5 ka Sugyot nga Nakasentro sa Ebanghelyo sa Pagtabang Nimo nga Magmalamposon sa Imong Karera

Ang personal nga mga pakiglambigit, mga tawag sa telepono, o bisan mga email nakapabalaka kanako. Hinuon, nakahimo kining klaro nga ang maayong pagpakig-istorya maoy labing importante sa usa ka palibot sa trabaho. Kini kinahanglan nga mosulti, mangutana, ug, siyempre, makig-istorya.

Ang parehas nga importante mao ang pagkaepektibo sa imong pagpakig-istorya. Si Presidente Russell M. Nelson miingon, “Ang [Langitnong Amahan] makigsulti sa yano, sa hilom, ug sa labihan kayano nga kita makasabot gayod Kaniya.” Akong nakat-onan nga ang direkta, matinahoron, ug sinsero nga pagpakig-istorya labing maayo diha sa trabahoan.

Ayaw pagpanuko sa pagpakig-istorya sa Langitnong Amahan bahin sa imong trabaho pinaagi sa pag-ampo. Ang Santiago 1:5 nagdapit, “Kon aduna man kaninyoy nakulangan og kaalam, papangayoa siya sa Dios.” Ang pag-ampo nakatabang kanako sa matag aspeto sa akong kinabuhi lakip na ang akong mga paningkamot sa pagtrabaho.

Ang trabaho lisod. Dili kini kanunayng makalingaw, ug panagsa kini mahimong sayon. Tingali makatag-an ka nga ang paglimpyo sa mga kasilyas wala malista sa akong paborito nga mga trabaho (isip pagtahod sa mga janitor nga nagbasa; nahigugma kami ug nagkinahanglan kaninyo), apan nahinumdom ko uban sa pasalamat nga ako kining gibuhat—ug dili lang tungod kay gisweldohan ko.

Ang Dios misaad sa mga Santos didto sa Nauvoo, “Kon maghago kamo sa tibuok ninyong kusog, akong ipahinungod kana nga luna nga kini mahimo nga balaan” (Doktrina ug mga Pakigsaad 124:44). Samtang kini nagpasabot sa pagtukod og templo, pwede usab kining magamit sa trabaho nga atong gibuhat bisan asa.

Nagtuo ko nga ang labing mapuslanon nga mga butang magkinahanglan og paningkamot. Ang paserbisyo og misyon nagkinahanglan og dakong paningkamot, apan mapasalamaton kaayo ko sa kasinatian. Ang romantikong mga relasyon nagkinahanglan og paningkamot, apan mahimong magdala kini og tumang kalipay. Ang mga karera dili lahi. Usahay kinahanglan lang nimong motutok sa imong trabaho aron mahuman kini.

Si Apostol Pablo milista og pailob, o, pagkamainantoson, isip usa ka hiyas sa Espiritu (tan-awa sa Mga Taga-Galacia 5:22). Wala pa ko nakatrabaho sa usa ka dapit nga walay kapakyasan, nag-atubang man og lisod nga mga kauban sa trabaho, pagpangita og direksyon sa mga kapakyasan, o pag-atubang og mga kalangan diha sa pagkab-ot sa mga katuyoan. Ang pagkat-on aron mahiangay sa mga sitwasyon, masaligon nga ang mga butang mahimo ra, ug magpabiling nakatutok sa molungtad og dugay nga panglantaw maoy mahinungdanon sa akong kaugalingong kasinatian sa pagtrabaho.

Ang pagkat-on sa pagdawat og feedback lisod apan gikinahanglan. Ang pagdawat og pagsaway wala magpasabot nga kapakyasan; kini nagpasabot lang nga adunay luna alang sa kalamboan. Ang mga kasulatan puno sa mga ehemplo sa mga tawo nga nagkat-on kon unsaon pagbuhat ug mahimong mas maayo—hunahunaa ang mga Israelita nga naglatagaw sa kamingawan o si Alma nga Batan-on. Tungod kay gihigugma sila sa Ginoo, Iyang gipanton sila ug daghan pang bantogan nga mga lalaki ug mga babaye.

Gihulagway ni Alma ang kasakit nga iyang gibati mahitungod sa iyang mga sala isip “mahangtorong kahasol” (Alma 36:12). Apan iyang gihulagway ang iyang paghinulsol, o kausaban sa kasingkasing, nga nag-ingon “wala nay labaw ka talagsaon ug makapahimuot sama katam-is sa akong kamaya” (Alma 36:21).

Nagtrabaho ko diha sa usa ka lawak sa mga magsusulat sa podcast sa daghang tuig. Kadaghanan sa mga adlaw naglakip sa pagpresentar sa mga draft ug paghisgot kon unsaon kini pagpalambo. Usahay, daw ang mga tawo nagtudlo sa tanang sayop nga akong nahimo. Hinuon, sa paglabay sa panahon, nag-anam ko nga mapasalamaton sa feedback tungod kay kini nakahimo nako nga usa ka mas maayo nga magsusulat ug, mangahas akong moingon, nga tawo.

Ayaw kabalaka kon dugay ang pagpalambo og usa ka karera. Pipila ka tawo ra ang nahimong malamposon sa usa lang ka gabii. Si Nephi mipadayag nga ang Ginoo nagtudlo “pagtulun-an human sa usa ka pagtulun-an, sugo human sa usa ka sugo” (2 Nephi 28:30). Gitudlo ni Alma nga “pinaagi sa gagmay ug yanong mga butang, mahitabo ang dagkong mga butang” (Alma 37:6).

Ang paghimo ug pagpadayon sa takos nga mga tumong usa ka talagsaong paagi sa pag-uswag sa hinay-hinay. Ang nindot nga bahin mao nga ang mga tumong dili kinahanglan nga dagko aron takos nga ipadayon, apan ang atong mga paningkamot kinahanglan nga makanunayon. Si Elder Michael A. Dunn sa Seventy mitudlo, “Ang ginagmay nga mga pag-uswag, kinahanglan nga adunay makanunayon, inadlaw-adlaw nga paningkamot.”

Kanunay kong mabalaka bahin sa paghimo og igong pag-uswag sa akong personal nga kinabuhi ug karera. Apan kon akong hinumdoman, akong makita ang usa ka klaro nga dalan gikan sa usa ka punto ngadto sa sunod, bisan tuod kini dili makita niadtong panahona.

Nasayod ko nga ang Dios mogiya kanato sa atong trabaho kon atong isalig ang atong hugot nga pagtuo diha Kaniya.