O Le Mana o le Auauna Atu i le Toatasi

Tuafafine ma uso e, faafetai atu i lo outou tuuto faamaoni e o mai ia Iesu Keriso i nei taimi fagata. Ese le tou matagofie, ua outou aulelei ma lalelei, o outou taitasi o se atalii/afafine o le Atua O la’u tatalo ia faapea ona tatou iloaina le tosinaga a le Agaga Paia a o avea i tatou ma ni ō, ma fesoasoani le tasi i le isi ia avea ma soo tuuto o Iesu Keriso ma lagona Lona olioli a o tatou tapuai i le maota o le Alii.

Ua folafola mai Peresitene Russell M. Nelson: “O le taimi lava lenei mo oe ma a’u e saunia ai mo le Afio Mai Faalua o lo tatou Alii ma le Faaola, o Iesu le Keriso. O le taimi lava lenei mo i tatou ina ia avea ma a tatou faamuamua aupito silisili lo tatou avea ma soo. I se lalolagi ua faatumulia i mea faalavefau faaninivaulu, e mafai faapefea ona tatou faia lenei mea?

Na ia tuuina mai le tali: “O le tapuai e le aunoa i le malumalu o le a fesoasoani ia i tatou. I totonu o le maota o le Alii, tatou te taulai atu ai ia Iesu Keriso. … Tatou te iloa ai o Ia. … O tagata uma e saili faamaoni atu ia Iesu Keriso o le a maua o Ia i totonu o le malumalu.”

E faapefea la ona avea i tatou, ma fesoasoani le tasi i le isi ia avea ma soo tuuto o Iesu Keriso? Tatou te auauna atu i le toatasi. O le auauna atu i le ala a le Faaola e aofia ai le agaalofa, agalelei, onosai, ma le alofa e aunoa ma le faamasino. A o tatou auauna atu i le toatasi, tatou te valaaulia le toatasi e sau ia Iesu Keriso ma ia tapuai i le maota o le Alii ina ia maua ai Lona mana togiola. I se isi faaupuga, tatou te fesoasoani i le tasi ma le isi ia avea ma soo tuuto a o tatou auauna atu i le toatasi i auala e taitai atu ai i le maota o le Alii.

Tatou te aoao mai ia Iesu Keriso le mana o le auauna atu i le toatasi i le alofa ma ia aunoa ma le faamasino atu. Tou te manatua le tamaitai Samaria i le vaieli. Atonu na lagona e lenei tamaitai lona le taua, tuuatoatasi, lotovaivai, ma le le vaaia. Atonu na ia lagonaina e le o ia o se tasi e auai. I lona olaga atoa e toalima ana tane na fai, ma o le tamaloa sa la nonofo nei sa lē o sana tane. Atonu pe na faia faamalosi e nisi se faamasinoga le amiotonu e aunoa ma le iloaina o tulaga o lona olaga. Atonu o se tasi lea o mafuaaga na sau ai i le vaieli na o ia i le taimi aupito vevela o le aso. Ae peitai, o ia o se tasi o tagata muamua na tautino atu i ai e Iesu Keriso o Ia o le Mesia. Ia te Ia, o lea tamaitai o se afafine o le Atua.

Na aoao atu e Iesu Keriso lea tamaitai e faapea, e ala atu ia te Ia e mafai ai e se tasi ona maua le ola e faavavau e ala i le inu i le vai ola . Sa Ia fetalai atu, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.”

Sa lagona e le tamaitai Samaria le alofa o le Faaola ma maua se molimau e ala i le Agaga o Ia lava o le Mesia. I le mavae ai o lea molimau, sa toe foi o ia i le aai, ma valaaulia isi e o mai ma vaai, ma e toatele na talitonu o Iesu “lava o le Keriso, le Faaola o le lalolagi.” Sa auauna atu Keriso i le toatasi ma le alofa; ma o le taunuuga, sa avea isi ma Ona soo tuuto.

Ua tatou aoao i le mana o le auauna atu i le toatasi ma le mutimuti alofa mai Aposetolo a Keriso o Peteru ma Ioane. Tou te manatua se tagata, na pipili ina o fanau mai, sa taoto i aso taitasi i le faitotoa o le malumalu ma aioi atu ai mo tupe. O lea tagata atonu na lagonaina e lē taua, tuuatoatasi, lotovaivai, ma e le o vaaia. Atonu na ia lagoanina e le o ia o se tasi e auai.

“Ona fai atu lea o Peteru, E leai sa’u ario po o sa’u auro; a o le mea ua ia te au, ou te avatu lea ia te oe: O le suafa o Iesu Keriso o le Nasareta, ina tu ai ia i luga, ina savali.”

Sa tago atu Peteru i le lima taumatau o le tagata ma faatu o ia i luga, ma sa faamaloloina o ia. Na vave lava ina ua mae’a le vavega, sa ulu atu le tagata i le malumalu faatasi ma Peteru ma Ioane, “ua savali, ma oso, ma vivii atu i le Atua.” Sa auauna atu Peteru ma Ioane i le toatasi i ala na taitai atu ai i le maota o le Alii, ma sa avea lenei tagata ma soo tuuto o Keriso.

A’u uo e, sa i ai taimi i lo’u olaga na ou lagonaina ai foi le le taua, tuuatoatasi, lotovaivai ma lē vaaia. Sa ou lagonaina e pei ou te le auai. Sa ou papatiso ma faamauina o se tagata o Le Ekalesia a Iesu Keriso o Aso e Gata Ai ina ua 19 o’u tausaga. Tasi le tausaga mulimuli ane, sa ou taliaina se valaauga e avea o se faifeautalai faamisiona, ae sa tele mea sa ou lei iloaina e uiga i le talafaasolopito o le Ekalesia.

I le popofou o la’u auaunaga faifeautalai, sa ou iloa ai faapea sa i ai se vaitau sa lei taliaina ai i latou e tupuga mai i Aferika Uli e olioli i faamanuiaga uma o le tapuai i le maota o le Alii. O le iloaina o lenei mea mo le uluai taimi, na aumaia ai lagona o le ita, fenumiai, le mautonu, ma le fefe. Sa matuai ogaoga nei lagona o lea sa galoma atu ai mo se vaitaimi lo’u gafatia e iloa ai le Agaga Paia.

O le mea e lelei ai, sa i ai sa’u soa faifeautalai lelei tele, o Kevin Vick, o lē sa auauna mai ia te a’u ma le alofa, onosai, ma le agalelei. O po taitasi, a o ia molimauina o’u lagona o le masalosalo ma le le mautonu, sa na ona ia fai mai lava ia Elder Johnson laitiiti, “Ou te alofa ia te oe.” I le mavae ai pe tusa o le lua vaiaso, sa ou faatagaina ai a’u lava ia lagona le alofa o Kevin. Sa ou maua le lototoa e tatalo i le Tama Faalelagi i le suafa o Iesu Keriso. A o ou tatalo, sa ta’a’ina atu au i le vaega e 6 o le Mataupu Faavae ma Feagaiga, fuaiupu e 21–23, o loo faapea mai:

“Faauta, o A’u o Iesu Keriso, le Atalii o le Atua. … “O a’u o le malamalama e susulu i le pouliuli. …

“… Liliu ane lou mafaufau i le po lea na e tagi mai ai ia te a’u i lou loto, ina ia mafai ona e iloa e uiga i le moni o nei mea.

“Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua nai lo lena mai le Atua?”

A o ou faitau, sa ou manatua. Sa ou manatua le aso sa ou anapogi ai ma tatalo ia iloa o le Tusi a Mamona o le afioga a le Atua, ma o Iosefa Samita o le Perofeta o le Toefuataiga. Sa ou manatua feagaiga na osia i le maota o le Alii na faafesoota’ia a’u ia Iesu Keriso i se ala patino ma vavalalata. Sa ou lagonaina le alofa o le Faaola, Lona alofamutimutivale, ma Lana faamautinoaga O Le Ekalesia a Iesu Keriso o le Au Paia o Aso e Gata Ai o Lona malo i le fogaeleele, ma e tatau ai mo le tapenaina o i tatou mo Lona Afio Mai Faalua. Ona sa ou manatuaina, sa toe mafai foi ona ou iloaina le Agaga Paia ma malamalama atili o Iesu o le Keriso ma o a’u o Lona soo.

E i ai taimi o le a i ai a tatou fesili e le taliina ma lagona o le le tāua, lotovaivai, tuuatoatasi, ma e le vaaia. Peitai, a’u uo e, e tatau lava ona tatou fetuleni atu i luma ma le faatuatua ia Iesu Keriso ma manatua Ana afioga:

“Aua le atuatuvale o outou loto.”

“E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”

O a’u o se molimau i lenei mea moni ma faamanuiaga folafolaina a le Faaola.

O le a la se mea e mafai ona tatou faia e faamautinoa ai la tatou auaunaga i le toatasi i le ala a le Faaola ua sili ona aoga? O leola i le aoaoga faavae autu a Keriso o le a fesoasoani ia i tatou. “O le ola i le aoaoga faavae autu a Keriso,” e pei ona faamatala mai e Peresitene Nelson, “e mafai ona tupu mai ai le taamilosaga mamana o le mamā, lea e fatua’i ai le malosiaga faaleagaga i o tatou olaga.

“A o tatou tauivi e ola i tulafono maualuga atu a Iesu Keriso, … e siitia i tatou e le Faaola i luga atu o lenei lalolagi pa’ū e ala i le faamanuiaina o i tatou i le alofa mama, lotomaualalo, limafoai, agalelei, amio-pulea, filemu, ma le malologasili atu.”

“O [lenei] malosiaga [faaleagaga], e maua mai i le ola i aoaoga faavae a Keriso,” e pei ona faamalamalamaina e Elder Dale G. Renlund, “e le gata ina faamamanaina ia le suiga o lo tatou natura paia e oo atu ai i lo tatou taunuuga faavavau ae e faaosofia ai foi i tatou e fesoasoani [ia auauna atu] i isi i ala talafeagai.” Ua faamanatu mai ia i tatou e Elder Renlund e faapea “o le galuega a le Faaola o le faamalolo [ia faaatoatoaina i tatou]. O la tatou galuega o le alolofa—ia alolofa ma auauna atu i se ala e tosina atu ai isi ia Iesu Keriso.”

O le mafai ona tatou ola ai i le aoaoga faavae autu a Keriso o le a faalauteleina e ala i le suesue i aso taitasi i le Tusi a Mamona ma aai ma feinu i vaiaso taitasi i le faamanatuga. Na tautino mai e Peresitene Nelson faapea, o le Tusi a Mamona “o loo aoao mai o le aoaoga faavae autu o Keriso … [ma] o loo aumaia ai le malamalama [ma le manino] atoa o le Togiola a Iesu Keriso ia maua i soo se mea.” Ou te fiafia i lenei tusi. O le taumamafa ma le lototatalo i le faamanatuga i vaiaso taitasi o le a faateleina ai lo tatou malamalama i le Togiola a Iesu Keriso ma maua mai ai le faafouga faaleagaga, mafanafana, ma le mana o le faaleatua i o tatou olaga. Manatua, “i sauniga [o le perisitua], e faaalia ai le mana o le faaleatua,” ma o lenei mana, e sau mai ia Iesu Keriso, e faamalosia ai lo tatou manao ma lo tatou gafatia e auauna atu ai i le toatasi.

O la’u suesuega o le Tusi a Mamona ma le taumamafa i le faamanatuga e tuuitiitia ai lagona o le lotovaivai, e faateleina ai lo’u filimaoti e auauna atu i le toatasi i le ala a le Faaola, ma fesoasoani ia avea le fai ma soo o a’u faamuamua aupito maualuga.

A’u uo e, ou te folafola atu a o tatou ola i le aoaoga faavae autu a Keriso ma auauna atu i le toatasi i ala e taitai atu ai i le maota o le Alii, o le a tatou fetuleni atu i luma i le faatuatua ia Iesu Keriso, e ui i fesili e le’i taliina ma lagona o le lē taua, tuuatoatasi, lotovaivai, ma le lē vaaia. O le a tatou valaaulia le toatasi e sau ia Iesu Keriso ma tapuai i le maota o le Alii ina ia maua Lona mana togiola ma le alofa. I le maota o le Alii, o le a tatou “lagona ai le alofamutimutivale [o le Faaola]. O le a [tatou] maua ai tali i [a tatou] fesili e sili ona lavelave. [Ma o le a tatou] malamalama lelei ai i le olioli o Lana talalelei.” I le suafa o Iesu Keriso, amene.