Importante nga Tambag sa Pagpangita og Tukmang Tawo nga Minyoan

Ang akong unang tambag nimo mao nga magmaisogon. Maningkamot sa imong kaugalingon nga mopalambo og tinagsa-tagsa nga panaghigalaay. Dili ka maghunahuna nga ang matag panaghigalaay kinahanglang molambo ngadto sa panag-uyab, apan daghan ang madiskobrehan sa tinagsa-tagsa nga pakiglambigit.

Pipila ka tuig ang milabay, si Presidente Dallin H. Oaks, Unang Magtatambag sa Unang Kapangulohan, mihimo niini nga komentaryo: “Motambag kami nga itumong ninyo ang pakig-uban sa lahi nga sekso ngadto sa pakig-date nga may kalagmitang mosangpot sa kaminyoon.”

Si Elder Robert D. Hales (1932–2017) sa kaulahian midugang: “Kon makig-date mo, pagkat-on sa tanan kutob sa inyong mahimo mahitungod sa usag usa. Ilha ang mga pamilya sa usag usa kon mahimo. Ang inyong mga tumong magkauyon ba? Pareho ba mo og pagbati bahin sa mga sugo, sa Manluluwas, sa pagkapari, sa templo, pagkaginikanan, mga calling sa Simbahan, ug sa pagserbisyo sa uban? Inyo bang naobserbahan ang usag usa kon ma-stress, sa ilang reaksyon sa kalamposan ug kapakyasan, pagbuntog sa kasuko, ug sa pag-atubang sa mga problema? Ang tawo ba nga inyong gika-date modaot sa uban o modasig kanila? Ang iya bang kinaiya, sinultihan, ug gawi mao ang ganahan nimo sa tawo nga ikauban kada adlaw?”

Kon ikaw nagtinguha sa pagpalambo sa relasyon lapas pa sa panaghigalaay ngadto sa panag-uyab, importante kaayo nga ang mga balaod sa kalunsay, disiplina, ug kaputli pagasundon.

Nasayod ka nga ikaw adunay kusog nga pisikal nga mga emosyon ug mainitong mga pagbati nga kinahanglang kontrolahon ug mainampingong idumala aron malikayan ang sobra nga panaghalok o bisan unsa nga matang sa dili maayo nga mga paghikap.

Ako mopaneguro nimo isip usa ka Apostol sa Ginoo nga ang pagpangatarongan sa imong kaugalingon nga tungod kay mibati ka og labihan nga pagpangga alang sa usag usa ug misangpot sa dili tukma nga hapit na malapas ang balaod sa kaputli dili makatabang nimo sa labing importante nga espirituwal nga pagpili nga imong gipangandoy nga himoon. Ang imong hunahuna, imong kasingkasing, ug imong espirituwal nga mga pagbati makompromiso.

Paghimo og inyong mga limitasyon. Lig-ona pagpahimutang kadto nga mga limitasyon diha sa tanan ninyong buhaton nga manag-uban, aron kini dili malapas o mabaliwala samtang gibati ninyo ang kusog nga emosyon alang sa usag usa.

Sunod, ayaw kahadlok nga mamasin sa usa ka tawo nga tingali dili klaro nga pilion. Sa dihang si Kathy ug ako nagsugod sa pag-ilaila sa usag usa, alang nako dili lang siya ang tawo nga adunay lawom kaayo nga pagtuo ug salabotan, apan prinsesa usab siya sa Florida. Nagsul-ob siya og nindot nga mga sinina ug may pagka-sosyal. Ako usa ka mag-uuma. Gikan ko sa gamayng umahan nga gatasan.

Mao nga si Kathy namasin nako. Segurado ko nga ang akong kagikan lahi kaysa iyang gihunahuna nga mamahimo niyang potensiyal nga bana. Dili lamang kita makighimamat niadtong sama lamang nato og kagikan. Motan-aw kita sa mas halawom ug mas dugang pa ngadto sa kon si kinsa sila karon ug kon si kinsa sila mamahimo sa umaabot.

Ganahan ko niining kinutlo ni Presidente David O. McKay (1873–1970), kinsa mao ang propeta sa Ginoo dinhi sa yuta sa dihang misulod ko sa akong unang tuig sa unibersidad. Nagsulti ngadto sa kalalakin-an, siya miingon:

“Kon kamo makahimamat og usa ka babaye kansang presensya moimpluwensya kaninyo sa pagtinguha sa pagkab-ot, nga modasig ninyo sa paghimo sa inyong labing maayo, ug sa paghimo sa labing maayo nga bersiyon sa inyong kaugalingon, ang ingon nga batan-ong babaye takos sa inyong gugma. …

“… Sa iyang presensya dili kamo magtinguha sa pagpahimulos niya; sa iyang presensya bation ninyo nga gusto kamo nga mahimo sa tanan nga gusto [ninyo] nga mamahimo, kay siya modasig ninyo niana nga maayo.”

Adunay upat ka pulong nga gusto nako nga imong hinumdoman: hingpit nga pagkamatinuoron, dili hinakog nga pagkamapainubsanon.

Si Presidente Jeffrey R. Holland, Akting nga Presidente sa Korum sa Napulog Duha ka Apostoles, miingon, “Ang tinuod nga gugma mamuswak kon mas panggaon nato ang usa ka tawo kay sa atong kaugalingon.”

Samtang naglambo ka sa imong pagkig-date ngadto sa seryoso nga pagkonsiderar sa pagpakigbahin sa inyong kinabuhi nga manag-uban, ipakigbahin ang imong labing pribado nga mga hunahuna, imong mga pangandoy, ug imong mga kahadlok. Isulti nimo si kinsa ka karon, kinsa ka kaniadto, ug unsa ang gusto nimo nga ikaw mamahimo sa umaabot. Hingpit nga pagkamatinuoron ug dili hinakog nga pagkamapainubsanon.

Kon ikaw nanglimbasog sa pornograpiya karon o nanglimbasog sa kanhi, ang tawo nga nagkonsiderar nimo isip mahangtoron nga kapikas kinahanglang masayod mahitungod sa imong hagit ug kon giunsa nimo kini pag-atubang. Kon naglisod ka sa ubang adiksyon, pagsunod sa balaod sa kaputli, pagpamakak, o pagpangawat, ang pagkamapainubsanon ug pagkamatinud-anon moaghat nimo nga ihatag sa tawo nga imong gihigugma ang oportunidad sa pagtimbang-timbang sa espirituwal ug mainampoong paagi sa mga pagpili bahin sa pagpadayon, sa dili pa dawaton ug ipahibalo ang tanyag nga makigminyo.

Ang tanan ba nga nahitabo kaniadto kinahanglan nga isulti? Gamita ang imong kaalam ug maayo nga paghukom. Kon gikuha nimo ang bubblegum ni Nancy sa iyang lingkoranan niadtong grade six pa nga wala mananghid niya, kana nga hilisgotan mahimo rang kalimtan. Apan kon ikaw nakasinati og duha ka tuig nga panglimbasog sa pornograpiya, nan mas importante kana.

Ang mahunahunaon nga paagi mao ang pagpangutana sa imong kaugalingon kon unsa ang imong gusto nga mahibaloan kon ikaw ang anaa sa lugar sa imong kompanyon, mainampoong mangandam sa paggahin sa imong kinabuhi uban sa usa ka tawo nga imong gihigugma.

Ang usa ka butang nga dugay nang nahitabo tingali mas sayon masabtan ug dili ra makamugna og babag. Kon ang problema o kahuyang o sala bag-ohay lang, mahimo kining maoy hinungdan alang sa lain nga mohuyang sa relasyon ug nagkinahanglan pa og dugang nga panahon ug dugang nga kasinatian sa paghukom kon siya andam na ba sa pagpadayon. Tingali magkinahanglan kini og dugang nga pag-ampo, mga panaghisgot uban sa mga ginikanan ug kasaligan nga mga lider, ug dugang nga kasinatian uban sa tawo nga imong gipangandoy nga imong makauban sa kahangtoran.

Kinahanglan nga atong hinumdoman nga walay usa nga hingpit. Kitang tanan nakahimo og mga sayop. Samtang ang tawo nga imong gihigugma matinuoron nga nakigsulti nimo, respetoha ang kaisog nga iyang gipakita. Kon adunay butang nga klarong nahitabo kaniadto, ibutang sa imong kasingkasing kini nga kasulatan: “Siya nga naghinulsol sa iyang mga sala, siya pasayloon, ug ako, ang Ginoo, dili na mahinumdom pa niini” (Doktrina ug mga Pakigsaad 58:42).

Gikutlo nako pag-usab si Presidente Holland: “Walay seryoso nga pagpangulitawo o pagkasinayoran o kaminyoon ang angayan sa ngalan kon kita dili hingpit nga mohatag sa tanan nga anaa nato diha niini ug sa pagbuhat sa ingon hingpit nga isalig ang atong kaugalingon ngadto sa tawo nga atong gihigugma.”

Hingpit nga pagkamatinuoron, dili hinakog nga pagkamapainubsanon.