Iloa Po o Ai Moni Lava Oe
Po o fea lava o tatou i ai i luga o lo tatou ala o le avea ma soo, o le a suia lava o tatou olaga pe afai tatou te malamalama atili po o ai moni lava i tatou.
I ni nai tausaga ua mavae sa i ai se aafiaga loloto o le ma tama teine i lana misiona. Faatasi ai ma lana faatagana, ou te faasoa atu ai se vaega o mea sa ia tusi mai ai ia i matou i lena vaiaso:
“O ananafi, sa talosaga mai ai se tagata ua toe foi mai ma te o atu i se taimi vave e mafai ai. Ina ua ma taunuu atu, sa ma mauaina o ia i luga o le fola, o loo tagi masusu. I lona tagi, sa ma iloa ai ua leai sana galuega, o le a aveesea faamalosi mai lona fale mautotogi, ma o le a toe avea foi ma se tagata e leai se mea e nofo ai.”
Sa faaauau le tusi a le ma tama teine: “Sa amata ona ou suesue ma le popole i a‘u tusitusiga paia, ma taumafai e sue se mea—soo se mea lava—e fesoasoani ai ia te ia. A o ou saili mo le fuaiupu talafeagai, sa ou mafaufau, ‘O le a la‘u mea o fai? E le o se mea lea o le a faia e Keriso. E le o se faafitauli lenei e mafai ona ou foia, ae o se afafine moni lenei o le Atua o loo manaomia la‘u fesoasoani.’ O lea, sa ou tapunia ai a‘u tusitusiga paia, tootuli i ona autafa, ma fusi o ia a o ma fetagisi faatasi, seia oo ina saunia o ia e tu i luga ma faafetaiai ma lenei tofotofoga.”
Ina ua uma ona faamafanafanaina lenei tamaitai, ona faaaoga lea e lo ma afafine o tusitusiga paia e taumafai ai e fesoasoani ia te ia ia malamalama i le moni o lona taua paia ma aoao o ia i se tasi o upumoni sili ona taua o lo tatou ola ai—o i tatou o atalii ma afafine faapelepele o le Atua, o se Atua e lagonaina le agaalofa atoatoa mo i tatou pe a tatou puapuagatia ma ua saunia e fesoasoani ia i tatou a o tatou toe tutu i luga.
E manino lelei o le vaega muamua o le aoaoga faavae o loo aoao atu e a tatou faifeautalai e faapea, o le Atua o lo tatou Tama Faalelagi alofa. O upumoni uma e sosoo ai e fausia i luga o le malamalama faavae po o ai moni lava i tatou.
Na aoao mai Sister Susan H. Porter, Peresitene Aoao o le Peraimeri: “Pe a e iloa ma malamalama i le atoatoa o le alofagia o oe o se atalii/afafine o le Atua, e suia ai mea uma. E suia ai ou lagona e uiga ia te oe lava pe a e faia ni mea sese. E suia ai ou lagona pe a tutupu mea faigata. E suia ai lau vaai i poloaiga a le Atua. E suia ai lau vaaiga i isi ma lou gafatia e faia ai se eseesega.”
O lenei suiga o loo faaalia a o tatou faitau e uiga i le aafiaga na oo ia Mose ina ua talanoa faafesagai ma le Atua. I le taimi o lena talanoaga, sa aoao faafia atu ai e le Atua ia Mose e uiga i lona tofi paia, ma faapea atu “Mose, … o oe o lo‘u atalii.” Sa faamalamalama mai e le Atua o Mose sa faatusa i Lona Alo e Toatasi na Fanaua. Sa oo ina malamalama lelei Mose o ai o ia, sa i ai sana galuega e fai, ma sa i ai sona Tama Faalelagi alofa.
Ina ua mavae lenei aafiaga, sa faaosoosoina o ia e le fili ma vave ona tautala atu ia te ia i le faapea atu, “Mose e, le atalii o le tagata.” O se meafaigaluega masani ma le matautia lenei i auala a le fili. E ui o lo tatou Tama Faalelagi e faamanatu mai pea lava pea ma le alofa ia i tatou o i tatou o Ana fanau, ae o le a taumafai pea le fili e faaigoa i tatou i o tatou vaivaiga. Ae ua uma ona iloa e Mose e sili atu o ia nai lo o se “atalii o le tagata.” Sa ia fai atu ia Satani, “O ai oe? Aua faauta, o a’u o se atalii o le Atua.” E faapena foi, pe a tatou fetaiai ma luitau o le olaga nei po o le taimi tatou te lagona ai e pei o loo taumafai soo se tasi e faaigoa i tatou i o tatou vaivaiga, e manaomia ona tatou tutu malolosi i le malamalama po o ai moni lava i tatou. E tatau ona tatou saili atu ma le migao i le faamaoniga mai lugā, ae le o autafa. Ma a o tatou faia, e mafai foi ona tatou folafola atu ma le lototoa, “O a‘u o se atalii/afafine o le Atua.”
I se faigalotu i le lalolagi atoa mo talavou matutua, na aoao mai ai lo tatou Peresitene peleina o Russell M. Nelson: “O ai la oe? O le mea muamua lava ma le sili, o oe o se atalii ma se afafine o le Atua, o se tama o le feagaiga, ma se soo o Iesu Keriso. A o e opomauina nei upumoni, o le a fesoasoani atu le Tama Faalelagi ia te oe ia ausia lau sini silisili o le ola e faavavau i Lona afioaga paia.”
E le o se mea na tupu faafuasei le faapea o le mau e sili ona ta‘ua soo, e faamanatu mai e le Atua ia i tatou lo tatou sootaga ma Ia. Mai igoa uma e mafai ona faailoa mai ai o Ia e ala i le tatalo o le faamanatuga, ua Ia talosagaina ina ia ta‘ua o le “Atua, le Tama e Faavavau.”
A oo ina tatou iloa moni po o ai i tatou, o le a sili atu ona tatou talitonu malosi ua saunia e lo tatou Tama Faalelagi alofa se fuafuaga mo i tatou e toe foi atu ai e toe mau faatasi ma Ia. Na aoao mai Elder Patrick Kearon: “O le fuafuaga matagofie a lo tatou Tama, e oo lava i Lana fuafuaga ‘maoae’, ua mamanuina e aumai ai oe i le aiga, ae le o le taofia ai o oe i fafo. … E le o malolo le Atua i le tulituliloaina pea o oe.” Mafaufau i lena mea mo sina taimi—o lo tatou Tama e mamana, ma agaalofa o loo i le “tulituliloaina pea o oe.”
Po o fea lava o tatou i ai i luga o lo tatou ala o le avea ma soo, o le a suia lava o tatou olaga pe afai tatou te malamalama atili po o ai moni lava i tatou. Se‘i ou fautuaina atu ni auala se lua e mafai ai ona tatou faalolotoina lenei malamalamaaga.
Muamua, Tatalo
A o amataina e le Faaola Lana galuega i le olaga nei, sa taitai atu o ia i le vao e “faatasi ma le Atua.” Atonu e tatau ona tatou aveesea o tatou mafaufau mai le na o le faia o a tatou tatalo i le faaalu lea ia lava se taimi e talanoa moni ai ma “ia faatasi ma le Atua” i aso taitasi.
Ua ou iloa o le tulaga lelei o a‘u tatalo ua faaleleia a o ou faaaluina ni nai minute e sauni ai e talanoa atu i lo’u Tama. Ua faaali mai e tusitusiga paia ia i tatou o se mamanu lenei e aoga. E tusa lava pe o Iosefa Samita; Nifae, atalii o Helamana; po o Enosa, sa iai i a i latou uma se ituaiga o mafaufau loloto ma manatunatuga a o lei faia a latou fesootaiga tusitusia ma le Atua. Na fai mai Enosa sa matelaina lona agaga a o goto loloto ifo upu a lona tama i lona loto. O nei faataitaiga taitasi ua aoaoina ai i tatou i le manaomia ona saunia faaleagaga mo o tatou taimi i aso taitasi ina ia “faatasi ma le Atua.”
I tagata Sa Nifae, na faatonu atu le Faaola, “Pe a e tatalo, ulu atu i lou afeafe, ma pe a uma ona e tapuni o lou faitotoa, tatalo atu i lou Tamā.”
Pe o totonu o se kapoti po o se potumoe, o le mataupu faavae o le sailia lea o se nofoaga e mafai ona tuua ai na o oe e tatalo ai, ia faataga lou agaga ia filemu, ma ia lagonaina uunaiga o le “leo filemu ma le itiiti.” E mafai ona tatou saunia e ala i le mafaufau loloto i mea tatou te faafetai ai ma fesili po o atugaluga tatou te mananao e avatu i lo tatou Tama. E tatau ona tatou taumafai ia aua nei i ai se uiga e faagasolo ai le tatalo ae ia talanoa leotele ma lo tatou Tama, pe a mafai.
Ua ou iloa i le vevesi o o tatou olaga, pe a tatou tauivi ma tamaiti laiti po o le tamomoe i le va o fonotaga, atonu tatou te le maua le kapoti toafilemu ma sauniuniga magafagafa—ae o na tatalo le leoa, vave, ma faanatinati e mafai ona sili atu ona anoa pe a tatou faia se taumafaiga e “faatasi ma le Atua” i le amataga o le aso.
Atonu e i ai nisi e lei tatalo mo se taimi umi po o isi e lei lagonaina ua faafofogaina a latou tatalo. Ou te folafola atu ia te oe e silafia oe e lou Tama Faalelagi, e alofa ia te oe, ma e finagalo e faafofoga mai ia te oe. E finagalo o Ia e fesootai ma oe. E finagalo o Ia ia e manatua po o ai oe.
Na aoao mai Elder Jeffrey R. Holland talu ai nei, “Po o le a lava le tele o loo e tatalo ai, ia tatalo atili pea. Po o le a lava le malosi o loo e tatalo ai, tatalo malosi atu.”
E faaopoopo atu i le faateleina o le faisoo ma le faatauanau o a tatou tatalo, o le suesueina o le Tusi a Mamona i aso taitasi ma le tapuai i le malumalu o le a fesoasoani e saunia ai o tatou mafaufau mo faaaliga. A o tatou tauivi e faaleleia atili a tatou fesootaiga ma lo tatou Tama Faalelagi, o le a Ia faamanuiaina i tatou ia lagona atili le loloto e faapea o i tatou o Ana fanau.
Lua, Ia Iloa o Iesu o le Keriso
O le faaaliga silisili o le alofa o le Tama Faalelagi mo i tatou e pei o Ana fanau o le mea moni lea na Ia auina mai ai Lona Alo, o lo tatou lava Faaola patino, e fesoasoani ia i tatou e toe foi atu i le aiga. O le mea lea, e tatau ai ona tatou iloa o Ia.
I tausaga ua mavae, a o tautua ai o se peresitene o le siteki, sa ou auina atu ai se fautuaga mo se uso e auauna atu o se tagata faigaluega i sauniga i le malumalu. Ina ua uma ona faamatala atu o le a avea o ia ma se tagata maoae e faigaluega i sauniga, sa ou oomiina ma le le iloa le “Aua le faamaonia,” lea na auina atu ai loa le fautuaga. Ina ua uma ona taumafai ma le le faamanuiaina e toe faaleaogaina le fautuaga, sa ou valaau atu i le peresitene o le malumalu ma fai atu, “Ua ou faia se mea sese matautia.” E aunoa ma se faatuai, fai mai lenei peresitene lelei o le malumalu, “Peresitene Eyre, e leai se mea na e faia e le mafai ona faamagaloina ma iu ai ina faasa‘oina.” Se upumoni ina a maoa‘e. E moni lava, o Iesu Keriso e “malosi e laveai.”
I le 2019 sa i ai se suiga tele i fesili o pepa faataga o le malumalu. I le taimi muamua, o se tasi o fesili sa fesiligia ai pe i ai sau molimau i le matafaioi a Iesu Keriso o lo tatou Faaola ma le Togiola. Ua fesili mai nei pe o i ai sau molimau i Lana matafaioi o lou Faaola ma le Togiola. O le Togiola a Iesu Keriso e le gata e aoga mo isi; e aoga foi mo oe ma a’u. O Ia o lo’u Faaola. O Ia o lou Faaola. Taitoatasi. E na o Ia lava e mafai ai e oe ma a’u ona toe foi atu e faatasi ma lo tatou Tama.
O lea, uso e ma tuafafine, ia tatou saili ia te Ia. Ia tatou suesue i Lana sootaga paia ma le Tama ma i tatou taitoatasi. Ia tatou lagonaina le pese o le alofa togiola lea e oo patino mai ia i tatou taitoatasi e ala i lo tatou Togiola pe a tatou salamo. A oo ina tatou iloa “o ia o lē ua malosi aoao e laveai,” o le a oo ina tatou malamalama o i tatou, i le avea ai ma fanau a le Atua, o Lona olioli—o Lana taulaiga aupito taua—ma e moni lava e aoga le laveaiina taitoatasi o i tatou.
Ou te molimau atu e iai so tatou Tama Faalelagi alofa. A o tatou iloa lenei upumoni e faavavau e ala i le tatalo malosi, faaaliga faaletagata lava ia, ma o mai ia Iesu Keriso, ua mafai nei ona tatou folafola atu ma le lototoa “O au o se atalii/afafine o le Atua.” I le suafa o Iesu Keriso, amene.