Nganong Wala man Siya Moayo Kaniya?

Sa pipila ka punto sa gamayng bata pa ang among anak nga babaye, si Jilly, wala siya naglambo sama sa ubang batang iyang kaedad ug kasagaran ingon og naglisod siya sa iyang palibot. Human sa daghang pag-ampo ug sunod-sunod nga balaanong gipahigayon nga mga kalihokan, among nahibaloan nga siya adunay problema sa pandungog.

Sa edad nga 18 ka bulan, si Jilly naoperahan nga nakapabalik sa iyang pandungog. Usa kini ka milagroso nga higayon, nagtan-aw niya nga naglambo samtang misugod siya sa pakig-istorya namo. Apan pipila ka tuig ang milabay, bag-ong mga hagit ang miabot. Sa makausa pa, nagtinguha kami og mga tubag.

Sama kaniadto, pinaagi sa sunod-sunod nga mga milagro, among nahibaloan nga si Jilly adunay mitumaw nga problema sa pagproseso sa pandungog, nagpasabot nga ang iyang utok dili makahubad sa mga senyales sa tunog sa tukmang paagi. Nakigtambabayong kami sa mga therapist ug sa mga doktor aron matabangan siya sa pagnabigar sa kalibotan sumala sa iyang nasinati niini.

Nagtuo ko sa tibuok nakong kasingkasing nga kon ako mag-ampo ug magpabiling matinud-anon, ang Dios moayo sa akong anak nga babaye. Nasayod ko nga Siya adunay gahom sa paghimo niini, busa nganong wala man Siya moayo kaniya?

Nagsagubang niining tanan, mibati ko nga sama nilang Maria ug Marta sa Bag-ong Tugon. Nangandoy sila og pagkaayo alang sa ilang igsoon nga lalaki, si Lazaro, apan ang Dios naghunahuna og mas dakong milagro. Pinaagi sa paghulat nga moabot sa ilang panimalay, si Jesus mitugot nga ang ilang pagtuo motubo sa paagi nga maghatag og himaya sa Amahan ug sa Anak ug mopunting ngadto sa potensiyal nga Ilang gitagana alang sa atong kinabuhi.

“Ginoo, kon dinhi ka pa lamang, dili unta mamatay ang akong igsoon,” miingon si Maria ngadto ni Jesus sa Iyang pag-abot (Juan 11:32). Unya Iya dayong gibuhi si Lazaro gikan sa pagkamatay, hingpit nga naayo.

Ang akong tubag, sama nilang Maria ug Marta, miabot sa wala damha nga paagi. Usa ka buntag, kining hilom nga hunahuna misantop kanako: “Ang imong anak nga babaye wala magkinahanglan nga ayohon; siya nagkinahanglan og gugma ug pagdawat.”

Sa sinugdanan, naglisod ko sa pagdawat niini nga tubag. Gusto ko nga si Jilly makalingkawas sa mga kalisdanan. Apan samtang akong giablihan ang akong kasingkasing, akong naamgohan nga ang plano sa Dios alang sa among anak nga babaye mas nindot kaysa akong gihunahuna. Siya nasayod nga kini nga kasinatian makatabang sa among pamilya nga motubo diha sa pagtuo ug pagsalig.

Dili gayod sayon nga magtan-aw ni Jilly nga nag-atubang sa iyang mga hagit. Apan pinaagi niini nga kasinatian, akong nakat-onan nga ang tukmang panahon ug mga plano sa Dios hingpit kanunay. Siya nasayod kon kanus-a Siya maanaa alang nato. Ang buhaton lamang nato mao ang pagsalig nga anaa Siya kanunay.