Ehemplo, mga Panalangin, ug usa ka Maanindot nga Kinabuhi

Atol sa bag-ohay lang nga multistake nga sayaw nga akong gitambongan isip chaperone, nakadesisyon ko nga makighigala sa laing chaperone. Akong nahibaloan nga nagkahimamat na diay kami og kadali kaniadto, nga siya nagpuyo sa laing stake, ug kami adunay komon nga mga higala. Nahibaloan usab nako nga gikan siya sa Rochester, New York, USA, diin ang iyang pamilya nagpuyo na didto sa daghang katuigan.

Gisultihan nako ang akong bag-ong higala, si Sara, nga ang akong mama gipanganak ug nagdako sa Rochester. Si Sara nangutana sa apelyido sa pagkadalaga sa akong inahan. Miinsister ko nga imposible nga kaila siya niya. Ang akong inahan dili miyembro sa Simbahan nianang higayona.

Gipasabot nako nga si Mama nagpasakop sa Simbahan sa iyang unang tuig samtang nag-eskwela sa kolehiyo sa Missouri. Sa high school pa, siya adunay usa ka magtutudlo sa high school nga iyang gitahod. Kanunay siya nga mabination sa akong inahan ug usa ka maayong ehemplo sa gugma sa Manluluwas.

Nahibaloan sa akong inahan nga siya miyembro sa Ang Simbahan ni Jesukristo sa mga Santos sa Ulahing mga Adlaw. Sa iyang pagbiya aron magkolehiyo, gusto sa akong inahan nga makakat-on pa og dugang mahitungod sa iyang relihiyon.

“Ang akong papa English teacher sa Rochester sulod sa 35 ka tuig,” si Sara miingon. “Unsa nga high school nag-eskwela ang imong mama?”

Giteksan dayon nako ang akong mama, nangutana kon unsa nga eskwelahan siya nag-eskwela ug ang ngalan sa magtutudlo nga nakaimpluwensya niya sa pagpangita sa Simbahan.

“Eastridge High, David Anderson,” siya mitubag.

Ang amahan ni Sara mao si David Anderson!

Nalingaw kami sa espesyal nga gutlo samtang ang akong inahan mipasabot sa nindot nga mga butang nga nahitabo sa iyang kinabuhi sukad sa iyang pagpasakop sa Simbahan—kaminyoon sa templo, misyonaryo nga pagserbisyo sa upat sa walo niya ka anak ug daghan sa iyang mga apo, ug daghan pang lain nga mga panalangin.

Sa dihang gipakigbahin ni Sara ang istorya sa akong inahan ngadto sa iyang amahan pagkasunod adlaw, ang iyang amahan nakahilak sa pasalamat. Nagpasakop ang iyang amahan sa Simbahan human naminyo ug gusto nga moserbisyo og misyon, apan usa siya ka biyudo nga duha na ka asawa ang namatay. Ang pagkadungog sa istorya sa akong inahan nakatabang niya nga mobati nga siya aduna diay nindot nga kinabuhi.

Ang akong pamilya mapasalamaton ni Mr. Anderson, ang magtutudlo sa high school nga nagtuman sa pakigsaad kansang ehemplo nakadasig sa 18 anyos nga babaye sa pagpangita sa kamatuoran ug nakapausab sa iyang kinabuhi ug sa kinabuhi sa mga henerasyon nga moabot.

Pinaagi sa ebanghelyo ni Jesukristo, ang kinabuhi mahimong maanindot alang sa tanan kanila nga andam mosunod sa Manluluwas ug motahod sa ilang mga pakigsaad.