Tema Karong Bulana: Kasuod ug Koneksyon

Kumusta, mga higala.

Mga lima ka tuig ang milabay, samtang ang YA Matag Semana bag-o pa lang gipagawas isip ang digital nga magazine sa Simbahan alang sa mga young adult, kami nga mga kawani wala makaamgo kon unsa ka daghan ang among makat-onan bahin sa daghang lainlaing butang. Kaming tanan naggamit sa mga hilisgotan sa ebanghelyo gikan sa basehan nga punto sa among kaugalingong mga panglantaw ug mga kasinatian, ug pipila ka hilisgotan nga among gisulat nga mas personal kanamo kaysa uban.

Usa ka partikular nga hilisgotan nga mas daghan namong nakat-onan sulod sa katuigan—pinaagi sa dili maihap nga mga panag-istoryahanay uban sa mga young adult, mga therapist, mga lider sa Simbahan, mga consultant, ug sa usag usa—mao ang importansya sa koneksyon.

Tingali dili kana mao ang inyong gilaoman.

Aw, gibati namo nga morag nahibaloan namo og gamay ang mahitungod kon unsa ang giagian sa mga young adult (sama sa kadaghanan sa atong mga sakop sa kawani, sa pagkatinuod, mga young adult mismo). Kita nag-atubang og daw imposible nga mga pagpili kada adlaw mahitungod sa pagpakig-date, pag-eskwela, mga karera, mga misyon, unsaon sa paggahin sa atong panahon, unsaon sa pagbuntog sa mga tentasyon sa kalibotan, ug unsaon nga mahimong mga tawo nga gusto sa Langitnong Amahan nga kita mamahimo. Nabalaka ta mahitungod sa mga pakigbisog o mga gawi nga gibati nato nga dili nato malikayan. Labaw sa tanan, morag daghan kanato ang naggahin og daghang panahon sa pagbati nga mag-inusara.

Ang sala nagpalain kanato. Ang kabalaka sa katilingban o uban pang mga hagit sa kahimsog sa pangisip nagpalain kanato. Ang paggamit sa pornograpiya nagpalain kanato. Ang pagkinabuhi niining digital nga kalibotan nagpalain kanato (tungod kay magmatinud-anon kita, ang mga virtual nga mga higala dili sama sa tinuod nga kinabuhi)

Karong bulana, makit-an ninyo ang mga istorya gikan sa mga young adult nga mibati sa panginahanglan alang sa dugang nga koneksyon ug kasuod sa ilang kinabuhi. Ang pipila ka istorya naglakip sa:

• Tambag gikan ni Elder Jaggi sa Seventy mahitungod kon unsaon sa pagtukod og Kristohanong koneksyon sa inyong mga relasyon

• Usa ka young adult gikan sa Brazil nga mipakigbahin sa mga gawi nga nakatabang niya nga mosunod sa balaod sa kaputli

• Tulo ka ideya kon unsaon nimo nga makahimo og mas lawon nga mga koneksyon diha sa elders korum

• Usa ka young adult gikan sa Pilipinas kinsaa walay gibati nga “kaibog” diha sa una niyang pagpakig-date sa lalaki nga sa kadugayan iyang naminyoan—ug mao hinuon ang iyang gibati

• Usa ka artikulo nga sinulat sa kawani nga dunay lima ka pangutana nga ipangutana sa imong kaugalingon kon nakigbisog ka sa pornograpiya apan gusto nga makig-date

Kita usab adunay mga artikulo nga kabahin sa atong padayon nga mga serye:

• Gihatagan og Dakong Importansiya sa Debosyonal: Si Elder Andersen naghatag og upat ka piraso sa tambag alang sa pagpangita sa sakto nga tawo nga minyoan

• Mga Kahanas sa Kinabuhi: Mga baroganan sa ebanghelyo nga makatabang sa imong propesyonal nga kinabuhi

• Paggamit sa Doktrina ug mga Pakigsaad sa Inyong Kinabuhi: Suporta alang sa inyong Dali, Sunod Kanako nga pagtuon uban ang istorya mahitungod ni Thomas B. Marsh ug unsaon nato nga makakat-on nga makita ang uban nga dunay dugang nga empatiya ug gugmang putli

• Ilabi na sa mga Bag-ong Kinasal: Unsaon ninyo nga makahimo og luna sa inyong kaminyoon alang sa inyong personal nga mga kahuyang, bisan sa inyong pagtinabangay aron molambo

Pinaagi sa pagsalig diha ni Jesukristo, kita gihatagan og kusog sa pagbuntog sa atong mga kahuyang. Ug kon kita makonektar ngadto sa uban, kita usab makahibalo nga kita wala mag-inusara sa atong mga hagit. Kita masuportahan sa atong mga paningkamot nga mahimong mas maayong mga disipulo ni Kristo. Ug kita mahimong andam sa pagtagamtam sa lainlaing matang sa kasuod sa tibuok natong kinabuhi.

Uban sa gugma ug daghang paglaom,

Kawani sa YA Matag Semana