Tofotofo ma Faamalosia ia Keriso

O’u uso e ma tuafafine pele, ou te lagonaina le alofa o le Alii ao tatou potopoto faatasi. Ua faalotomaualaloina lava a‘u e talanoa atu ia te outou. Ou te tatalo o le a molioo atu e le Agaga i o outou loto mea e finagalo le Alii tou te faafofoga i ai, e sili atu nai lo upu o le a ou tautala atu ai.

I aso ua leva, sa ou sailiILI ai e aoao le fisiki ma le matematika i o‘u tausaga i le kolisi. Sa ou lagonaina le lofituina. Sa amata ona ou lagonaina sa ou taumafai e aoao se mea sa sili atu nai lo a’u. O le tele o lo‘u lagonaina o le lofituina, o le faaitiitia foi lena o lo’u lagonaina o le malosi e taumafai ai pea. O lo‘u lotovaivai na taitai atu ai a’u i le lagonaina ua toetoe lava a leai ni fua o a’u taumafaiga. Sa amata ona ou mafaufau e togi le solo, e faia se mea faigofie atu.

Sa ou lagona le vaivai. A o ou tatalo, sa ou lagonaina le faamautinoaga filemu a le Alii. Sa ou lagonaina o Ia o fetalai mai i lo‘u mafaufau, “O loo ou tofotofoina oe, ae ua ou faatasi foi ma oe.”

Ou te lei iloa i lena taimi mea uma na faatatau i ai na upu. Ae sa ou iloa le mea e fai—sa ou alu e galue.

E ala i le manatunatu loloto ma galue i tausaga na sosoo ai, sa oo ina ou malamalama i lenei feau o le faamalosiauga i tusitusiga paia: “Ou te mafaia mea uma lava i le faamalosi mai o Keriso ia te au.”

Sa ou aoaoina o la’u tauiviga ma le fisiki sa o se meaalofa moni lava mai le Alii. Sa Ia aoaoina a’u e faapea, faatasi ai ma Lana fesoasoani, e mafai ai ona ou faia mea na foliga mai e le mafai pe afai e i ai so‘u faatuatua o le a i ai o Ia iina e fesoasoani mai ia te a’u. E ala mai i lenei meaalofa, sa galue ai le Alii e tofotofo ma faamalosia a‘u.

O le upu tofotofo e tele ona uiga. O le faamaonia o se mea e le na o le tofotofoina. O le faateleina lea o lona malosi. O le faamaonia o se fasi uamea o le tuu lea i lalo o se mea mamafa. E faaopoopo i ai le vevela, mamafa, ma le uunaiga, seia oo ina faaleleia ma faaalia lona natura moni. E le faavaivaia le uamea i le faamaoniaina. O le mea moni, e avea o se mea e mafai ona faatuatuaina, o se mea e lava le malosi e tauave ai avega e tele atu.

E tai faapena foi le ala e tofotofo ai i tatou e le Alii iina ia faamalolosia ai i tatou. O lena faamaoniaina e le oo mai i taimi o le faigofie po o le to’afilemu. E oo mai i taimi tatou te lagona ai le toso atu i talaatu o mea sa tatou manatu e mafai ona tatou tatalia. Ua aoao mai le Alii e tatau ona tatou faaauau pea ona tuputupu ae ma aua lava nei faavaivai i a tatou taumafaiga, ia aua lava nei o tatou fiu, ia tatou taumafai pea.

Pe a faaauau pea ona tatou faatuatua ia Iesu Keriso—e tusa lava pe o le a lagona le faigata o mea ia i tatou i lena taimi—ona tatou malolosi atili ai lea faaleagaga. O faamaumauga paia faatusi paia o loo faamamafa mai ai lenei upumoni.

O le perofeta o Moronae, mo se faataitaiga, sa tofotofo ma faamalosia i se ala faapena. Sa soifua na o ia i ona tausaga mulimuli. Sa ia tusia e faapea sa leai ni ana uo, ua fasiotia lona tamā, ua faaumatia lona nuu. Sa sailia o ia e i latou o e na saili e fasioti ia te ia.

Ae sa lei faanoanoa Moronae. Nai lo lena, sa ia vaneina lana molimau ia Iesu Keriso i luga o papatusi mo tagata o le a ia lē ola e vaai i ai, e aofia ai tupuaga o tagata o e sa mananao e fasioti ia te ia. Sa ia tusia mo i tatou. Sa ia iloa o le a tauemu nisi i ana upu. Sa ia iloa o le a teena ana upu e nisi. Ae sa ia tusitusi pea.

I ona tofotofoga, sa faaatoatoaina ai ma faamalosia le faatuatua o Moronae. Sa oo ina atili mama a’ia’i. O Ana upu ua tauave ai le mana o se tasi na tumau faamaoni e oo i le iuga. E mafai ona tatou lagonaina lena mana a o tatou faitau i lana molimau:

“O lenei, o a’u, o Moronae, ou te tusia lava ni mea ou te manatu lava a’u ua lelei; ma ou te tusi atu i o’u uso, o sa Lamanā; ma ou te manao ia latou iloa ua sili atu i le fa selau ma le lua sefulu tausaga ua mavae atu talu ona tuuina mai o le faailoga o le afio mai o Keriso.

“Ma ou te faamaufaailogaina nei talafaamaumau, pe a uma ona ou tautala atu ni nai upu itiiti e ala i le apoapoai atu ia te outou.

“Faauta, ou te apoapoai atu ia te outou, pe a outou faitauina nei mea, pe afai e tusa ai ma le finagalo poto o le Atua ia outou faitauina, ina ia outou manatua ai le alofa mutimutivale tele o le Atua i le fanauga a tagata, mai i le foafoaga o Atamu seia oo mai lava i le taimi o le a outou maua ai nei mea, ma manatunatu i ai i o outou loto.

“Ma pe a maua e outou nei mea, ou te apoapoai atu ia te outou ia outou ole atu i le Atua, le Tama Faavavau, i le suafa o Iesu Keriso, pe ua le moni ea nei mea; afai tou te ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.

“Ma o le mana o le Agaga Paia e mafai ona outou iloa ai le moni o mea uma lava.”

Sa faaatoatoaina le molimau a Moronae i le tuuatoatasi, ae ua susulu i le malamalama e taiala ai augatupulaga uma e saili lo tatou Tama oi le Lagi ma le Faaola o Iesu Keriso.

O se isi perofeta o le Tusi a Mamona, o Iakopo, sa tofotofo ma faamalosia o se tamaitiiti o lē na oo i puapuaga ma le faanoanoa tele. Ae sa aoaoina o ia e lona tamā, o Liae, o le a faamanuia o ia e le Atua i ona tofotofoga.

“Ma faauta, o lou laitiiti lava na e mafatia ai i puapuaga ma le faanoanoa tele, ona o le lē migao o ou uso.

“Ae ui i lea, Iakopo e, laʼu ulumatua na fanauina i le vao, ua e iloa le silisiliese o le Atua; ma o le a ia faapaiaina ou puapuaga mo lou manuia.

“O le mea lea, o le a faamanuiaina lou agaga, ma o le a e nofo saogalemu faatasi ma lou uso, o Nifae; ma o le a faaaoga ou aso i le galuega a lou Atua. O le mea lea, ua ou iloa ua togiolaina oe, ona o le amiotonu o lou Togiola; ona ua e vaai e afio mai o ia i le atoatoaga o taimi e aumai le olataga i tagata.”

Sa oo le perofeta o Iosefa Samita i ia ituaiga o tofotofoga ma faamalosiauga a o i ai o ia i le Falepuipui o Liperate. I le lotolotoi o lona lototiga, sa alaga ai le Perofeta o Iosefa:

“Le Atua e, o fea o i ai oe? …

“O le a le umi e taofia ai lou aao?”

Na silasila le Alii i mafatiaga o Iosefa i le aafiaga faapaiaina o lona onosaia lelei ina ua Ia tali mai:

“Lo’u atalii e, ia filemu lou agaga; o ou tiga ma ou puapuaga o le a na o sina taimi laitiiti;

“Ma ona oo lea, afai e te gafatia lelei, o le a faaeaina oe e le Atua i lugā; o le a e manumalo i ou fili uma.”

O le faataitaiga aupito sili o le faamaoniaina ma le faamalosiaina na tupu e ala i le Togiola a le Faaola. Na Ia ave i Ona luga agasala a le lalolagi. Sa Ia tauave o tatou tiga ma o tatou faanoanoaga. Sa Ia inuina le ipu oona. Sa faamaonia Lona faamaoni i taimi uma.

Ona o Lana Togiola mamalu, ua mafai ai e Iesu Keriso ona faamalosia i tatou i o tatou taimi o tofotofoga. Na te silafia le ala e fesoasoani ai ia i tatou aua sa Ia lagonaina luitau uma o le a tatou lagonaina i le olaga nei. “O le a Ia ave i ona luga tigā ma ma’i o ona tagata … ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ai ma o latou vaivaiga.”

Ua tatou aoao a o i ai i le Faatoaga o Ketesemane, sa fesili atu le Faaola i le Tama pe mafai ona pasia o Ia e le tofotofoga—ae sa Ia fetalai foi afai o le finagalo lea o le Tama, o le a faia lea e le Faaola. I se isi faaupuga, sa tauaveina foi e le Faaola le masalosalo ma le le mautonu, ae sa ia te Ia le faatuatua i Lona Tama Faalelagi.

Uso e ma tuafafine, o a outou faamaoniaga ma faamalosiauga atonu e le foliga mai o Moronae po o Iakopo po o le Perofeta o Iosefa. Ae o le a oo mai lava. Atonu e oo mai lemu, e ala i tofotofoga o le olaga faaleaiga. Atonu e oo mai e ala i ma‘i po o le le fiafia po o le faavauvau po o le tuuatoatasi.

Ou te molimau atu o nei taimi e le o ni faamaoniga ua tuulafoaiina outou e le Alii. Ae, o ni faamaoniga ia e lava Lona alofa ia te oe e faaleleia ma faamalosia ai oe. O loo Ia faia oe ia lava lou malosi e tauave ai le mamafa o le ola e faavavau.

Afai tatou te tumau faamaoni i la tatou auaunaga, o le a faamamāina i tatou e le Alii. O le a Ia faamalosia i tatou. Ma e i ai se aso, o le a tatou toe tepa i tua ma iloa ai o na lava tofotofoga sa o ni faamaoniga o Lona alofa. O le a tatou iloa ai sa Ia mamanuina i tatou ina ia mafai ona tatou tutu faatasi ma Ia i le mamalu. E pei ona ta‘ua e le Aposetolo a le Alii o Paulo i le faaiuga o lona lava olaga, “Ua ou tau le taua lelei, ua iu ia te a’u le tausinioga, ua ou taofi le upu o le faatuatua.”

Ou te molimau atu e silafia oe e le Atua. Na te silafia tofotofoga o loo oulua feagai. O loo faatasi o Ia ma oe. O le a Ia le tuulafoai lava oe. Ou te molimau atu o Iesu Keriso o le Alo o le Atua. O Ia o lo tatou malosiaga, o lo tatou Togiola, o lo tatou faamoemoe. Afai tatou te faalagolago ia te Ia, o le a Ia faia lo tatou mana faaleagaga ia tutusa ma tofotofoga uma ua valaauina i tatou e onosaia. O lea ou te molimau atu ai i le suafa paia o Iesu Keriso, amene.