Ang Atong Kasingkasing diha sa Iyang mga Kamot

Ang akong hugot nga pagtuo diha ni Jesukristo mao ang pundasyon sa akong kinabuhi, ug ang gugma sa Langitnong Amahan mao ang labing mahinungdanon sa akong kinabuhi. Mibati ko nga nahiusa Kanila. Pinaagi sa paghimo ug sa pagtuman sa mga pakigsaad sa templo, gibati nako ang Ilang gahom ngari sa akong kinabuhi.

Diha sa balay sa Ginoo, mibati ko nga anaa duol Kaniya. Gibati nako ang kalig-on ug gahom sa Iyang pagkapari. Gibati nako nga ingon og Iyang gitunol ang Iyang kamot ngari nako, nagdapit nako sa pagkupot niini.

Ang akong panaw sa kinabuhi naglakip sa medikal nga mga pagtuon, diin atol niini ang koneksiyon sa hugot nga pagtuo ug medisina nahimong tataw nako. Usa ka higayon samtang nagbansay sa cardiac surgery, mitabang ko sa usa ka operasyon sa kasingkasing. Ang pasyente kinahanglan makadawat og coronary artery bypass. Ang mga lakang sa pagpangandam naglakip sa pagtaod sa heart-lung machine aron pagseguro nga ang mahinungdanong suplay sa dugo ug oxygen maanaa sa circulatory system sa lawas.

Gamit ang espesyal nga liquid solution, ang surgeon temporaryo nga mipahunong sa kasingkasing aron makapahigayon siya sa operasyon nga dili maglihok ang kasingkasing. Mainampingon kong nagtan-aw sa mga kamot sa surgeon ug nakita siya nga hinay-hinayng mialsa og gamay sa kasingkasing sa iyang atubangan sa may dughan. Nianang higayona milingi siya nako nga adunay gipasabot gamit ang paglihok sa iyang ulo. Mihangyo siya nako nga mainampingong mokupot sa kasingkasing gamit ang akong tuong kamot aron maandam na alang sa bypass nga operasyon.

Sa dihang gikuptan nako ang kasingkasing sa pasyente, dihadiha dayon mibati ko og hilabihan ka dako nga responsibilidad, ingon man hilabihan nga kahingangha. Ang mosunod nga mga pulong sa Doktrina ug mga Pakigsaad 101:16 misantop sa akong hunahuna: “pagmalinawon ug hibaloi nga ako mao ang Dios” (tan-awa usab sa Salmo 46:10).

Gitandi nako kini nga hulagway sa usa ka kalma nga kasingkasing ngadto sa espirituwal nga pagkaamgo nga si Jesukristo, isip atong Manluluwas, mokupot sa atong kasingkasing diha sa Iyang mga kamot ug moayo niini.

Akong nakat-onan ang kamatuoran sa mga pulong ni Presidente Russell M. Nelson nga gipamulong atol sa bag-ohay lang nga kinatibuk-ang komperensiya: “Ang labing maayo moabot pa samtang kita hingpit nga motugyan sa atong mga kasingkasing ug sa atong mga kinabuhi ngadto ni Jesukristo.”