloai ma Ia i Lona Afio Mai Faalua. Ou te faasoa atu ai nei upu paia i le suafa o lo tatou Faaola o, Iesu Keriso, amene.