Giputos sa Kainit ug sa Gugma

“Unsay akong ikaalagad nimo?” Nangutana si Michelle. Si Michelle ang akong tigpangalagad nga sister ug usa sa labing maayo nakong higala. Ang iyang pangutana mibagting sa akong dunggan, ug nahasol ko nga wala na usab nako siya mahatagi og diretso nga tubag.

Ang makaguba sa kasingkasing nga sirkumstansya bag-o lang misamok sa akong mga kaliwat, ug nasayod ko nga nagkinahanglan ko og tabang. Hinoon, dili ko gusto nga makita nga huyang pinaagi sa pagpangayo og tabang kang Michelle.

Sa kasagaran akong ikompara ang akong kaugalingon ngadto sa uban sama sa mga pioneer nga mga Santos sa Ulahing mga Adlaw kinsa misakripisyo sa tanan alang sa ilang pagtuo o niana nga higala sa Facebook kinsa ingon og aduna niining tanan. Nasayod ko nga walay bisan usa niini nga pagkumpara ang patas. Sa gihapon padayon nakong gipalayo ang akong kaugalingon dihang ang kahupayan gikan sa mahigugmaon nga brother o sister sa ward makahimo unta sa tanan nga kalainan.

Sulod sa mga katuigan, gibalibaran nako ang mga higala nga tinuorayng gusto nga motabang nga nakadawat og daghang lahilahi nga bersiyon sa “okey ra ko.” Sa sukwahi, nasagmuyo ako nga makadawat og parehas nga tubag gikan sa akong giserbisyohan. Kapila man nako gibalibaran sa mapahitas-ong paagi ang mga tawo nga gipadala sa Dios isip tubag sa akong mga pag-ampo? Ang kasamtangan nakong mga kahimtang, hinoon, nagpugos kanako nga ipaubos ang akong garbo ug mangayo og tabang.

Sa una, wala ko kahibalo unsay isulti dihang gitawagan nako si Michelle, apan dihang gibu-bu nako ang akong mga pagbati sa pagbangotan ug kasubo, mihilak siya uban kanako ug naminaw kanako. Giingnan nako siya nga gusto lang ko nga dunay tawo nga mopa-snack nako, moputos kanako og habol, ug mopahigda kanako uban sa mga kaseguroan nga ang tanan ma-Ok ra.

Miingon si Michelle nga kaniadto pa siyang nag-ampo aron masayod unsaon ako sa paghupay apan wala mahibalo unsaon tungod kay wala ko maghisgot bahin sa akong kasub-anan. Dihang sa kataposan akong giablihan ang akong kasingkasing kaniya, bisan pa, mas nakasabot siya ug nasayod unsaon ako sa pagtabang.

Pagkasunod adlaw mitunga siya sa akong pultahan nga may dalang usa ka bag nga cherry ug ang labing init, humok nga habol nga sukad akong nahikap. Ang iyang tigpangalagad nga kompanyon, si Linda. miabot pagkataod-taod nga may dalang pagkaon alang sa akong pamilya ug sida nga mga medyas alang kanako.

Karon kon magsinati ko og labihan ka emosyonal nga kasakit sama sa usa ka unos, akong puston ang akong kaugalingon pinaagi sa kainit ni Michelle ug sa gugma ni Linda ug nasayod nga ma-OK ra ko. Ang ilang gugma usa ka pahinumdom sa gugma ni Kristo—butang nga akong matawagan sa bisan unsang oras kon kini akong gikinahanglan (tan-awa sa Mga Taga-Roma 8:35, 38–39).