“Mga Pakigsaad, Gahom, ug mga Saad,” Liahona, Okt. 2025.

Mga Pakigsaad, Gahom, ug mga Saad

Ni Elder Ronald A. Rasband

Sa Korum sa Napulog Duha ka Apostoles

Ang templo mao ang sentro sa gahom ug proteksiyon nga gisaad ngadto sa matinud-anon sa dili pa ang Ikaduhang Pag-anhi ni Ginoong Jesukristo.

paghulagway kang Joseph Smith nga nagbarog atubangan sa Templo sa Kirtland

Niadtong Mayo 1833, ang apohan sa akong apohan sa tuhod sa habig sa akong inahan nga si Asahel Perry ug ang pipila ka higala mibiyahe gikan sa amihanang bahin sa New York paingon sa Kirtland, Ohio. Dili sila mga miyembro sa bag-ong gipahiuli nga Simbahan, apan gusto nilang mahimamat si Propeta Joseph Smith. Miabot sila sa tukmang oras sa pagtambong sa kinaunhang konseho nga gipahigayon aron hisgotan ang pagtukod sa Templo sa Kirtland.

Human sa pagsugod sa konseho, ang Propeta mipresentar bahin sa pagtukod sa templo. Dayon gitawag niya kadtong anaa didto aron mopahayag sa ilang mga pagbati kalabot nianang dakong buluhaton. Kadaghanan mitubag nga ang Simbahan kabos kaayo aron mohimo og ingon niana nga buluhaton. Misugyot sila nga magtukod og mas gamay, dili kaayo mahal nga bilding.

Atol sa nahitabo nga panaghisgot, si Lolo Perry ug ang iyang mga higala nagtapok, mipagawas sa ilang kwarta, ug gidugang kini. Sila ba adunay igong ikabayad sa ilang biyahe pauli ug miamot sa pagtukod sa templo? Pipila ka minuto ang milabay, ang akong lolo miduol ni Joseph Smith, mikuha og lima ka dolyar nga bulawang sensilyo, ug gihatag kini ngadto sa Propeta. (Kana nga sensilyo sa pagkakaron mokantidad na og gatosan ka dolyar!)

Si Joseph mibarog atubangan sa konseho ug gigunitan pataas ang sensilyo. Dayon, madasigong namulong, miingon siya “ang buhat nagsugod na ug ang Balay [sa Ginoo] pagatukoron sumala sa sundanan nga gipresentar” ni Ginoong Jesukristo.

Ang pamilya Perry sa wala madugay nagpasakop sa Simbahan didto sa Kirtland, nakadawat sa ilang mga panalangin sa templo pipila katuig ang milabay didto sa Templo sa Nauvoo, ug kadugayan mitabok sa kapatagan paingon sa Utah.

Sa dihang ang Templo sa Kirtland gipahinungod niadtong 1836, gamay kaayo kini aron masulod ang mga Santos sa Ulahing mga Adlaw nga gustong motambong sa pagpahinungod. Samtang ang Simbahan mitubo, mao usab ang gidaghanon sa mga Santos nga kinahanglang motambong sa mga miting diha sa gawas. Si Presidente James E. Faust (1920–2007), kinsa miserbisyo isip akong presidente sa stake sa batan-on pa ko ug isip akong mentor sa dihang gitawag ko isip Kinatibuk-ang Awtoridad niadtong 2007, mihimo niini nga obserbasyon kalabot sa ikaduhang templo sa Simbahan:

“Sa wala pa mahuman ang Templo sa Nauvoo niadtong 1846 ang mga Santos nanagtigom sa gawas, kasagaran duol sa templo, aron maminaw ni Joseph nga mamulong ug sa ubang mga lider sa Simbahan. Usahay kaliboan ang manambong niadto nga mga miting”—usahay bisan og bati ang panahon.

“Sama sa napanid-an ni [Elder] George A. Smith sa iyang alegre nga kinaiya, ‘Sa mga panahon ni Propeta Joseph … [ang Simbahan] nagkadaghan og maayo diha sa gawas.’”

Mapasalamaton kita sa atong panahon karon, Ang Simbahan ni Jesukristo sa mga Santos sa Ulahing mga Adlaw nagkadaghan sa gawas, sa sulod, ug sa tibuok kalibotan. Kana nga pagdaghan naglakip sa pagtukod og mga templo sa gipaspason nga wala pa mahitabo sukad “sumala sa sundanan nga gipresentar”—usa ka sundanan nga sa kanunay naglakip sa mga panalangin, pagpahinungod, hugot nga pagtuo, ug saksripisyo.

A Glorious Light—Kirtland Temple [Usa ka Mahimayaong Kahayag—Kirtland Temple], ni Glen S. Hopkinson, dili mahimong pakopyahan

Nganong ang Simbahan Naghimo man og Daghan Kaayong mga Templo?

“Ang atong mga katigulangan nanagna nga ang mga templo tukoron sa palibot sa Amihanan ug Habagatang Amerika, sa mga isla sa Pasipiko, Uropa, ug sa laing dapit pa,” si Presidente Eza Taft Benson (1899–1994) miingon pipila ka dekada na ang milabay. “Kon kining matubsanon nga buhat pagahimoon sa dako kaayo nga paagi, gatosan ka templo ang gikinahanglan.”

Si Presidente Russell M. Nelson miingon nga nagtukod kita karon og mga templo sa gipaspason nga wala pa mahitabo sukad “tungod kay ang Ginoo nagsugo kanato sa pagbuhat sa ingon. Ang mga panalangin sa templo nagtabang sa pagpundok sa Israel sa duha ka habig sa tabil. Kini nga mga panalangin nagtabang usab sa pag-andam og usa ka katawhan nga motabang sa pag-andam sa kalibotan alang sa Ikaduhang Pag-anhi sa Ginoo!”

Sa iyang pag-ampo sa pagpahinungod sa Templo sa Kirtland, si Joseph Smith nag-ampo “aron ang tanang katawhan nga mosulod sa pultahan sa balay sa Ginoo mobati sa imong gahom. …

“Ug mangayo kami kanimo, Balaan nga Amahan, nga ang imong mga sulugoon molakaw gikan niini nga balay inubanan sa imong gahom, ug nga ang imong ngalan maanaa kanila, ug ang imong himaya maglibot kanila, ug ang imong mga anghel magabantay kanila” (Doktrina ug mga Pakigsaad 109:13, 22; tan-awa usab sa bersikulo 23).

Sa dihang gibasa nako kadto nga mga bersikulo, naghunahuna ko bahin sa panan-awon ni Nephi sa ulahing mga adlaw. Bantayi kining susama nga pulong: “Ug nahitabo nga ako, si Nephi, nakakita sa gahom sa Kordero sa Dios, nga kini mikunsad diha sa mga santos sa simbahan sa Kordero, ug diha sa katawhan sa pakigsaad sa Ginoo, kinsa nagkatibulaag sa ibabaw sa tibuok yuta; ug gisangkapan sila sa pagkamatarong ug sa gahom sa Dios sa dako nga himaya” (1 Nephi 14:14).

Nagtuo ako nga ang mga templo sa ulahing mga adlaw adunay mahinungdanong tahas sa katumanan sa panagna ni Nephi ug mao ang sentro sa proteksiyon ug gahom nga gisaad ngadto sa matinud-anon sa dili pa ang Ikaduhang Pag-anhi.

Pipila ka tuig ang milabay, samtang nagserbisyo isip bishop sa unibersidad nga ward, nakadayeg ko ilabi na sa usa ka batan-ong babaye sa akong ward. Padayon ko nga nagdayeg niya. Nailhan ninyo siya isip si Presidente Emily Belle Freeman, Kinatibuk-ang Presidente sa Young Women. Sa bag-ohay lang nga pakigpulong sa kinatibuk-ang komperensiya, siya mitudlo nga pinaagi sa templo, si Jesukristo mobayaw nato ngadto sa mas taas nga lebel sa espirituhanon.

“Matag higayon nga ako molabang sa bakanan sa Iyang balay, ako makasinati og mas lawom nga relasyon sa pakigsaad uban Niya,” si Presidente Freeman miingon. “Ako gibalaan sa Iyang Espiritu, gitugahan sa Iyang gahom, ug gi-set apart aron sa pagtukod sa Iyang gingharian.”

Gisaad nga Gahom

Si Presidente Nelson namulong kanunay mahitungod sa gahom ni Jesukristo nga mahimong makab-ot pinaagi sa mga pakigsaad sa templo. “Ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom,” siya miingon. Si Presidente Nelson mitudlo usab:

“Kon kita motuman sa atong mga pakigsaad sa templo, kita makabaton og mas dakong akses ngadto sa makapalig-on nga gahom sa Ginoo. Diha sa templo, kita makadawat og panalipod gikan sa mga paghampak sa kalibotan.”

“Ang mahinungdanon nga mga ordinansa [sa Manluluwas] nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga kanato sa Iyang makaayo, makapalig-on nga gahom. Ug o, unsa kadako sa atong panginahanglan sa Iyang gahom sa mga adlaw nga umaabot.”

“Ang moral ug espirituwal nga gahom nga gikinahanglan sa atong katawhan karon ug sa mga adlaw nga moabot mao ang gahom sa Dios nga Amahan ug sa Iyang Anak, si Jesukristo. Makagamit kita sa Ilang gahom pinaagi sa paghimo ug pagtuman sa mga pakigsaad ngadto Kanila.”

Ang langitnong gahom mahinungdanon, mga kaigsoonan, tungod kay nagpuyo kita sa hilabihan ka daotan nga kalibotan. Kon wala kana nga gahom, dili kita “[maka]lahutay sa adlaw sa pag-abot niya” o “makaharong inig padayag na niya” (Malaquias 3:2). Wala kita masayod kon kanus-a kana nga adlaw, apan ang Iyang sinugo gipadala na Niya aron sa “pag-andam sa dalan” alang sa Iyang pag-anhi (Malaquias 3:1). Sa pagkakaron, walay kalinaw sa kalibotan samtang nagkaduol kana nga adlaw.

Nagkinahanglan kita sa gahom nga gisaad ngadto sa matinud-anon nga motabang nato nga:

Mapatigbabaw ang Dios labaw sa tanan sa atong mga kinabuhi.
Maghinulsol ug magpaduol ngadto sa Ginoo.
Mopanalangin, mohupay, mogiya, ug mangalagad.
“[Mosugakod] sa atong mga pagsulay, mga tentasyon, ug mga kasakit.” (tan-awa sa Mosiah 3:19).
Makakaplag og kalinaw ug kalipay diha ni Kristo samtang maglakaw kita sa dalan sa pakigsaad.
Maandam “batok sa adlaw sa pagsunog” ug “sa katalagman sa mga daotan” (Doktrina ug mga Pakigsaad 109:46).
Makatuman sa buhat sa Ginoo sa dili pa ang Iyang Ikaduhang Pag-anhi.

Litrato sa simboryo [dome] sa Tucson Arizona Temple ni James Whitney Young

Mga Tigbantay sa Kaluwasan

Ang buhat ug himaya sa Amahan mao ang “pagpahinabo sa pagka-imortal ug sa kinabuhi nga dayon sa tawo” (Moises 1:39). Matag templo nagbarog isip yutan-ong tigbantay sa plano sa Dios alang sa kaluwasan, nagpunting ngadto sa mahinungdanong tahas sa Manluluwas niana nga buhat ug himaya.

Gisangkapan sa Iyang gahom, ang matag lalaki ug babaye nga nagtuman sa pakigsaad—minyo o dili—nga matinud-anong nagtuman sa mga pakigsaad sa templo mapanalanginan niini nga kinabuhi ug sa kinabuhi nga moabot.

Si Presidente Nelson misaad: “Ang tumong nga gipaningkamotan sa matag usa kanato mao ang matugahan og gahom diha sa balay sa Ginoo, maselyo isip mga pamilya, matinud-anon sa mga pakigsaad nga gihimo diha sa templo nga maghimo kanato nga takos sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”

Isip Apostol ni Ginoong Jesukristo, ako mopamatuod nga kini nga mga butang tinuod.