O I Latou o O Latou Lava Faamasino

O faamoemoega aupito taua o le fuafuaga sili o le fiafia a le Tama, o le saunia lea o avanoa mo Ana fanau agaga e maua ai se tino faitino, e iloa ai le “lelei mai le leaga” e ala i aafiaga o le olaga nei, tuputupu a’e faaleagaga, ma agaigai i luma e faavavau.

O le mea o loo faasino i ai le Mataupu Faavae ma Feagaiga o le “faitalia e filifili tatau ai” e totonugalemu i le fuafuaga a le Tama e aumaia ai le tino ola pea ma le ola e faavavau o Ona atalii ma afafine. O lenei mataupu faavae tatau o loo faamatala mai foi i tusitusiga paia o le faitalia ma le saolotoga e filifili ai e gaoioi.

O le faaupuga “faitalia e filifili tatau ai e ‘anoa. O upu uigatutusa mo le upu “tatau” e aofia ai le “lelei,” “faamaoni,” ma le “amiolelei.” O upu uigatutusa mo le upu “faitalia” e aofia ai le “faatinoga,” “gaoioiga,” ma le “galue.” O lea, o le “faitalia e filifili tatau ai”, e mafai ona malamalama i ai o le tomai ma le avanoa e filifili ai ma faatino mo i tatou lava i ala e lelei, faamaoni, amiolelei, ma tonu.

O foafoaga a le Atua e aofia ai “mea e gaoioi ma mea e tau faagaoioi.” Ma o le faitalia e filifili tatau ai o le “mana [ua mamanuina faalelagi] o faatinoga tutoatasi” lea e faamamanaina ai i tatou o fanau a le Atua e avea ma sui e gaoioi ae le na o ni meafaitino e taufaagaoioia.

Sa foafoaina le lalolagi e avea o se nofoaga lea e mafai ai ona tofotofoina fanau a le Tama Faalelagi e vaai pe o le a latou “faia mea uma o soo se mea e poloaiina ai i latou e le Alii lo latou Atua.” O se faamoemoega autu o le Foafoaga ma lo tatou i ai i le tino, o le saunia lea o le avanoa mo i tatou e gaoioi ai ma avea ma e ua valaaulia i tatou e le Alii ia avea ai.

Na faatonuina Enoka e le Alii:

“Faauta ia i latou nei o ou uso; o i latou o galuega a o’u lava lima, ma sa Ou tuu atu ia te i latou lo latou malamalama, i le aso na Ou foafoa ai i latou; ma sa Ou tuu atu i le tagata i le Faatoaga o Etena, lona faitalia;

“Ma sa Ou fai atu i ou uso, ma tuu atu foi le poloaiga, e tatau ona latou alolofa o le tasi i le isi, ma e tatau ona latou filifili aʼu, lo latou Tamā.”

O faamoemoega faavae mo le faaaogaina o le faitalia o le, ia alofa lea o le tasi i le isi ma ia filifili le Atua. Ma o nei faamoemoega e lua e ogatusa lelei ma poloaiga sili muamua ma le lua ia alofa i le Atua ma o tatou loto atoa, agaga, ma le mafaufau, ma ia alofa i o tatou tuaoi e pei o i tatou lava.

Mafaufau ua poloaiina i tatou—ua le na ona apoapoaiina pe fautuaina, ae ua poloaiina—e faaaoga la tatou faitalia e alofa atu ai i le tasi ma le isi ma filifili ai le Atua. Sei ou fautuaina atu i tusitusiga paia, o le upu fetuunai o le “tatau ai” ua le na o se upu faamatala ae peiseai foi o se faatonuga faalelagi i le ala e tatau ona faaaoga ai lo tatou faitalia.

O se viiga masani ua faaautuina “Filifili le Mea Tonu” mo se mafuaaga. E lei faamanuiaina i tatou i le faitalia e filifili tatau ai e fai ai soo se mea tatou te mananao ai i soo se taimi. Ae, e tusa ai ma le fuafuaga a le Tama, ua tatou maua le faitalia e filifili tatau ai e saili ma gaoioi e tusa ai ma upumoni e faavavau. I le avea ai “o ni pule ia i [tatou lava],” e tatau ona tatou auai ma le naunautai i faamoemoega lelei, “ma fai mea e tele i lo [tatou] lava loto malie, ma aumai le amiotonu tele.”

O le taua e faavavau o le faitalia e filifili tatau ai o loo faamamafa mai i le tala faatusipaia o le fono i le muai olaga. Sa fouvale Lusifelo e faasaga i le fuafuaga a le Tama mo Ana fanau ma sa saili e faaumatia le mana o le faatino toatasi. E maoae, o le fouvale a le tiapolo sa tulimatai tonu i le mataupu faavae o le faitalia e filifili tatau ai.

Sa faamalamalama e le Atua, “O le mea lea, ona sa fouvale o Satani ia te a’u, ma saili e faaumatia le faitalia a le tagata, … na ou faia ai ia lafoaiina i lalo o ia.”

O le fuafuaga manatu faapito a le fili o le aveesea lea mai fanau a le Atua o le gafatia ia “avea ma pule ia i latou lava” o e e mafai ona gaoioi i le amiotonu. O lona faamoemoe o le auina atu o fanau a le Tama Faalelagi e fai ma meafaitino e na ona tau faagaoioia.

Na faamamafa mai e Peresitene Dallin H. Oaks e faapea, o le talalelei a Iesu Keriso ua valaaulia ai i ta’ua uma ia iloa se mea ina ia avea ai o se mea e ala i le faaaogaina ma le amiotonu o le faitalia e filifili tatau ai. Sa Ia saunoa:

“E tele Tusi Paia ma tusitusiga paia o ona po nei o loo talanoa i se faamasinoga mulimuli lea o le a tauia ai tagata uma e tusa ai ma a latou amioga po o galuega po o manaoga o o latou loto. Ae o isi mau ua faalauteleina lenei e ala i le faasino atu i lo tatou faamasinoina i tulaga ua tatou ausia.

“Ua faamatala e le perofeta o Nifae le Faamasinoga Mulimuli e faatatau i le mea ua tatou avea ai: ‘Ma afai sa eleelea a latou galuega ua tatau foi onalatou eleelea; ma afai ua latou eleelea, e tatau ona le mafai ona latou nonofo i le malo o le Atua’ [1 Nifae 15:33; ua faaopoopo le faamamafa]. Ua tautino mai e Moronae, ‘O lē ua eleelea o le a eleelea pea, ma o lē ua amiotonu o le a amiotonu pea’ (Mamona 9:14; ua faaopoopo le faamamafa).”

Na faaauau Peresitene Oaks, “Mai i na aoaoga tatou te faia ai se faaiuga faapea, o le Faamasinoga Mulimuli e le na o se iloiloga o se aofa’iga atoa o amioga lelei ma amioga leaga—o mea na tatou faia. O se faailoaga o aafiaga mulimuli o a tatou faatinoga ma mafaufauga—o tagata ua tatou avea ai.”

O a tatou galuega ma naunautaiga lava ia e le mafai ona faaolaina ai i tatou. “A uma mea tatou te mafaia,” ua tatou faalelei ma le Atua e ala i le na o le alofa mutimutivale ma le alofa tunoa e maua e ala i le taulaga togiola e le gata ma faavavau a le Faaola.

Fai mai Alema, “Amata ona talitonu i le Alo o le Atua, o le a afio mai o Ia e togiola Ona tagata, ma o le a mafatia ma maliu o Ia e togiola mo a latou agasala; ma o le a toetu mai o Ia mai le oti, lea o le a faataunuu ai le toetutu mai, o le a laulaututu ai tagata uma i Ona luma, e faamasinoina i le aso faamasino mulimuli, e tusa ma a latou galuega.”

“Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.” E ao ina tatou faafetai ona o le a le tutu atu a tatou agasala ma galuega amioleaga e fai ma molimau e faasagatau ia i tatou pe afai tatou te “toe fanau,” moni faaaoga le faatuatua i le Togiola, salamo ma le “faamaoni o le loto” ma le “faamoemoega tonu,” ma “tumau e oo i le iuga.”

O le toatele o i tatou atonu e manatu faapea o le tatou tutu i luma o le pa o le Faamasino Faavavau, o le a pei o se taualumaga i se faamasinoga faalelalolagi o le tulafono. O le a pulefaamalumalu ai se faamasino. O le a tauaaoina atu faamaoniga. O le a tuuina mai se faaiuga. Ma atonu o le a tatou lemautonu ma fefefe seia vagana ua tatou iloa le taunuuga faaiu. Ae ou te talitonu e lē sa’o lena faauigaga.

E ese mai ae fesootai lava i le mata’u faaletagata lea e tele ina tatou oo i ai, le mea ua faamatalaina e tusitusiga paia o le “mata’u ia fiafia mai ai o ia” po o “le mata’u i le Alii.” E le pei o le mata’u faalelalolagi lea e tupu ai le te’i ma le atuatuvale, o le mata’u faaleatua e valaaulia ai le filemu, faamautinoaga, ma le talitonuga mautinoa i o tatou olaga.

O le mata’u amiotonu e aofia ai se lagona loloto o le migao, ma le maofa mo le Alii o Iesu Keriso, usiusitai i Ana poloaiga, ma le tulimatai atu i le Faamasinoga Mulimuli ma le faamasinotonu i Lona aao. O le mata’u faaleAtua e tupu mai i se malamalamaaga sa’o o le natura paia ma le misiona a le Togiola, se naunautaiga e gauai atu o tatou loto i Lona finagalo, ma se malamalama o le a tali atu lava alii ma tamaitai uma mo ona lava faanaunauga, mafaufauga, upu, ma faatinoga i le tino i le Aso o le Faamasinoga.

O le mata’u i le Alii e le o se atuatuvale musuā e uiga i le alu atu i Lona afioaga ina ia faamasinoina. Ae, o se vaaiga o le faailoaga laualuga e uiga ia i tatou lava o mea e pei ona i ai moni lava ma e pei o le a i ai moni lava.

O tagata uma lava na soifua, o soifua nei, ma o le a soifua mai i luga o le fogaeleele “o le a aumai e tutu i luma o le nofoa faamasino a le Atua, e faamasino e ia e tusa ma a [ana] galuega pe lelei pe leaga.”

Afai o o tatou faanaunauga sa mo le amiotonu ma lelei a tatou galuega—o lona uiga sa tatou faaali le faatuatua ia Iesu Keriso, sa osia ma tausia feagaiga ma le Atua, ma salamo i a tatou agasala—ona logomalie ai lea o le pa o le faamasinoga. E pei ona sa tautino mai e Enosa, o le a tatou “tutu atu i luma [o le Togiola]; ona [tatou] vaai ai lea i Ona fofoga ma le fiafia.” Ma i le aso mulimuli o le a “tauia i tatou i le amiotonu.”

Peitai, afai o o tatou manao sa mo le tiapolo ma amioleaga a tatou galuega, ona avea lea o le pa faamasino ma se pogai o le fā’atu. O le a tatou maua “se malamalama atoatoa,” se “manatua pupula,” ma se “lagona olaola o a [tatou lava] sala.” “O le a tatou le fia vaai a’e ai i luga i lo tatou Atua; ma o le a sili ai ona tatou fiafia pe a na mafai ona tatou faatonu atu i papa ma mauga ia pauu mai i o tatou luga, e pupuni ai i tatou mai ona luma.” Ma i le aso mulimuli o le a tatou “maua lo tatou taui o le leaga”

I le faaiuga, o i tatou o o tatou lava faamasino. O le a le moomia se tasi e ta’u maia po o fea tatou te o i ai. I le afioaga o le Alii, o le a tatou faailoa atu ai mea na tatou filifili e avea ai i le olaga faitino, ma iloa mo i tatou lavale mea e tatau ona tatou i ai i le faavavau.

O le malamalama e faapea o le Faamasinoga Mulimuli e mafai ona logomalie e le o se faamanuiaga na faapolopolo mo na o Moronae.

Sa faamatala e Alema ia faamanuiaga folafolaina e maua e soo tuuto uma o le Faaola. Sa Ia saunoa:

“O le uiga o le upu toefuataiga o le toe aumai lea o le leaga i le leaga, po o le faaletino mo le faaletino, po o le faatiapolo mo le faatiapolo—o le lelei mo le mea ua lelei; o le amiotonu mo le mea ua amiotonu; o le mea tonu mo le mea ua tonu; o le alofa mutimutivale mo le mea ua alofa mutimutivale.

“… Fai mea tonu, faamasino ma le amiotonu, ma fai mea lelei e le aunoa; ma afai e te faia nei mea uma ona e maua lea o lou taui; ioe, o le a toefuatai mai ia te oe le alofa mutimutivale; o le a toefuatai mai ia te oe le faamasinotonu; o le a toefuatai mai ia te oe se faamasinoga amiotonu; ma o le a toe tauia mai ia te oe le lelei.”

Ou te molimau atu ma le olioli o Iesu Keriso o lo tatou Faaola soifua. E moni le folafolaga a Alema ma e faatatau ia te oe ma a’u—nei, o a taeao, ma le faavavau atoa. Ou te molimau atu ai i le suafa paia o le Alii o Iesu Keriso, amene.