“Pagtudlo sa Kamatuoran, Pag-usab sa mga Kinabuhi,” Liahona, Okt. 2025.
Mga Hulagway sa Pagtuo
Pagtudlo sa Kamatuoran, Pag-usab sa mga Kinabuhi
Ang ebanghelyo ni Jesukristo tinuod. Ang Iyang doktrina nakapausab sa kinabuhi sa katawhan. Ug mao kana ang nakapausab sa kinabuhi sa batan-ong mga tawo sa Kenya.
Mga litrato pinaagi ni Leslie Nilsson
Nagserbisyo ko isip presidente sa gamay nga branch sa Simbahan nga naorganisar pagka-Septiyembre 2024. Mga duha sa tulo ka bahin sa among mga miyembro mga batan-on. Manimba sila matag semana, kadaghanan kanila mobiyahe pa pipila ka kilometro. Ang uban maglakaw ra, ang uban magbisikleta.
Ang mga ginikanan niini nga mga batan-on dili mga miyembro sa Simbahan, apan gitugotan nila ang ilang mga anak nga mabunyagan. Bag-o lang, nahimamat nako ang usa sa mga ginikanan. Gusto siyang makahibalo pa og dugang mahitungod sa Simbahan nga gitambongan sa iyang anak.
“Nakakita ko og daghang kausaban sa akong anak,” miingon siya. Lahi na kaayo siya nga tawo. Masulondon siya ug buotan diha sa panimalay. Gusto kong makahibalo ngano.”
Kini nga amahan miadto sa simbahan ug nakita niya mismo nga ang mga pagtulun-an sa Manluluwas ug ang gipahiuli nga ebanghelyo mao ang nag-usab sa kinaiya sa iyang anak. “Karon nasayod na ko nga ang giadtoan sa akong anak usa ka maanindot nga dapit,” miingon siya human niana. “Akong tugotan ang uban usab sa pag-adto.”
Sa akong branch sa milabayng tuig, kapin sa 30 ka batan-on ang nabunyagan. Sa mosunod nga duha ngadto sa tulo ka tuig, makita unya namo ang daghang misyonaryo nga magserbisyo gikan sa branch. Malipayon kami alang kanila. Ang among buhat dinhi mao ang paghatag og mga oportunidad nga ilang mapalawman ang ilang pagkakabig ngadto kang Jesukristo ug sa Iyang gipahiuli nga ebanghelyo. Mao nga, among giseguro nga ma-enrol namo sila sa mga programa sa Simbahan sama sa seminary ug institute aron mas maandam sila pag-ayo.
“Adunay Daghan nga Makita nga Positibo”
Dihang nahuman ko sa akong misyon, adunay 12 lamang ka branch sa tibuok Kenya. Karon duna na kami kapin sa 100 ka yunit. Makatingala ang pagtan-aw sa paagi sa pagtubo sa Simbahan, ilabi na sa kasadpan sa Kenya.
Usa sa mga rason nganong ang akong branch dunay labihan ka daghang mga batan-on mao nga ang misyonaryo nga buhat tali sa kabatan-onan epektibo kaayo dinhi. Kadaghanan kanila parehas ra og eskwelahan, ug modapit sila sa usag usa ngadto sa simbahan. Nakamugna kini og dako kaayo nga pagsalig.
Lahi nga butang nga nakatampo sa paglambo sa Kenya mao ang mga nauli na nga mga misyonaryo. Talagsaon sila nga kalig-on sa Simbahan. Dihang nauli sila gikan sa ilang mga misyon, nauli sila dala ang pagtuo kang Jesukristo ug usa ka pagpamatuod sa Iyang gipahiuli nga ebanghelyo. Nakapalambo sila og mga kahanas sa pagpangulo. Nagpabilin sila sa Simbahan. Nakigminyo sila sa kaubang mga miyembro sa Simbahan. Ang ilang mga anak nagtubo sa Simbahan. Ug ang ilang mga anak nahimong kalig-on sa Simbahan.
Usa pa ka hinungdan mao ang pioneer nga mga miyembro nga nagpuyo sa Nairobi niadtong mga 1990 ug sa sayong bahin sa 2000. Karon mga retirado na sila ug nanguli sa ilang mga balangay sa rural nga Kenya. Gidala nila ang ilang mga pagpamatuod, gisaligan sila, ug gipakigbahin nila ang ebanghelyo ngadto sa mga kaliwat ug mga higala.
Ang kinabuhi sa usa ka miyembro sa Simbahan niadtong mga 1990, hinoon, lisod gayod didto sa Nairobi tungod kay dunay daghang mga artikulo sa mantalaan nga batok sa Simbahan.
Nalipay ko nga ang mga miyembro sa Simbahan niadto nga panahon mga matinud-anon ug lig-on. Nalahutay nila ang labihan ka daghan nga butang. Apan daghan sa mga Santos maoy mga modelo bisan asa sila moadto ug sa bisan unsay ilang buhaton. Mao kana ang nakahimo og dako nga kalainan.
“Usa ka Lahi nga Binuhat”
Atol sa akong pagmisyon, duna koy oportunidad nga makatudlo sa ebanghelyo ni Jesukristo ngadto sa akong mga igsoong lalaki ug mga igsoong babaye sa Kenya, ug Uganda. Ang labawng importante, nakaangkon ko og pagpamatuod bahin ni Jesukristo. Dihang nauli ko niadtong 1997, lahi na ako nga binuhat (tan-awa sa 2 Mga Taga-Corinto 5:17).
Duna koy oportunidad nga moserbisyo nga may mga kompanyon gikan sa managlahing mga nasod. Kadaghanan nila mosulti nako nga mobalik sila sa pag-eskwela sa kolehiyo human sa ilang mga misyon. Akong nakita ang akong kaugalingon nga gustong mohimo sa sama nga butang.
Ang akong mga kompanyon naghatag kanako og dako nga paglaom, apan ang pagbalik ngadto sa akong kabos nga kinabuhi ug panimalay human sa akong misyon makapakurat [culture shock]. Hinoon, nasayod ko nga tabangan ako sa Langitnong Amahan, mao nga nakapadayon ra ko sa pagpakabuhi nianang higayona uban sa dako nga pagtuo ug paglaom.
Gamit ang mga pag-loan gikan sa Church Educational System nga gihatag sa mga nauli nang mga misyonaryo, nakaeswela ko. Nakaangkon ko sa akong diploma sa medikal laboratory, nakagradwar pagka-2002. Sukad niadto, nakabaton ko sa panalangin nga makaserbisyo og daghang calling sa Simbahan. Dihang miadto ko sa kasadpang Kenya, ubos sa pagpangulo sa area nagsugod kami og usa ka grupo sa Simbahan sa Kakamega. Kadto nga grupo milambo nga nahimong branch nga karon nabahin na ngadto sa duha ka branch.
“Nahibalo sila nga ang simbahan mao ang dangpanan diin sila makadungog sa ebanghelyo ni Jesukristo,” miingon si Jastus sa mga batan-on nga naagni sa Simbahan.
Mga Kahoy ug usa Ka Tolda
Sa kasamtangan maghimo mi sa mga miting ilawom sa usa ka tolda nga makalingkod ang mga 100 ka tawo. Among ablihan ang pikas kilid aron magamit kon mosubra ang motambong. Usahay kon mosobra ang mga manimba, ang mga tawo manglingkod sa duol nga kakahoyan.
Sa pagkakaron ang panagtigom alang sa sakramento ra ang among ipahigayon. Pipila sa among mga miyembro sa branch maglakaw og duha ka oras padulong ug pauli gikan sa simbahan aron motambong, moambit sa sakramento, ug maglingaw sa usag usa.
Ang mensahe nga makapainteres sa among batan-ong mga miyembro mao ang pagbati nga nahisakop kon moadto sila sa simbahan. Nahibalo sila nga ang simbahan usa ka dangpanan diin sila makadungog sa ebanghelyo ni Jesukristo ug mamahimong buotan nga mga lalaki ug mga babaye. Nasayod sila nga ang mga tawo nagmahunahunaon kanila. Nasayod sila nga ang simbahan usa ka dapit diin sila makakat-on og kamatuoran, mga hiyas, kamatinuoron, integridad, ug paningkamot. Nasayod sila nga ang katawhan sa simbahan modasig kanila sa pagtuon og maayo sa eskwelahan.
Sa batan-on pa ko, usa ka higala midapit kanako ngadto sa Ang Simbahan ni Jesukristo sa mga Santos sa Ulahing mga Adlaw. Batan-on pa lang ko nga walay bisan unsa, apan ang akong pagtuo kang Jesukristo ug ang akong pagpamatuod sa Iyang gipahiuli nga ebanghelyo nahimo nga lig-on. Ang mga miyembro sa Simbahan misalig kanako ug migahin sa ilang panahon ngari kanako. Napanalanginan ako nga makahimo sa sama nga butang ngadto sa mga batan-on karon.
Ang ebanghelyo ni Jesukristo tinuod. Ang Iyang doktrina nakapausab sa kinabuhi sa katawhan. Ug mao kana ang nakapausab sa kinabuhi sa batan-ong mga tawo sa Kenya.