O Tagata Lotomaualalo o Tootutuli i Fatafaitaulaga

Saunia e Elder Jeremy R. Jaggi

O Le Au Fitugafulu

A o tatou osia ma faamamalu a tatou feagaiga, ua tatou fusia i tatou lava i le Faaola, maua atili Lona alofamutimutivale, puipuiga, faapaiaga, faamalologa, ma le malologa.

Faafetai, i le aufaipese, mo la outou molimau e ala i lena viiga fou.

O le viiga fou o le faamanatuga “Bread of Life, Living Water” ua faatumulia ai lo’u agaga. Fai mai se laina e tasi i le viiga, “Ua ou sau nei i luma o le fatafaitaulaga, ma ofo atu ai ia te Ia lo’u loto nutimomoia.”

O lo’u malamalama i na upu na faalolotoina ina ua tuua e lo matou aiga Newbury Park, Kalefonia, e auauna atu i le Misiona a Utah Ogden i le 2015. Sa ou maua se valaaulia e malaga maimoa i le Hill Air Force Base e latalata i Layton, Utah. Ou te le’i alu muamua i se toagalauapi a se militeli; pe na ou feiloai foi i se failotu a se militeli po o ni alii ma tamaitai e galulue e saunia le saogalemu ma le puipuiga mo o latou atunuu.

O le failotu o Harp, e pei o le fiaafe o isi failotu volenitia ma faapolofesa, o e galulue i a tatou falepuipui, falemai, ma nofoaga o militeli i le lalolagi atoa, na musuia ma siitia ai a’u. O le matou afega mulimuli i le nofoaga o le faletapuai. Sa ou fesili i le failotu pe na te faatautaia sauniga mo tagata uma e mananao e manatunatu loloto, tatalo, mafaufau, ma tapuai. Sa alu o ia i le puipui pito i luma o le falesa ma sa ia toso mai se satauro mai tua o pupuni. Na ia fai mai na te faaaogaina le satauro mo sauniga Polotesano ma le Katoliko. Sa ou fesili pe o le a le mea na te faaaogaina mo o tatou uso ma tuafafine Iutaia, ma sa alu o ia i le isi itu o le puipui pito i luma ma ia toso mai i fafo se Fetu o Tavita.

Ona ou fesili lea, “O le a le mea e te fai mo sauniga a le Au Paia o Aso e Gata Ai?” Sa ia tuleia esea na faatusa ae tusi atu i se fatafaitaulaga laupapa telē i le ogatotonu o le faletapuai. Fai mai a ia o tagata o Le Ekalesia a Iesu Keriso o le Au Paia o Aso e Gata Ai, e saunia ma faamanuia le areto ma le vai i luga o le fatafaitaulaga. Sa ou fesili pe aveesea le fatafaitaulaga telē naua a o lei faia sauniga a o tatou uso ma tuafafine Iutaia, Musolemi, Katoliko, po o le Polotesano. Sa ia fai mai e tu ai a i o le fatafaitaulaga, ona o le tele o na tapuaiga e faaaogaina foi le fatafaitaulaga.

Sa fauina e Aperaamo se fatafaitaulaga, fusifusi Isaako, ma sa sauni e ositaulaga lona atalii e toatasi, ae sa taofia lona lima, ma sa ia tautino atu, e faapei foi ona tautino atu le Alii, “O A’u Lenei”! Ua faafia ona ofofua atu le O A’u Sili po o se tasi o Ana perofeta, “O A’u Lenei”?

I Lana Lauga i luga o le Mauga, sa valaaulia ai e le Faaola i tatou e faalelei ma o tatou uso ma tuafafine ae tatou te lei o atu i le fatafaitaulaga. Na aoao mai Paulo e faapea, e “ositaulagaina” i tatou i le fatafaitaulaga e ala i le Togiola a Iesu Keriso.

O le perofeta o Liae “sa tuua e ia lona fale … ma ana mea taua. … [Ona] faia lea e ia se fatafaitaulaga …⁠ ma osi ai se taulaga … , ma avatu le faafetai i le Alii.”

Ua aoao mai i tatou e le Tusi Paia ma le Tusi a Mamona e tapuai i le Alo o le Atua i fatafaitaulaga. Aisea?

O o tatou uluai matua, o Atamu ma Eva na faia ma tapuai i fatafaitaulaga. Ina ua uma ona tutuliese i la’ua mai le Faatoaga o Etena ma sa tapuai mo le “tele o aso,” sa asiasi atu i ai se agelu ma fai atu se fesili faamomoiloto lea e mafai foi ona fesili mai ai ia i tatou taitoatasi: “Aisea ua e osi atu ai taulaga i le Alii?”

Sa tali atu Atamu, “Ou te le iloa.”

O le tali a le agelu i le tautinoga lotomaualalo a Atamu e mataina: “O lenei mea o se faatusa lea o le taulaga a le Toatasi na Fanaua e le Tamā. … O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau.”

O le laulau o le faamanatuga ma fatafaitaulaga o malumalu e faatusa i le taulaga a Iesu Keriso ma Lana Togiola le i’u.

A o tatou osia ma faamamalu a tatou feagaiga, talia sauniga o le faamanatuga i le lotu ma faaeega paia ma faamauga i le malumalu, ua tatou fusia i tatou lava i le Faaola, maua atili Lona alofamutimutivale, puipuiga, faapaiaga, faamalologa, ma le malologa.

Alofamutimutivale ma le Puipuiga e Ala i Feagaiga

I le avea ai o se alii talavou e 15 tausaga, sa ou fesili i lo’u tamā pe mafai ona ou faamisia le sauniga faamanatuga—na o le tasi lava le Aso Sa ia Ianuari mo se taaloga faapitoa o le lakapi faaAmerika. Sa ia fai mai ua lava lo’u matua e faia ai lena filifiliga mo a’u lava, ma sa fai mai ou te mafaufau i se fautuaga e tasi. Sa ia fai mai, “Afai e te filifili e faamisi tasi le faamanatuga, o le a sili atu ona faigofie le filifili e toefaamisi foi.”

Afai o le Faaola o lē sili e faafesoota’ia, o lona uiga la o le fili o ia lea e tuueseeseina. E faaosooso i tatou e Satani e tuueseese i tatou lava mai o tatou nofoaga faapaiaina mo tapuaiga ma mai le puipuiga a Iesu Keriso. Pe a tatou tapuai i le Faaola, tatou te maua le “mana e faasagatau ai i tafega faalenatura faalelalolagi.” A tatou faaalu se taimi e fesootai ai ma Ia, ua i ai la tatou folafolaga e “laveaiina mai ia Satani.” “Ma, a tatou tausia a tatou feagaiga, Na te faaee mai ia i tatou Lona mana … faamalosiau.” Oka so’u faapelepele i le aafiaga o le fesootai ma le Faaola e ala i feagaiga e osia i fatafaitaulaga paia.

O le fauina o se malamalama i le Togiola faavavau a le Faaola i lea fuaiupu ma lea fuaiupu, o lea mataupu i luga o lea mataupu, e maua ai se puipuiga faaleagaga mai faaosoosoga a le fili. O Elder Jaggi Talavou i Mekisiko, Zuster [Sister] Jaggi i Peleseuma, ma isi faifeautalai i le lalolagi atoa atonu o latou vaaia i a latou uo o maua faamanuiaga o le papatisoga ma le mauaina o le meaalofa a le Agaga Paia pe afai e auai a latou uo i sauniga faamanatuga i totonu o le vaiaso muamua latou te fesootai ai.

O se talavou matua i Toga po o Samoa o le a le pine ae faamau i le maota o le Alii pe afai ua latou saunia mo le mauaina o o latou faaeega paia i le taimi lava e mae’a ai ona faauu mai le aoga. I le faaeega paia, e valaaulia tagata e ola ai, usita’ia, ma tausia tulafono e lima ia e maua ai e o latou ola le mana ma le puipuiga. A o tatou osia feagaiga ma le Alii, e fatuina se sootaga tuufaatasi. Tatou te faaali atu lo tatou faamaoni ma le alolofa ia te Ia. E tuputupu a’e lo tatou malosi ma le mana faatasi ma folafolaga taitasi e faia ma tausia.

Toetomanatu ma le Faapaiaga

Pe a tatou tootutuli ma le lotomaualalo ma faafaatusa i fatafaitaulaga o le Alii, o se avanoa lea mo le toetomanatu, “e faatatau i le faamaululuga o o [tatou] loto, … [faamaualalalo i tatou lava] i luma o le Atua.” Ae matou te lei o e tafafao ma a’u uo a o talavou, e masani ona fai mai lo’u tina, “Manatua pe o ai oe, ma ta’u mai pe a e taunuu mai i le fale.” O nisi po e misi ai ona ou faailoa i ai ona sa tuai tele ona ou taunuu i le fale. Ou te faanoanoa i lo’u misia o na talanoaga taua ma lo’u Tina.

O le taimi nei ou te sagisagi ai lava i a ma sootaga faailoa ma le Tama Faalelagi. I a’u faatulagaga o tapuaiga faaletagata i aso taitasi, i autafa o lo’u moega pe faapotopoto ma lo’u aiga, ma ou te mafaufau ia te a’u lava ia o tootuli i fatafaitaulaga, ma tomanatunatu ai ma suesue lo’u olaga. Ou te mafaufau i le faamanatuga, e oo lava i fasi falaoa atoatoa, ua tofitofi mo i tatou, o faatusa taitasi o le tino o lo tatou Faaola na gauia. Ou te manatua ai le aoaoga a Peresitene Dallin H. Oaks e faapea “o fasi falaoa taitasi e tulagaese, e faapei foi ona tulagaese tagata taitasi o e taumamafa ai.” A ou tootuli e tatalo, ou te mafaufau pe faapefea ona ou avatu i le Atua lo’u loto.

Na aoao mai Elder David A. Bednar e faapea “o le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. O le faatinoga o le taumamafa i le faamanatuga, na o le faamanatuga lava, e le faamagaloina ai ni agasala. Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma se agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala.”

Pe a ma autilo lelei ma Amy i aafiaga o o ma’ua olaga, ma te patipatia le meaalofa o le alofa atoatoa ma le taulaga a Iesu Keriso. Ua ma vaai ai foi i le matala mai o le matamataita o seoli. E mafai faapefea ona ma manumalo mai sīōa o le faamasinosino, atuatuvale, lotopopole, kanesa, ma’isuka, faasausili i luga o upega tafailagi, faailo po o ID e gaoia, ma’itaga e fafano, le maliu o se tamaitiiti, se uso, ma se tamā? Ona sa inu Iesu i le ipu oona o le tautevateva, le ipu o le ita—mo a’u, mo lo’u aiga, mo i tatou uma lava!

O le “ipu oona” sa Ia inuina i le Faatoaga o Ketesemane ma Ona mafatiaga na “faateteleina” i luga o le satauro i Kalevario ua mafai ai ona tatou faataatia mea faigata, o le le mafaufau, o fevesiaiga, o le lotoita, ma le gatete i luga o fatafaitaulaga a le Alii ma “faapaiaina ai e ala i le taliaina o le Agaga Paia,” i taimi uma.

Na saunoa mai Sister Patricia Holland, “O la’u tatalo aupito loloto mo outou ma mo a’u lava ia i le taimi nei, o lo tatou tuu atu atoatoa o i tatou, tuu i tatou lava i le fatafaitaulaga o folafolaga a le Atua ma le filemu po o fea lava o tatou i ai, ma pe o le a foi le mea na tatou faia.”

O Se Nofoaga o le Faamalologa ma le Malologa

Pe a tatou o mai i le fatafaitaulaga, tatou te le o mauaina se taui; o loo tatou aoao e uiga i Le e Foai Maia Meaalofa. I lena aoaoina ma le fusifusia i feagaiga, e oo mai ai le faamalologa. Fai mai Nifae, “Ua ia faatumuina aʼu i lona alofa, ua oo lava ina mu ai loʼu tino.” Ua valaaulia mai foi lo tatou Faaola alofa, “Pe tou te le foi mai nei ea ia te a’u, ma salamo i a outou agasala, ma liua, ina ia Ou faamaloloina outou?”

A o laiti le ma fanau teine matutua e toalua, Mackenzie ma Emma, o se tasi o tala e fiafia i ai i la’ua o le The Chronicles Narnia: The Lion, the Witch and the Wardrobe [O Le Tala ia Namia: O Le Leona, le Saualii ma le Pusalavalava]. Sa matou alolofa uma i le leona, o Aselana. O se tasi o po e sili ona matou manatua a o faitauina le tusi, o le taimi na ofo atu ai e le leona maoae lona ola e sui ai Etimani. E manatua pea ona sa fetagisi ai matua [le au Jaggi] ma le la fanau teine ina ua faaumatia le ola o le leona i luga o se Laulau Maa e le Saualii. E manatua pea ona sa i ai pea le faamoemoe, e ui i le mafatia, seia oo ina tupu se mea ofoofogia. Sa toe faalogoina le feei o le olioli i lena tamai potumoe ina ua toetu mai Aselana ma fai mai, “Ana iloa e le Saualii le uiga moni o le ositaulaga, … semanu na te iloa afai na oti se tagata naunau ua afaina fua, e lei faia se taufaamatau, nai lo le tagata faalata, semanu e mavaevae le Laulau Maa, ma semanu foi e amata e le Oti lava ia ona toefaafoisia.”

E faamalolo e Iesu Keriso manu’a uma. Ua faia e Iesu Keriso ia mafai ona toe ola mai.

I lana saunoaga i le konafesi aoao ia Oketopa 2022, na faamatala ai e Peresitene Russell M. Nelson se vaega na o mai e maimoa i se malumalu. Sa i ai se tamaitiiti iina. Na aoao mai Peresitene Nelson:

“Ina ua ulufale atu le vaega o le maimoaga i se potu o faaeega paia, sa faasino atu le tamaitiiti i le fatafaitaulaga, lea e tootutuli ai tagata e osi feagaiga ma le Atua, ma faapea atu, ‘Oi, ta’i manaia. O le nofoaga lenei mo tagata e malolo ai mai le latou malaga faalemalumalu.’

“… Masalo na te le’i malamalama e uiga i le sootaga tuusa’o i le va o le osiga o se feagaiga ma le Atua i totonu o le malumalu ma le folafolaga ofoofogia a le Faaola:

“‘Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.

“‘Ia outou amoina la’u amo, ma ia outou faaa’oa’o ia te au, … ona maua lea e outou o le malologa mo outou agaga.

“‘Aua e avegofie la’u amo, o la’u avega foi e mama ia’ [Mataio 11:28–30; faaopoopo le faamamafa].”

“O le Atalii o le Tagata e leai se mea e taoto ai,” ae sa Ia valaaulia Ona soo i le lao’ai o le faamanatuga e malolo ai ma Ia iina. Pe a “tootutuli tagata lotomaualalo i le fatafaitaulaga,” e faateleina le filemu. Ua faaloaloa mai aao o lo tatou Faaola; ua saunia Lona lao’ai. O mai e tapuai i le Alo o le Atua i Ona fatafaitaulaga paia. I le suafa o Iesu Keriso, amene.