Faamalosiau Atu i le Tasi ma le Isi

Talu ai nei na ou faitau ai i se aafiaga na matuai loloto lo’u ootia ai. Na tupu i le Suega Siamupini Faaleatunuu i le Malae Taalo Faalematuaofaiva a le ISA—o se tausinioga mo tagata matutua.

O se tasi o le ‘au tauvā i le tu’uga o le 1,500 mita, o Orville Rogers e 100-tausaga-le-matua. Na tusia e le tusitala:

“Ina ua pa le fana amata, sa taufetuli le au tamomoe, ma sa amata ai loa ona i ai Orville i le tulaga mulimuli, lea na ia tumau ai na o ia i le tu’uga atoa, ma faataupepē mālie atu ai lava. [Ina ua tini le toe tagata tamoe e ese mai lo Orville, sa toe lua taamilosaga a Orville na totoe. Toeitiiti atoa le 3,000 o le au maimoa sa nonofo filemu ma matamata atu ia te ia o faifai mālie atu faataamilo i le malae—sa lei logomalie le tuua na o ia, sa sāō, atoa.

“[Peitai] ina ua amata lana taamilosaga mulimuli, sa tutulai i luga le aofia, ma faamalosiau atu ma patipati. E oo ane i le taimi na ia oo ai i le sā’oga mulimuli, ua pisapisaō le aofia. O le faamalosiau patipatia a le faitau afe o le aumaimoa, sa faaaoga ai e Orville le toēga o lona malosiaga. Sa feei tagata i le fiafia a o ia kolosia le tini ma opoina e i latou sa latou tauva. Sa talotalo atu Orvile ma le lotomaualalo ma le agaga faafetai i le aumaimoa, ma savavali ese atu mai le malae ma ana uo fou.”

O le tautuuga lona lima lea a Orville o le tauvaga, ma i isi tuuga taitasi sa ia maua ai foi le tulaga mulimuli. Atonu na faaosoosoina nisi e faamasino Orville, ma le mafaufau faapea sa le tatau lava ona tauva i lona matua lea—faapea sa le tatau ona i ai i le malae ona sa ia matuai faatuai lana tuuga mo isi tagata uma.

Ae ui ina sa mulimuli o ia i taimi uma, ae sa faatūina e Orville ni matāti’a fou se lima i lena aso. Semanu e leai se tasi na matamata i ana tu’uga e talitonu e mafai lena mea, ae sa le o le au maimoa po o le au tauva o ni faamasino. Sa lei solia e Orville se tulafono, ma sa lei tuua foi i lalo e le au taitai ni tulaga faatauaina. Sa tamoe o ia i le tuuga lava e tasi ma sa faataunuuina tulaga manaomia e tasi e pei o isi au tauva uma. Ae o le maualuga o lona tulaga faigata, i le tulaga lea o lona matua ma le tapulaa o lona gafatia faaletino, sa faitaulia o ia i le faatulagaga o le vaega o le ta’i 100 ma ona tupu tausaga. Ma o le vaega lena na ia faatuina ai ni matāti’a fou se lima i le lalolagi.

E pei lava ona lototele Orville e la’a i luga o lena malae i taimi taitasi, e faapena foi le lotototoa o nisi o o tatou uso ma tuagane e la’a atu i le faalāgāmaea o le olaga i aso taitasi, ma le iloa e ono faamasino ma le le tonu i latou e ui ina o latou faia le mea sili latou te mafaia e manumalo ai i luitau lofituina ina ia mulimuli i le Faaola ma faamamalu a latou feagaiga ma Ia.

E le afaina pe o fea tatou te nonofo ai i le lalolagi, pe o le a lo tatou matutua, o se manaoga faavae faaletagata soifua mo i tatou uma ia maua se lagona o le avea ma ni ō, ia lagona e talia i tatou ma manaomia, ma e i ai le faamoemoega ma le uiga o o tatou olaga, tusa lava po o a o tatou tulaga po o tapulaa.

I le taamilosaga mulimuli o le tuuga, sa matuai faamalosiau atu le aofia ia Orville, ma ia maua ai le malosi e faaauau ai. Sa lei afaina lona mulimuli. I le au taufetuli ma le aofia, sa le na o se tauvaga lenei mea. I le tele o itu, o se faataitaiga matagofie lenei o le faatinoga o le alofa o le Faaola. Ina ua tini Orville, sa latou fiafia faatasi.

E faapei o le Su’ega Siamupini Faalematuaofaiva, e mafai foi e a tatou faapotopotoga, paranesi, ma aiga ona avea ma nofoaga e faapotopoto ai ma tatou fefaamalosi’au ai i le tasi ma le isi—o nuu o le feagaiga e faaosofia e le alofa o Keriso mo le tasi ma le isi—e fesoasoani i le tasi ma le isi e faatoilalo pe o a lava luitau tatou te feagai, avatu ai i le tasi ma le isi le malosi ma le faamalosiauga e aunoa ma le fefaamasinoa’i. Tatou te manaomia le tasi ma le isi. E maua le malosiaga faalelagi mai le lotogatasi, ma o le mafuaaga lena o loo fuafua ai Satani e faafevaevaeai i tatou.

Ae paga lea, o nisi o i tatou, e mafai ona faigata i nisi o taimi le auai i le lotu mo le tele o mafuaaga eseese. Atonu o se tasi o loo tauivi ma ni fesili po o le faatuatua po o se tasi o feagai ma le atuatuvale faaagafesootai po o le lotopopole. Atonu o se tasi mai se isi atunuu po o lanu po o se tasi e ese ni aafiaga o le olaga po o ala e vaai atu ai i mea e ono manatu ai e le fetaui ma ia. Atonu foi o ni matua e lē lava le moe ma tauivi faalelagona o pepe po o tamaiti laiti po o se tasi e nofotoatasi i se faapotopotoga e tumu i ulugalii ma aiga. Atonu foi o se tasi o tapu’e le lototoa e toe foi mai i le mavae ai o ni tausaga o aluese, po o se tasi o i ai pea lagona popole faapea e le lava lo latou lelei e avea ai ma se tasi o i latou.

Na saunoa Peresitene Russell M. Nelson: “Afai e tatala le faaipoipoga a se ulugalii i la outou uarota, po o se faifeautalai talavou ua vave faafo’i mai i le fale, po o se talavou ua masalosalo i lana molimau, latou te le manaomia lau faamasinoga. Latou te manaomia ona iloa le alofa mama o Iesu Keriso o atagia atu i au upu ma faatinoga.”

O o tatou aafiaga i le lotu ua fuafuaina e tuuina atu ai ni fesootaiga taua ma le Alii ma le tasi ma le isi lea e matua manaomia mo lo tatou soifua manuia faaleagaga ma faalelagona. Ua i totonu o feagaiga ua tatou osia ma le Atua, e amata i le papatisoga, ia lo tatou tiutetauave e alolofa ma fetausia’i e le tasi le isi o itutino o le aiga o le Atua, o itutino o le tino o Keriso, ma e le na ona makaina o se pusa o se lisi o mea ua faamoemoe tatou te faia.

O le alofa ma le tausiga faaKeriso e maualuluga ma paia atu. O le alofa le ponā o Keriso o le alofa mama lea. Pei ona aoao mai Peresitene Nelson, “O le alofa mama e uunaia ai i tatou e ‘tauamo avega a le tasi ma le isi’ [Mosaea 18:8] nai lo le fatufatu o avega i luga o le tasi ma le isi.”

Sa fetalai mai le Faaola, “O le mea lea e iloa ai e tagata uma lava o o’u soo outou, pe afai ua outou fealofani.” Na faaopoopo mai foi Peresitene Nelson: “O le alofa mama o le uiga ‘autu lea o se soo moni o Iesu Keriso.” “E manino lava le savali a le Faaola: O Ona soo moni e atia’e, siitia, faamalosiau, faasufi, ma musuia. … O le ala tatou te talanoa ai i, ma e uiga i isi … e matua taua lava.”

O aoaoga a le Faaola e uiga i lenei mea e faigofie lava. E taaofa’i i le Tulafono Faaauro: Fai i isi e pei ona e manao i isi e fai atu ia te oe. Tuu oe lava i le tulaga o lena tagata ma taulima i latou i le ala e te manao e taulima ai oe pe ana faapea o e tu i o latou seevae.

O le taulimaina o isi e faapei o Keriso e alu mamao lava tusa pe tatou te le aiga pe aulotu. E aofia ai o tatou uso ma tuagane o isi faatuatuaga pe augapiu foi ma se faatuatuaga. E aofia ai o tatou uso ma tatou tuagane mai isi atunuu ma aganuu, faapea ma i latou e ese o latou talitonuga faapolotiki. O i tatou uma o se vaega o le aiga o le Atua, ma e alofa o Ia i Ana fanau uma. E finagalo o Ia ia alolofa Ana fanau ia te Ia ma alolofa foi i le tasi ma le isi.

O le soifuaga o le Faaola sa o se faataitaiga o le alofa, faapotopoto, ma le siitia e oo lava ia i latou na faamasinoina e tagata lautele o ni tagata ua faanofoesea ma lē mamā. O Ia o se faataitaiga ua poloaiina i tatou e mulimuli ai. Ua tatou iai iinei e atia’e uiga auaumama faaKeriso, ma i’u ai ina avea faapei o lo tatou Faaola. O Lana e le o se talalelei o ni mea e maka pe a fai; o se talalelei o le avea ma ni ō—avea e faapei o Ia ma alolofa e pei ona Ia alofa ai. E finagalo o Ia ia avea i tatou o se nuu o Siona.

Ina ua ou i ai i le 20 ma ona tupu faaiuiu o o’u tausaga, sa ou asaina ai se vaitau o le loloto o le popolevale, ma i lena taimi, sa pei na faafuasei ona mou atu le mea moni e faapea o loo i ai se Atua. E le mafai ona ou faamatalaina atoa le lagona nai lo le faapea atu sa ou matuai fememea’i. Mai le taimi sa ou laitiiti ai, sa ou iloa i taimi uma sa i ai lo’u Tama i le Lagi iina, ma e mafai ona ou talanoa ia te Ia. Ae i lena taimi, sa ou le toe iloaina pe sa i ai se Atua. Ou te le’i oo muamua lava i se mea faapena i lo’u olaga, ma sa pei ua masofa lo’u faavae atoa.

O le taunuuga, sa faigata ona ou alu i le lotu. Sa ou alu, ae sa na o si vaega ona sa ou fefe ne’i faaigoa au ua “le toaga mai,” pe ua “le faamaoni,” ma sa ou fefe nei avea au o se poloketi atofa a se tasi. O le mea moni sa ou moomia i lena taimi o le lagonaina lea o se alofa faamaoni, malamalama, ma le lagolago mai ia i latou sa vagaia au, ae le o le faamasinosino.

O nisi o manatu soona fai sa ou fefe ina nei fai e tagata e uiga ia te a’u na ou faia foi e a’u lava e uiga i isi ina ua latou le o mai faalausosoo i le lotu. O lena aafiaga patino tuga na aoao mai ai au i nisi o lesona taua e uiga i le mafuaaga na poloaiina ai i tatou e aua nei faamasinoina isi ma le le amiotonu.

Pe o i ai nisi o i tatou o mafatia le leoa, fefe nei iloa e isi a latou tauiviga natia ona latou te le iloa pe o le a le latou tali i ai?

E na o le Alii e silafia atoa, le tulaga tonu o le faigata o loo taufetuli taitasi ai i tatou i le tautuuga o le olaga —o avega, o luitau, ma mea faalavefau tatou te feagai e tele ina le mafai ona vaaia e isi. E na o Ia e malamalama atoatoa i manu’a suia olaga ma mafatiaga atonu na oo i ai nisi o i tatou i le tuanai, ma o loo aafia ai pea i tatou i le taimi nei.

E tele ina tatou faamasinoina matuia i tatou lava ma mafaufau faapea ua tatau ona tatou mamao i luma i le tu’uga. E na o le Alii e silafia atoa o tatou tapulaa ma gafatia faaletagata lava ia, ma ona o lena mea, ua na o Ia lava ua agavaa atoatoa e faamasino a tatou faatinoga.

Uso e ma tuagane, ia avea i tatou o na aumaimoa i le tala ma fefaamalosiaua’i le tasi i le isi i latou malaga o le avea ma soo tusa lava po o a o tatou tulaga! E le moomia ai ona tatou solia tulafono pe tuu maualalo ai tulaga faatauaina. O le mea moni o poloaiga sili e lua—ia alolofa i o tatou tuaoi e pei o i tatou lava. Ma e pei ona fetalai lo tatou Faaola, “Aua sa faia e outou i le tasi o e aupito itiiti o ou uso nei …, o a’u lea sa outou faia i ai,” mo se aafiaga lelei pe le lelei. Sa Ia ta’u mai foi ia i tatou, “Afai e le tasi outou e le a a’u outou.”

O le a i ai taimi i o tatou olaga taitasi, o le a tatou manaomia ai le fesoasoani ma le faamalosiauga. I na tatou tautino nei loa e faia i taimi uma mo le tasi ma le isi. A o tatou faia, o le a tatou atia’e le lotogatasi sili atu ma faatautaia se avanoa mo le Faaola e faia ai Lana galuega paia o le faamalologa ma le suia o i tatou taitoatasi.

Ia te outou taitoatasi atonu ua lagona ua tou mamao i tua i lenei tuuga o le olaga, lenei malaga i le olaga nei, faamolemole ia faaauau pea. E na o le Faaola e mafai ona faamasino atoatoa le mea ua tatau ona e i ai i lenei taimi, ma e mutimuti alofa o Ia ma faamaoni. O Ia o le Faamasino Sili o le tu’uga o le olaga, ma e ua na oia lava e malamalama atoa i le tulaga o faigata o loo e tamo’e pe savali pe ta’u la’ala’a ai. O le a Ia faitaulia ou tapulaa, ou gafatia, ou aafiaga o le olaga, ma avega natia o e tauaveina, faapea foi ma manaoga o lou loto. Atonu foi na e te faatuina ni matati’a faafaatusa i le lalolagi. Faamolemole aua nei uma le faamoemoe. Faamolemole ia faaauau pea! Faamolemole nofo! O oe lava o sō matou. E manaomia oe e le Alii, ma matou te moomia oe!

Po o fea lava e te nofo ai i le lalolagi, tusa lava pe o le a le mamao ese, faamolemole ia manatua pea e silafia lelei oe e lou Tama i le Lagi ma lou Faaola, ma e alolofa atoatoa ia te oe. E le galo lava oe ia i La’ua. La te finagalo e aumai oe i le aiga.

Taulai lau vaai i le Faaola. O Iao lou ai u’amea. Aua lava ne’i faamamulua o Ia. Ou te molimau atu o loo soifua o Ia ma e mafai ona e faatuatuaina o Ia. Ou te molimau atu foi o loo Ia patipatia ma faamalosiauina oe.

Tau ina tatou mulimuli uma ia i le faataitaiga a le Faaola ma faamalosiau le tasi i le isi o la’u tatalo lea i le suafa o Iesu Keriso, amene.