O Le Tusi a Mamona—o se Oa E Le Mafuatiaina i La Tatou Malaga
A tatou taumamafa i afioga a Keriso o loo maua i le Tusi a Mamona, o le a fesoasoani le Agaga ia tatou malamalama i upumoni e faavavau.
E mafai ona e manatua se taimi na avatu ai e se tasi se meaalofa ia te oe na suia ai lou olaga? O Oketopa nei e atoa i ai le 40 tausaga talu ona ou maua se tasi o meaalofa silisili i lo’u olaga. A o ou i ai i le aoga maualuga, sa ou matauina se tasi o la’u vasega sa i ai se malamalama sa ese a mai le toatele o isi talavou. Sa ou fiafia lava e faatasi ma ia. I se tasi aso sa ia ta’u mai ia te a’u o ia o se tagata O Le Ekalesia a Iesu Keriso o le Au Paia o Aso e Gata Ai. Ona ia ofoina mai lea ia te a’u o se meaalofa: o se kopi o le Tusi a Mamona. Sa ia valaaulia a’u e faitau ni nai itulau ma feiloai i ni uo se toalua e mafai ona tali i a’u fesili. O na uo o faifeautalai.
Ina ua matou feiloai ma faifeautalai, sa la’ua aoaoina a’u i le aoaoga faavae autu a Keriso ma valaaulia a’u e mulimuli i le valaaulia a le perofeta o Moronae: “Pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua lē moni ea nei mea; ma afai tou te ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia” (Moronae 10:4).
Sa ou faitauina ni itulau o le Tusi a Mamona ma tatalo. E ui ina sa lei loloto so’u malamalama i mea uma na aoao mai e faifeautalai, ae sa ou lagonaina i lo’u loto o mea sa ou faitauina sa lelei ma sa mai le Atua. Sa ou mauaina se faamautinoaga o le folafolaga a Moronae: “O le mana o le Agaga Paia e mafai ona outou iloa ai le moni o mea uma lava” (Moronae 10:5).
Ina ua uma ona ou papatiso i Le Ekalesia a Iesu Keriso o le Au Paia o Aso e Gata Ai, sa taumafai nisi o uo e faatalitonu a’u na ou faia se faaiuga sese. Ae o taimi uma ou te feagai ai ma ia masalosaloga po o feteenaiga, sa ou maua se faamautinoaga faafouina e ala i le suesueina o tusitusiga paia ma tatalo ina ia ou faamaoni i feagaiga sa ou ulu i ai ma le Atua. Talu mai lena taimi, ua avea le Tusi a Mamona ma a’u soa ma ua avea ma oa e le mafuatiaina i la’u malaga i le olaga nei.
O le Tusi a Mamona e sili atu nai lo na o se tusi. O se tasi molimau ia Iesu Keriso, na tusia e le toatele o perofeta anamua e ala i le agaga o valoaga ma faaaliga.
O le mea aupito sili ona taua na tupu ua tusi faamaumauina i le Tusi a Mamona, o le misiona patino lea a le Alii o Iesu Keriso i tagata sa Nifaē, ina ua mavae Lona Toetu. O le Tusi a Mamona “ua faamatala mai ai aoaoga faavae autu o le talalelei, ua faatulaga mai ai le fuafuaga o le faaolataga, ua taʼu mai ai foi i tagata mea e ao ona latou faia e maua ai le filemu i le olaga nei ma le faaolataga e faavavau i le olaga a sau” (faatomuaga i le Tusi a Mamona).
O le uluai lomiga o le Tusi a Mamona, O Se Tasi Molimau ia Iesu Keriso, na lolomiina i se taulaga itiiti i le setete o Niu Ioka ia Mati 1830. Sa na o le 23 tausaga o le Perofeta o Iosefa Samita i le taimi na ia faamae’aina ai le faaliliuga o le tusi i le 1829. Sa ia faaliliuina toetoe o le tusi atoa i lalo ifo o le 75 aso, ae o le faagasologa o le lolomiga sa alu ai le tusa ma le fitu masina.
O le taimi nei, e tusa ma le 80,000 faifeautalai faamisiona i le silia ma le 150 atunuu o loo galulue ai o ni volenitia, ua tuuto o latou olaga e molimau atu e moni le Tusi a Mamona, ma e molimau ia Iesu Keriso.
I le semina aupito lata mai mo taitai misiona fou ia Iuni i le tausaga nei, sa faasoa mai ai e Peresitene Russell M. Nelson lana molimau mamana e uiga i le Tusi a Mamona: “O le Tusi a Mamona o … le afioga a le Atua. O loo aoao mai ai le aoaoga faavae autu a Keriso, ma faamatala atili mai ai e uiga i le Togiola a le Faaola nai lo se isi lava tusi.”
Ou te fia ofoina atu ni fautuaga se tolu e mafai ona fesoasoani e faaloloto ai lo tatou liua ia Iesu Keriso e ala i le suesueina o le Tusi a Mamona.
1. Ia Filiga ma Faifai Pea au Suesuega i Aso Taitasi
Faapei o Alema ma atalii o Mosaea, e tatau ona tatou “[sailiili] ia tusitusiga paia ma le filiga, ina ia [tatou], iloa le afioga a le Atua” ma faamalolosia ai i le upumoni (Alema 17:2).
A o avea ai ma taitai misiona i le Misiona a Georgia Atalanta, sa ma’ua uunaia ma lo’u toalua ia faifeautalai uma e suesue le Tusi a Mamona mo le le itiiti ifo ma le 30 minute i aso taitasi. O lena tautinoga na faateleina ai lo matou faatuatua ma fesoasoani matou te sailia ma faamoemoe ai mo ni vavega.
E mafai ona faapea a mae’a le misiona atonu e le tutusa le tele o le taimi tatou te maua mo le suesueina o tusitusiga paia i aso taitasi, ae ou te folafola atu afai e te faamuamua ma le faamaoni le suesueina o le Tusi a Mamona ma le loto tatalo i aso taitasi, o le a e maua le malosi faaleagaga sili atu ma le talitonu mautinoa i le Alii ma Ana folafolaga
2. Ia Fai a Outou Suesuega ia Sili ona Anoa e ala i le Taumamafa i Afioga a Keriso
Na aoao mai Nifae, “Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” (2 Nifae 32:3).
O le taumamafa e sili atu nai lo le na o le faitau—o lona uiga o le tofo, mafaufau loloto, ma le faaaogaina. A o e suesue i le Tusi a Mamona, mafaufau i auala e fai ai au suesuega o tusitusiga paia ia sili ona anoa. Mo se faataitaiga:
-
Faaaoga suesuega fesoasoani o loo maua i le polokalama o le Gospel Library.
-
O le faailoaina o upumoni e faavavau ia e fesoasoani tatou te malamalama ai i le fuafuaga a le Atua ma taitai atu ai i tatou e osia ma tausia feagaiga ma lo tatou Tama Faalelagi.
-
Faailoga fasifuaitau taua ma tusifaamaumau ou lagona e teu ai mea sa e aoaoina i au suesuega.
Ua i ai i le Tusi a Mamona le mana e tali ai fesili o o tatou agaga. Na faapea mai Nifae, e tatau ona tatou “faatatauina tusitusiga paia uma ia te i [t]atou, ina ia avea ma o [t]atou manuia ma aoaoga” (1 Nifae 19:23).
A o tatou taumamafa i afioga a Keriso, o le a latou tatalaina ai le faitotoa i faaaliga ma faaali mai ia i tatou mea e moomia ona tatou faia i tulaga eseese o o tatou olaga e latalata atili ai ia te Ia.
3. Tuu atu Lau Molimau i le Moni o le Tusi a Mamona.
Faapei lava ona manao Liae e faasoa atu le fua o le laau o le ola i lona aiga (tagai 1 Nifae 8:12), a tatou maua se molimau i le Tusi a Mamona, tatou te atiia’e se manao e faasoa atu le olioli lea e maua mai i le iloaina o le talalelei a Iesu Keriso.
O se tasi o a matou faifeautalai, o Sister Benson, o lē o loo auai ma i tatou i lenei sauniga, na faasoa mai ia te a’u lona manao e fesoasoani i lona tuagane laitiiti. I le taimi lena, sa sauni ai [lona tuagane] e alu i le kolisi, ma sa le’i mautinoa e uiga i le alu i se misiona. Sa uunaia a’u e valaaulia Sister Benson e faitau le Tusi a Mamona i masina muamua e fa o lana misiona, faailoga fuaiupu e sili ona ia fiafia i ai, ona auina atu lea o le kopi lena i lona tuagane.
Sa auina atu e Sister Benson le kopi ua makaina o le Tusi a Mamona ma valaaulia lona tuagane e faitau i ai i po taitasi. Mulimuli ane sa ia faasoa mai ia te a’u, “A o lei amata la’u misiona, sa le’i mautinoa e lo’u tuagane pe sa manao e faamisiona. Sa faasolosolo malie i le mavae ai o se taimi, a o ia faitauina le Tusi a Mamona, sa ia maua le olioli faateleina i lona olaga ma sa amata ona mafaufau e auauna atu i se misiona.”
Na toe lua vaiaso ona mae’a lea o le misiona a Sister Benson, na maua ai e lona tuagane lona valaauga i le misiona. O loo auauna nei o ia i le Misiona a Mexico Tuxtla Gutierrez. E ala i le Tusi a Mamona, na vaaia ai e Elder Benson lona olaga ma le manino faaleagaga, lea na taitai ai o ia e auauna atu i le Alii ma talitonu o le a lelei mea uma. O lena faaiuga sa o se vavega— ma tosinaina e le mana o afioga a Keriso.
O’u uso e ma tuafafine peleina, ou te uunaia outou taitoatasi ia faaloloto a outou suesuega o le Tusi a Mamona. Ou te iloa a tatou taumamafa i afioga a Keriso o loo maua i le Tusi a Mamona, o le a fesoasoani le Agaga ia tatou malamalama i upumoni e faavavau ma faasoa atu a tatou molimau ma le talitonuga maumaututu faatasi ma i latou o e ua saunia e le Alii e faalogo i Lana savali. Na fetalai mai le Alii, “O la’u ‘au filifilia e faalogo i lo’u leo ma lē faamaa’aina o latou loto” (Mataupu Faavae ma Feagaiga 29:7). Ou te molimau atu o i latou e ole atu i le Atua ma le faatuatua o le a maua se molimau o le moni ma le paia o le Tusi a Mamona e ala i le mana o le Agaga Paia. Ou te molimau atu ai i nei mea, i le suafa o Iesu Keriso, amene.