Manatuaina o Peresitene Nelson

I le lua o aso talu ona tapunia le konafesi aoao, sa faamamaluina ai e taitai o le Ekalesia ma tagata o le aiga ia Peresitene Russell M. Nelson o se tamā ma se tane alofa, uo pele, soo tuuto o le Alii o Iesu Keriso, ma se perofeta musuia a le Atua.

O le soifuaga o Peresitene Nelson “na tuuina mai ai se molimau i lana molimau tuuto o se perofeta ma se auauna a le Alii o Iesu Keriso,” na saunoa ai Peresitene Dallin H. Oaks i le taimi o sauniga falelauasi mo Peresitene Nelson i le aso 7 o Oketopa, 2025, i le Maota Autu mo Konafesi. Sa valaauina e Peresitene Oaks ia Peresitene Nelson, o lē na maliu filemu i le fale i le aso 27 o Setema, 2025, “o la’u uo mamae ma se faiaoga sili ona mataalia.”

Sa valaauina foi e Peresitene Oaks ia Peresitene Nelson “o se tasi o faifeautalai sili ona mamana a Isaraelu i lona faatinoga.” Sa ia fai mai, “O Lana ataata, o le mafanafana o lona siufofoga, ma le mana o lona i ai na liusuavai ai loto” o taitai o malo ma faatuatuaga.

Sa faamamaluina e Peresitene Oaks ma isi failauga e toalima ia Peresitene Nelson mo lona alofa, auaunaga, ma le tuuto i le Alii o Iesu Keriso ma fanau a le Atua i le lalolagi atoa.

Faatasi ai ma isi failauga, sa ia faafetai atu ia Sister Wendy Watson Nelson mo le tausiga ma le lagolagoina o Peresitene Nelson i le 19 tausaga o le la’ua faaipoipoga. Sa ia faaalia foi le agaga faafetai i le faletua ua maliu o Peresitene Nelson, o Dantzel White Nelson, ma le la fanau e toa 10 mo lo latou faamaoni i “mea sa ia aoao atu ma ola ai.”

Sa molimau Elder Henry B. Eyring, o lē sa auauna atu faatasi ma Peresitene Oaks ma Peresitene Nelson i le Au Peresitene Sili, e uiga i le valaauga faaperofeta o Peresitene Nelson ma lona tomai ma le manao e faamanuia isi.

“A o ou auauna atu i ona autafa i le Au Peresitene Sili, na amata ia Ianuari 2018, sa avea a’u ma se molimau patino i le mea moni e faapea, e musuia e le Alii lana perofeta,” o le saunoaga lea a Elder Eyring. “Ou te faafetai i le iloaina o Peresitene Russell M. Nelson.”

I a latou saunoaga, sa faamanusina ai e Elder Jeffrey R. Holland o le Korama a Aposetolo e Toasefululua ma Peresitene Camille N. Johnson, o le Peresitene Aoao o le Aualofa, ia Peresitene Nelson mo lona agalelei lemafaatoilaloina i tagata i totonu ma fafo atu o le Ekalesia.

“O le mauaina o le avanoa e vaai ai ia te ia o alofa i tagata ma tagata e alolofa ia te ia, na faia mo mea e sili ona matagofie o manatuaga,” o le saunoaga lea a Elder Holland. Sa ia manatuaina Peresitene Nelson o “le e uuina lima ma le fomai faamalolo o loto.”

Na faaopoopo mai Peresitene Johnson, “Ua suia moni lava e Peresitene Nelson le lalolagi e toatasi le tagata ma le fegalegaleaiga e tasi i le taimi, ma ua ia valaaulia i tatou e faia lea lava mea e tasi e ala i le utuvai mai i le mana o le Atua o ni tamaitai ma ni alii o le feagaiga.”

Fai mai le toalua o le fanau a Peresitene Nelson, o Laurie N. Marsh ma Russell M. Nelson Jr., sa soifua fiafia lo latou tamā ona sa ia faatotonugalemuina lona soifua i le Faaola o Iesu Keriso ma faia le auaunaga i isi o se mea e ave i ai le faamuamua.

“Sa matou ola ae i se aiga e faatotonugalemu i le Faaola ma faatumulia i le olioli,” na fai mai ai Sister Marsh. Sa ia fai mai o le sini a le aiga o le, ia avea lea ma se aiga e faavavau.

Sa faaopoopo mai Uso Nelson e faapea, sa lei faavaivai lava lona tamā i lana auaunaga. “Na muai faaali mai e Peresitene Nelson ia i matou e leai se ‘malolo’ i lana faauigaga o le Toefuataiga.” Fai mai a ia, ina ua valaauina e taitai le Ekalesia, sa tautino atu lona tamā e auauna atu i le Tama ma le Alo seia oo i le aso e maliu ai. “O le mea lava lena sa ia faia.”

O Marjorie N. Lowder ma Gloria N. Irion, o afafine o Peresitene Nelson, na faia tatalo i le sauniga. O le Aufaipese a le Tapeneko i le Lotoa o le Malumalu na saunia musika.

Na mulia’i mai le falelauasiga o Peresitene Nelson i saaafiafiga na faia e faamamalu ai o ia i le aso 1 o Oketopa, ma faasalalauina mai le Tapeneko i le Lotoa o le Malumalu. Na fofogaina mai e Peresitene Oaks, Elders Holland ma Eyring, le Epikopo Pulefaamalumalu o Gérald Caussé, Elder Carl B. Cook o le Au Peresitene Aoao o Fitugafulu, ma le Peresitene Aoao o le Peraimeri o Susan H. Porter ni saafiafiga, ma faasoa mai ni aafiaga patino faamomoiloto a o galulue faatasi ai ma Peresitene Nelson ma o latou lagona e uiga i lona soifuaga maoae, auaunaga faaKeriso, ma aoaoga musuia.

I lana saafiafiga, sa faaigoa ai e Peresitene Oaks ia Peresitene Nelson “o se perofeta o le alofa” o lē na “talai atu le talalelei o le alofa.”

Mo nisi faamatalaga e uiga i le soifuaga ma le auaunaga a Peresitene Nelson, tagai i le O Saafiafiga: Peresitene Russell M. Nelson, 1924–2025, ua lolomiina o se faaopoopoga i mekasini a le Ekalesia ia Novema 2025.