Gikan sa YA Matag Semana
3 ka Gamhanang mga Gawi Nga Makatabang Nako aron Masunod ang Balaod sa Kaputli
Ang tagsulat nagpuyo sa Formosa, Brazil.
Ang kaputli daw dili makab-ot. Apan si Jesukristo mitabang kanako nga mahangop kini sa hingpit.
Ang pagsunod sa balaod sa kaputli dili kanunayng sayon alang kanako.
Dihang mipasakop ko sa Ang Simbahan ni Jesukristo sa mga Santos sa Ulahing mga Adlaw pagka-15, usa ko sa pipila ra ka miyembro sa akong eskwelahan, mao nga ang akong mga sumbanan kalabot sa pagpakig-date kasagaran masaypan ug bugal-bugalan.
Usa sa akong labing dako nga mga hagit mao ang pagpahiuyon sa akong sekswal nga pagsabot ngadto sa balaod sa kaputli. Usa ko ka bisexual, ug dihang nabunyagan ko, nanlimbasog ko kon unsaon nako nga makasunod niini nga balaod, ilabi na dihang ang kadaghanan sa akong mga higala dili interesado sa pagsunod niini uban kanako.
Samtang nagdako ko, nakakaplag ko og tulo ka gamhanang mga butang nga nakatabang nako nga makatuman sa akong mga pakigsaad:
1. Pagprayoridad sa Templo
Ang pagtambong sa templo nagtabang nako nga magpabiling masaligon sa balaod sa kaputli. Naningkamot ko nga makaadto kanunay kutob sa mahimo. Usa ka mahagitong semana, misulod ko sa lawak sa celestial nga mibati nga nabug-atan sa akong mga sayop. Sa pagkakita sa akong repleksiyon diha sa samin, gibati nako ang kalinaw ug nakahinumdom kon unsa ka dako ang paghigugma sa Manluluwas kanako.
Sama sa gipahinumdom ni Presidente Russel M. Nelson: “Walay laing mas makatabang kaninyo sa paggunit sa gunitanan nga puthaw kaysa pagsimba sa templo kanunay kon gitugot sa inyong mga sirkumstansiya. Walay laing mas makapanalipod kaninyo samtang inyong masugatan ang mga gabon sa kangitngit sa kalibotan. Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga mas makasabot sa talagsaong plano sa Dios.”
Sama sa gisaad ni Presidente Nelson, kon akong himoong prayoridad ang templo, mapahinumdoman ko sa sagradong mga pakigsaad nga akong gihimo sa akong Langitnong Amahan. Ang pag-adto sa balay sa Ginoo nagpalig-on sa akong determinasyon sa pagsunod sa Iyang mga sugo ug nagtabang kanako nga mabati ang Iyang gugma.
2. Pag-apil sa Simbahan
Dihang una kong mitambong sa simbahan, kasagaran moadto ko nga mag-inusara, isip ako lang ang miyembro sa akong pamilya. Usahay, nakigbisog ko nga mobati nga nahisakop, diin makadugang sa mga tentasyon sa paghimo og koneksiyon diha sa sayop nga mga dapit. Akong naamgohan ang usa ka paagi nga mahimo nakong mabuntog kini mao ang pag-apil gayod sa akong kongregasyon. Sama sa gitudlo sa Ginoo kanato diha sa Doktrina ug mga Pakigsaad 58:27, kita kinahanglang “matinguhaon nga moapil sa maayo nga katuyoan, ug mobuhat og daghang butang pinaagi sa [atong] kaugalingong gawasnon nga kabubut-on.”
Nagsugod ko pinaagi sa pagboluntaryo sa pagtabang sa paglimpyo sa chapel. Nagsugod ko sa pagtambong sa tanang kalihokan sa ward ug nagtanyag og tabang bisan asa sa akong mahimo. Sa hinay-hinay, nakatukod ko og lawom nga mga koneksiyon ngadto sa mga miyembro sa akong ward. Usa ka pamilya nagsugod sa pagdapit kanako sa ilang mga home evening, mga panihapon sa Dominggo, ug gani aron lang mag-istambay ug magdula. Ang akong pamilya ug ako nahimong ilang maayo nga mga higala, ug kini usa ka matahom nga kasinatian alang kanamong tanan.
Pinaagi sa hingpit nga pag-apil sa akong kaugalingon sa akong ward, nakakita ko og mga oportunidad nga makakonektar ngadto sa uban nga nagpakigbahin og managsama og mga mithi ug mga sumbanan, lakip ang balaod sa kaputli. Ang akong pamilya sa ward nahimong usa ka dakong tinubdan sa suporta sa pagtabang nako nga magpabiling matinud-anon ug lig-on.
3. Paghangop sa Paghinulsol
Ang paghinulsol dili usa ka butang nga kahadlokan—usa kini ka panalangin, usa ka gasa gikan sa atong Langitnong Amahan ug ni Jesukristo.
Sa matag higayon nga ako mamalandong sa gibuhat ni Jesukristo alang kanako, ako mapuno sa pasalamat. Gipahinumdoman nako ang akong kaugalingon nga ang Pag-ula ni Jesukristo naglangkob sa tanan nakong mga kahuyang, mga sayop, ug mga sala ug kana “pinaagi sa grasya kami maluwas, human sa tanan nga among mabuhat” (2 Nephi 25:23).
Sama sa gitudlo ni Sister Kristin M. Yee, Ikaduhang Magtatambag sa Kinatibuk-ang Kapangulohan sa Relief Society: “Kon ikaw nakigbisog sa usa ka sitwasyon nga sa imong hunahuna imo na unta nga nabuntog karon, ayaw pagbiya. Pagmapailubon sa imong kaugalingon, tumana ang imong mga pakigsaad, paghinulsol kanunay, pangayoa ang tabang sa imong mga lider kon gikinahanglan, ug adto sa balay sa Ginoo sa kanunay kon mahimo nimo. … Dili Niya talikdan ang Iyang relasyon sa pakigsaad uban kanimo.”
Ayaw kahadlok sa pagpakig-istorya sa imong bishop o mga lider sa pagkapari mahitungod sa bisan unsa nga nakapabug-at sa imong kasingkasing, ilabi na kalabot sa balaod sa kaputli. Gusto silang motabang nimo sa paghinulsol ug pagpangita og pagkaayo pinaagi sa Pag-ula ni Jesukristo. Ug ayaw kalimti ang gahom sa adlaw-adlaw nga paghinulsol. Bisan og gikinahanglan ang kaisog, takos gayod kini kanunay. Gibati nako pag-ayo ang Espiritu diha sa akong kinabuhi ug napahinumdoman ko sa gugma ni Kristo alang kanako sa matag higayon nga maghinulsol ko.
Pagsunod sa Balaod sa Kaputli Usa ka Padayon nga Proseso
Hinumdomi nga ang pagtuman sa atong mga pakigsaad, lakip ang pagsunod sa balaod sa kaputli, usa ka padayon nga proseso nga atong masinati sa tibuok natong kinabuhi ug dili usa ka listahan. Bisan kon imong ilakip kining tulo ka gamhanang mga gawi, ang pagsunod sa balaod sa kaputli usa ka malungtarong paningkamot.
Nag-atubang man kita og mga hagit uban sa mga tentasyon o mga pagbati sa kakulang, ang Langitnong Amahan nahigugma sa matag usa kanato. Ang balaod sa kaputli usa ka balaan nga balaod, ug ang pagsunod niini magdala og kalinaw, kalipay, ug espirituhanong kalig-on. Nasayod ko nga pinaagi ni Jesukristo, atong makaplagan ang pagkaayo, kahupayan, ug gugma nga atong gikinahanglan.
Ako mopamatuod nga bisan unsa pa ang inyong mga kahimtang, ang pagtuman sa balaod sa kaputli takos gayod kini!