“Pagkat-on og Daghan gikan sa Doktrina ug mga Pakigsaad 109,” Liahona, Oktubre 2025.
Dali, Sunod Kanako
Pagkat-on og Daghan gikan sa Doktrina ug mga Pakigsaad 109
Mga ideya sa pagtuon sa pagpahinungod nga pag-ampo sa Kirtland Temple
Detalye gikan sa Kirtland Temple, ni Al Rounds
Ang mga lider sa Simbahan sa kasagaran maghisgot mahitungod sa gahom nga madawat niadtong moserbisyo ug mosimba sa templo. Usahay ingon og dili kaayo nako kana masabtan o lisod kab-uton. Apan daghang kasulatan nagtudlo nga ang mga miyembro sa Simbahan “matugahan sa gahom gikan sa kahitas-an” (tan-awa sa Lucas 24:49; Doktrina ug mga Pakigsaad 38:32; 95:8; 105:11; 109:35).
Si Presidente Russel M. Nelsyon mitudlo nga ang Doktrina ug mga Pakigsaad 109 makatudlo kanato mahitungod niini nga gahom: Ang “pagpahinungod nga pag-ampo ni Joseph Smith sa Kirtland Temple usa ka panudlo kon sa unsa nga paagi nga ang templo espirituwal nga makahatag kaninyo ug kanako og gahom aron makaatubang sa mga hagit sa kinabuhi niining kataposang mga adlaw. Awhagon ko kamo sa pagtuon niana nga pag-ampo.”
Mga tema sa Doktrina ug mga Pakigsaad 109
Ang pag-ila sa mga tema sa pagpahinungod nga pag-ampo sa Kirtland Temple makapalambo sa inyong pagtuon. Aniay pipila ka pinili nga mga tema nga may kalabotan sa pagpangita og gahom pinaagi sa pagsimba sa templo. Samtang ikaw magtuon, makakita ka og ubang mga tema ug mga baroganan.
Pagpadayag ug Instruksiyon (mga bersikulo 8, 14)
Makaadto kita sa templo aron makadawat og pagpadayag, katin-awan, ug kaalam nga makatabang kanato sa pagsagubang sa mga hagit sa kinabuhi.
Pagbalaan ug Kabalaan (mga bersikulo 12, 20)
Ang pagsimba sa balay sa Ginoo maghatag kanato og usa ka dapit nga kaadtoan nga gibalaan ug balaan, diin walay hugaw nga butang ang makasulod.
Panaghiusa ug Koneksiyon [Labing suod nga kabanay] (mga bersikulo 6, 17–19, 24, 67, 72)
Samtang moapil kita sa mga ordinansa sa templo, mahiusa kita isip mga anak sa pakigsaad ug mas maandam alang sa pagbalik sa Manluluwas.
Balaanong Gahom ug Panalipod (mga bersikulo 22, 26)
Ang mga hagit sa pagpakabuhi sa kataposang mga adlaw malisod. Ang pagsimba sa templo ug pagtuman sa atong mga pakigsaad maghatag kanato og panalipod gikan sa daotan.
Ang Himaya sa Dios Mapakita (mga bersikulo 5, 12, 37, 77)
Ang balay sa Ginoo mao ang dapit diin ikapakita sa Dios ang Iyang presensya ug Iyang himaya. Kon kita mosimba didto, atong madawat ang Iyang kahayag ug himaya dinhi sa atong kinabuhi.
Kamaya ug Kalinaw (mga bersikulo 39, 76, 80)
Kon kita mohimo ug motuman sa mga pakigsaad, nag-abli kita og paagi aron ang Dios ,mopanalangin kanato og kalinaw, kamaya, ug pagbag-o, nga maghatag kanato og gahom sa pagbuntog sa mga pagsulay niining ulahing mga adlaw.
Mga Saad ug mga Pribilihiyo
Ang pagtuon sa Doktrina ug mga Pakigsaad 109 makapalambo sa atong panabot sa mga saad ug mga panalangin nga maangkon pinaagi sa pagsimba sa balay sa Ginoo. Sama sa gitudlo ni Presidente Nelson, “Ang pagsabot sa espirituwal nga mga pribilihiyo nga nahimong posible sa templo importante sa matag usa kanato karon.”