Unsa Kaha Kon Dili Ko Mobati og “Kaibog” sa Unang Pakig-date?

Aron mahatagan kamo og gamay nga kahibalo sa panghitabo, ang akong umaabot nga bana ug ako nagkahimamat sa dihang nagserbisyo siya sa iyang misyon sa among ward. Katuigan ang milabay, mikontak siya pinaagi sa social media. Nagteksanay kami ug nag-video call, apan nagpuyo siya sa lahi nga isla layo nako, mao nga lisod ang pakigkita sa personal.

Sa dihang sa kataposan nagkita kami aron opisyal nga mag-date, nagkaistorya na kami hapit usa ka tuig, ug daghan kami og mga gidahoman nga padulngan niining unang pakig-date.

Apan wala pa kami magkita sa personal sulod sa katuigan, ug sa pagkatinuod, kaming duha mibati og kakiwaw.

Ang mga butang dili ingon kanindot o kahinam sama sa among gilaoman. Mao nga sa akong pagpauli, tungod kay na-busy ko sa akong bag-ong trabaho ug siya nagkapuliki sa kinabuhi isip usa ka estudyante sa pagkadoktor, ang among komunikasyon naputol. Walay talagsaong koneksiyon, nganong maghasol-hasol pa man ko?

Tulo ka tuig ang milabay, ug nahitabo nga siya naghimo sa iyang pagpraktis sa pagkadoktor sa dapit nga mga duha ka oras ang gilay-on gikan sa akong gipuy-an—duol kaayo nga anaa na kami sa samang utlanan alang mga komperensiya sa YSA.

Kahibalo ko nga ingon og dili kini katuohan, apan samtang naglingkod ko sa luyo sa usa sa mga komperensiya, naglantaw-lantaw ko ug nakita nako siya. Ug kalit lang, siya lamang ang akong nakita, ug akong gibati kini nga impresyon gikan sa Espiritu:

“Siya ang tukma nga tawo.”

Unsa?

Naglingkod ko didto, nakalitan. Nganong karon pa man nako madawat kini nga tubag—human sa katuigan nga milabay? Ug unsa man ang angay nakong buhaton niini?

Ang nahitabo, bisan pa og ang tubag klaro ug milagroso, kinahanglan gihapon kami nga magkailhanay sa usag usa. Mihangyo siya nako nga makig-date pag-usab; akong gidawat. Dayon nagpadayon kami sa daghang pakig-date. Ug samtang migahin kami sa among mga kaugalingon og panahon aron magkailhanay sa usag usa imbes magsalig sa dinalian nga koneksiyon, kami nakapalambo og usa ka butang nga lawom ug tinuod.

Unya unsa man ang mahitungod nianang pagbati og kaibog?

Nganong wala man kadto sa unang higayon?

Kon ikaw wala mobati og kaibog sa unang pakig-date, nagpasabot ba kana nga bisan unsa nga potensiyal nga relasyon sa panag-uyab walay kaibog?

Kining tanan maayo nga mga pangutana. Ug ako walay mga tubag niining tanan. Apan ania ang pipila ka dugang nga mga pangutana nga angay hunahunaon kon interesado ka sa usa ka tawo apan wala gayod mobati og dihadiha nga koneksiyon:

• Kini ba nga tawo nag-aghat o nagdasig nako nga mahimong labing maayo nga bersiyon sa akong kaugalingon?

• Kahibalo ba ko kon unsay gayod ang akong gipangita sa usa ka kapikas?

• Kahibalo ba ko sa akong tinuod nga bili isip anak sa Dios? Ug kini nga tawo miila ba sa akong bili?

• Nangayo ba ko og kompirmasyon sa Espiritu nga kini usa ka maayo nga tawo alang nako aron makig-date?

Si Elder Gerrit W. Gong sa Korum sa Napulog Duha ka Apostoles mitudlo: “Magmahimong sama nianang imong gipangita. Pangita og usa ka tawo nga imong ikadungan sa paglambo. Ang pagdungan sa paglambo nagpasabot nga ang matag usa ninyo molambo isip indibidwal sa espirituwal, sa intelektuwal, sa sosyal nga paagi. Apan ang pagdungan sa paglambo nagpasabot usab nga inyong tumanon ang inyong hingpit nga potensiyal samtang kamo nagdungan sa paglambo isip magtiayon ug isip pamilya.

Dili nako ipakaubos ang tinguha sa kaibog ug pagkatukma ngadto sa imong kapikas. Siyempre mangita ka og usa ka tawo nga sa imong hunahuna makapainteres, mabination, matahom, makalingaw, bisan unsa nga mga kinaiya nga sa imong pamati makahimo sa kinabuhi diha sa dalan sa pakigsaad nga mas malipayon ug mas maanindot.

Apan kon imong nakita ang imong kaugalingon nga matinguhaon nga nag-analisar sa matag detalye sa unang pakig-date, naghunahuna kon gibati ba nimo ang “husto” nga mga butang ug kon unsay ipasabot niining tanan, hinumdomi nga “Kay ang Espiritu nga gihatag sa Dios kanato wala maghimo kanatong talawan kondili naghatag kanatog gahom ug gugma ug pagpugong sa kaugalingon” (2 Timoteo 1:7). Kon ikaw misalig nga ikaw adunay maayo nga panghunahuna ug makadawat og personal nga pagpadayag, mahimo ka nga mohunong og kadali, sabton og maayo ang imong mga pagbati, ug mogahin og panahon nga imong gikinahanglan aron modesisyon kon nakita ba nimo ang umaabot uban sa usa ka tawo.

Ang matuod, tinuod nga gugma labaw pa gayod kaysa kaibog.