“Tan-awa ang Kaayo nga anaa Nila,” Liahona, Okt. 2025.
Kababayen-an sa Pakigsaad
Tan-awa ang Kaayo nga anaa Nila
Ang pagpangalagad dili lamang usa ka programa; usa kini ka balaanong proseso nga pinaagi niini ang Dios mopanalangin ug mousab sa mga kasingkasing sa Iyang mga anak.
Mibati ba kamo nga tinouray nga nakita? Adunay gamhanang kadasig nga moabot kon ang usa ka tawo tinud-anay nga nakakita ninyo, nahigugma ninyo, ug mituo ninyo. Nahimo kong artist kay mituo ang akong inahan nga aduna koy talento. Wala lang siya motuo nako kon makahimo ko og maayo nga binuhatan. Kon makahimo ko og sayop, nakita gihapon niya ang kaayo nga anaa nako.
Si Elder David A. Bednar sa Korum sa Napulog Duha ka Apostoles mitudlo nga “ang pag-ila sa labing taas nga lebel sa pagpakita niini mao ang pagkakita sa kaayo nga anaa sa laing tawo nga wala niya makita sa iyang kaugalingon ug ang abilidad sa pagtabang nila sa pag-ila ug pagpalambo niini.”
Mao kini ang gihimo sa Langitnong Amahan alang nato sa matag adlaw. Nakita Niya ang kaayo nga tingali wala nato makita sa atong kaugalingon ug mahigugmaon ug mapailobon nga nagtabang nato sa pagpalambo niini ug nagtabang nato nga mahimong sama sa Iyang Anak. Ang Manluluwas mipakita nato kon unsaon nga kita makakita sa kaayo ug motabang sa uban sa pagpalambo niini. Siya mahigugmaon ug tinuoray nga mitudlo ni Pedro ug sa Iyang bag-ong Apostoles. Siya nangalagad ug midasig sa mga tawo nga gikonsiderar sa katilingban nga mga makasasala, mga sinalikway, o hugaw. Nakita niya ang bili ug paglaom niadtong gikonsiderar nga wala nay paglaom. Siya mitubag inubanan sa kaluoy ngadto sa mga pangamuyo sa desperado nga mga sanlahon. Wala lamang siya magpaduol kanila apan mihikap usab nila ug miayo kanila. (Tan-awa sa Marcos 2:15–17; Lucas 5:12–13; Juan 4:4–26.)
Nasayod Siya sa bili sa matag kalag, ug Siya nahigugma nila. Mas daghan pa ang Iyang nakita nga anaa kanila kaysa sa ilang mga kahuyang, mga sala, mga sakit, ug mga kaluya. Siya nakakita sa ilang mga kalag ug sa tanan nga sila makahimo ug mamahimo sa umaabot. Siya mitudlo nila, miayo nila, miawhag nila, ug midapit nila sa pagkab-ot sa ilang potensiyal pinaagi sa pagsunod Niya.
Isip kababayen-an sa pakigsaad sa Iyang Simbahan, kita aduna sa panalangin ug katungdanan nga “molakaw ug mobuhat sama sa iyang gibuhat” (Lucas 10:37). “Kay ang mga buhat nga inyong nakita nga akong gibuhat mao usab kana ang inyong buhaton” (3 Nephi 27:21). Kita aduna sa pribilihiyo ug panalangin sa pakigsaad sa pagtabang niadtong atong gipangalagaran nga mobati sa gugma sa Manluluwas ug makita ang kaayo nga nakita sa Dios nga anaa nila ug motabang nila sa pagpalambo niini. Mao kini ang paghigugma sa uban sama sa buhaton sa Manluluwas (tan-awa sa Juan 13:34).
Ang atong Amahan sa Langit sa kasagaran motabang nato nga molambo ug mamahimong sama sa Iyang gilaoman kanato pinaagi sa pagpadala og espesyal nga mga tawo ngari sa atong kinabuhi—mga tawo nga magdala sa Iyang gugma ug kahupayan ug motabang nato nga makab-ot ang atong potensiyal.
Ang tigpangalagad nga mga brother ug mga sister adunay nindot nga pribilihiyo ug responsibilidad sa pakigsaad nga mahimong usa niadtong espesyal nga mga tawo sa trabahoon sa Ginoo. Makatabang kita niadtong atong gialagaran nga makita ang maayo nga mga batasan, mga talento, ug mga kinaiya ni Kristo nga anaa sa ilang kaugalingon ug motabang nila nga molambo.
Kon kita mas motabang sa uban nga matuman ang kahingpitan sa ilang pagkalalang, mas makaamgo kita sa atong kaugalingong potensiyal isip mga anak sa Dios. Kinahanglan kita nga mosalig sa Ginoo aron mahibalo sa mga panginahanglan sa Iyang mga anak.
Mga sister, kamo adunay mga kapanguhaan sa langit nga magamit sa pagtuman niining matarong ug mahimayaon nga buhat, lakip na ang mga panalangin sa gahom sa pagkapari sa Ginoo pinaagi sa pagtuman sa mga pakigsaad ug sa gidelegar nga awtoridad sa pagkapari pinaagi sa inyong mga calling ug mga buluhaton sa pagpangalagad. Kini nga mga panalangin motabang sa paghatag sa pagpadayag nga atong gikinahanglan sa pagpangalagad sa Iyang paagi.
Ang Espiritu makatabang nga mohumok ang atong mga kasingkasing aron makakita sa uban “kon unsa gayod ang ilang tinuod nga kinaiyahan karon” (Jacob 4:13) ug ang atong panan-aw dili matabonan sa mga pangagpas, pagkakaswal, o gani sa kabalaka.
“Ang Tigpangalagad nga mga Sister Gipadala gikan sa Dios”
Si Karen akoa na karon nga minahal nga amiga. Apan wala ko makaila niya hangtod nga nahimo kong iyang tigpangalagad nga sister. Ang akong kompanyon sa pagpangalagad usa ka buotan nga batan-ong babaye nga ginganlan og Ella, nga usa ka senior sa high school. Nadawat namo ang buluhaton nga mangalagad ni Karen sa dihang mao pa lang ang iyang pagbalik sa simbahan.
Samtang nangalagad kami ngadto ni Karen ug nahibalo sa iyang talagsaong istorya ug mga panginahanglan, si Ella ug ako mibati og kadasig nga dapiton siya sa pag-adto sa templo. Kini nga paningkamot migamit sa mga kahanas ni Ella sa teknolohiya sa pagtarong sa mga isyu sa online nga account ni Karen sa Simbahan aron makabayad siya sa iyang ikapulo ug makahimo og appointment sa templo. Ug gidala nako siya aron makakuha og bag-ong sinina sa templo ug gitabangan siya nga mobati nga komportableng moadto. Si Karen daw malipayon tan-awon ug napuno sa kalinaw samtang siya ug ako nanglingkod sa lawak sa celestial human sa sesyon.
Si Karen nakasinati og dakong problema sa panglawas ug ingon man usab maanindot nga mga milagro sa panahon nga kami nangalagad niya. Ang pagsuporta niya niining panahona nakapalig-on kanamong tanan diha sa Ginoo.
Gidapit namo siya nga moapil namo sa Relief Society ug Sunday School ug migahin og panahon uban niya sa iyang panimalay. Siya milambo sa matahom nga kamasaligon kon si kinsa siya karon ug kon si kinsa ang buot niyang mamahimo sa umaabot. Iyang nakita og sugod ang kaayo nga anaa sa iyang kaugalingon.
Sa dihang nangutana ko ni Karen kon pwede ba nakong ipakigbahin kining espesyal nga kasinatian sa pagkahimong iyang tigpangalagad nga sister, siya miingon, “Sige! Ipahibalo nila nga adunay Langitnong Amahan nga nahigugma [nila]!” Miingon siya nga ang gugma ug pagpakabana ni Ella ug nako alang niya nakatudlo niya nga nagkinahanglan siya og usa ka tawo sa iyang kinabuhi. Siya miingon, “Wala gayod sila kahibalo kon unsa ka dako ang akong panginahanglan nila. … Ang mga tigpangalagad nga mga sister gipadala gikan sa Dios.”
Ang Ginoo may katuyoan gayod sa Iyang pagpahimutang kon asa ka ug ako karon. Nasayod Siya kon kinsa ang atong gikinahanglan sa atong kinabuhi ug kon ngano. Kon kita mopakita og hugot nga pagtuo sa Ginoo ug motuman sa atong mga buluhaton sa pagpangalagad nga nagagikan Kaniya, Iyang ipakita nato ang maanindot nga mga panalangin sa Iyang gugma ug Iyang balaanong pakigtambayayong alang nato.
Ang Pagpangalagad Mousab sa Ato Mismo nga Pagkatawo
Isip mga anak sa Dios, tuyo nga kita molambo ug mausab ug mahimong sama sa atong langitnong mga ginikanan. Ug ang pagpangalagad inubanan sa gugma mahinungdanon niana nga katuyoan. Ang pagpangalagad dili lamang usa ka programa; usa kini ka balaanong proseso nga pinaagi niini ang Dios mopanalangin ug mousab sa mga kasingkasing sa Iyang mga anak gikan sa gahi nga kasingkasing ngadto sa kasingkasing nga masinugtanon (tan-awa sa Ezequiel 11:19).
Ang pagpangalagad mao ang paghigugma ug pag-atiman sa uban sama sa buhaton sa Manluluwas. Usa kini ka paagi sa pagkabinuhat; kini ang paagi sa atong Manluluwas nga si Jesukristo ug sa tanan niadtong nakigsaad nga mosunod Kaniya. Siya miingon, “Maghatag ako kaninyog bag-ong sugo: paghigugmaay kamo. Ingon nga ako nahigugma kaninyo” (Juan 13:34).
Ang paglihok sama sa buhaton sa Manluluwas ug ang pagsalig Kaniya mousab sa ato mismo nga pagkatawo nga mahimong sama Kaniya, nga mohimo natong angayan nga mobalik ngadto sa presensya sa atong Amahan sa Langit.
Si Presidente Russell M. Nelson mitudlo nga “samtang kita maningkamot sa pagsunod sa mas taas nga mga balaod ni Jesukristo, ang atong mga kasingkasing ug ang atong pagkatawo magsugod sa pagkausab. Ang Manluluwas motabang nato sa pagbuntog sa mga tentasyon niini nga [napukan nga] kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.”
Kababayen-an sa Pakigsaad Nagdala sa Kahupayan sa Manluluwas
Nahinumdom ko usa ka gabii nga nagdrayb diretso gikan sa trabaho aron mobisita sa usa sa mga sister nga akong gipangalagaran. Dili maayo kadto nga adlaw, ug dili maayo ang akong gipamati. Mibati ko nga wala na koy mahimo ug mibati nga dili gayod hingpit nga maluluy-on. Mibati ko nga mohimo og mubo nga pag-ampo inubanan sa hugot nga pagtuo sulod sa akong kasingkasing samtang nagdrayb nga kini nga sister unta mapanalanginan sa unsay iyang gikinahanglan bisan pa sa akong pagkulang. Samtang ang akong kompanyon ug ako nakig-istorya niini nga sister bahin sa iyang pamilya, sa iyang bisi nga kinabuhi, ug kon unsay among mabuhat sa pagtabang, gibati nako ang gugma sa Ginoo nga gibu-bo ngari nako. Gibati nako ang Iyang gugma alang niya, alang sa iyang pamilya, ug alang nako.
Nakigdula kami sa iyang gagmayng mga anak samtang nagbisita kami. Ug mibiya ko nianang gabhiona nga mibati nga ingon og lahi nga pagkatawo. Nahibalo ko nga gihatagan ko og kusog ug kalig-on. Nasayod ko nga gibati nako ang tinipik sa langit niana nga panimalay. Kaming tanan mibati nga gibayaw sa Iyang gugma.
Nakakaplag ko og kalipay sa paghigugma niini nga sister ug sa pagdala kaniya sa kahupayan sa Manluluwas. Ang atong mga kasinatian sa pagpadulong ngadto sa pagpangalagad dili kanunay nga komportable o malipayon. Sama sa bisan unsang butang nga importante, kasagaran adunay pipila ka babag. Apan kon kamo mangalagad, kamo dili magmahay nga mahimong Iyang mga kamot ug mga dunggan. Kamo dili magmahay sa pagdala sa Iyang gugma ug kahupayan.
Si Presidente Nelson miingon, “Mga sister, palihog ayaw ipakaminos ang talagsaong gahom nga anaa kaninyo sa pag-impluwensya sa uban alang sa kaayohan. Usa kini ka gasa nga gituga sa Langitnong Amahan sa matag babaye sa pakigsaad.”
Kamo mga babaye sa pakigsaad sa Simbahan sa Ginoo. Sa tibuok kalibotan, kamo nahigugma sa Dios ug naningkamot sa pagsunod sa mga pakigsaad ug sa paghatag sa inyong labing maayo ngadto Kaniya. Kamo naghimo sa responsibilidad sa pagpangalagad ngadto sa usa ug ngadto sa daghan sa pagdala sa kahupayan sa Manluluwas.
Ug, minahal nga mga sister, kon aduna may panginahanglan sa kahupayan dinhi sa yuta, mao kini karon. Dako kaayo ang panginahanglan diha sa tanang lebel ug tanang dapit. Ug ang Ginoo mibutang ninyo diha sa inyong piho nga bahin sa ubasan sa pagdala sa Iyang gugma ug kahupayan ngadto sa Iyang mga anak. Matag buhat sa kamabination mahinungdanon; matag andam nga kasingkasing ug kamot mahinungdanon; matag pagpahayag sa gugma ug pailob mahinungdanon. Unsay inyong gibuhat mahinungdanon gayod.