Gikan sa YA Matag Semana
Angay Ka bang Makig-date Bisan og Nakigbisog Ka sa Pornograpiya? 5 ka Pangutana nga Unang Ipangutana sa Imong Kaugalingon
Sa dili pa modayon og seryoso nga relasyon sa pakig-date, paggahin og panahon alang sa tinud-anay nga pagpamalandong sa kaugalingon.
Matag adlaw, makadungog kita gikan sa mga young adult kinsa nakigbisog sa paggamit sa pornograpiya. Nagtinguha sila og makahuloganong mga relasyon nga moresulta ngadto sa mahangtorong mga kaminyoon apan naghunahuna kon kana posible ba bisan ang pornograpiya nagpadayon nga usa ka hagit.
Kon usahay gibati nimo nga dili takos sa gugma o nagduhaduha sa imong abilidad nga mahimong usa ka talagsaong mahangtorong kauban, mopasalig kami kanimo: Posible kini, bisan nakigbisog sa pornograpiya. Sa unsang paagi? Tungod sa atong Manluluwas, si Jesukristo.
Si Elder Patrick Kearon sa Korum sa Napulog Duha ka Apostoles bag-o lang mitambag niadtong nakigbisog sa pornograpiya: “Ang akong labing dakong paglaom alang kaninyo nga nakigbatok gihapon, nga ako nasayod nga kamo makahimo, nga kamo makadawat sa labing dako sa tanang mga gasa sa Dios, ang kinabuhing dayon. Kini makaya kaayo ninyo. Ang Iyang plano mao ang pagdala kaninyo balik sa panimalay, dili ang pagpagawas kaninyo, ug buhaton Niya ang tanang posible nga mga paagi aron makabalik kamo.”
Aron tabangan ka nga mahibaloan kon andam na ba ka alang sa usa ka relasyon padulong sa mahangtorong kaminyoon, ania ang lima ka pangutana nga ipangutana sa imong kaugalingon:
1. Nahibaloan ba Nimo ang Lintunganay nga Hinungdan Luyo sa Imong Paggamit og Pornograpiya?
Ang paggamit sa pornograpiya kasagaran mas lisod kaysa sekswal nga isyu—ang naandang gawi mahimong usa ka mekanismo sa pagsagubang sa kalaay, kabalaka, depresyon, o emosyonal nga mga pakigbisog. Sama sa pagpatuyang sa pag-scroll o naghinobra nga pagtan-aw og TV, ang pornograpiya nagsilbi nga pangtabon sa mas lawom nga emosyonal nga mga samad. Ang pagpangayo og tabang sa imong bishop, sa usa ka propesyonal alang sa kahimsog sa pangisip, o sa suporta nga mga grupo (sama sa 12 ka lakang nga mga miting aron maulian sa pagkaadik nga programa sa Simbahan) makatabang nimo nga mailhan ang mga hinungdan ug makaugmad og mas maayo nga mga estratehiya sa pagsagubang.
Sama sa gidugang ni Elder Kearon, “Ang tabang mahimong makaplagan sa mga tawo sa imong palibot, ug ang tabang moabot gikan sa kahitas-an, ug gikinahanglan nato ang duha.” Ang pagdangop sa espirituhanon ug praktikal nga mga tinubdan sa suporta makatabang nimo sa pag-establisar og mas maayo nga mga gawi, makapangita og sistema sa suporta aron motabang nimo nga mohimo og mas maayo nga mga pagpili, ug makasabot ug makaakses sa gahom sa Manluluwas sa pag-ayo sa imong mga samad sa sulod.
2. Tinud-anay Ka bang Naningkamot sa Pagbuntog sa Imong Paggamit sa Pornograpiya?
Nasayod kita nga gikondenar sa Simbahan ang pornograpiya, ug daghan sa mga young adult kinsa nakigbisog sa pornograpiya nanghinaot nga unta wala nila buhata. Pamalandongi kon tinud-anay ba gayod kang nagtinguha nga makunhoran ang kasubsob niini ug pulihan ang makadaot nga mga gawi ngadto sa mga mas maayo. Si Presidente Dallin H. Oaks, Unang Magtatambag sa Unang Kapangulohan, mitudlo: “Ang tinuod nga paghinulsol gikan sa pornograpiya nagkinahanglan og labaw pa kaysa paghunong lang sa paggamit niini. Ang ingon nga paghinulsol nagkinahanglan og kausaban sa kasingkasing pinaagi sa Pag-ula ni Kristo.”
Ang imong kaandam sa pagpakig-date nagdepende sa imong pagkamatinud-anon sa imong kaugalingon. Sama sa gitudlo ni Brother Bradley R. Wilcox, Unang Magtatambag sa Kinatibuk-ang Kapangulohan sa Young Men: “Ang mensahe sa Dios mao nga ang pagkatakos dili ang pagkawalay tatsa. Ang pagkatakos mao ang pagkahimong matinuoron ug mapaningkamoton. Kita kinahanglan nga magmatinuoron sa Dios, mga lider sa pagkapari, ug sa uban kinsa nahigugma kanato, ug kita kinahanglan nga maningkamot sa paghupot sa mga sugo sa Dios ug dili mohunong tungod kay kita nasayop.”
Ayaw padala sa mga bakak sa kaaway nga mas maayo pang moundang sa pagpaningkamot sa pagbuntog sa imong mga gawi tungod kay lisod kaayo kini nga biyaan. Padayon sa pagpangayo og tabang sa Langitnong Amahan ug ni Jesukristo samtang naningkamot ka alang sa mas maayong mga gawi.
3. Nakita ba Nimo nga ang Kaminyoon nagsilbi nga Solusyon sa Problema?
Sa makausa pa, ang pornograpiya dili kanunay usa ka sekswal nga isyu. Mao nga dili ka magdahom nga ang pagminyo ug paghimo og usa ka suod nga sekswal nga relasyon sa imong kapikas mosulbad sa imong mga isyu sa pornograpiya, ilabi na kon wala nimo masulbad ang lintunganay nga mga hinungdan.
Ug kon wala nimo masulbad kini nga isyu sa imong ka-date o kapikas, ang mga tentasyon mas mograbe og maayo tungod sa gihimo nga sekreto. Ang pagpakig-istorya sa imong bishop ug kwalipikado nga mga propesyonal alang sa kahimsog mao ang yawe sa pagsulbad sa imong mga pakigbisog.
4. Nagplano Ka ba nga Mahimong Hingpit nga Matinud-anon ngadto sa Tawo nga Imong Ka-date Karon ug sa Umaabot?
Ang kaaway gusto nga mobati ka og kaulaw, kahadlok, ug pagkawala sa kadasig mahitungod sa imong mga pakigbisog sa pornograpiya. Apan ang pagkamatinud-anon ug pagkamay-tulubagon mao ang pipila sa labing importante nga mga bahin sa bisan unsa nga relasyon. Ang pagkadili matinud-anon o pagtago sa imong mga pakigbisog makadaot lamang kaninyong duha.
Ug kon dili pa ka andam nga manubag o mohimo og mga lakang padulong sa pagkaayo, sama ra nga dili ka pa andam alang sa seryoso nga relasyon. Ang malungtaron nga mga relasyon gitukod sa pagkahuyang, pagsalig, ug pagkaklaro.
“Ang pagbuntog sa makadaot nga mga kinaiya, mga gawi, ug mga pagkaadik usa ka lisod nga proseso, apan ang matag lakang sa unahan usa ka lakang padulong sa pagkaayo,” gitudlo ni Elder Kearon. “Kon ang mga minahal magtinabangay sa usa ka himsog, suportado, ug dili magbasol nga paagi, ang dalan sa pagkaayo mapadali alang sa tanan.”
Ang pag-atubang sa mga hagit nga magkauban—kauban ang tabang sa Manluluwas—motabang nimo nga matukod ang dili matarog nga pundasyon sa imong relasyon sa usag usa ug ngadto Kaniya.
5. Motuo Ka ba nga ang Manluluwas Makatabang Kanimo nga Mausab?
Wala ka mag-inusara sa imong mga pakigbisog sa pornograpiya. Daghang mga young adult ang naningkamot sa pagbuntog sa paggamit og pornograpiya. Kon padayon kang mobalik sa usa ka butang nga mopugong nimo, sayon ra ang paghunahuna nga ang Langitnong Amahan gikapoy na nimo sama sa imong kaugalingon.
Apan, si Elder Kearon mipasalig kanato: “Kon kamo may kalagmitan nga mabalaka nga kamo dili gyod igo, o nga ang mahigugmaon nga walay kinutoban nga Pag-ula ni Kristo maluluy-ong moabot ni bisan kinsa pa, apan dili diha ninyo, nan kamo nasayop sa pagsabot. Ang walay kinutoban nagpasabot nga hangtod sa hangtod. Ang walay kinutoban moabot kanimo ug niadtong imong gihigugma.”
Ayaw pagkawala sa hugot nga pagtuo nga ang Manluluwas makatabang nimo nga mausab pinaagi sa paghinulsol, panahon, pasensya, pagkamatinud-anon, ug kaluoy sa kaugalingon.
Dangop sa Langitnong Amahan pinaagi sa pag-ampo samtang naningkamot ka sa pagpakig-date. Uban ang Manluluwas, ikaw makabaton og pagsalig ug paglaom sa imong abilidad sa pagtukod og malungtaron, matahom nga relasyon ug mahatorong kaminyoon.
Kami nahigugma kanimo. Kami nag-ampo alang kanimo. Hinumdomi nga ang Langitnong Amahan ug si Jesukristo makahimo og mga milagro sa atong kinabuhi. Padayon sa pagpaningkamot ug paglaom, mga higala. Mahimo nimo kini.