Husto ang Akong Inahan

Sa dihang 13 anyos pa ko, ang akong inahan grabe nga nasakit. Nahiling siya nga adunay grabe nga kanser ug gitagalan og unom ka bulan nga mabuhi. Ang akong amahan dili gusto nga mahibalo kaming mga anak, mao nga wala ko makahibalo kon unsa na kagrabe ang iyang sakit hangtod nga siya adunay usa na lang ka bulan ang nahibilin aron mabuhi.

Dili pa ko ingon ka hingkod kaniadto aron makasabot sa unsay nanghitabo, ug nagpanagana ko nga mobisita niya sa ospital. Ang akong bishop miawhag nako nga dad-an siya sa sakramento, apan dili ko ganahan. Naghunahuna ko nga sa dili madugay mopauli ra siya. Apan ang akong bishop miinsister tungod kay kahibalo siya nga gamay na lang ang nahibilin niya nga panahon.

Sa dihang miadto ko, ang akong bishop mipanalangin sa sakramento, ug ako kining gipasa ngadto sa akong inahan. Luya kaayo siya nga dili siya makasulti kaayo. Apan giingnan ko niya, “Ayaw pagbuhi sa gunitanan nga puthaw” (tan-awa sa 1 Nephi 8:19–20, 24, 30).

Ang akong inahan wala madugay namatay, apan nahinumdoman nako ang iyang panamilit nga mga pulong ngari nako. Ang pagsunod sa iyang tambag nakapanalangin sa akong kinabuhi.

Sa wala madugay, mitanyag ko nga motabang sa duha ka sakop sa usa ka pamilya nga nagpuyo sa duol kinsa nagkalisod. Gidawat nila ang akong tabang ug nahimong kabahin sa akong pamilya.

Pero, wala koy kakuhaan sa pinansiyal nga makasuporta namo. Mao nga kinahanglan ko nga mas magkugi, nagsuporta sa tulo ka tawo imbes sa usa ra. Dako kaayo kadto nga kausaban sa estilo sa kinabuhi.

Aron makasugakod niana nga kausaban, nasayod ko nga kinahanglan nakong sundon ang mga pulong sa akong inahan ug higpit nga mokupot sa gunitanan nga puthaw. Ang pagkupot sa gunitanan nga puthaw naglakip sa paghinumdom sa Manluluwas ug sa pagtuon sa pulong sa Dios. Kinahanglan ko nga mopakita og maayo nga ehemplo, mas makig-istorya ngadto sa Dios, ug magtuon sa mga kasulatan matag adlaw. Mao nga, misugod kami sa pagtuon sa kasulatan nga manag-uban. Wala madugay, ang Espiritu nahimong abunda diha sa among panimalay.

Ang labing nindot ug talagsaong mga higayon sa akong kinabuhi miabot gumikan sa pagkupot sa gunitanan nga puthaw. Nakat-onan usab nako nga “samtang kamo padayong magkupot sa gunitanan nga puthaw, kamo maglakaw nga nagkinuptanay og kamot ni Jesukristo. Siya mogiya kaninyo, ug Siya magtudlo kaninyo.”