3 ka Paagi aron Mamaayo gikan sa Makadaot nga mga Panglantaw bahin sa Pakighilawas ug Motan-aw sa Kasuod Sumala sa Katuyoan sa Dios

Ang Dios mao ang Dios sa kaangayan ug kaluoy. Siya nagmando nato sa paglikay sa pipila ka butang ug sa pagsunod sa Iyang mga balaod. Sa kasamtangan, ang kaaway motingog nga matugtanon: “Dili kaayo na importante nga butang. Ang usa lang ka higayon dili makadaot.”

Apan human sa atong pagtugyan ngadto sa tentasyon, kana nga tingog mahimong mapintas ug dili mapasayloon: “Dili ko makatuo nga magbinuang ka. Walay paagi sa paghinulsol. Dili na ka angayng higugmaon.”

Sa laing bahin, atong madungog ang maluluy-on nga tingog sa Dios pinaagi sa Manluluwas: “Dili ba kamo mobalik na ngari kanako karon, ug maghinulsol sa inyong mga sala, ug makabig, aron ako moayo kaninyo?” (3 Nephi 9:13).

Bisan nianang mahigugmaon nga pagdapit, komon nakong madungog ang mga young adult nga mosulti og mga butang sama sa, “Nakigbisog ko sa paggamit sa pornograpiya, mao nga dili gyod ko takos sa kaminyoon sa templo,” “Mibati ko nga guba na kaayo aron higugmaon,” o “Dili ko makapasaylo sa akong kaugalingon sa unsay akong nahimo.”

Kadtong nasugamak niini nga matang sa kaulaw, paminawa ang mga pulong ni Elder Patrick Kearon sa Korum sa Napulog Duha ka Apostoles: “Kon kamo may kalagmitan nga mabalaka nga kamo dili gyod igo, o nga ang mahigugmaon nga walay kinutoban nga Pag-ula ni Kristo maloloy-ong moabot ni bisan kinsa pa, apan dili diha ninyo, nan kamo nasayop sa pagsabot. Ang walay kinutoban nagpasabot nga hangtod sa hangtod. Ang walay kinutoban moabot kanimo ug niadtong imong gihigugma.”

Ang unang lakang diha sa pagkaayo gikan sa dili maayo nga mga mensahe sa pornograpiya ug sa makadaot nga mga panglantaw sa sekswalidad mao ang pagtuo nga ikaw makahimo uban sa tabang ni Jesukristo.

Ang gikinahanglan mao nga dili motago gikan sa Langitnong Amahan ug ni Jesukristo. Modangop ngadto Nila alang sa paglaom, tabang, ug kalinaw.

Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, bag-ohay lang mitudlo: “Si Jesukristo naghatag og kahayag niadtong kinsa anaa sa kangitngit. Mao nga, sa mga adlaw nga gibati nimo kana nga tingog nga nagsulti kanimo sa pagtago, nga kinahanglan ka magtago sa usa ka mangitngit nga kwarto nga mag-inusara, ako nagdapit kanimo nga magmaisogon ug motuo ni Kristo! Padayon sa unahan ug pasigaa ang Kahayag—atong Hingpit nga Kahayag sa Paglaom.”

Ayaw limitahi ang Pag-ula ni Kristo ug ang paagi nga Siya makahimo og mga milagro sa imong kinabuhi.

Si Presidente Thomas S. Monson (1927–2018) makausa misugilon sa usa ka istorya gikan sa Alice’s Adventures in Wonderland. Sa dihang si Alice anaa sa nagsanga nga mga dalan, nangutana siya sa Cheshire nga Iring kon asa nga dalan ang iyang subayon. Mitubag kini, “Depende kana kon asa ka gustong mopaingon. Kon wala ka masayod asa ka paingon, dili igsapayan kon hain nga dalan ang imong subayon.”

Sa samang paagi, tingali anaa ka sa nagsanga nga mga dalan tali sa kaswal nga panglantaw sa pakighilawas ug sa pagsabot sa mga katuyoan sa Dios alang sa sekswal nga kasuod. Kinahanglan ka nga makasabot sa dalan sa pakigsaad ug sa mga katuyoan sa Dios alang sa maayo, mahigugmaon nga sekswal nga kasuod aron makaila sa mga pamatasan ug mga dalan nga wala mahisubay sa Iyang mga paagi. Daghang mensahe—pornograpiya, naandan nga kultura nga mahimo ra ang kaswal nga pakighilawas, gituis nga mga paghulagway sa media—ang makamugna og dili maayo nga panglantaw bahin sa sekswalidad kalabot sa diha-diha dayon nga pisikal nga katagbawan ug pagdula-dula sa pagbati sa uban.

Apan ang panglantaw sa ebanghelyo bahin sa sekswal nga kasuod sulod sa kaminyoon tali sa usa ka lalaki ug usa ka babaye mas halapad. Ang katuyoan niini mao ang pagkonektar sa mga magtiayon sa emosyonal ug sa espirituwal nga paagi, nga mopalawom sa ilang relasyon.

Daghang tawo ang wala makaamgo kon unsa ka daghan ang wala nila masabti bahin sa sekswalidad hangtod nga ilang nadungog ang nakasentro sa ebanghelyo nga panglantaw. Kausa nakigsulti ko sa usa ka batan-ong lalaki kon sa unsang paagi nga ang paggamit sa pornograpiya makaguba sa espirituwal nga aspeto sa sekswalidad. Nasorpresa, miingon siya nga wala pa siya makadungog sa mga pulong nga sekswal ug espirituwal sa samang kapahayag kaniadto.

Kon ikaw adunay mas maayo nga espirituwal nga panglantaw sa katuyoan sa sekswal nga kasuod, mas sayon ang pagbuntog sa sukwahi nga bersiyon nga gitanyag sa kalibotan.

Sa pag-usab sa atong panglantaw, kinahanglan nga kita dili lang molikay sa makadaot nga mga mensahe—kita kinahanglan nga aktibong magkat-on sa unsay katuyoan sa Dios alang sa sekswal nga kasuod ug mag-ampo alang sa tabang sa Espiritu sa paghulma sa atong panglantaw.

Sa higayon nga ang Espiritu nakatabang na nimo nga makasabot sa mas taas nga mga katuyoan sa Dios alang sa sekswal nga kasuod, ikaw mobati nga nalig-on sa pagpili nga mosubay sa dalan sa pagkaayo ug kausaban.

Ania ang pipila ka paagi nga makasugod ka:

• Bisan kon tingali naningkamot pa gihapon ka sa pagbuntog sa naandan nga paggamit sa pornograpiya, sugdi sa pagpuli sa pornograpiya ug sa dili maayo nga media isip imong tinubdan sa impormasyon mahitungod sa unsay normal o maayo nga sekswal nga kasuod.

• Pagtuon sa mga kapanguhaan mahitungod sa sekswalidad nga nahisubay sa mga pagtulun-an sa ebanghelyo, sama sa Addressing Pornography nga seksiyon sa Gospel Library. Ang kurso sa institute nga “Ang Mahangtorong Pamilya” nagtudlo mahitungod sa pagpangandam alang sa sekswal nga kasuod diha sa kaminyoon. Ang Agosto 2020 nga isyu sa YA Matag Semana naghisgot kon unsaon sa pagpalambo og maayo nga panglantaw sa sekswalidad. Adunay daghan usab nga basahon nga gisulat sa kasaligan nga mga miyembro sa Simbahan nga makatabang. Pangayo og tabang sa Langitnong Amahan sa paggiya nimo sa dinasig nga mga kapanguhaan.

• Bukas nga makigsulti ngadto sa mga ginikanan, kasaligan nga mga lider sa Simbahan, maalamon nga mga mentor, o mga therapist nga makatabang nimo sa pagtan-aw sa kasuod sa paagi nga gusto sa Dios.

• Paliboti ang imong kaugalingon og mga higala nga sama nimo og mga hiyas ug naningkamot sa pagsunod sa balaod sa kaputli.

Ang impluwensya sa miaging mga kalapasan o makadaot nga mga mensahe dili mawala dihadiha dayon—apan paglabay sa panahon, ang kalibotanong mga tingog mag-anam og kahilom samtang maglakaw kita sa dalan sa pakigsaad inubanan sa hugot nga pagtuo. Sama sa gitudlo ni Presidente Russell M. Nelson, “Tungod kay si Jesukristo mibuntog niining napukan nga kalibotan, ug tungod kay Siya miula alang sa matag usa nato, kamo usab makabuntog niining puno sa sala, nakasentro sa kaugalingon, ug sa kasagaran makakapoy nga kalibotan.”

Kon ikaw modangop ngadto sa Langitnong Amahan alang sa tabang sa pag-usab sa imong mga panglantaw bahin sa sekswalidad, makabaton ka og paglaom sa pag-ugmad og sekswal nga relasyon uban sa imong umaabot (o kasamtangan) nga kapikas base sa pagsalig, gugma, ug pagtahod sa usag usa.

Nakita nako diha sa mga mata sa mga tawo nga nagpas-an og lawom nga kasakit gikan sa problemado nga mga mensahe mahitungod sa sekswalidad. Nakita usab nako kadtong sama nga mga mata nga misanag sa kalinaw, kalipay, ug paglaom samtang ilang nadiskobrehan ang kamatuoran sa Dios mahitungod sa sekswal nga kasuod ug sinsero nga naghinulsol kon gikinahanglan.

Kon ikaw mibati nga nasakitan, naulawan, o naglibog, palihog hibaloi kini: Ang pagkaayo posible. Ikaw wala hikawi sa gugma, kasuod, o kalipay.

Ikaw angayan og mas maayo pa kaysa mini nga koneksiyon. Palamboa ang imong panglantaw. Subay sa dalan. Tugoti nga ang kahayag sa Pag-ula ni Kristo mogiya nimo ngadto sa umaabot nga tinuod nga pagkaayo ug kasuod.