Mahinungdanong mga Paagi sa Pag-ugmad og Kristohanong mga Koneksiyon sa mga Pakigrelasyon

Ayaw Pagsalig sa Peke nga Koneksiyon

Ang kasuod mahitabo kon ang mga tawo mobati nga gihigugma, gisabot, ug konektado sa usag-usa sa halawom, tinuod nga lebel. Sa kalibotan nga puno sa daghan kaayong pagsulbong sa teknolohiya, maingon og mas konektado kita kay sa kaniadto. Sa ilawom niana hinuon, ang nagkadaghang panahon nga igahin diha sa mga screen tingali mobabag sa atong koneksiyon ngadto sa uban.

Daghan sa mga young adult nakigbisog sa paggamit sa pornograpiya, diin, kon mapasagdan nga dili matagad, makamugna og mga babag aron makapalambo og tinuod nga kasuod ngadto sa uban. Ang artificial intelligence nahimo usab nga himan dili lang para sa impormasyon apan usab alang sa hinimohimo nga mga koneksiyon. Ang ubang mga young adult mopeke sa ilang mga pagbati sa pagkahisakop pinaagi sa paggahin sa ilang panahon sa pagkumpara sa ilang mga kaugalingon ngadto sa tig-impluwensiya sa social media o aron makasunod sa uso sa pagpatahom ug sa mga estilo sa kinabuhi. Ang pipila migahin og sobrang mga oras sa mga basahon, mga video game, o sa telebisyon, sa paghanduraw og mga koneksiyon kauban sa pekeng mga tawo nga nagbaton og dili tinuoray nga mga relasyon. Ang uban basta lang ilayo ang ilang kaugalingon ug pulihan sa kalibotanong mga kahupayan ang tinuoray nga kasuod, molikay sa mga pakig-inter-aksiyon sa tinuod nga mga tawo kutob sa mahimo.

Si Elder David A. Bednar sa Korum sa Napulog Duha ka Apostoles mipahimangno sa mga young adult mahitungod sa mga peligro sa pagpakabuhi sa digital nga kalibotan, pinaagi sa pag-ingon nga, “Ang peke nga emosyonal nga pagkasuod mahimong mopuli sa tinuod nga emosyonal nga pagkasuod sa kinabuhi—sa butang mismo nga nagbugkos sa duha ka tawo.”

Subo lang, ang kaaway mohimo sa pag-inusara nga ingon og mas maagnihon kay sa koneksiyon—mas sayon nga ipadayon ang karaang mga kinaiya kay sa mohimo og mga lakang sa pag-usab ug paglig-on sa mga relasyon. Nasayod siya nga ang manggiloy-on, tinuorayng mga relasyon tali sa mga higala, pamilya, mga lider, ug mga kapikas makatabang nato aron mobati nga mas konektado ngadto sa usag usa ug sa putli nga gugma ni Jesukristo.

Si Elder David L. Buckner sa Seventy mipamatuod: “Kaigsoonan, kinahanglang mohunong kita sa pagpangita og mga rason sa panagbahin kondili sa pagpangita og mga oportunidad nga “magkahiusa’ [Doktrina ug mga Pakigsaad 38:27]. [Ang Manluluwas] mipanalangin kanato og talagsaong mga gasa ug mga hiyas nga nagdapit sa pagkat-on sa usag usa ug personal nga kalamboan. … Ang pagkabahin-bahin ug ang pagbuntog mao ang plano sa kaaway sa pagguba sa mga panaghigalaay, mga pamilya, ug sa pagtuo. Ang Manluluwas mao ang naghiusa.”

Unsa man ang atong pilion nga atong gahinan sa oras, enerhiya, o tutokan maoy magtino sa ganti nga atong maani.

Diha sa Daang Tugon, si propeta Hageo mitudlo, “Nagapugas kamo og daghan, ug diyutay ra ang naani ninyo; kamo nagakaon, apan kamo wala makabaton og igo; kamo nagainom, apan kamo wala matagbaw sa ilimnon; kamo nagasapot sa inyong kaugalingon, apan walay usa nga nainit; ug kadtong nagadawat sa suhol, nagadawat sa suhol nga isulod sa puntil nga may mga buslot” (Hageo 1:6).

Kon gahinan nato og daghang panahon ang bisan unsa nga magmugna og peke nga koneksiyon, sama kini sa pagkadawat og suhol nga gisulod nato sa usa ka puntil nga may mga buslot. Wala kay makuha nga bisan unsang kaayohan agig balos. Walay bunga nga mosulod diha niini. Naningkamot kita sa pagtukod og usa ka pagkasuod ngadto sa butang o tawo nga wala diha, nga nagmugna og mga babag sa pagtukod og tinuod nga koneksiyon ug kasuod ngadto sa uban.

Ang kalagmitan nga sulbad gihatag gikan sa Ginoo, dili lamang sa makausa, apan makaduha: “Hunahunaa ang inyong kahimtang” (Hageo 1:5, 7).

Sugdi sa gagmayng mga tumong. Pahawa diha sa kompyuter, sa mga dula [gaming system], sa selpon, ug igahin ang matag adlaw diha sa Pulong! Mitudlo si Juan, “Sa sinugdan mao ang Pulong, ug ang Pulong uban sa Dios, ug Dios ang Pulong” (Juan 1:1). Paliboti ang imong kaugalingon kang Jesukristo. Siya mao ang Pulong!

Dugang pa, human ang Ginoo mihatag og tambag nga “hunahunaa ang inyong kahimtang,” gidapit Niya ang Iyang katawhan sa pagtukod og balay sa Ginoo: “Tungas kamo sa kabungtoran ug pagkuha kamog kahoy nga itukod pag-usab sa akong Templo aron ako malipay ug ipakita ko kaninyo ang akong himaya.” nag-ingon ang Ginoo” (Hageo 1:8).

Kon nagkinahanglan ka og pagdasig sa pagkonekta ngadto sa Dios ug sa uban, pangayo og tabang sa Langitnong Amahan. Samtang magtubo ka sa kasuod ug koneksiyon sa Dios, ang imong kapasidad sa pagsinati og gugmang putli sa kaugalingon nimong kinabuhi ug sa imong pakigrelasyon mas molawom.

Ang pagpalambo og emosyonal ug espirituhanong kasuod sa usa ka relasyon nagkinahanglan og matinuorong mga diskusyon mahitungod sa usa ka malagmit lisod nga hilisgotan: ang atong kaugalingon.

Ang pagpakigbahin sa atong mga panlimbasog, mga kahuyang, mga tinguha, mga interes, ug mga pagbati magkinahanglan og pag-antos ug kaisog. Apan adunay labing una nga babag nga magpugong kanato sa tinuorayng paghisgot mahitungod niining mga matang sa isyu:

Garbo.

Pagbati kini nga dili kita dili makatugot nga ipakita ang tinuod nato nga pagkatawo basin unsay mahunahuna sa uban. Higugmaon ba kaha kita, o isalikway ba kita? Ang pagkompara ngadto sa uban mokawat sa atong kalipay.

Ang pagbati nga masakitan, kaaghop ug ang pagkasinsero mosangpot sa naglambo nga pagsalig, ug kasuod sa mga relasyon. Ang pagpakigbahin og sensitibong mga emosyon mabatyagan nga sama sa usa ka risgo, apan gipanalipdan nato ang atong garbo kon kita dili mopakigbahin sa mga pagbati diha sa atong mga relasyon.

Nagkinahanglan kita og pagpaubos.

Unsaon nato sa pagdapit og mas halawom nga pagpaubos sa atong kinabuhi?

Barog sa balaan nga mga dapit. Pakig-uban sa balaang mga tawo. Pag-anad sa paghimo og balaang mga buhat.

Ang pipila sa labing nindot, labing makakonektar sukad nga mga pagpakigsulti sa akong asawa nga si Amy, mao kadtong didto sulod sa celestial nga lawak sa templo. Mas labihan ang akong ka-emosyonal kon naa ko sa mga dapit diin ang Espiritu makapuyo.

Si Presidente Russel M. Nelson mihatag niini nga saad: “Ang matag sinsero nga tigpangita ni Jesukristo makakaplag Kaniya sulod sa templo. Mabati ninyo ang Iyang kaluoy. Makakaplag kamo og mga tubag sa inyong labing makabalaka nga mga pangutana. Mas masabtan ninyo ang hingpit nga kalipay sa Iyang ebanghelyo.”

Kon unahon nato ang pag-adto sa dapit diin ang Espiritu mohikap sa atong mga kasingkasing, sama sa templo, sa institute, o sa ppanagtigom alang sa sakramento, magsugod kita sa pagtinguha sa pagpaubos, magsugod kita sa pagtinguha nga makigsuod sa Dios ug sa pag-angkon og mas halawom, makakonektar nga mga pagpakighinabi.

Mosaad ko nga Siya molig-on kanimo kon ikaw magmatinuoron ngadto sa imong mga ika-date mahitungod sa milabayng mga panlimbasog o lisod nga mga kinaiya, paggamit og pornograpiya o dili maayong pagdumala sa pinansiyal, truma o pag-abuso. Mogiya Siya kanimo ngadto sa makasuportang mga higala ug mga mentor nga imong kasultihan sa imong mga pangutana mahitungod sa ebanghelyo, mga panlimbasog sa mental nga kahimsog, o mga pagbati nga nag-inusara.

Sigon sa gitudlo ni Elder Joseph W. Sitati, emeritus nga General Authority Seventy, “Uban sa kinaiya sa kamapainubsanon posible gayod ang pagkaila ug paghigugma sa Dios nga Amahan sa tibuok natong pagkatawo ug sa paghigugma sa uban sama sa atong kaugalingon, sa walay pagpanagana,”

Magtinguha sa Pagbalanse ug sa Pagkakompleto

Pipila ka butang nga sagad nakong makita diha sa mga young single adult mao ang kahadlok nga basin dili sila maminyo. Isip resulta, ang ilang uban nga espirituwal, intelektuwal, pisikal, ug sosyal nga mga tumong dili na maoy prayoridad, ug daghan ang nagdalidali sa pagpakigrelasyon ug pagpakigminyo nga walay paggahin og panahon aron ikaila sa tinuoray ang usa ka tawo ug makapalambo og espirituwal ug emosyonal nga kasuod diha kanila.

Nakasulay ka na ba sa imong kaugalingon nga nakig-date tungod kay nabalaka? Nakasabot ko unsa ka makahahadlok ang wala mahibaloi nga umaabot. Alang niadtong mibati og kahadlok, si Santiago mitambag:

“Ipha kining tanan nga hingpit nga kalipay kon kamo mahulog ngadto sa daghan nga mga kasakit;

“Kay nasayod kamo nga ang inyong pagtuo gisulayan lamang aron kamo mahimong malahutayon.

“Paniguroa nga ang inyong pagkamalahutayon mahingpit aron mahingpit gayod kamo ug dili makulangan sa bisan unsa” (Hubad ni Joseph Smith, Santiago 1:2 Santiago 1:3–4).

Ang hubad sa Griyego sa hingpit mao ang “hingpit” o “kompleto.” Hunahunaa kon sa unsang paagi kana nakausab sa kasulatan: Tugoti ang pailob magbaton sa iyang hingpit nga buhat, nga siya mahimong hingpit ug tibuok.

Mahimo ra natong dawaton ang unsay dili nato makontrol ug itugot nga ang pagpailob mohimo sa iyang hingpit nga buhat.

Ang pagpakasal sulod sa templo ug ang pagbaton og pamilya maoy makahuloganong mga tumong, apan ikaw kinahanglan usab nga dunay mga tumong ug mga plano nga dili apektado sa romantiko nga pakigrelasyon. Ang pakigrelasyon mahimong mas balaan kon ikaw mopadayon sa ubang mga tumong sa kinabuhi, ilabi na kon maglakip kini sa pag-awhag og mas lawom nga mga koneksiyon ug kapasidad sa emosyonal nga kasuod ngadto sa mga higala ug pamilya, sa Langitnong Amahan, ug kang Jesukristo.

Si Jesus nagtudlo diha sa mga kasulatan, “Busa unaha ninyo ang pagpasakop sa paghari sa Dios ug ang pagtuman sa iyang kabubut-on, ug ihatag gayod niya ang tanan ninyo nga mga gikinahanglan” (Mateo 6:33).

Usahay ipakaubos ra nato kini nga saad.

Kinahanglan nga unahon nato sa pagpangita ang Dios. Kon pangitaon nato Siya, mahatod kita ngadto sa uban kinsa usab nangita Kaniya. Mahinungdanon kini alang sa pagpalambo og lig-on, malungtaron nga panaghigalaay ug mga kaminyoon.

Ang espirituhanong mga butang kinahanglang maoy mopatigbabaw sa atong mga hunahuna, ang ngalan sa Manluluwas duol sa atong mga ngabil.

Si Presidente M. Russell Ballard (1928–2023) mipamatuod: “Akong nakat-onan nga ang labing mahinungdanon mao ang atong mga relasyon ngadto sa Langitnong Amahan ug sa Iyang Hinigugma nga Anak, atong mga pamilya, ug atong mga silingan, ug pagtugot sa Espiritu sa Ginoo nga mogiya kanato niana nga mga relasyon aron kita makapamatuod sa mga butang nga labing mahinungdanon ug molungtad sa labing taas nga panahon.”

Nagkinahanglan kita sa usag usa. Ug pinaagi sa atong mga koneksiyon, makatabang kita sa usag usa sa pagduol kang Jesukristo.

Ang atong koneksiyon kang Jesukristo mao ang yawe sa pag-usab sa atong naandang mga lihok, atong mga kinaiya, ug sa atong kaandam sa mas lawom nga pagkonektar ngadto sa mga nagpalibot kanato. Samtang atong mahatagan og prayoridad ang atong relasyon Kaniya, mahimo ra natong ipakita sa hingpit ang atong tinuod nga kaugalingon ug magtukod og tinuod nga kasuod ug makahuloganong mga relasyon nga mopabuhong sa atong kinabuhi inubanan sa molahutay nga kalipay ug gugma.